ຂ່າວຫຼ້າສຸດ

ລາວ ແລະ ກຳປູເຈຍ ເຫັນດີແກ້ໄຂບັນຫາຊາຍແດນຮ່ວມກັນດ້ວຍສັນຕິ

569 14 ສ.ຫ. 2017 ຂ່າວໜ້າ​ໜຶ່ງ

ໃນ​ວັນ​ທີ 12 ສິງຫາ 2017 ສົມເດັດ ອັກຄະມະຫາເສນາ​ບໍດີ ເຕ​ໂຈ ຮຸນ​ເຊນ ນາຍົກ​ລັດ​ຖະ​ມົນຕີ ແຫ່ງ ຣາ​ຊະ​ອານາຈັກກຳປູເຈຍ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ​ຂອງກຳປູເຈຍ ໄດ້​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ເພື່ອ​ປຶກສາ​ຫາລື​ຊອກ​ຊ່ອງ​ທາງ​ແກ້​ໄຂ​ບັນຫາ​ຊາຍ​ແດນ​ລະຫວ່າງ​ສອງ​ປະເທດ ​ທີ່​ກຳລັງ​ເຄັ່ງຮ້ອນ.

ໃນ​ໂອກາດ​ນີ້ ສົມເດັດ ຮຸນ​ເຊນ ໄດ້​ພົບ​ປະ​ສອງ​ຝ່າຍ​ກັບ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ​ສປປ ລາວ ທີ່​ຫ້ອງ​ວ່າການ​ສຳນັກງານ​ນາຍົກລັດຖະມົນຕີ ໂດຍ​ສອງ​ຝ່າຍ​ໄດ້​ປຶກສາ​ຫາ​ກ່ຽວ​ກັບແນວທາງ​ແກ້​ໄຂ​ ບັນຫາ​ຊາຍ​ແດນ​ຮ່ວມ​ກັນ​ຢູ່​ລະຫວ່າງແຂວງ​ອັດ​ຕະ​ປືຂອງ​ລາວ ແລະ ແຂວງ​ຊຽງ​ແຕຣງຂອງ​ກຳປູເຈຍ ຢ່າງ​ກົງ​ໄປ​ກົງ​ມາ​ ຖານ​ມິດຕະພາບ ບ້ານ​ພີ່​ເມືອງ​ນ້ອງ ການ​ພົວພັນ​ຮ່ວມ​ມື​ທີ່​ດີ ແລະ ມີ​ມູນເຊື້ອ​ອັນ​ດີງາມ​ນຳ​ກັນ ພາຍຫຼັງ​ສຳເລັດ​ການ​ພົບ​ປະ​ສອງ​ນາຍົກລັດຖະມົນຕີ ລາວ ແລະ ກຳປູເຈຍ ໄດ້​ຖະແຫຼງ​ຂ່າວ​ຮ່ວມ​ຕໍ່​ສື່​ມວນ​ຊົນ​ ກ່ຽວ​ກັບ​ຜົນ​ຂອງ​ການ​ປຶກສາ​ຫາລື​ຮ່ວມ​ກັນ​ໃນ​ຄັ້ງ​ນີ້ ເຊິ່ງ​ສອງ​ຝ່າຍ​ໄດ້​ຕົກລົງ​ເຫັນ​ດີ​ຈະ​ແກ້​ໄຂ​ບັນຫາ​ຊາຍ​ແດນ​ຮ່ວມ​ກັນ ​ດ້ວຍ​ຄວາມ​ເອົາໃຈໃສ່ ແລະ ຢ່າງ​ສັນຕິ ເພື່ອ​ບໍ່​ໃຫ້​ເກີດ​ການ​ປະ​ທະ​ກັນ​ທາງ​ດ້ານ​ກຳລັງ ພ້ອມ​ທັງ​ເປັນ​ການ​ຮັກສາ​ສັນຕິພາບ ສະຖຽນ​ລະ​ພາບ ສ້າງ​ຄວາມ​ໄວ້​ເນື້ອ​ເຊື່ອ​ໃຈ ແລະ ເພື່ອ​ຜົນ​ປະໂຫຍດ​ລວມ​ຂອງ​ສອງ​ປະເທດ ກໍ່​ຄືປະຊາຊົນ​ສອງ​ຊາດ ລາວ-ກຳປູເຈຍ ທີ່ຢູ່​ລຽບ​ຕາມ​ຊາຍ​ແດນ ໃນ​ນັ້ນ ຝ່າຍ​ລາວ​ເຫັນ​ດີ​ຈະ​ຖອນ​ກຳລັງ​ທະຫານ​ທີ່​ບໍ່​ທັນ​ຖອນ​ໝົດ ພາຍຫຼັງ​ທີ່​ສົມເດັດ ຮຸນ​ເຊນ ໄດ້​ສັ່ງ​ໃຫ້​ຢຸດ​ໃນ​ການ​ສ້າງ​ເສັ້ນທາງ​ເຂົ້າ​ໄປ​ເຂດ​ນັ້ນ ໃຫ້​ຖອນ​ອອກ​ໝົດຈາກ​ບໍລິເວນ​ຊາຍ​ແດນ​ທີ່​ຍັງ​ຄົງ​ຄ້າງ​ໃຫ້​ກັບ​ຄືນ​ກົມ​ກອງ ແລະ ທີ່​ຕັ້ງ​ເດີມ ​ບໍ່​ໃຫ້​ກາຍ​ຕອນ​ເຊົ້າ​ຂອງ​ວັນ​ທີ 13 ສິງຫາ 2017 ສ່ວນ​ຝ່າຍ​ກຳປູເຈຍ ກໍ່​ເຫັນ​ດີ​ຈະ​ຖອນ​ກອງ​ກຳລັງ​ທະຫານ​ທີ່​ໄປ​ສະ​ສົມ​ໄວ້​ໃນ​ເຂດ​ນັ້ນ​ກັບ​ຄືນ​ກົມ​ກອງ ເພື່ອ​ເຮັດ​ໃຫ້​ສະຖານະ​ການ​ຄວາມ​ເຄັ່ງ​ຕຶງ​ກ້າວ​ເຂົ້າ​ສູ່​ຄວາມ​ເປັນ​ປົກກະຕິ ເພື່ອ​ສ້າງ​ຄວາມ​ໝັ້ນ​ໃຈ​ໃຫ້​ແກ່​ປະຊາຊົນ​ທັງ​ສອງ​ປະເທດ ແລະ ຈະ​ບໍ່​ໃຫ້​ເກີດ​ເຫດການ​ທີ່​ບໍ່​ເພິ່ງ​ປາຖະໜາ.

ພ້ອມ​ນັ້ນ ສອງ​ຝ່າຍ​ຍັງ​ໄດ້​ເຫັນ​ດີ​ເປັນ​ເອກະ​ພາບ​ມອບ​ໃຫ້​ກະຊວງ​ການ​ຕ່າງປະເທດ ກໍ່​ຄືຄະນະ​ກຳ​ມະການຊາຍ​ແດນ​ຮ່ວມ ລາວ-ກຳປູເຈຍ ກຳປູເຈຍ-ລາວ ສືບຕໍ່​ພົບ​ປະ​ປຶກສາ​ຫາລື ແລະ ເຈລະຈາ​ແກ້​ໄຂ​ຈຸດ​ຊາຍ​ແດນ​ທີ່​ຍັງ​ຄົງ​ຄ້າງ ແລະ ບໍ່​ໄດ້​ປັກ​ຫຼັກ​ໝາຍ​ຊາຍ​ແດນ​ຮ່ວມ​ກັນ​ໃຫ້​ສຳເລັດ​ ໂດຍ​ໄວ​ເທົ່າ​ທີ່​ຈະ​ໄວ​ໄດ້ໂດຍ​ອີງໃສ່​ຜົນສຳເລັດ​ທີ່​ຜ່ານ​ມາ ແລະ ອີງ​ຕາມ​ເອກະສານ ແລະ ຫຼັກການ​ທີ່​ກ່ຽວຂ້ອງ​ ທີ່​ສອງ​ຝ່າຍ​ໄດ້​ຮັບຮອງ​ເອົາ​ຮ່ວມ​ກັນ​ແລ້ວ ລວມ​ທັງ​ສົນທິສັນຍາ ແລະ ແຜນທີ່​ຂອງ​ສອງ​ປະເທດ​ທີ່​ມີ​ໃນ​ປັດຈຸບັນ ເປັນ​ພື້ນຖານ​ໃນ​ການ​ປຶກສາ​ຫາລື​ໃນ​ຂັ້ນ​ຕໍ່​ໄປ ທັງ​ນີ້​ກໍ່​ເພື່ອ​ສ້າງ​ຊາຍ​ແດນ​ໃຫ້​ເປັນ​ຊາຍ​ແດນ​ແຫ່ງ​ສັນຕິພາບ ມິດ​ຕະພາບ ການ​ຮ່ວມ​ມື ແລະ ການ​ພັດທະນາ ແລະ ເຮັດ​ໃຫ້ການ​ປັກ​ຫຼັກ​ໝາຍ​ຊາຍ​ແດນ​ລະຫວ່າງ ລາວ-ກຳປູເຈຍ ກາຍເປັນ​ມໍລະດົກ​ສືບ​ທອດ​ໄວ້​ໃຫ້​ລູກ​ຫຼານ​ສອງ​ປະເທດ ນອກຈາກ​ນັ້ນ ສອງ​ຝ່າຍ​ໄດ້​ຕົກລົງ​ເຫັນ​ດີ​ຈະ​ສືບຕໍ່​ສ້າງ​ເງື່ອນໄຂ​ໃຫ້​ມີ​ການ​ປຶກສາ​ຫາລື ແລະ ແລກປ່ຽນ​ຄຳ​ຄິດ​ຄຳ​ເຫັນ​ນຳ​ກັນ​ຢ່າງ​ເປັນ​ປົກກະຕິ ເພື່ອ​ຮ່ວມ​ກັນ​ແກ້​ໄຂ​ບັນຫາ​ລະຫວ່າງ​ສອງ​ປະເທດ.

ໃນ​ໂອກາດ​ຢ້ຽມຢາມ ​ສປປ ລາວ ຄັ້ງ​ນີ້ ສົມເດັດ ຮຸນ​ເຊນ ຍັງ​ໄດ້​ເຂົ້າ​ຢ້ຽມ​ຂ່ຳນັບທ່ານ ບຸນ​ຍັງ ວໍລະ​ຈິດ ເລຂາທິການ​ໃຫຍ່ ປະທານ​ປະເທດ ແຫ່ງ ​ສປປ ລາວ ທີ່​ຫ້ອງ​ວ່າການ​ສູນ​ກາງ​ພັກ ໃນ​ໂອກາດ​ນີ້ ສົມເດັດ ຮຸນ​ເຊນ ໄດ້​ສະແດງ​ຄວາມ​ຂອບໃຈ​ຕໍ່​ການ​ຕ້ອນ​ອັນ​ອົບ​ອຸ່ນ ແລະ ໄດ້​ນຳ​ເອົາ​ຄວາມ​ຢື້​ຢາມ​ຖາມ​ຂ່າວ​ຈາກ​ເຈົ້າ​ຊີວິດ ໂນ​ໂຣ​ດົມ ສີ​ຫາ​ໂມ​ນີ ເຖິງ​ທ່ານ​ປະທານ​ປະເທດ ແຫ່ງ ​ສປປ ລາວ ໃນ​ໂອກາດ​ດຽວ​ກັນ ທ່ານ ບຸນ​ຍັງ ວໍລະ​ຈິດ ກໍ່​ໄດ້​ສະແດງ​ຄວາມ​ຊົມເຊີຍ​ຕໍ່​ຜົນ​ການ​ພົບ​ປະ​ຂອງ​ສອງ​ນາຍົກລັດຖະມົນຕີ ລາວ-ກຳປູເຈຍ ທີ່​ໄດ້​ແກ້​ໄຂ​ບັນຫາ​ຮ່ວມ​ກັນ​ຢ່າງ​ທັນ​ການ.

ຂ່າວທີ່ກ່ຽວຂ້ອງ