ຕັດສິນປະຫານຊີວິດ ຄະດີຄ້າຢາເສບຕິດ 2 ເລື່ອງ

221 11 ສ.ຫ. 2017 ຂ່າວໜ້າ​ໜຶ່ງ

ໃນ​ອາທິດ​ຜ່ານ​ມາ ຄະນະ​ສານອາຍາ ສານ​ປະຊາຊົນ ແຂວງ​ບໍ່ແກ້ວ ໄດ້​ຕັດສິນ​ປະຫານ​ຊີວິດ​ຈຳເລີຍ​ຄະດີ​ຄ້າຂາຍ​ຢາ​ເສບ​ຕິດ 2 ເລື່ອງ​ ໂດຍ​ມີ​ຈຳເລີຍ 2 ຄົນຄື: ທ້າວ ໄມ​ຈັນ​ດີ ອາຍຸ 27 ປີ ຢູ່ບ້ານ​ຊຽງ​ກົກ​ໃໝ່ ເມືອງ​ລອງ ແຂວງ​ຫຼວງ​ນ້ຳ​ທາ ຖືກ​ກັກ​ຕົວ​ໃນວັນ​ທີ 21 ກັນຍາ 2016 ພ້ອມຂອງ​ກາງ​ຢາ​ບ້າ 100 ມັດ ເທົ່າກັບ 20.000 ເມັດ ແລະ ທ້າວ ໃຈ​ໂຟ ອາຍຸ 23 ປີ ຢູ່​ບ້ານ​ຫ້ວຍແມງ ເມືອງ​ປາກ​ທາ ແຂວງ​ບໍ່ແກ້ວ ຖືກ​ກັກ​ຕົວ​ໃນ​ວັນ​ທີ 9 ກັນຍາ 2016 ພ້ອມ​ຂອງ​ກາງ​ເຮ​ໂຣອິນ ຈຳນວນ 6 ຫໍ່.

ສຳລັບ​ຄະດີ​ທີ 1 ມີ​ຢູ່​ວ່າ: ໃນວັນ​ທີ 19 ກັນຍາ 2016 ທ້າວ ໄມຈັນ​ດີ ໄດ້​ຕິດຕໍ່ພົວພັນ​ກັບ​ຄົນ​ປະເທດ​ເພື່ອນ​ບ້ານ ກ່ຽວ​ກັບ​ການຂົນສົ່ງ​ຢາ​ເສບ​ຕິດປະເພດ​ຢາ​ບ້າ ຈຳນວນ 100 ມັດ ເທົ່າ​ກັບ 20.000 ເມັດ ຈາກ​ບ້ານ​ຫຼວງສິງ​ໃຈ ເມືອງ​ຕົ້ນ​ເຜິ້ງ ຫາເມືອງຫ້ວຍ​ຊາຍ ແຂວງ​ບໍ່​ແກ້ວ ເຊິ່ງໄດ້​ຕົກລົງ​ກັນ​ໃນ​ລາຄາ​ຂົນສົ່ງ 50.000 ບາດ ມາ​ຮອດ​ວັນ​ທີ 21 ກັນຍາ 2016 ຈຳເລີຍ​ໄດ້​ອອກຈາກ​ບ້ານ​ຊຽງ​ກົກ ເມືອງ​ລອງ ແຂວງ​ຫຼວງ​ນ້ຳ​ທາ ໄປ​ແຂວງ​ບໍ່ແກ້ວ ຈາກ​ນັ້ນ ໄດ້​ຢືມ​ລົດ​ກະບະ​ວີໂກ້ ໝາຍ​ເລກ​ທະບຽນ ​ຈຄ 2888 ກຳແພງ​ນະຄອນ ນຳ​ຄົນຮູ້ຈັກ​ຮັກແພງ​ກັນ​ຢູ່​ບ້ານ​ຫວ້ຍຊາຍ​ໃຕ້ ເມືອງ​ຫ້ວຍ​ຊາຍ ເມື່ອໄດ້​ລົດ​ແລ້ວ ກໍ່​ຂີ່​ລົດ​ໄປ​ທີ່​ບ່ອນ​ນັດໝາຍ ພໍ​ໄປ​ຮອດ​ມີ​ຊາຍ 2 ຄົນ​ຂີ່ລົດຈັກ​ເອົາ​ຢາ​ບ້າ​ຈຳນວນ​ດັ່ງກ່າວ ​ມາ​ໃສ່​ລົດ​ກະບະ​ດ້ານ​ຫຼັງ ແລ້ວ​ກໍ່​ຂັບ​ຂີ່​ລົດຈັກ​ກັບ​ຄືນ ແລະ ໃນ​ເວລາ​ຕໍ່​ມາ ກໍ່​ຖືກ​ເຈົ້າ​ໜ້າທີ່ ​ປກສ ກັກ​ຕົວ ພ້ອມ​ຢາ​ບ້າ ​ໄປ​ດຳເນີນ​ຄະດີ.

ສ່ວນ​ຄະດີ​ທີ 2 ມີ​ຢູ່​ວ່າ: ໃນວັນ​ທີ 8 ກັນຍາ 2016 ທ້າວ ໃຈໂຟ ໄດ້​ຮັບ​ຂົນສົ່ງ​ຢາ​ເສບ​ຕິດ​ປະເພດ​ເຮ​ໂຣ​ອິນ ຈຳນວນ 6 ຫໍ່ ແຕ່ເຂດ​ບ້ານ​ດ່ານ​ຖິ່ນ ເມືອງ​ຫ້ວຍຊາຍ ຫາບ້ານ​ວຽງ​ໃໝ່ ເມືອງຫ້ວຍ​ຊາຍ ແຂວງ​ບໍ່​ແກ້ວ ໂດຍ​ໄດ້ຄ່າ​ຈ້າງ 30.000 ບາດ ມາ​ຮອດວັນ​ທີ 9 ກັນຍາ 2016 ເວລາ​ປະມານ 6:00 ໂມງ ຈຳເລີຍ​ໄດ້​ມາຮັບ​ເອົາ​ເຮ​ໂຣ​ອິນ ຈຳນວນ 6 ຫໍ່ ຕາມ​ທີ່​ໄດ້​ນັດ​ໝາຍ ຈາກ​ນັ້ນ ຈຳເລີຍ​ໄດ້​ຂີ່​ລົດຈັກ​ເວບສີແດງ​ດຳ ເພື່ອ​ຈະ​ໄປ​ສົ່ງ​ຢູ່​ຕາມ​ຈຸດ​ນັດ​ໝາຍ ພໍ​ໄປ​ຮອດ​ຈຸດ​ກວດກາ​ເຂດ​ບ້ານດອນ ເມືອງ​ຫ້ວຍ​ຊາຍ ເຈົ້າ​ໜ້າທີ່ ​ປກສ ໄດ້​ກວດ​ຄົ້ນ​ລົດຈັກ​ພົບ​ເຫັນເຮ​ໂຣ​ອິນ​ຈຳນວນ​ດັ່ງກ່າວ ​ໃນ​ກະເປົາ​ຂອງ​ຈຳເລີຍ ຈຶ່ງ​ໄດ້​ກັກ​ຕົວໄປ​ດຳເນີນ​ຄະດີ​ຕາມ​ກົດໝາຍ.

ຜ່ານ​ການ​ຄົ້ນຄວ້າ​ພິ​ຈາລະນາ​ບັນດາ​ຫຼັກ​ຖານ ເອກະສານຕ່າງໆ​ທີ່​ປະກອບ​ໃນ​ສຳນວນ​ຄະດີ ແລະ ບວກ​ກັບ​ຄຳ​ໃຫ້ການ​ຂອງຈຳເລີຍ​ທັງ 2 ເຫັນ​ວ່າ: ມີ​ການກະທຳ​ຜິດ​ຄົບ 4 ອົງ​ປະກອບ​ຂອງ​ການ​ກະທຳ​ຜິດ ດ້ວຍ​ເຫດ​ນີ້ ສານຈຶ່ງ​ໄດ້​ຕັດສິນ​ລົງໂທດ​ປະຫານ​ຊີວິດ​ຈຳເລີຍ​ທັງ 2 ໃນ​ສະຖານ​ຂົນສົ່ງ​ຢາ​ເສບ​ຕິດຕາມ​ມາດຕາ 146 ຂໍ້ 2 ວັກ 3 ຂອງ​ກົດໝາຍ​ອາຍາ.

ຂ່າວທີ່ກ່ຽວຂ້ອງ