ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ມຽນ​ມາ ປອກ​ຕຸຍ​ການ ຫວຽດ­ນາມ

702 15 ມິ.ນ. 2017 ຫົວຂໍ້ຂ່າວອື່ນໆ

ພົບ​ກັນ​ປະ­ຈຳ​ວັນ​ນີ້ ມີ​ເລື່ອງ​ທາງ​ການ​ມຽນ​ມາ ສົ່ງ​ດິນ​ທີ່​ລັດ​ຢຶດ​ເອົາ​ໃນ​ເມື່ອ​ກ່ອນ​ຄືນ​ໃຫ້​ເຈົ້າ​ຂອງເດີມ ຕໍ່​ໃສ່​ເລື່ອງ​ໜ່ວຍງານ​ສົງ­ເຄາະ​ຂອງ​ປະ­ເທດປອກ​ຕຸຍ​ການ ລະ­ດົມ​ກຳ­ລັງ​ເພື່ອ​ຊອກ​ອາ­ຫານຊ່ວຍ­ເຫຼືອ​ຜູ້​ທຸກ​ຍາກ ສຸດ​ທ້າຍ​ໄປ​ເບິ່ງ​ນະ­ໂຍ­ບາຍຜ່ອນ­ຜັນ​ວີ​ຊາ​ຂອງ​ຫວຽດ­ນາມ ເພື່ອ​ດຶງ​ດູດ​ນັກ​ທ່ອງທ່ຽວ​ຕ່າງ­ປະ­ເທດ.

ທີ່ ມຽນ​ມາ: ຂ່າວ​ໜັງ­ສື­ພິມ​ວຽງ​ຈັນ​ທາມ ສະບັບ​ວັນ​ທີ 7 ເດືອນ​ມິ­ຖຸ­ນາ​ນີ້ ໃຫ້​ຮູ້​ວ່າ ທາງ​ການມຽນ​ມາ ​ໄດ້​ສົ່ງ​ເນື້ອ­ທີ່​ດິນ ຈຳ­ນວນ 2.580 ເຮັກ­ຕາ ຄືນ​ໃຫ້​ເຈົ້າ​ຂອງ​ເດີມ ໃນ​ເຂດ​ນະ­ຄອນ​ຢ້າງ​ກຸ້ງ ຈຳນວນ​ເນື້ອ­ທີ່​ດິນ​ດັ່ງ­ກ່າວ​ຖືກ​ຢຶດ​ຈາກ​ຊາວ​ກະ­ສິ­ກອນ ໂດຍ​ສຳ­ນັກ­ງານ-ອົງ­ການ​ຕ່າງໆ​ຂອງ​ລັດ ໃນ​ລັດຖະ​ບານ​ຊຸດ​ເກົ່າ ຄະ­ນະ​ກຳ­ມະ­ການ​ທີ່​ເຮັດ​ໜ້າ­ທີ່​ພິຈາ­ລະ​ນາກ່ຽວ​ກັບ​ທີ່​ດິນ ໄດ້​ຕົກ­ລົງ​ສົ່ງ​ທີ່​ດິນ​ໃນ​ຄະ­ດີ ຈຳ­ນວນ 1.905 ເລື່ອງ​ຄືນ​ໃຫ້​ເຈົ້າ​ຂອງ​ເດີມ ສ່ວນ​ຢູ່ນະ­ຄອນມັນ​ດາ​ເລ​ນັ້ນ ທີ່ດິນ​ທີ່​ຢຶດ​ຈາກ​ປະ­ຊາ­ຊົນທັງ​ໝົດ​ນັ້ນ ມີ​ຈຳ­ນວນ 14.175 ເຮັກ­ຕາ ໃນ​ນັ້ນ ໄດ້​ສົ່ງ​ຄືນ​ໃຫ້​ເຈົ້າ​ຂອງ​ເດີມ​ທີ່​ຖືກ­ຕ້ອງ​ຕາມ​ກົດ­ໝາຍແລ້ວ 12.960 ເຮັກ­ຕາ ຂະ​ບວນ​ການ​ສົ່ງ​ທີ່​ດິນ​ທີ່ລັດ​ໄດ້​ຢຶດ​ມາ​ແບບ​ບໍ່​ຖືກ­ຕ້ອງ​ໃຫ້​ເຈົ້າ​ຂອງ​ເດີມ​ນັ້ນ ໄດ້​ດຳ­ເນີນ​ໄປຢ່າງ​ເປັນ​ລະ­ບົບ​ໃນ​ເຂດ​ຕ່າງໆ​ທົ່ວປະ­ເທດ.

ນັບ​ແຕ່​ມື້​ຂຶ້ນ​ກຳ​ອຳ­ນາດລັດ­ຖະ­ບານ​ຊຸດ​ໃໝ່ຂອງ​ມຽນ​ມາ ໄດ້​ເລັ່ງ​ແກ້​ໄຂ​ບັນ­ຫາ​ຂັດ​ແຍ່ງ​ກ່ຽວກັບ​ທີ່​ດິນ ທັງ​ນີ້ກໍ່​ເພາະ­ວ່າ ເນື້ອ­ທີ່​ດິນ​ສຳ­ລັບ​ການກະ­ສິ­ກຳ​ນັ້ນ ມີ​ຄວາມ​ສຳ­ຄັນ​ທີ່​ສຸດ​ສຳ­ລັບ​ຊາວ​ກະສິ​ກອນ​ມຽນ​ມາ ​ທີ່​ກາງ​ຕໍ່​ການ​ຜະ­ລິດ​ກະ­ສິ­ກຳ ໃນຍຸກ​ລັດ­ຖະ­ບານ​ຊຸດ​ເກົ່າ ເນື້ອ­ທີ່​ດິນ​ຂອງ​ຊາວ​ກະ​ສິກອນ​ຈຳ­ນວນ​ຫຼວງ­ຫຼາຍ​ຖືກ​ຢຶດ ແລະ ຈັບ​ຈ່ອງ​ດ້ວຍຂໍ້​ອ້າງ​ວ່າ “ເພື່ອ​ໂຄງ­ການ​ສ້າງ​ຕົວ​ເມືອງ ແລະ ການ​ພັດ­ທະ­ນາ​ອຸດ­ສາ­ຫະ­ກຳ”.

ທີ່ ປອກ​ຕຸຍ​ການ (ໂປ​ຕຸ​ເກດ): ຄະ­ນະ​ກຳ​ມະການ “ທະ­ນາ­ຄານ​ອາ­ຫານ​ຕ້ານ​ຄວາມ​ອຶດ­ຫິວ” ໃນ​ຖາ­ນະ​ອົງ­ການ​ສົງ­ເຄາະ​ໄດ້​ດຳ­ເນີນ​ໂຄງ­ການ​ລະ­ດົມບໍ­ລິ­ຈາກ​ດ້ານ​ອາ­ຫານ​ຈາກ​ບັນ­ດາ​ຫ້າງ​ຮ້ານ​ໃຫຍ່ໆທົ່ວ​ປະ­ເທດ ເພື່ອ​ເອົາ​ໄປ​ຊ່ວຍ​ຄອບ­ຄົວ ກໍ່​ຄືຜູ້​ທຸກຍາກ ຂະ​ບວນ​ການ​ນີ້​ໄດ້​ສົ່ງ​ຄົນ​ເດີນ​ສາຍ​ໄປ​ຫ້າງຮ້ານ​ຕ່າງໆ ເພື່ອ​ເກັບ​ອາ­ຫານ​ໂດຍ​ກົງ ກໍ່​ຄືການຮຽກ­ຮ້ອງ​ການບໍ­ລິ­ຈາກ​ຜ່ານ​ລະ­ບົບ​ອິນ​ເຕີ​ເນັດ ຂ່າວ​ບອກ​ວ່າ ຈຳ­ນວນ​ຜູ້​ອາ­ສາ​ສະ­ໝັກ​ທີ່​ຊອກ​ເກັບຮິບ​ໂຮມ​ອາ­ຫານ​ນັ້ນ ມີ​ຫຼາຍ​ກວ່າ 40 ພັນ​ຄົນ ແລະ ຄາດ​ວ່າອາ­ຫານ​ທີ່​ໄດ້​ຈາກ​ການ​ບໍ­ລິ­ຈາກ​ຈະ​ພຽງພໍ​ເພື່ອ​ສະ­ໜອງ​ປາກ-ທ້ອງ​ຂອງ​ຜູ້​ອຶດ­ຫິວ​ຈຳ­ນວນ ຢ່າງ​ໜ້ອຍ 420.000 ຄົນ ມີ​ຮ້ານ​ສັບ­ພະ​ສິນ­ຄ້າປະ­ມານ 2.000 ແຫ່ງ ຈະ​ຮ່ວມ​ໃຫ້­ການ​ບໍ­ລິ­ຈາກອາ­ຫານ ພາຍ​ໃຕ້​ຄຳຂວັນ “ພວກ​ເຮົາ​ສາ­ມາດ​ເຮັດໃຫ້​ວັນ​ນີ້​ເປັນ​ວັນ​ພິ­ເສດ” ຄຳ​ວ່າ “ວັນ​ນີ້” ໝາຍ​ເຖິງວັນ​ທີ່​ທຸກ​ຄົນ​ມີ​ນ້ຳ­ໃຈ​ບໍ­ລິ­ຈາກ​ອາ­ຫານ ໃນ​ປີ 2016 “ທະ­ນາ­ຄານ​ອາ­ຫານ​ຕ້ານ​ຄວາມ​ອຶດ­ຫິວ” ສາ­ມາດສະ​ສົມ​ອາ­ຫານ​ຈາກ​ການ​ບໍ­ລິ­ຈາກໄດ້​ເຖິງ 26 ລ້ານ​ໂຕນ ແລະ ເຊື່ອ​ວ່າ​ໃນ​ປີ​ນີ້ ຈຳ­ນວນ​ອາ­ຫານ​ທີ່ໄດ້​ຈາກ​ການ​ບໍ­ລິ­ຈາກ​ຈະ​ມີ​ປະ­ລິ­ມານ​ຫຼາຍ​ກວ່າເກົ່າ.

ທີ່ ຫວຽດ­ນາມ: ຂ່າວ​ຕ່າງ­ປະ­ເທດ​ໃນ​ທ້າຍອາ­ທິດ​ຜ່ານ​ມາ​ ໄດ້​ເວົ້າ​ເຖິງ​ນະ­ໂຍ­ບາຍ​ຂອງ​ຫວຽດນາມ ໃນ​ການ​ຍົກ­ເວັ້ນ​ວິ­ຊາໃຫ້ 5 ປະ­ເທດ​ໃນ​ເອີ​ຣົບ ເຊັ່ນ: ອັງ­ກິດ ຝຣັ່ງ ເຢຍ​ລະ​ມັນ ອີ​ຕາ​ລີ ແລະ ແອດສະ​ປາຍ ໃນ​ກຳ­ນົດ 1 ປີ ນັບ​ແຕ່​ວັນ​ທີ 1 ເດືອນ​ກໍ​ລະກົດ​ປີ​ນີ້​ເປັນ­ຕົ້ນ​ໄປ ນະ­ໂຍ­ບາຍ​ດັ່ງ­ກ່າວ ແມ່ນ​ເພື່ອດຶງ​ດູດ​ນັກ​ທ່ອງ​ທ່ຽວ​ຕ່າງ­ປະ­ເທດ​ເຂົ້າ​ຫວຽດ­ນາມ ໃຫ້​ໄດ້ຫຼາຍ​ຂຶ້ນ.

ຂ່າວທີ່ກ່ຽວຂ້ອງ