ເລັ່ງຕິດຕາມກໍລະນີຂັບລົດຕຳຄົນຕາຍແລ້ວໜີ

239 17 ກ.ກ. 2017 ຂ່າວໜ້າ​ໜຶ່ງ

ຍາດ​ພີ່ນ້ອງ​ຂອງ​ຜູ້​ຂັບ​ຂີ່​ລົດຈັກ​ທີ່​ຖືກ​ລົດ​ໃຫຍ່​ຕຳ​ຈົນ​ເສຍ​ຊີວິດ ແລ້ວ​ເອົາ​ໂຕ​ຫຼົບໜີ​ຢູ່​ເສັ້ນທາງ 13 ໃຕ້ ເຂດ​ບ້ານ​ບໍ່​ເຫຼັກ ຫຼັກ 36 ເມືອງ​ໄຊ​ທານີ ນະຄອນຫຼວງວຽງ​ຈັນ ໄດ້​ເຂົ້າ​ແຈ້ງ​ຄວາມ​ຕໍ່ເຈົ້າ​ໜ້າທີ່ ເພື່ອ​ເລັ່ງ​ຕິດຕາມ​ຫາຜູ້​ກະທຳ​ຜິດ​ມາ​ດຳເນີນ​ຄະດີ​ໃຫ້ໄດ້​ໂດຍ​ໄວ ແລະ ເພື່ອ​ບໍ່​ໃຫ້​ໄປ​ກໍ່ເຫດ​ກັບ​ຄົນ​ອື່ນ​ອີກ​ຕໍ່​ໄປ.

ກໍລະນີ​ທີ່​ເກີດ​ຂຶ້ນ​ດັ່ງກ່າວ​ນີ້ ເຈົ້າ​ໜ້າທີ່​ຕຳຫຼວດ​ຈະລາຈອນ ນະຄອນຫຼວງ​ວຽງ​ຈັນ ໄດ້​ຮັບແຈ້ງ​ຈາກ​ພົນລະເມືອງ​ດີ ເວລາປະມານ 2 ໂມງ​ເຊົ້າ ວັນ​ທີ 13 ກໍລະ​ກົດ 2017 ທີ່​ຜ່ານ​ມາ​ນີ້​ວ່າ ມີ​ອຸປະຕິເຫດ​ລົດ​ໃຫຍ່​ຕຳ​ກັບ​ລົດຈັກ​ຢູ່​ເສັ້ນທາງ 13 ໃຕ້ ເຂດ​ບ້ານບໍ່​ເຫຼັກ ຫຼັກ 36 ເມືອງ​ໄຊ​ທານີ ນະຄອນຫຼວງ​ວຽງ​ຈັນ ເຈົ້າ​ໜ້າທີ່​ກໍ່​ໄດ້​ຮີບ​ຮ້ອນ​ລົງ​ສະຖານທີ່​ເກີດ​ເຫດ ພົບ​ລົດຈັກ​ໝາຍ​ເລກ​ທະບຽນ ​ຍອ 2460 ທີ່​ມີ​ສະພາບ​ເປ່​ເພ​ສົມຄວນ ແລະ ຮ່າງ​ຊາຍ 1 ຄົນ ນອນ​ຢູ່​ກາງ​ທາງ ຫ່າງ​ຈາກ​ຈຸດ​ເກີດ​ເຫດ​ປະມານ 5 ແມັດ ທີ່​ຖືກ​ກະທົບ​ຢ່າງ​ຮຸນ​ແຮງ ຈົນ​ເສຍ​ຊີວິດ​ຄາ​ທີ່.

ຜ່ານ​ການ​ສືບສວນ-ສອບ​ສວນເບື້ອງ​ຕົ້ນ ເຈົ້າ​ໜ້າທີ່​ພົບ​ວ່າ: ຜູ້ເສຍ​ຊີວິດ​ຄືທ້າວ ພອນ​ມີ​ໄຊ ອາຍຸ​ປະມານ 40 ປີ ຢູ່​ບ້ານ​ໜອງບົວທອງ ເມືອງ​ປາກ​ງື່ມ ນະຄອນຫຼວງ​ວຽງ​ຈັນ ເຊິ່ງ​ກ່ອນ​ເກີດ​ເຫດ ຜູ້ກ່ຽວ​ໄດ້​ຂີ່​ລົດຈັກ​ມາ​ແຕ່​ບ້ານຜາ​ສຸກ ມຸ້ງ​ໜ້າ​ກັບ​ເມືອ​ບ້ານ ພໍມາ​ເຖິງ​ຈຸດ​ເກີດ​ເຫດ​ເຂດ​ບ້ານບໍ່​ເຫຼັກ ຫຼັກ 36 ໄດ້​ມີ​ລົດ​ໃຫຍ່​ທີ່​ຂີ່ສວນ​ທາງ​ມາ​ຕຳ​ກັບ​ລົດ​ຂອງ​ຜູ້ກ່ຽວ​ໜ້າ​ເຊິ່ງ​ໜ້າ​ຢ່າງ​ຮຸນ​ແຮງ ຈົນ​ລົດ​ຟົ້ງ​ກັບ​ຄືນ ແລະ ຜູ້​ຂັບ​ເສຍ​ຊີວິດ​ກາງ​ທາງ ຜູ້​ຂັບ​ຂີ່​ລົດໃຫຍ່​ໄດ້​ຂີ່​ລົດ​ຫຼົບໜີ ເຊິ່ງ​ເຈົ້າ​ໜ້າທີ່​ກຳລັງ​ເລັ່ງ​ຕິດຕາມ​ຕົວ​ມາ​ດຳເນີນ​ຄະດີ​ຕາມ​ລະບຽບ​ກົດໝາຍ ນອກຈາກ​ນີ້ ເຈົ້າ​ໜ້າທີ່​ຕຳຫຼວດຈະລາຈອນ​ໃຫ້​ຮູ້​ຕື່ມ​ວ່າ: ໃນ​ອາທິດ​ຜ່ານ​ມາ ຢູ່​ນະຄອນຫຼວງ ມີ​ອຸບັດ​ຕິ​ເຫດ​ເກີດ​ຂຶ້ນ 35 ກໍລະນີ ເຮັດ​ໃຫ້​ມີ​ຜູ້​ເສຍ​ຊີວິດ 5 ຄົນ.

ຂ່າວທີ່ກ່ຽວຂ້ອງ