ເປີດປຶ້ມບັນທຶກ ການຂຽນຂອງອານູໂລມ

191 10 ສ.ຫ. 2017 ຂ່າວໜ້າ​ໜຶ່ງ
ເປີດປຶ້ມບັນທຶກ ການຂຽນຂອງອານູໂລມ

ງານ​ຖະແຫຼງ​ຂ່າວ​ເປີດ​ປຶ້ມບັນທຶກ “ການ​ຂຽນ ແລະ ອອກ​ແບບ​ແຕ້ມ​ຂອງ​ອາຈານ ອາ​ນູ​ໂລມ ສຸວັນ​ດວນ” ໄດ້ຈັດ​ຂຶ້ນ​ວັນ​ທີ 8 ສິງຫາ 2017 ຢູ່​ສູນ​ການ​ຄ້າ​ວຽງ​ຈັນ​ເຊັນ​ເຕີ ມີທ່ານ ບົວ​ເງິນ ຊາ​ພູ​ວົງ ຮອງ​ລັດຖະ​ມົນຕີ ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ທ່ານ ສົມ​ສະໜຸກ ມີ​ໄຊ ຮອງ​ປະທານ​ສະມາຄົມ​ນັກ​ຂ່າວ​ແຫ່ງ ​ສປປ ລາວ ພ້ອມ​ດ້ວຍ​ແຂກ​ຖືກເຊີນ​ເຂົ້າ​ຮ່ວມ.

ອາຈານ ອາ​ນູ​ໂລມ ສຸວັນດວນ ເປັນ​ຜູ້​ທີ່​ມີ​ພອນ​ສະຫວັນ ແລະ ມັກ​ແຕ້ມ​ຮູບ​ມາ​ແຕ່​ຍັງນ້ອຍ ເຊິ່ງ​ມີ​ຜົນງານ​ທີ່​ພົ້ນ​ເດັ່ນຢ່າງ​ຫຼວງຫຼາຍ​ໃນ​ໄລຍະ​ຜ່ານ​ມາ ໂດຍ​ສະເພາະ ການ​ແຕ້ມ​ກາໝາຍ​ຊາດ ຮູບ​ພາບ​ກ່ຽວ​ກັບ​ການປຸກລະດົມ​ຄວາມ​ສາມັກຄີ​ພາຍໃນ​ຊາດ ແບບ​ເງິນ ປົດ​ສະ​ເຕີ ຫວຍ ສະແຕັມ ບັດອວຍພອນ ຮູບແຕ້ມ​ກ່ຽວ​ກັບ​ວັດທະນະ​ທຳ​ການ​ດຳລົງ​ຊີວິດ ທຳມະ​ຊາດ ຮູບ​ຕະຫຼົກ ບົດ​ເລື່ອງສັ້ນ-ຍາວ​ຕ່າງໆ ຈົນ​ໄດ້​ຮັບ​ລາງວັນຕ່າງໆ ເປັນຕົ້ນ ລາງວັນ​ອອກແບບ​ໂລ​ໂກ ນະຄອນຫຼວງ​ວຽງຈັນ ຄົບຮອບ 450 ປີ ລາງວັນຊະນະ​ເລີດ​ໃນ​ການ​ຂຽນ​ບົດ​ເລື່ອງ “ແຕ້ມ​ຮູບ​ຈັບ​ຄົນ​ຂີ້ລັກ” ລາງວັນການ​ແຂ່ງຂັນ​ບົດ​ບັນທຶກ “ໄປຊ່ວຍ​ເພິ່ນ​ແຕ້ມ​ຮູບ” ແລະ ລາງວັນ​ອື່ນໆ ປັດຈຸບັນ​ເປັນ​ອາຈານສອນ​ພາບ​ພິມ ແລະ ໄດ້​ຮັບ​ນາມມະ​ຍົດ​ສິລະ​ປິນ​ດີເດັ່ນ​ສາຂາ​ວິຈິດສິນ ໂດຍ​ຜົນງານ​ຕ່າງໆ ໄດ້​ຮີບໂຮມ​ໄວ້​ໃນ​ປຶ້ມ​ບັນທຶກ “ໂຮມ​ຜົນງານ​ການ​ຂຽນ ແລະ ອອກ​ແບບແຕ້ມ​ຂອງ​ອາຈານ ອາ​ນູ​ໂລມ ສຸວັນ​ດວນ” ອາຈານ ອາ​ນູ​ໂລມ ສຸວັນ​ດວນ ກ່າວ​ວ່າ: ຂ້າພະເຈົ້າໄດ້​ຕັ້ງໃຈ​ມາ​ດົນ​ແລ້ວ ​ທີ່​ຕ້ອງການ​ຮີບ​ໂຮມ​ເອົາ​ບົດຮຽນ ແລະ ປະສົບ​ການ ພ້ອມ​ທັງ​ຜົນງານ​ຕົວຈິງ​ທີ່​ໄດ້​ສ້າງ​ຂຶ້ນ​ມາ​ຕະຫຼອດ 50 ປີຜ່ານມາ ທີ່ຢູ່​ໃນ​ວົງ​ການ​ອອກແບບ-ແຕ້ມ ເຊິ່ງ​ມີ​ທັງ​ຜົນງານເກົ່າ ແລະ ໃໝ່ ບາງ​ຜົນງານ​ກໍ່​ມີຄຸນຄ່າ​ທາງ​ປະຫວັດສາດ​ທີ່​ຄວນແກ່​ການ​ຮັກສາ ຈຶ່ງ​ໄດ້​ນຳ​ເອົາ​ຜົນງານ​ດັ່ງກ່າວ ​ມາ​ໄວ້​ໃນ​ປຶ້ມ​ຫົວ​ນີ້ ເພື່ອ​ມອບ​ບົດຮຽນ ແລະ ປະສົບການ​ໃຫ້​ນ້ອງ​ນຸ່ງ ລູກ​ຫຼານ ແລະ ຜູ້​ທີ່​ສົນໃຈ​ໃນ​ຂະແໜງ​ດັ່ງກ່າວ ໄດ້​ຄັດ​ເລືອກ​ເອົາ​ສິ່ງ​ດີໆ​ໄປ​ເປັນບົດຮຽນ​ໃນ​ການ​ປະກອບ​ອາຊີບ ຮັບ​ໃຊ້​ຄອບຄົວ ແລະ ປະເທດຊາດ​ໃນ​ອະນາຄົດ.

ຂ່າວທີ່ກ່ຽວຂ້ອງ