ສະໜອງທຶນເຂົ້າໂຄງການຄຸນະພາບຊີ້ນງົວຢູ່ລາວ

356 14 ກ.ກ. 2017 ຂ່າວໜ້າ​ໜຶ່ງ
ສະໜອງທຶນເຂົ້າໂຄງການຄຸນະພາບຊີ້ນງົວຢູ່ລາວ

ກະຊວງ​ການ​ຕ່າງປະເທດ ແລະ ການ​ຄ້າ ປະເທດ​ນູ​ແວນເຊນ​ລັງ ໄດ້​ສະໜັບສະໜູນ​ງົບ​ປະມານ ຈຳນວນ 5.002.374 ໂດລາ​ນູ​ແວນ​ເຊນ​ລັງ ຫຼື ປະມານ 29,04 ຕື້​ກີບ ປະຕິບັດ​ໂຄງການຄຸນະພາບ​ຊີ້ນ​ງົວ ​ສປປ ລາວ ໄລຍະ​ເວລາ 5 ປີ ແຕ່​ປີ 2016-2020 ຢູ່​ນະຄອນຫຼວງ​ວຽງ​ຈັນ ເຊິ່ງ​ຄຸ້ມ​ຄອງ​ໂດຍ​ກົມ​ລ້ຽງສັດ ແລະ ການ​ປະມົງ ກະຊວງ​ກະ​ສິກຳ ແລະ ປ່າໄມ້ ເພື່ອ​ເຮັດ​ໃຫ້ການ​ລ້ຽງ​ງົວ​ມີ​ການ​ຂະຫຍາຍຕົວ ສ້າງ​ລາຍ​ຮັບ​ໃຫ້​ຜູ້​ລ້ຽງ​ງົວ ສ້າງ​ມູນ​ຄ່າ​ເພີ່ມ​ໃນ​ການ​ຜະລິດຊີ້ນ​ງົວ​ມີ​ຄຸນະພາບ​ສູງ ແລະ ມີຄວາມ​ປອດ​ໄພ​ຕໍ່​ຜູ້​ບໍລິໂພກ.

ພິທີ​ລົງ​ນາມ​ສັນຍາ​ຮ່ວມ​ມືການຈັດຕັ້ງ​ປະຕິບັດ​ໂຄງການ​ດັ່ງກ່າວ ໄດ້​ຈັດ​ຂຶ້ນ​ວັນ​ທີ 11 ກໍລະກົດ 2017 ຢູ່​ກະຊວງ​ກະສິກຳ ແລະ ປ່າໄມ້ ລະຫວ່າງທ່ານ ພວງ​ປາຣີ​ສັກ ປຣະ​ວົງ​ວຽງ​ຄຳ ຮອງ​ລັດຖະ​ມົນຕີ​ກະຊວງ​ກະສິກຳ ແລະ ປ່າໄມ້ ແລະ ທ່ານ Ben King ເອກ​ອັກ​ຄະ​ລັດ​ຖະ​ທູດ​ນູ​ແວນ​ເຊນລັງ ປະຈຳ​ລາວ ໂດຍ​ຊ້ອງ​ໜ້າທ່ານ ລຽນ ທິ​ແກ້ວ ລັດຖະມົນຕີກະຊວງ​ກະສິກຳ ແລະ ປ່າໄມ້ ພ້ອມ​ດ້ວຍ​ພາກສ່ວນ​ກ່ຽວຂ້ອງ.

ໂຄງການ​ນີ້ ຈະ​ເປັນ​ການ​ເສີມສ້າງ​ຄວາມ​ຮູ້ ຄວາມ​ສາມາດ​ໃຫ້ພະນັກງານ​ວິຊາ​ການ ແລະ ຜູ້ລ້ຽງ​ງົວ ບັນດາ​ຟາມ​ງົວ​ທີ່​ຜະລິດເປັນ​ສິນຄ້າ ແລະ ຜູ້​ລ້ຽງ​ງົວ​ຂະໜາດ​ນ້ອຍ​ໄດ້​ຮຽນ​ຮູ້​ເຕັກນິກ-ເຕັກ​ໂນ​ໂລ​ຊີ​ການ​ຜະລິດ ຄຽງ​ຄູ່ກັບ​ການ​ປັບປຸງ​ລະບົບ​ການ​ແປຮູບ​ຊີ້ນ ເພື່ອ​ຮັບປະກັນ​ດ້ານ​ຄຸ​ນະພາບ​ໃນ​ໂຮງງານ​ຂ້າ​ສັດ ເຮັດ​ໃຫ້ຊີ້ນ​ງົວ​ມີ​ຄວາມ​ປອດ​ໄພ​ຕໍ່​ຜູ້​ບໍ​ລິໂພກ ທັງ​ເປັນ​ໂຄງການ​ຕົວ​ແບບທີ່​ເຮັດ​ວຽກ​ຮ່ວມ​ກັນ ລະຫວ່າງພາກ​ລັດ ຜູ້​ປະກອບ​ການ ແລະ ຜູ້ລ້ຽງ​ງົວ​ໃນ​ລະດັບ​ຄົວ​ເຮືອນ ເພື່ອພັດທະນາ​ອຸດສາຫະກຳ​ຊີ້ນ​ງົວ​ໃນ ​ສປປ ລາວ ໃຫ້​ເປັນ​ສິນຄ້າ​ທີ່​ຍືນຍົງ ປະກອບສ່ວນ​ເຂົ້າ​ໃນ​ການພັດທະນາ​ເສດຖະກິດ-ສັງຄົມຂອງ​ຊາດ.

ຂ່າວທີ່ກ່ຽວຂ້ອງ