ຮ່ວມກັບຄົນຕ່າງປະເທດຈຳໜ່າຍຢາບ້າຖືກຈັບ

279 15 ມິ.ນ. 2017 ຂ່າວໜ້າ​ໜຶ່ງ

ເຈົ້າ​ໜ້າທີ່​ກົມ​ຕຳຫຼວດ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ສົມທົບ​ກັບ ​ປກສ ແຂວງ​ບໍ່​ແກ້ວ ໄດ້​ເຂົ້າ​ຈົບ​ກຸມ​ກຸ່ມ​ພວກ​ຄ້າຂາຍ​ຢາ​ເສບ​ຕິດ​ຮ່ວມ​ກັບ​ຄົນ​ຕ່າງປະເທດ ຢູ່​ຊຸມ​ຊົນ​ເຂດ​ຄາ​ຊີ​ໂນ​ເຂດ​ເສດຖະກິດ​ພິເສດ​ສາມ​ລ່ຽມ​ຄຳ ສາມາດ​ຢຶດ​ຢາ​ບ້າ​ໄດ້​ຈຳນວນ 36.200 ເມັດ ພ້ອມ​ກັກ​ຕົວ​ຜູ້​ຖືກ​ຫາ 4 ຄົນ ໃນ​ນັ້ນ​ມີ​ຄົນ​ມຽນ​ມາ 3 ຄົນ ໃນ​ວັນ​ທີ 4 ມິຖຸນາ 2017 ໄປ​ສອບ​ສວນ​ຂະຫຍາຍ​ຜົນ ​ແຫຼ່ງ​ທີ່​ໄປ​ທີ່​ມາ​ຂອງ​ຢາ​ເສບ​ຕິດ​ດັ່ງກ່າວ.

ເຈົ້າ​ໜ້າທີ່​ຕຳຫຼວດ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ແຂວງ​ບໍ່​ແກ້ວ ໃຫ້​ຮູ້​ວ່າ: ພາຍຫຼັງ​ໄດ້​ຮັບ​ລາຍ​ງານ​ວ່າ ມີ​ກຸ່ມ​ຄົນ​ບໍ່​ດີ​ເຄື່ອນໄຫວ​ຄ້າຂາຍ​ຢາ​ເສບ​ຕິດ​ຢູ່​ຊຸມ​ຊົນ​ເຂດ​ຄາ​ຊີ​ໂນ​ເຂດ​ເສດຖະກິດ​ພິເສດສາມ​ລ່ຽມ​ຄຳ ຈາກ​ນັ້ນ ​ຈຶ່ງ​ນຳ​ກຳລັງ​ເຂົ້າ​ໄປ​ພິສູດ​ແຫຼ່ງ​ຂ່າວ ເຫັນ​ວ່າ​ມີ​ມູນ​ຄວາມ​ຈິງ ຈຶ່ງ​ເຂົ້າ​ໄປ​ກວດ​ຄົ້ນພົບ​ຢາ​ເສບ​ຕິດ​ປະເພດ​ຢາ​ບ້າ ຈຳນວນ 18 ມັດ ກັບ 1 ຖົງ​ນ້ອຍ ເທົ່າ​ກັບ 36.200 ເມັດ ລົດຈັກ 2 ຄັນ ໂທລະສັບມື​ຖື 4 ໜ່ວຍ ພ້ອມ​ກັກ​ຕົວ​ຜູ້​ຖືກ​ຫາ 4 ຄົນຄື: ທ້າວ ອາຍ​ກ່າ ອາຍຸ 37 ປີ ຢູ່​ບ້ານ​ຫ້ວຍ​ຫົງ ເມືອງ​ຫວະ ແຂວງ​ທ່າ​ຂີ້ເຫຼັກ ປະເທດ​ມຽນມາ ທ້າວ ອາ​ເຊິນ ອາຍຸ 35 ປີ ຢູ່​ບ້ານ​ຈຽງ​ກາ ເມືອງ​ຈຽງ​ຕຸງ ແຂວງ​ຈຽງ​ຕຸງ ປະເທດ​ມຽນ​ມາ ທ້າວ ອາຍ​ຫຼົງ ອາຍຸ 21 ປີ ຢູ່ບ້ານ​ເມືອງ​ຊາດ ເມື່ອງ​ທ່າ​ຂີ້ເຫຼັກ ແຂວງ​ທ່າ​ຂີ້ເຫຼັກ ປະເທດ​ມຽນ​ມາ ແລະ ທ້າວ ທອງ ອາຍຸ 27 ປີ ຢູ່ບ້ານ​ປາກ​ຮາວ​ເໜືອ ເມືອງ​ຫ້ວຍຊາຍ ແຂວງ​ບໍ່​ແກ້ວ.

ຜ່ານ​ການ​ສືບສວນ-ສອບ​ສວນໃນ​ເບື້ອງ​ຕົ້ນ ທ້າວ ອາຍ​ກ່າ ແລະ ທ້າວ ອາຍ​ເຊິນ ຮັບ​ສາລະພາບວ່າ: ຢາ​ບ້າ​ຈຳນວນ​ດັ່ງກ່າວ​ແມ່ນຂອງ​ພວກ​ກ່ຽວ​ແທ້ ສ່ວນ​ທ້າວ ອາຍ​ຫຼົງ ແລະ ທ້າວ ທອງ ແມ່ນ​ໃຫ້ການ​ປະຕິເສດ​ທຸກ​ຂໍ້​ກ່າວ​ຫາ ​ວ່າຢາ​ບ້າ​ຈຳນວນ​ດັ່ງກ່າວ​ບໍ່ແມ່ນ​ຂອງ​ພວກ​ກ່ຽວ ປັດຈຸບັນ ທາງ​ເຈົ້າ​ໜ້າທີ່​ໄດ້​ກັກ​ຕົວ​ພວກກ່ຽວ​ໄວ້ ເພື່ອ​ທຳ​ການ​ສືບສວນ-ສອບ​ສວນ​ຫາ​ກຸ່ມ​ແກ້ງ​ຄ້າຂາຍຢາ​ເສບ​ຕິດ​ລາຍ​ນີ້ ​ມາ​ດຳເນີນ​ຄະດີ​ຕາມ​ລະບຽບ​ກົດໝາຍ​ຕໍ່​ໄປ.

ຂ່າວທີ່ກ່ຽວຂ້ອງ