K&C ອະນຸມັດ​ເງິນ 600 ລ້ານ​ກວ່າ​ກີບ ຊ່ວຍສ້າງເສັ້ນທາງເບຕົງ​ໃຫ້ບ້ານ​ສີສະຫວາດ

285 17 ມິ.ນ. 2017 ຂ່າວໜ້າ​ໜຶ່ງ
K&C ອະນຸມັດ​ເງິນ 600 ລ້ານ​ກວ່າ​ກີບ ຊ່ວຍສ້າງເສັ້ນທາງເບຕົງ​ໃຫ້ບ້ານ​ສີສະຫວາດ

ກຸ່ມບໍລິສັດເຄແອນຊີ (K&C Group) ​ໄດ້​ອະນຸມັດ​ທຶນ​ຈໍານວນ 602.046.000 ກີບ ຊ່ວຍ​ສ້າງ​ທາງ​ເບ​ຕົງ​ເສີມ​ເຫຼັກ ຮ່ວມ​ 13 ບ້ານ​ສີສະ​ຫວາດ ​ເມືອງ​ຈັນທະ​ບູລີ ນະຄອນຫຼວງ​ວຽງ​ຈັນ ​ໃຫ້​​ເປັນເສັ້ນທາງ​ທີ່ມີຄຸນະ ພາບ ແລະ ​ໄດ້ມາດຕະຖານ ​ເພື່ອ​ຮອງ​ຮັບ​ການ​ຂະຫຍາຍຕົວ​ຂອງ​ເສດຖະກິດ-​ສັງຄົມ​ ທັງ​ເປັນ​ການ​ອໍານວຍ​ຄວາມ​ສະດວກໃນການສັນຈອນໄປ-ມາຫາສູ່ ຍົກ​ລະດັບ​ຊີວິດ​ການ​ເປັນ​ຢູ່ ແລະ ການດໍາເນີນທຸລະກິດໃນ​ຕໍ່ໜ້າ.

ພິທີ​ມອບ-​ຮັບ​ເສັ້ນທາງ​ດັ່ງກ່າວ ​ໄດ້​ຈັດ​ຂຶ້ນ​ວັນ​ທີ 16 ມິຖຸນາ 2017 ຢູ່ບ້ານສີສະຫວາດ ​ເຊິ່ງມອບ​ໂດຍທ່ານ ກິດສະໜາ ວົງໄຊ ແລະ ນາງ ຈັນທະຈອນ ວົງໄຊ ປະທານ ແລະ ຮອງປະທານ K&C Group ແລະ ຮັບໂດຍທ່ານນາງ ບົວລອນ ວົງດາລາແສນ ເຈົ້າເມືອງຈັນທະບູລີ ​​ໂດຍ​ຊ້ອງ​ໜ້າ​ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມ​ດ້ວຍພາກສ່ວນ​​ກ່ຽວຂ້ອງ.

 K&C Group ເປັນບໍລິສັດທີ່ມີການເຮັດທຸລະກິດຫຼາຍຂະແໜງການມາ​ໄດ້ຫຼາຍສິບປີ ສະນັ້ນຈຶ່ງບິແບ່ງຜົນກຳໄລຂອງທຸລະກິດຂອງຕົນ ​ແລະ ຄອບຄົວ ​ເພື່ອຊ່ວຍເຫຼືອສັງຄົມ ​ໃນ​ນີ້ການ​ກໍ່ສ້າງເສັ້ນທາງເບຕົງ ຮ່ອມ 13 ບ້ານສີສະຫວາດ ກໍ່​ແມ່ນໜຶ່ງ​ໃນ​ບັນດາ​ການ​ຊ່ວຍ​ເຫຼືອ​​ທີ່​ສໍາຄັນ ເນື່ອງຈາກເປັນເສັ້ນທາງຈຸດສຳຄັນຂອງເສດ ຖະກິດ-ສັງຄົມຢູ່ໃຈກາງເມືອງ ຕິດກັບຫຼາຍສະຖານທີ່ໆ​ສໍາຄັນ​ຂອງລັດ ດັ່ງນັ້ນ K&C Group ຈຶ່ງເຫັນດີອະນຸມັດ​ທຶນ​ຊ່ວຍ​ເຫຼືອ​ລ້າ​ ກໍ່ສ້າງເສັ້ນທາງດັ່ງກ່າວໃຫ້ມີຄຸນນະພາບ ແລະ ​ໄດ້ມາດຕະຖານ​ ​ແນ​ໃສ່​ໃຫ້ປະຊາຊົນມີຄວາມສະດວກສະບາຍໃນການສັນຈອນໄປ-ມາ ແລະ ການດໍາເນີນທຸລະກິດໄດ້ຢ່າງຄ່ອງແຄ່ວ ​​ເຊິ່ງໂຄງການນີ້ມີລວງຍາວ 240 ແມັດ ກວ້າງ 5,5 ແມັດ ມີລະບົບລະບາຍນໍ້າ​ເປື້ອນ 1 ເບື້ອງ ຝາປິດ ລົດສາມາດແລ່ນຜ່ານໄດ້ ໂຄງການດັ່ງກ່າວໄດ້ເລີ່ມຈັດ​ຕັ້ງ​ປະຕິບັດແຕ່ວັນທີ 2 ມີນາ 2017 ແລະ ໄດ້ສຳເລັດວັນທີ 10 ເມສາ 2017. 

​ເພື່ອ​ເປັນ​ການສະ​ແດງ​ຄວາມ​ຂອບ​ໃຈ ​ແລະ ຮູ້​ບຸນຄຸນ​ຕໍ່​ການ​ປະກອບສ່ວນ​ດັ່ງກ່າວ ​ທ່ານ ສິນລະວົງ ຄຸດໄພທູນ ກໍ່​ໄດ້ຕາງໜ້າໃຫ້ລັດຖະບານ ປະດັບຫຼຽນໄຊພັດທະນາຊັ້ນ III ​ໃຫ້ K&C Group ອີກ​ດ້ວຍ.

ຂ່າວທີ່ກ່ຽວຂ້ອງ