ເຮືອນ​ຫ້ອງ​ແຖວ 7 ຊັ້ນ ພັງ​ຖະ​ຫຼົ່ມ​ຢູ່​ໃນ​ເຄນ​ຢາ

250 15 ມິ.ນ. 2017 ຂ່າວຕ່າງປະເທດ
ເຮືອນ​ຫ້ອງ​ແຖວ 7 ຊັ້ນ ພັງ​ຖະ​ຫຼົ່ມ​ຢູ່​ໃນ​ເຄນ​ຢາ

ເຈົ້າ​ໜ້າ­ທີ່​ຂອງ​ເຄນ​ຢາ ໃຫ້ຮູ້​ວ່າ ມີ​ຜູ້​ຫາຍ​ສາບ​ສູນ​ຢ່າງ​ໜ້ອຍ 121 ຄົນ ຢູ່​ໃນ​ເຫດ­ການ​ອາ­ຄານ​ຫ້ອງແຖວ​ສູງ 7 ຊັ້ນພັງຖະ​ຫຼົ່ມ​ ຢູ່​ໃນ​ນະ­ຄອນ­ຫຼວງ​ໄນ​ໂຣ​ບີ ຂອງ​ປະ­ເທດ​ເຄນຢາ ຊຶ່ງ​ເກີດ​ຂຶ້ນ​ເມື່ອ​ຄ່ຳ​ຄືນ​ຂອງ​ວັນທີ 12 ມິ­ຖຸ­ນາ​ນີ້.

ເຈົ້າ​ໜ້າ­ທີ່​ກູ້​ໄພ​ຂອງ​ເຄນ​ຢາ ໃຫ້​ຮູ້​ວ່າ ໃນ​ເວ­ລາ​ນີ້ ເຈົ້າ​ໜ້າ­ທີ່​ກ່ຽວ­ຂ້ອງ​ພວມ​ຂຸ້ນ­ຂ້ຽວ​ຂຸດ​ເຈາະ​ເພື່ອຄົ້ນ​ຫາ ແລະ ຊ່ວຍ​ກູ້ໄພ​ຜູ້​ທີ່​ພວມ​ຕິດຄ້າງ​ຢູ່​ໃນ​ຊາກ​ຫັກ​ພັງ​ຂອງ​ອາ­ຄານ ພ້ອມ​ກັນ​ນັ້ນ​ກໍ​ອົບ​ພະ​ຍົມ​ປະ­ຊາ­ຊົນ​ທີ່­ຢູ່​ໃນ​ເຂດ​ໃກ້​ຄຽງ​ບ່ອນ­ເກີດເຫດ ເພື່ອ​ຮັບ­ປະ­ກັນ​ຄວາມ​ປອດ​ໄພ​ໃຫ້ແກ່​ປະ­ຊາ­ຊົນ.

ເຈົ້າ​ໜ້າ­ທີ່​ກ່ຽວ­ຂ້ອງ​ຂອງ​ເຄນ​ຢາ ໃຫ້​ຮູ້​ວ່າ ອາ­ຄານ​ຫ້ອງ​ແຖວ​ດັ່ງ­ກ່າວ ໄດ້​ຮັບ​ການ​ແຈ້ງ​ເຕືອນ​ແລ້ວ ກ່ຽວກັບ​ລະ­ດັບຄວາມ​ອັນ­ຕະ­ລາຍ ເນື່ອງຈາກ​ປາ­ກົດ​ໃຫ້​ເຫັນ​ຮອຍ​ແຫງ​ຂະ­ໜາດ​ໃຫຍ່.

ເຫດ­ການ​ອາ­ຄານ​ຫຼາຍ​ຊັ້ນ​ພັງ​ຖະຫຼົ່ມ​ຢູ່​ໃນ​ເຄນ​ຢາ​ມັກ​ເກີດ​ຂຶ້ນ​ເລື້ອຍໆ ຊຶ່ງ​ເປັນ​ຍ້ອນ​ມາດ­ຖານ​ການ​ກໍ່­ສ້າງຖືກ “ຕັດຮອນ” ຍ້ອນ​ການ​ສໍ້​ລາດ​ບັງ​ຫຼວງ.

ເມື່ອ​ເດືອນ​ເມ­ສາ ປີ 2016 ມີ​ຜູ້ເສຍ​ຊີ­ວິດ​ເກືອບ 50 ຄົນ ຈາກ​ເຫດການ​ອາ­ຄານ​ສູງ 6 ຊັ້ນ​ ພັງ​ຖະ​ຫຼົ່ມ​ ຢູ່​ໃນ​ພື້ນ​ທີ່​ນະ­ຄອນ­ຫຼວງ​ໄນ​ໂຣ​ບີ ຊຶ່ງ​ເຫດ­ການ​ຄັ້ງ​ນັ້ນ ​ເກີດ​ຂຶ້ນ​ຫຼັງ​ມີ​ສະພາບ​ຝົນ­ຕົກ​ໜັກ.

ຂ່າວທີ່ກ່ຽວຂ້ອງ