ຫວຍຂູດ ເປັນຜະລິດຕະພັນທີ່ບໍ່ສາມາດປອມແປງໄດ້

220 09 ສ.ຫ. 2017 ຂ່າວໜ້າ​ໜຶ່ງ
ຫວຍຂູດ ເປັນຜະລິດຕະພັນທີ່ບໍ່ສາມາດປອມແປງໄດ້

ຫວຍ​ຂູດ​ເປັນ​ຜະລິດ​ຕະ​ພັນໜຶ່ງ​ຂອງ​ບໍລິສັດ​ລັດ​ວິ​ສາ​ຫະ​ກິດຫວຍ​ພັດທະນາ ໂດຍ​ແມ່ນ​ບໍ​ລິສັດ ບົວ​ທິບ​ລາວ ຈຳກັດ ເປັນ​ຕົວແທນ​ຈຳໜ່າຍ​ພຽງ​ຜູ້​ດຽວ​ໃນ ​ສປປ ລາວ ເຊິ່ງ​ເປັນ​ຜະລິດ​ຕະພັນ​ເກມ​ຫຼິ້ນ​ຄ້າຍຄື​ການ​ຈົກ​ສະຫຼາກ ແລະ ໄດ້​ຮັບ​ການ​ສ້າງຕັ້ງເຄື່ອນ​ໄຫວ​ມາ​ແຕ່​ປີ 2003 ເພື່ອຕອບ​ສະໜອງ​ຄວາມ​ຮຽກຮ້ອງຕ້ອງການ​ຂອງ​ຜູ້​ມັກ​ສ່ຽງ​ໂຊກ-ຊີງ​ລາງວັນ ແຕ່​ເບື້ອງ​ຕົ້ນ​ຜະລິດຕະ​ພັນ​ດັ່ງກ່າວ​ບໍ່​ທັນ​ເປັນ​ທີ່​ນິຍົມຂອງ​ສັງຄົມ ເນື່ອງ​ຈາກ​ລາງວັນບໍ່​ຈູງ​ໃຈ ມາ​ຮອດ​ທ້າຍ​ປີ 2016 ຜະລິດ​ຕະ​ພັນ​ຫວຍ​ຂູດ​ໄດ້​ມີ​ການປັບປຸງ​ຮູບ​ແບບ​ເກມ​ຫຼິ້ນ ແລະ ກໍ່ໄດ້​ຮັບ​ການ​ຍອມຮັບ​ຈາກ​ສັງຄົມໃນ​ປັດຈຸບັນ ແລະ ມີ​ຜູ້​ໂຊກ​ດີ​ຈຳນວນ​ບໍ່​ໜ້ອຍ ​ທີ່​ໄດ້​ຮັບ​ເງິນ​ລາງວັນ​ຫວຍ​ຂູດ​ເລກ 2 ສາມາດ​ແກ້​ໄຂ​ຊີວິດ​ການ​ເປັນ​ຢູ່​ຂອງ​ຄອບຄົວ​ໄດ້ໃນ​ລະດັບ​ໜຶ່ງ ທັງ​ເປັນ​ການ​ປະກອບ​ສ່ວນ​ລະດົມ​ທຶນ​ຈາກ​ສັງຄົມ ສ້າງ​ລາຍ​ຮັບ​ເຂົ້າ​ງົບປະມານຂອງ​ລັດ.

ທ່ານ ຄຳ​ເພັງ ທິນນະກອນ ຜູ້ອຳນວຍ​ການ​ບໍລິສັດ ລັດ​ວິ​ສາ​ຫະກິດ​ຫວຍ​ພັດທະນາ ໄດ້​ໃຫ້​ສຳພາດ​ວັນ​ທີ 3 ສິງຫາ 2017 ວ່າ: ຫວຍ​ຂູດ​ມີ 3 ຕົວ​ແທນ​ຈຳໜ່າຍຄື: ຕົວ​ແທນ​ຈຳໜ່າຍ​ເລກ 1 ເລກ 2 ແລະ ເລກ 3 ສຳລັບ​ຫວຍ​ຂູດທີ່​ສັງຄົມ​ນິຍົມ​ໃນ​ປັດຈຸບັນ​ແມ່ນຕົວ​ແທນ​ເລກ 2 ບໍລິສັດ ບົວ​ທິບລາວ ຈຳກັດ ທີ່​ຖືກ​ແຕ່ງຕັ້ງ​ໃຫ້ເປັນ​ຕົວ​ແທນ​ຈຳໜ່າຍ​ຫວຍ​ຂູດ ໃນ​ປີ 2009 ເປັນຕົ້ນ​ມາ ໃນ​ໄລຍະ​ນີ້​ ຫວຍ​ຂູດ​ແມ່ນ​ເປັນ​ສິ່ງ​ໃໝ່ ບວກ​ໃສ່​ກັບ​ລາງວັນ​ບໍ່​ຈູງ​ໃຈ ​ຈຶ່ງເຮັດ​ໃຫ້​ໄປ​ບໍ່​ໄດ້​ດີ​ບໍລິສັດ​ຂາດທຶນຕໍ່​ມາ​ທ້າຍ​ປີ 2016 ຈຶ່ງ​ໄດ້​ມີ​ການປັບປຸງ​ຮູບ​ແບບ​ໃບ​ຫວຍ​ເກມການ​ຫຼິ້ນ ໂຄງ​ສ້າງ​ລາງວັນ​ໃໝ່ ແລະ ດ້ານ​ການ​ຕະຫຼາດ ຈຶ່ງ​ເຮັດໃຫ້​ຫວຍ​ຂູດ​ເປັນ​ທີ່​ນິຍົມ​ຂອງ​ສັງຄົມ ກໍ່​ຄືຜູ້​ທີ່​ມັກ​ສ່ຽງ​ໂຊກ-ຊີງລາງວັນ ຜະລິດ​ຕະ​ພັນ​ຫວຍ​ຂູດ ຖ້າ​ທຽບໃສ່​ຜະລິດ​ຕະ​ພັນ​ອື່ນແມ່ນ​ສະດວກ​ກວ່າ ໂດຍ​ບໍ່​ໄດ້​ລໍຖ້າ​ວັນ​ເວລາ​ອອກ​ເລກ​ລາງວັນ ພຽງ​ແຕ່​ຜູ້​ສ່ຽງ​ໂຊກ​ຂູດ​ຫາ​ເຄື່ອງໝາຍ​ລາງວັນ​ໃນ​ໃບ​ຫວຍ​ແຕ່​ລະໃບ ​ກໍ່​ຮູ້​ຜົນ​ໄດ້​ທັນທີ ເຊິ່ງ​ຫວຍ​ຂູດປະກອບ​ມີ​ຜະລິດ​ຕະ​ພັນ​ເລກ 7 ສາມ​ໂຕ ລາຄາ 5.000 ກີບ ຍອດ​ລາງວັນ​ສູງ​ສຸດ 50 ລ້ານກີບ ຜະລິດ​ຕະ​ພັນ​ຝັນ​ດີ​ມີ​ໂຊກ ລາຄາ 10.000 ກີບ ມີ​ລາງວັນສູງ​ສຸດ 100 ລ້ານ​ກີບ ຜະລິດ​ຕະພັນ​ເຮັງ​ເຮັງ ລາຄາ 15.000 ກີບ ມີ​ລາງວັນ 150 ລ້ານ​ກີບ ແລະ ຜະລິດ​ຕະ​ພັນ​ຊ້າງ​ນຳ​ໂຊກ ລາຄາ 20.000 ກີບ ມີ​ລາງວັນສູງ​ສຸດ 250 ລ້ານ​ກີບ ນອກຈາກຊິງ​ຮັບ​ລາງວັນ​ສູງ​ສຸດ​ແລ້ວ ຍັງມີ​ລາງວັນ​ນັບ​ແຕ່ 5.000 ກີບ​ຂຶ້ນໄປຕື່ມ​ອີກ​ຈຳນວນ​ຫຼາຍ​ລາງວັນ ສຳລັບ​ຜູ້​ທີ່​ໄດ້​ຮັບ​ລາງວັນ​ນັບ​ແຕ່ 50 ລ້ານ​ກີບ​ຂຶ້ນ​ໄປ ​ແມ່ນ​ຈັດ​ພິທີມອບ​ຮັບ​ຢູ່​ສຳນັກງານ​ບໍລິສັດ​ລັດວິ​ສາ​ຫະ​ກິດ​ຫວຍ​ພັດທະນາ​ໃນປັດຈຸບັນ ແຕ່​ໃນ​ອະນາຄົດ​ຈະ​ຈັດພິທີ​ມອບ​ຮັບ​ຢູ່​ທີ່​ບໍລິສັດ ບົວ​ທິບລາວ ຈຳກັດ ສຳນັກງານ​ຕັ້ງ​ຢູ່ບ້ານ​ໜອງ​ດ້ວງ ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ສ່ວນຜູ້​ທີ່​ໄດ້​ຮັບ​ລາງວັນ​ມູນ​ຄ່າ​ຫຼຸດ 50 ລ້ານ​ກີບ​ລົງ​ມາ​ແມ່ນ​ໃຫ້​ຮັບ​ຢູ່​ຕົວແທນ​ຈຳໜ່າຍ​ແຕ່​ລະ​ແຂວງ.

ທ່ານ​ນາງ ທອງ​ທິບ ພົມ​ມະຈັກ ປະທານ​ບໍລິສັດ ບົວ​ທິບ​ລາວ ຈຳກັດ ໄດ້​ກ່າວ​ວ່າ: ຫວຍ​ຂູດເປັນ​ຜະລິດ​ຕະ​ພັນ​ທີ່​ບໍ່​ສາມາດປອມ​ແປງ​ໄດ້ ເນື່ອງ​ຈາກ​ເປັນ​ຜະລິດ​ຕະ​ພັນ​ທີ່​ຜະລິດ​ຢູ່​ໂຮງງານ​ທີ່​ມີຄວາມ​ທັນ​ສະໄໝ​ຢູ່​ປະເທດ​ຈີນ ແລະ ເປັນ​ໂຮງງານ​ທີ່​ຜະລິດ​ຫວຍຂູດ​ໃຫ້​ຫຼາຍ​ປະເທດ​ໃນ​ໂລກ ດັ່ງນັ້ນຈຶ່ງ​ມີ​ຄວາມ​ຮັບປະກັນ ເນື່ອງຈາກ​ຢູ່​ໃນ​ໃບ​ຫວຍ​ມີ​ລະບົບ​ບາໂຄດ ຄື: ບາ​ໂຄດ​ໃບ​ຫວຍ ແລະ ບາ​ໂຄດ​ລາງວັນ​ທີ່​ມີ​ລະຫັດ 15 ຕົວ​ເລກ ແລະ ໃບ​ຫວຍ​ຂູດ​ທີ່​ຖືກລາງວັນ ​ຈະ​ຜ່ານ​ການ​ກວດ​ສອບລະບົບ​ບາ​ໂຄດ​ດ້ວຍ​ເຄື່ອງ​ຈັກ​ທີ່ທັນ​ສະໄໝ​ຢູ່​ບໍລິສັດ ບົວ​ທິບ​ລາວ ຖ້າ​ຖືກຕ້ອງ​ຂໍ້​ມູນ​ທີ່​ອ່ານ​ຄ່າ​ໄດ້ ຕ້ອງ​ກົງ​ກັບ​ໂຕ​ເລກ​ທີ່​ລະບຸ​ໄວ້ ນອກ​ນີ້ ໃບ​ຫວຍ​ຍັງ​ມີ​ເສັ້ນ​ກ້ຽວກັນ ຄື​ສາຍ​ນ້ຳ​ແບບ​ບໍ່​ຂາດ ແລະ ການ​ມອບ​ລາງວັນ​ແຕ່​ລະ​ຄັ້ງ ​ໄດ້​ມີ​ຄະນະ​ກຳມະການ​ທີ່​ເປັນ​ຕົວ​ແທນ​ຈາກ​ພາກ​ລັດ ​ມາ​ກວດກາ​ເປັນ​ທີ່ລະອຽດ ແລະ ຮັກສາ​ໄວ້​ເປັນ​ເວລາ 3 ປີ ​ຈຶ່ງ​ທຳລາຍ​ໃບ​ຫວຍ​ຖິ້ມ ສ່ວນ​ລາງວັນ​ຢູ່​ໃນ​ໃບ​ຫວຍ​ຈະ​ກະຈາຍ​ໄປ​ທົ່ວ​ປະເທດ ແລະ ທຸກ​ຄົນຊື້​ຫວຍ​ຂູດ​ສາມາດ​ຊິງ​ຮັບ​ໂຊກ ແລະ ຜ່ານ​ມາ​ທີ່​ມີ​ຫາງ​ສຽງ​ໃນສັງຄົມ​ອອນ​ລາຍ ​ທີ່​ວ່າ​ມີ​ຫວຍຂູດ​ປອມ​ນັ້ນ​ແມ່ນ​ບໍ່​ມີ​ຄວາມ​ຈິງ ມີ​ແຕ່​ບາງ​ຄົນ​ສ້າງ​ບັນຫາ​ຂຶ້ນ​ມາ ແກະ​ເອົາ​ເລກ​ຈາກ​ໃບ​ອື່ນ​ມາ​ຕິດໃສ່​ອີກ​ໃບ​ໜຶ່ງ ​ສ້າງ​ກະແສ​ປັ່ນປ່ວນ​ເຮັດ​ໃຫ້​ສັງຄົມ​ມີ​ຄວາມ​ສັບສົນ ປັດຈຸບັນ​ເຈົ້າ​ໜ້າທີ່​ກຳລັງຊອກ​ຫາ​ຜູ້​ກະທຳ​ຜິດ ສະເພາະ​ປີ 2017 ມີ​ຜູ້​ທີ່​ໂຊກ​ດີ​ຖືກ​ລາງ​ໃຫຍ່ມາ​ແລ້ວ​ຫຼາຍ​ຄົນ ຄື: ລາງວັນ 250 ລ້ານ​ກີບ ມີ 6 ຄົນ ລາງວັນ 150 ລ້ານ​ກີບ ມີ 7 ຄົນ ລາງວັນ 100 ລ້ານ​ກີບ ມີ 88 ຄົນ ແລະ ລາງວັນ 50 ລ້ານ​ກີບ ມີ 40 ຄົນ ສ່ວນ​ລາງວັນ​ນ້ອຍໆ​ແມ່ນ​ມີຫຼາຍ ແຕ່​ລະ​ລາງວັນ​ກໍ່​ໄດ້​ຈັດ​ພິທີມອບ​ຮັບ​ຢ່າງ​ເປັນ​ທາງ​ການ​ໃນທຸກໆ​ອາທິດ ​ຢູ່​ສຳນັກງານ​ຫວຍພັດທະນາ.

ຂ່າວທີ່ກ່ຽວຂ້ອງ