ມອບອາຄານໂຮງຮຽນມັດທະຍົມສົມບູນນ້ຳສັງ

267 17 ກ.ກ. 2017 ຂ່າວໜ້າ​ໜຶ່ງ

ລັດຖະບານ​ຍີ່ປຸ່ນ ມອບ​ອາຄານ​ໂຮງຮຽນ​ມັດທະຍົມ​ສົມບູນນ້ຳ​ສັງ ບ້ານ​ທ່າ​ນາສາ ເມືອງ​ສັງທອງ ນະຄອນຫຼວງ​ວຽງ​ຈັນ ເຊິ່ງເປັນ​ໂຄງການ​ຊ່ວຍເຫຼືອ​ລ້າ​ຈາກລັດຖະບານ ແລະ ປະຊາຊົນ​ຍີ່ປຸ່ນ ມູນ​ຄ່າ 78.724 ໂດ​ລາ​ສະຫະ​ລັດ ຫຼື ປະມານ 600 ລ້ານກີບ ໂດຍ​ພາຍ​ໃຕ້​ໂຄງການ​ເສີມສ້າງ​ຄວາມ​ໝັ້ນຄົງ​ຂອງ​ມະນຸດໃນ​ຂັ້ນ​ຮາກ​ຖານ​ຂອງ​ຍີ່ປຸ່ນ ໂດຍແມ່ນ​ບໍລິສັດ ສຸກ​ປະເສີດ​ສຳ​ຫຼວດອອກ​ແບບ​ກໍ່ສ້າງ​ເຄຫາ​ຂົວ​ທາງ ແລະ ຊົນລະປະທານ ​ຈຳກັດ​ຜູ້ດຽວ​ເປັນ​ຜູ້​ຮັບ​ເໝົາ​ກໍ່ສ້າງ.

ເຊິ່ງ​ແຕ່​ກ່ອນ​ໂຮງຮຽນ​ຫຼັງ​ເກົ່າ ແມ່ນ​ຕັ້ງ​ຢູ່​ໃນ​ບ້ານ​ທ່າ​ນາສາ ແລະ ຈຳນວນ​ນັກຮຽນ​ແມ່ນ​ເພີ່ມຂຶ້ນ​ເລື້ອຍໆ ເຮັດ​ໃຫ້​ຫ້ອງ​ຮຽນ​ແຕ່ລະ​ຫ້ອງ​ແມ່ນ​ມີ​ຄວາມ​ແອ​ອັດ ເພື່ອ​ແນໃສ່​ການ​ປັບປຸງ​ສະພາບແວດ​ລ້ອມ​ການ​ສຶກ​ສາ ໂຄງການເສີມ​ສ້າງ​ຄວາມ​ໝັ້ນຄົງ​ຂອງ​ມະນຸດ ໃນ​ຂັ້ນ​ຮາກ​ຖານ​ຂອງ​ຍີ່ປຸ່ນ ໄດ້​ກໍ່ສ້າງ​ໂຮງຮຽນ​ມັດທະຍົມ​ນ້ຳສັງ​ຫຼັງ​ໃໝ່​ດັ່ງກ່າວ​ນີ້​ຂຶ້ນ ໂດຍ​ປະກອບ​ມີ 5 ຫ້ອງ​ຮຽນ ພ້ອມ​ດ້ວຍອຸປະກອນ​ການ​ສຶກ​ສາ ຫ້ອງ​ນ້ຳ ເຄື່ອງ​ດູດ​ນ້ຳສ້າງ ທັງ​ນີ້ເພື່ອ​ເປັນການ​ຍົກ​ລະດັບ​ຂອງ​ສະພາບແວດ​ລ້ອມ​ຂອງ​ໂຮງຮຽນ​ໃຫ້​ດີ​ຂຶ້ນ ແລະ ໄດ້​ຮັບ​ການ​ພັດທະນາ​ຍິ່ງໆຂຶ້ນ.

ໄລຍະ​ຜ່ານ​ມາ​ ລັດຖະບານ​ຍີ່ປຸ່ນ ໃຫ້ການ​ສະໜັບສະໜູນ​ການ​ພັດທະ​ນາ​ພື້ນຖານ​ການ​ສຶກ​ສາ​ຂອງລັດຖະບານ ​ສປປ ລາວ ເປັນ​ເວລາ​ຍາວ​ນານ ເລີ່ມ​ແຕ່​ປີ 1989 ເປັນຕົ້ນ​ມາ ພາຍ​ໃຕ້​ໂຄງການເສີມ​ສ້າງ​ຄວາມ​ໝັ້ນຄົງ​ຂອງ​ມະນຸດ ໃນ​ຂັ້ນ​ຮາກ​ຖານ​ຂອງ​ຍີ່ປຸ່ນ ແມ່ນ​ໄດ້​ໃຫ້ການ​ສະໜັບສະໜູນ ໃນ​ຂະແໜງການ​ສຶກ​ສາ​ເປັນ​ທັງໝົດ 288 ໂຄງການ ໃນ​ນັ້ນ ລວມ​ມີ​ໂຄງການ​ຂອງ​ການ​ສຶກສາ​ຂັ້ນ​ປະຖົມ 173 ໂຄງການ ແລະ ອີກ 65 ໂຄງການ​ແມ່ນຂອງ​ການ​ສຶກ​ສາ​ຂັ້ນ​ມັດທະຍົມຕົ້ນ ແລະ ຕອນ​ປາຍ.

ພິທີ​ມອບ-ຮັບຈັດ​ຂຶ້ນ​ວັນ​ທີ 13 ກໍລະກົດ 2017 ທີ່​ບ້ານ​ທ່າ​ນາສາ ເມືອງ​ສັງ​ທອງ ນະຄອນຫຼວງ​ວຽງຈັນ ໂດຍ​ມີ​ທ່ານ ຄຳ​ຜາຍ ສີສະຫວັນ ຮອງ​ລັດຖະມົນຕີ​ກະຊວງສຶກ​ສາ​ທິ​ການ ແລະ ກີລາ ທ່ານ ຄີ​ໂຢ​ຊິ ໂອ​ດາ​ວະລະ ຮອງ​ລັດ​ຖະມົນຕີກະຊວງ​ການ​ຕ່າງປະເທດຍີ່ປຸ່ນ ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ​ນະຄອນຫຼວງ​ວຽງຈັນ ພ້ອມ​ດ້ວຍ​ພະນັກງານ​ທີ່​ກ່ຽວຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ