ຕິດຕາມກວດກາສະຖານທີ່ບັນເທີງຢູ່ໃກ້ ມຊ

372 13 ກ.ກ. 2017 ຂ່າວໜ້າ​ໜຶ່ງ

ຄະນະ​ນຳ​ຫ້ອງ​ວ່າການ​ສຳນັກ​ງານ​ນາຍົກລັດຖະມົນຕີ ຮ່ວມກັບກະຊວງ​ສຶກ​ສາ​ທິ​ການ ແລະ ກີລາ ນຳ​ໂດຍ ທ່ານ ບຸນ​ເກີດ ສັງສົມ​ສັກ ລັດຖະມົນຕີ​ປະຈຳ​ສຳນັກງານ​ນາຍົກລັດຖະມົນຕີ ແລະ ທ່ານ ກອງ​ສີ ແສງ​ມະນີ ຮອງ​ລັດຖະ​ມົນຕີ​ກະຊວງ​ສຶກ​ສາ​ທິ​ການ ແລະ ກິລາ ພ້ອມ​ຄະນະ ໄດ້​ລົງຕິດຕາມ​ກວດກາ ແລະ ປືກ​ສາຫາລື​ກ່ຽວ​ກັບ​ການ​ເກັບ​ຂໍ້​ມູນບັນດາ​ຮ້ານ​ກິນ​ດື່ມ ແລະ ຮ້ານ​ບັນເທີງທີ່ຢູ່​ໃກ້ ​ມຊ ໃນ​ວັນ​ທີ 10 ກໍລະ​ກົດ 2017 ທີ່​ມະຫາ​ວິທະຍາໄລ​ແຫ່ງ​ຊາດ (​ມຊ) ໂດຍ​ສະເພາະ​ແມ່ນ 6 ບ້ານທີ່ຢູ່​ອ້ອມຂ້າງ ເພື່ອ​ເປັນ​ບ່ອນ​ອີງ​ໃນ​ການຄົ້ນຄວ້າ​ນິຕິ​ກຳ​ທີ່​ເໝາະ​ສົມ ​ໃນການ​ຄຸ້ມ​ຄອງ​ສະຖານທີ່​ການ​ສຶກສາ​ໃຫ້​ມີ​ຄວາມ​ເປັນ​ລະບຽບ​ຮຽບຮ້ອຍ ເຊິ່ງ​ມີ​ທ່ານ ສົມ​ສີ ຍໍ​ພັນ​ໄຊ ວ່າການ​ອະທິການ​ບໍດີ ​ມຊ ພ້ອມດ້ວຍ​ພາກສ່ວນ​ກ່ຽວຂ້ອງ​ໃຫ້ການ​ຕ້ອນຮັບ.

ການ​ລົງ​ເຄື່ອນ​ໄຫວ​ຄັ້ງ​ນີ້ ແມ່ນເພື່ອ​ປະຕິບັດ​ຕາມ​ຂໍ້​ຕົກລົງວ່າດ້ວຍ​ການ​ແຕ່ງຕັ້ງ​ຄະນະ​ຕິດຕາມກວດກາ ແລະ ຊຸກຍູ້​ການຈັດຕັ້ງປະຕິບັດ​ດຳລັດ​ມະຕິ​ຄຳ​ສັ່ງ ແລະ ຄຳ​ເຫັນ​ຊີ້​ນຳ​ຂອງ​ນາຍົກ​ລັດ​ຖະມົນຕີ ທັງ​ເປັນ​ການ​ປຶກສາ​ຫາລື ເກັບ​ກຳ​ຂໍ້​ມູນ​ບັນດາ​ຮ້ານ​ກິນ​ດື່ມ ແລະ ຮ້ານ​ບັນເທີງ​ທີ່ຢູ່​ພາຍ​ໃນ ແລະ ໃກ້​ກັບ​ມະຫາວິທະຍາໄລແຫ່ງ​ຊາດ ເປັນຕົ້ນ​ແມ່ນ ເຂດບ້ານ​ດົງ​ໂດກ ຕານ​ມີ​ໄຊ ໜອງວຽງ​ຄຳ ນາ​ທົ່ມ ສະພັງ​ເມິກ ແລະ ບ້ານ​ສ້າງ​ຄູ້ ເພື່ອ​ຊອກ​ຫາ​ວິທີ​ແກ້​ໄຂ ແລະ ຄຸ້ມ​ຄອງ​ຮ້ານ​ບັນເທິງ ແລະ ສະຖານທີ່​ມົ້ວ​ສຸມຕ່າງໆ ອັນ​ນຳໄປ​ສູ່​ການ​ສ້າງຄວາມ​ບໍ່​ເປັນ​ລະບຽບ​ຮຽບ​ຮ້ອຍໃນ​ສັງຄົມ ກໍ່​ຄື​ສະຖານທີ່​ການສຶກ​ສາ​ໃຫ້​ຫຼຸດ​ໜ້ອຍ​ຖອຍ​ລົງ​ເທື່ອລະ​ກ້າວ.

ຂ່າວທີ່ກ່ຽວຂ້ອງ