ປູກຈິດສຳນຶກ ຢຸດການຊື້-ຂາຍສັດປ່າ

ພິທີ​ປະກາດ​ການ​ນຳ​ໃຊ້​ປ້າຍໂຄສະນາ​ຢຸດ​ການຊື້-ຂາຍສັດປ່າ ​ສປປ ລາວ ຂຶ້ນ​ວັນ​ທີ 11 ສິງຫາ 2017 ນີ້ ທີ່​ສະໜາມ​ບິນ​ສາກົນ​ວັດ​ໄຕ ໂດຍ​ມີ​ທ່ານ ຄຳ​ພຸດ ພັນ​ດາ​ນຸ​ວົງ ຫົວໜ້າ​ກົມ​ປ່າໄມ້ ມີ​ຮອງ​ກົມ​ປ່າໄມ້ ມີ​ຕາງໜ້າ​ຈາກຫ້ອງການ​ກອງ​ທຶນ​ປົກ​ປັກ​ຮັກສາສິ່ງແວດລ້ອມ ກົມ​ກວດກາ​ປ່າໄມ້ ກອງ​ຄຸ້ມ​ຄອງ​ສະໜາມ​ບິນ​ວັດ​ໄຕ ດ່ານ​ພາສີ​ປະຈຳ​ສະໜາມ​ບິນວັດ​ໄຕ ຕາງໜ້າ​ຕຳຫຼວດ​ດ່ານ ​ຕມ ເຈົ້າ​ໜ້າທີ່​ກັກ​ກັນພືດ ອົງການຈັດຕັ້ງ​ສາກົນ ແລະ ເຈົ້າໜ້າທີ່​ກອງ​ກວດກາ​ປ່າໄມ້ນະຄອນ​ຫຼວງ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ ທອງ​ພັນ ລັດຕະນະ​ລັງສີ ຮອງ​ຫົວໜ້າ​ກົມ​ກວດກາ​ປ່າໄມ້ ກ່າວ​ວ່າ: ການ​ເປີດ​ນຳ​ໃຊ້​ປ້າຍຢຸດການ​ຊື້-ຂາຍ​ສັດປ່າ ​ສປປ ລາວ ຄັ້ງ​ນີ້ ແມ່ນ​ໄດ້​ຕັ້ງ​ຢູ່ 2 ຈຸດ ຄື: ຈຸດ​ທີ 1 ຕັ້ງ​ຢູ່​ສະໜາມ​ບິນ​ສາກົນ​ວັດ​ໄຕ ແລະ ຈຸດ​ທີ 2 ຕັ້ງ​ຢູ່ດ່ານ​ຂົວ​ມິດຕະພາບ ລາວ-ໄທ 1 ເຊິ່ງ​ເປັນ​ການ​ສ້າງ​ຄວາມ​ເຂັ້ມແຂງ​ໃນ​ການ​ບັງຄັບ​ໃຊ້​ກົດໝາຍວ່າ​ດ້ວຍສັດ​ນ້ຳ-ສັດປ່າ (LENS2) ໃຫ້ການ​ສະໜັບ​ສະໜູນ​ລັດຖະບານແຫ່ງ ​ສປປ ລາວ ເພື່ອ​ຕ້ານ ແລະ ສະກັດ​ກັ້ນການ​ລັກລອບ​ຄ້າ-ຂາຍ​ສັດປ່າຂ້າມ​ຊາດ ໂດຍ​ປະຕິບັດ 3 ກິດຈະ​ກຳ ຄື: ສ້າງ​ຍຸດ​ທະ​ສາດ​ມາດຕະ​ຖານ​ກ່ຽວ​ກັບ​ການຈັດຕັ້ງ​ປະຕິ​ບັດ ​ເຄືອ​ຂ່າຍ​ບັງຄັບ​ໃຊ້​ກົດໝາຍວ່າ​ດ້ວຍ​ສັດ​ນ້ຳ-ສັດປ່າ ​ສປປ ລາວ ຊຸກຍູ້​ນຳພາ​ອົງການສືບສວນ-ສອບ​ສວນ​ຂອງ​ເຈົ້າໜ້າທີ່ ​ເພື່ອ​ດຳເນີນ​ການຈັດຕັ້ງປະຕິບັດ​ກົດໝາຍ​ວ່າ​ດ້ວຍ​ສັດນ້ຳ-ສັດປ່າ ​ສປປ ລາວ ແລະ ສົນທິ​ສັນຍາ​ສາກົນ CITES ທີ່​ລັດຖະ​ບານ​ໄດ້​ລົງ​ນາມ​ການ​ຄຸ້ມຄອງ​ບໍລິຫານ​ໂຄງການ​ຍ່ອຍ ແລະ ການ​ສ້າງ​ຄວາມ​ອາດ​ສາມາດ​ໃຫ້​ເຈົ້າ​ໜ້າທີ່​ປ່າໄມ້ ແລະ ທີມ​ງານ​ເຄືອ​ຂ່າຍ​ບັງຄັບ​ໃຊ້​ກົດໝາຍວ່າ​ດ້ວຍສັດ​ນ້ຳ-ສັດປ່າ ​ສປປ ລາວ.

ການຈັດຕັ້ງ​ປະຕິບັດ​ແມ່ນ​ການປະສານ​ງານ ແລະ ການ​ຮ່ວມ​ມືກັບ​ອົງການ​ສືບສວນ-ສອບ​ສວນຂອງ​ເຈົ້າ​ໜ້າທີ່​ຂອງ​ລັດ​ ທີ່​ໄດ້​ລະບຸໃນ​ກົດໝາຍ​ວ່າ​ດ້ວຍ​ການ​ດຳເນີນ​ຄະດີ​ອາຍາ​ສະບັບ​ປັບປຸງ​ໃໝ່ຈາກ​ສະພາ​ແຫ່ງ​ຊາດ ​ໃຫ້​ມີຄວາມ​ເຂັ້ມ​ງວດ​ເທື່ອ​ລະ​ກ້າວ ການ​ສະກັດ​ກັ້ນ​ການ​ຄ້າ-ຂາຍສັດປ່າ ຊິ້ນ​ສ່ວນ​ຂອງ​ສັດປ່າ​ທີ່​ຜິດກົດໝາຍ ໂດຍ​ສະເພາະ ການ​ຄ້າຂາຍ​ຊະນິດ​ພັນ​ສັດປ່າ​ທີ່​ໃກ້​ຈະສູນພັນໃນ ​ສປປ ລາວ ແລະ ສາກົນ​ລະຫວ່າງ​ຊາດ ເຊັ່ນ: ສັດລ້ຽງ​ລູກ​ດ້ວຍ​ນ້ຳ​ນົມ​ຂະໜາດໃຫຍ່​ປະເພດ ເສືອ ຊ້າງ ທະນີ ລີງ ສັດລ້ຽງ​ລູກ​ດ້ວຍ​ນ້ຳ​ນົມ​ຂະໜາດນ້ອຍ ໂຕ​ລິ່ນ ສັດ​ເລືອ​ຄານປະເພດ ເຕົ່າ ງູ​ສິງ ງູເຫຼືອມ ງູ​ເຫົ່າ ງູຈົງອາງ ແລະ ພັນ​ພືດ​ປ່າ​ຊະນິດຕ່າງໆ​ທີ່​ໃກ້​ຈະ​ສູນພັນ ທັງ​ນີ້ ເປັນການ​ປູກ​ຈິດ​ສຳນຶກ ໃນ​ການ​ສະກັດ​ກັ້ນ​ການ​ຄ້າ-ຂາຍ​ສັດປ່າ​ທີ່ຜິດ​ກົດໝາຍ ທາງ​ພາກສ່ວນ​ທີ່ກ່ຽວຂ້ອງ​ຈຶ່ງ​ປະກາດ​ນຳ​ໃຊ້​ປ້າຍໂຄສະນາ​ຢຸດ​ການຊື້-ຂາຍສັດປ່າ ​ສປປ ລາວ ຢ່າງ​ເປັນ​ທາງການ ເພື່ອ​ເຜີຍແຜ່​ເຂົ້າ​ໃນ​ວຽກງານ​ການ​ຮ່ວມ​ມື ເພື່ອ​ສະກັດ​ກັ້ນການ​ລະເມີດ​ຕໍ່​ກົດໝາຍ​ວ່າ​ດ້ວຍປ່າໄມ້ ແລະ ກົດໝາຍ​ວ່າ​ດ້ວຍສັດ​ນ້ຳ-ສັດປ່າ ໃຫ້​ມີ​ປະ​ສິດທິພາບ​ສູງ​ສຸດ.