ສະກັດລົດເປົ້າໝາຍ ພົບຢາເສບຕິດເກືອບແສນເມັດ

201 10 ສ.ຫ. 2017 ຂ່າວໜ້າ​ໜຶ່ງ

ພະ​ແນກ​ຕຳຫຼວດ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ແຂວງ​ຫຼວງ​ນ້ຳ​ທາ ໄດ້​ສົມທົບ​ກັບ​ໜ່ວຍ​ສະເພາະ​ກິດ 303 ປະຈຳ​ແຂວງ ໄດ້​ນຳ​ກຳລັງ​ຕັ້ງ​ດ່ານ​ກວດກາ​ລົດ​ເປົ້າ​ໝາຍ​ຢູ່​ເສັ້ນທາງ​ເຂດ​ບ້ານຊຽງ​ກົກ​ເກົ່າ ໃນ​ວັນ​ທີ 26 ກໍລະກົດ 2017 ຜ່ານ​ການ​ກວດກາ​ຈຶ່ງ​ໄດ້​ລົດຈັກ​ເປົ້າ​ໝາຍ​ທີ່​ສົງໄສ ແລະ ສະກັດ​ກວດ​ຄົ້ນພົບ​ຢາ​ເສບ​ຕິດປະເພດ​ຢາ​ບ້າເກືອບ 100.000 ເມັດ​ທີ່​ຊຸກເຊື່ອງ​ໄວ້​ໃນ​ຖົງ​ເປ້ ພ້ອມທັງ​ກັກ​ຕົວ​ຜູ້​ຂັບ​ຂີ່​ໄປ​ສອບ​ສວນ​ຂະຫຍາຍ​ຜົນ ​ຫາ​ຜູ້​ຮ່ວມ​ຂະ​ບວນການ​ດຽວ​ກັນ.

ເຈົ້າ​ໜ້າທີ່​ວິຊາ​ສະເພາະ ​ປກສ ແຂວງ​ຫຼວງ​ນ້ຳ​ທາ ໃຫ້​ຮູ້​ວ່າ: ຜູ້ຖືກ​ຫາ​ຊື່​ທ້າວ ຈຳ​ໂບ້ ອາຍຸ 22 ປີ ຢູ່​ບ້ານ​ຈ່າ​ຍີ ເມືອງ​ລອງ ແຂວງຫຼວງ​ນ້ຳ​ທາ ກ່ອນ​ຈັບ​ຕົວ​ຜູ້ກ່ຽວແມ່ນ​ໄດ້​ຮັບ​ລາຍ​ງານ​ຈາກ​ພົນ​ລະເມືອງ​ດີ​ວ່າ: ຜູ້ກ່ຽວ​ກຳລັງ​ລັກລອບ​ຂົນສົ່ງ​ຢາ​ເສບ​ຕິດປະເພດຢາ​ບ້າ​ຈຳນວນ​ຫຼາຍ ໂດຍ​ໃຊ້​ລົດຈັກ​ເປັນ​ພາຫະນະ ມຸ່ງ​ໜ້າ​ເຂົ້າ​ສູ່ເມືອງ​ລອງ ຈາກ​ນັ້ນ ຈຶ່ງ​ໄດ້​ປະສານ​ສົມທົບ​ກັບ​ໜ່ວຍ​ເພາະ​ກິດ 303 ປະຈຳ​ແຂວງ​ຫຼວງ​ນ້ຳ​ທາ ອອກ​ເຄື່ອນ​ໄຫວ​ຕັ້ງ​ຈຸດ​ກວດກາຢູ່​ເສັ້ນທາງ​ເຂດ​ບ້ານ​ຊຽງ​ກົກ​ເກົ່າ ພໍ​ຮອດ​ເວລາ​ປະມານ 15:00 ໂມງ​ຂອງ​ວັນ​ດຽວ​ກັນ ກໍ່​ພົບ​ເຫັນລົດຈັກ​ເປົ້າ​ໝາຍ ເວບ​ໄອ ສີຟ້າ ໝາຍ​ເລກ​ທະບຽນ ​ຈຂ 6201 ຫຼວງ​ນ້ຳ​ທາ ຂັບ​ຂີ່​ດ້ວຍ​ຄວາມ​ໄວ ຈາກ​ນັ້ນ ຈຶ່ງ​ໄດ້​ສະກັດ​ກວດ​ຄົ້ນພົບ​ເຫັນ​ຢາ​ເສບ​ຕິດ ຈຳນວນ 47 ມັດ ເທົ່າ​ກັບ 94.000 ເມັດ ຊຸກເຊື່ອງ​ໄວ້​ໃນ​ຖົງ​ເປ້​ຂອງ​ຜູ້ກ່ຽວ.

ທ້າວ ຈຳ​ໂບ້ ຮັບ​ສາລະພາບວ່າ: ຢາ​ບ້າ​ຈຳນວນ​ດັ່ງກ່າວ ແມ່ນ​ໄດ້​ຮັບ​ເອົາ​ນຳ​ຜູ້​ຮ່ວມ​ຂະບວນ​ການ​ດຽວ​ກັນ​ຢູ່​ປະເທດ​ມຽນມາ ເພື່ອ​ຈະ​ມາ​ຂາຍ​ສົ່ງ​ໃຫ້​ຜູ້​ສັ່ງຊື້​ຢູ່​ເມືອງ​ສິງ ແຕ່​ບໍ່​ທັນ​ໄດ້​ຂາຍ ຖືກ​ເຈົ້າ​ໜ້າ​ຈັບ​ຕົວ​ໄດ້​ກ່ອນ ປັດຈຸ​ບັນ ເຈົ້າ​ໜ້າທີ່​ກຳລັງ​ປະສານສົມທົບ​ກັບ​ພາກສ່ວນ​ທີ່​ກ່ຽວຂ້ອງ ຕິດຕາມ​ຕົວ​ຜູ້​ສົ່ງ ແລະ ຜູ້​ຊື້​ຢາເສບ​ຕິດ​ຈຳນວນ​ດັ່ງກ່າວ​ ໄປ​ດຳເນີນ​ຄະດີ​ຕາມ​ລະບຽບ​ກົດໝາຍ.

ຂ່າວທີ່ກ່ຽວຂ້ອງ