ຢູ​ໂດ​ລາວ ​​ເຝິກ­ຊ້ອມ​ທີ່​ຍີ່­ປຸ່ນ ກຽມ​ຊີ­ເກມ

607 13 ມິ.ນ. 2017 ວົງຈອນກີລາ
ຢູ​ໂດ​ລາວ ​​ເຝິກ­ຊ້ອມ​ທີ່​ຍີ່­ປຸ່ນ ກຽມ​ຊີ­ເກມ

ພາຍ­ຫຼັງ​ທີ່​​ນັກ­ກີ­ລາ​ຢູ​ໂດທີມ​ຊາດເຝິກ­ຊ້ອມ​ມາ​ຕັ້ງ­ແຕ່​ເດືອນ​ມັງ­ກອນນີ້ ເປັນ­ຕົ້ນ​ມາ ຈົນ​ຮອດ​ວັນ​ທີ 1 ພຶດ­ສະ­ພາ ຈຶ່ງ​ໄດ້​ມີ​ການ​ເຂົ້າ​ສູນ​ເຝິກຊ້ອມ​ຢ່າງ​ເປັນ​ລະ­ບົບ ຢູ່​ສູນ​ກີ­ລາ​ບູ​ໂດ ລາວ-ຍີ່­ປຸ່ນ ໂດຍ​ການ​ນຳພາ​ຂອງ​ຄູ​ເຝິກ​ຄົນທັງ ​ລາວ ແລະ ​ຍີ່ປຸ່ມ ​ເພື່ອ​ກຽມ​ຄວາມ​ພ້ອມ​ສ້າງ​ຜົນ­ງານໃນ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 29 ທີ່​ປະ­ເທດ​ມາ​ເລ​ເຊຍ ລະ­ຫວ່າງ​ວັນ​ທີ 19-31 ສິງ­ຫາ​ນີ້.

ທ່ານ ເຂັມ​ຊາດ ພິ­ລາ​ພັນ​ເດ​ຊ ປະ­ທານ​ສະ­ຫະ­ພັນ​ກີ­ລາ​ຢູ​ໂດ​ແຫ່ງ​ຊາດ​ລາວ ໃຫ້​ສຳ­ພາດ​ກັບ​ສື່​ມວນ​ຊົນ ໃນວັນ​ທີ 9 ມິ­ຖຸ­ນາ ວ່າ: ເພື່ອ​ເປັນ​ການ​ກຽມ​ຄວາມ​ພ້ອມ​ດ້ານ​ຕ່າງໆ ສະ­ຫະ­ພັນ​ພວກ​ເຮົາຈະ​ສົ່ງ​ນັກ­ກີ­ລາ​ຢູ​ໂດ​ທີມ​ຊາດທີ່­ຢູ່​ໃນ​ເປົ້າ​ໝາຍ​ຈຳ­ນວນ 5 ຄົນ ຍິງ 2 ຄົນ ພ້ອມ​ຄູ​ເຝິກ 1 ທ່ານ ເດີນ­ທາງ​ໄປ​ເກັບ​ໂຕ​ເຝິກ­ຊ້ອມ​ຢູ່​ປະ­ເທດ​ຍີ່­ປຸ່ນ ລະ­ຫວ່າງ​ວັນ​ທີ 10 ມິ­ຖຸ­ນາ-17 ກໍ­ລະ­ກົດນີ້ ໂດຍຈະເຝິກ­ຊ້ອມ​​ຢູ່ 3 ບ່ອນ ຄື:

1. ນະ­ຄອນ­ຫຼວງ​ໂຕ​ກຽວ ສະ​ຖາ​ບັນ​ໂກ​ໂດ​ກັນ ເຊິ່ງ​ເປັນ​ສະ­ຖານ­ທີ່​ຕົ້ນ​ກຳ­ເນີດ​ຂອງ​ຢູ​ໂດ ແລະ ຈະ​ໄດ້​ຈັດ­ການ​ເຝິກ­ຊ້ອມ International Camping ກັບ​ນັກ­ກີ­ລາ​ສີ­ມື​ດີ​ຈາກ​ທົ່ວ​ໂລກ ທີ່​ເຂົ້າມາ​ຮ່ວມ​ເຝິກ­ຊ້ອມ​ໃນ​ທີ່ນີ້.

2. ​ທີ່ Tateyama Chiba ສະ­ຖານ­ທີ່​ດັ່ງ­ກ່າວແມ່ນ​ມີ​ອາ­ຈານ ຫຼື ຄູ​ເຝິກທີ່​ເຄີຍ​ໄດ້​ຮັບ​ຂັນ​ຊະ­ນະ​ເລີດ​ມາ​ແລ້ວ​ຫຼາຍ​ລາຍ­ການ.

3. ມະ­ຫາ­ວິ­ທະ­ຍາ­ໄລ ເທັນ​ລິ ເຊິ່ງມີນັກ­ກີ­ລາ​ທີ່​ເຄີຍ​ໄດ້​ຫຼຽນ​ຄຳ​ໂອ​ແລມ​ປິກ​ມາ​ແລ້ວ​ຫຼາຍ​ທ່ານ ພ້ອມ​ທັງ​ມີ​ນັກ­ກີ­ລາ​ຢູ​ໂດ​ລາວ ທ້າວ ສຸກ​ພະ​ໄຊ ສິດ­ທິ​ສານ ນັກ­ກີ­ລາ​ເປົ້າ​ໝາຍ​ໂອ​ແລມ​ປິກ 2020 ທີ່​ກຳ­ລັງ​ສຶກ​ສາ​ຮ່ຳ­ຮຽນ ແລະ ເຝິກ­ຊ້ອມ​ຢູ່​ບ່ອນ​ນີ້ດ້ວຍ.

ທັງ​ນີ້ ກໍ່​ເພື່ອ​ເປັນ​ການ​ໃຫ້​ນັກ­ກີ­ລາ​ໄດ້​ແລກ­ປ່ຽນ ແລະ ເກັບ​ກ່ຽວ​ທັກ​ສະປະ­ສົບ​ການ ສ້າງ​ຄວາມ​ແຂງ​ແກ່ນ ທັງ​ຮູ້​ຍຸດ­ທະ­ວິ­ທີ​ໃນ​ການ​ຕໍ່­ສູ້ ເພື່ອ​ນຳ​ມາ​ປັບ​ໃຊ້​ໃນ​ໂຕ​ເອງ.

ກ່ອນ​ໜ້າ​ນີ້ ວັນ​ທີ 4-10 ມິ­ຖຸ­ນາ​ ຜ່ານ​ມາ ສະ­ຫະ­ພັນ​ຍັງ​ໄດ້​ສົ່ງ​ຄູ​ເຝິກ ຄື: ທ່ານ​ນາງ ພອນ​ນາ­ລີ ໄຊ​ຍະ​ລາດ ອະ­ດີດ​ນັກ­ກີ­ລາ​ທີມ​ຊາດ ແລະ ທ່ານ ຈິດ​ຕິ​ເວດ ນວນ​ຄາຍ​ສີ ກຳ­ມະ­ການ​ຕັດສິນ ໄປ​ສຳ​ມະ​ນາ​ທີ່​ປະ­ເທດ​ຍີ່­ປຸ່ນ​ເຊັ່ນ​ດຽວ​ກັນ ເພື່ອເປັນ​ການ​ສຶກ​ສາ​ກະ­ຕິ​ກາ​ໃໝ່ ທີ່​ຈະ​ໃຊ້​ເຂົ້າ​ໃນ​ການ​ແຂ່ງ­ຂັນ​ກີ­ລາ​ຊີ­ເກມ ຄັ້ງ​ທີ 29 ອີກ​ດ້ວຍ.

ໃນ​ການ​ໄປ​ເຝິກ­ຊ້ອມ​ຄັ້ງ​ນີ້ ຕ້ອງ​ສະ­ແດງ​ຄວາມ​ຂອບ­ໃຈ​ມາ​ຍັງອາ­ຈານ​ອາ­ວຸ­ໂສຈາກ​ປະ­ເທດ​ຍີ່­ປຸ່ນ ທີ່​ເຄີຍ​ມາ​ສິດ­ສອນ​ກີ­ລາ​ຢູ​ໂດ ​ຢູ່ ສປປ ລາວ ພ້ອມ​ທັງບໍ­ລິ­ສັດ ເຄ​ພີ ຈຳ­ກັດ ບໍ­ລິ­ສັດ ລາວ​ໂຕ​ໂຍ​ຕ້າ ບໍ­ລິ­ການ​ ຈຳ­ກັດ ບໍ­ລິ­ສັດ ທິບ​ພະ​ຍະ​ປະ­ກັນ​ໄພ ຈຳ­ກັດ ປະ­ຈຳລາວ KP-Bridgestone Adidas ແລະ ບໍ­ລິ­ສັດ ຟ້າ​ໃຫຍ່ ຈຳ­ກັດ ທີ່ໃຫ້ກການສະໜັບສະໜູນ.

ຂ່າວທີ່ກ່ຽວຂ້ອງ