ປະຊາຊົນຮຽກຮ້ອງມາຍັງພາກລັດ ຊ່ວຍແກ້ໄຂຜົນກະທົບດູດຫີນ-ດູດຊາຍຢູ່ບ້ານຫ້ວຍຫ້ອມ

619 15 ສ.ຫ. 2017 ຂ່າວໜ້າ​ໜຶ່ງ
ປະຊາຊົນຮຽກຮ້ອງມາຍັງພາກລັດ ຊ່ວຍແກ້ໄຂຜົນກະທົບດູດຫີນ-ດູດຊາຍຢູ່ບ້ານຫ້ວຍຫ້ອມ

ປະຊາຊົນ​ບ້ານ​ຫ້ວຍ​ຫ້ອມ ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ໄດ້​ຮຽກຮ້ອງ​ມາ​ຍັງພາກສ່ວນ​ກ່ຽວຂ້ອງ​ຂອງ​ລັດ ຊ່ວຍ​ມາ​ແກ້​ໄຂ​ກິດຈະການ​ດູດຫີນ-ດູດ​ຊາຍຂອງ​ບໍລິສັດ ແກ້ວຈະເລີນ ຢູ່​ບ້ານ​ຫ້ວຍ​ຫ້ອມ ໃຫ້ດ່ວນ ເນື່ອງ​ຈາກ​ປະຊາຊົນ​ຫຼາຍຄອບຄົວ​ໄດ້​ຮັບ​ຜົນ​ກະທົບ​ຕໍ່​ການດຳລົງ​ຊີວິດ ຍ້ອນ​ກິດຈະການຂອງ​ບໍລິສັດ​ຕັ້ງ​ຢູ່​ເຂດ​ຊຸມ​ຊົນໃກ້ກັບ​ເຮືອນ​ປະຊາຊົນ.

ພໍ່​ວຽງ ຊາ​ມົນຕີ ແລະ ທ້າວ ເພັດ​ສະໝອນ ພູນ​ສະຫວັນ ໜຶ່ງໃນ​ຄອບຄົວ​ປະຊາຊົນ​ບ້ານ​ຫ້ວຍຫ້ອມ ທີ່​ມີ​ເຮືອນ​ຕັ້ງ​ຢູ່​ຕິດ​ກັບ​ກິດຈະ​ການ​ດູດ​ຫີນ-ດູດ​ຊາຍ​ຂອງບໍລິ​ສັດ ແກ້ວ​ຈະເລີນ ໄດ້​ໃຫ້​ສຳພາດ​ວັນ​ທີ 13 ສິງຫາ 2017 ວ່າ: ສຳລັບ​ຜົນ​ກະທົບ​ໂດຍ​ກົງ​ແມ່ນມີ​ຂີ້ຝຸ່ນ ຂີ້​ຊາຍ​ປິວ​ເຂົ້າ​ມາ​ໃນເຮືອນ ມີ​ສຽງ​ລົດ​ດ້າມ​ໃນ​ເວລາແກ່​ຫີນ-ແກ່​ຊາຍ​ແລ່ນ​ເຂົ້າ-ແລ່ນ​ອອກ​ເປັນ​ປະຈຳ ແລະ ລົດຈົກກໍ່​ເຮັດ​ວຽກ​ຕະຫຼອດ ເຮັດ​ໃຫ້ມີ​ສຽງ​ດັງ​ແຮງ​ລົບ​ກວນ​ການ​ດຳລົງ​ຊີວິດ​ບໍ່​ມີ​ຄວາມ​ສະຫງົບ ໂດຍສະເພາະແມ່ນ​ຕອນສວາຍ ບໍ່​ໄດ້ຫຼັບ​ນອນ ນອກ​ນີ້ຍັງ​ມີ​ການ​ສັ່ນສະເທືອນ ເຮັດ​ໃຫ້​ເຮືອນ​ຊານແຕກ​ລ້າວ​ໄດ້​ຮັບ​ຜົນ​ເສຍ​ຫາຍ ເນື່ອງ​ຈາກ​ບໍລິສັດ​ເຮັດ​ວຽກມີບາງ​ມື້ ເລີ່ມ​ແຕ່ 6:00-20:00 ໂມງ.

ປະຊາຊົນ​ຜູ້​ທີ່​ໄດ້​ຮັບ​ຜົນ​ກະທົບ ໄດ້​ໃຫ້​ຮູ້​ຕື່ມ​ວ່າ: ຜ່ານ​ມາ​ກໍ່​ໄດ້​ສະເໜີ​ບັນຫາ​ນີ້​ໄປ​ຍັງ​ອຳນາດ​ການປົກຄອງ​ບ້ານ ແລະ ອຳນາດ​ການປົກຄອງ​ບ້ານ ກໍ່​ໄດ້​ຕັກເຕືອນ​ໃຫ້​ບໍລິ​ສັດ​ຢຸດ​ເຊົາ​ກິດຈະການ ນອກ​ນີ້ ກໍ່​ໄດ້​ສະເໜີ​ໄປ​ຍັງ​ຂະແໜງການກ່ຽວຂ້ອງ ແລະ ອຳນາດ​ການ​ປົກຄອງ​ທ້ອງຖິ່ນ​ທຸກ​ຂັ້ນ​ຕາມ​ຂັ້ນຕອນ ແລະ ຜ່ານ​ມາ​ກໍ່​ມີ​ຫຼາຍພາກສ່ວນ ລວມ​ທັງ​ຂັ້ນ​ກົມກະຊວງ​ກ່ຽວຂ້ອງ ​ກໍ່​ໄດ້​ລົງ​ມາ​ຕິດຕາມ​ເບິ່ງ​ການ​ດຳເນີນ​ກິດ​ຈະການ​ຂອງ​ບໍລິສັດ ແລະ ຜົນ​ກະທົບ​ຂອງ​ປະຊາຊົນ​ຕົວ​ຈິງ​ມາແລ້ວ​ຫຼາຍ​ຄັ້ງ ແຕ່​ກໍ່​ບໍ່​ມີ​ຄວາມສາມາດ​ຈະ​ແກ້​ໄຂ​ໄດ້ ບໍລິສັດ​ຍັງສືບຕໍ່​ດຳເນີນ​ກິດຈະການ​ຈົນ​ມາຮອດ​ທຸກ​ມື້ນີ້ ແລະ ເຮັດ​ໃຫ້​ປະຊາ​ຊົນ​ລໍຄອຍ​ການ​ແກ້​ໄຂ​ບັນຫາດັ່ງກ່າວ​ ຈາກ​ພາກ​ລັດ​ມາ​ໄດ້​ຫຼາຍ​ປີ​ແລ້ວ.

ດັ່ງນັ້ນ ຈຶ່ງ​ຮຽກຮ້ອງ​ມາ​ຂັ້ນ​ເທິງ ກໍ່​ຄືພາກສ່ວນ​ກ່ຽວຂ້ອງ​ທີ່​ຄຸ້ມຄອງ​ທຸລະ​ກິດ​ດັ່ງກ່າວ ​ໃຫ້​ມາ​ຊ່ວຍແກ້​ໄຂ​ບັນຫາ​ຜົນ​ກະທົບ​ຂອງ​ປະຊາ​ຊົນ​ໂດຍ​ດ່ວນ​ໃຫ້​ແດ່ ເນື່ອງຈາກ​ມີ​ປະຊາຊົນ​ຫຼາຍ​ຄອບຄົວ​ມີຄວາມ​ເດືອດຮ້ອນ ​ທີ່​ໄດ້​ຮັບ​ຜົນ​ກະທົບ​ຈາກ​ກິດຈະການ​ດູດ​ຫີນ-ດູດຊາຍ​ຂອງ​ບໍລິສັດ ແກ້ວ​ຈະເລີນ ແລະ ຢາກ​ໃຫ້​ບໍລິສັດ​ຢຸດຕິ​ກິດ​ຈະການ​ດູດ​ຫີນ-ດູດ​ຊາຍ​ຢູ່​ຈຸດ​ນີ້ ໃຫ້ຍ້າຍ​ໄປ​ຢູ່​ບ່ອນ​ອື່ນ​ແທນ​ທີ່​ຫ່າງໄກ​ຈາກ​ເຂດ​ຊຸມ​ຊົນ ບໍ່​ມີ​ຜົນ​ກະທົບຕໍ່​ເນື້ອທີ່​ທຳ​ການ​ຜະລິດ​ກະສິກຳ ແລະ ບໍ່​ມີ​ຜົນ​ກະທົບ​ຕໍ່​ສິ່ງ​ແວດລ້ອມ ສິ່ງ​ສຳຄັນ​ໜຶ່ງ​ອີກ​ຂໍ​ຝາກເຖິງ​ຂັ້ນ​ເທິງ ພາກສ່ວນ​ທີ່​ອະນຸຍາດ​ໃຫ້​ບໍລິສັດ​ດຳເນີນ​ກິດ​ຈະກຳ​ດູດ​ຫີນ-ດູດ​ຊາຍ​ຢູ່​ຈຸດ​ໃດ​ໜຶ່ງ ແມ່ນ​ໃຫ້​ຄຳນຶງ​ເຖິງ​ຜົນ​ກະທົບ​ທີ່ຈະ​ຕາມ​ມາ ແລະ ໃຫ້​ດຳເນີນທຸລະ​ກິດ​ຖືກຕ້ອງ​ຕາມ​ລະບຽບກົດໝາຍ​ບ້ານ​ເມືອງ.

ຂ່າວທີ່ກ່ຽວຂ້ອງ