ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ຈີນ ເນ​ປານ ອິນ​ເດຍ

728 24 ພ.ພ. 2017 ຫົວຂໍ້ຂ່າວອື່ນໆ

ໃນ​ບົດ​ປະ­ຈຳ​ວັນ​ນີ້​ ມີ​ຂ່າວ​ກ່ຽວ​ກັບ​ການ​ລົງ­ທຶນ ປັບ­ປຸງ​ບັນ­ຫາ​ສິ່ງ­ແວ­ດລ້ອມ​ທີ່​ປັກ​ກິ່ງ ສປ ຈີນ ການ​ຊ່ວຍແມ່­ຍິງ​ເນ​ປານ ​ທີ່​ຕົກ​ເປັນ​ເຫຍື່ອ​ການ​ຄ້າ​ມະ­ນຸດ​ຢູ່ອິນ​ເດຍ ແລະ ເລື່ອງ​ເຈົ້າ​ຄອງ​ລັດ​ແຫ່ງ​ໜຶ່ງ​ຂອງອິນ​ເດຍ​ ຕິດ​ຄະ­ດີ​ຫຼິ້ນ​ແສ້​ພານ​ສາວ.

ທີ່ ສປ ຈີນ: ໃນ​ວັນ​ທີ 17 ເດືອນ​ພຶດ­ສະ­ພາ​ນີ້​ ຫ້ອງການ​ການ​ເງິນ​ຂອງ​ນະ­ຄອນ­ຫຼວງ​ປັກ​ກິ່ງ ໄດ້​ແຈ້ງ​ໃຫ້​ຮູ້​ວ່າ​ນະ­ຄອນ­ຫຼວງປັກ​ກິ່ງ ​ຈະ​ໃຊ້​ງົບ­ປະ­ມານ 10 ຕື້​ຢວນ (ປະ­ມານ 1,45 ຕື້​ໂດ​ລາ​ສະ­ຫະ­ລັດ) ເປັນກ້ອນ​ທຶນ​ພິ­ເສດ​ເພື່ອ​ປັບ­ປຸງ​ບັນ­ຫາ​ສິ່ງ­ແວ­ດລ້ອມຂອງ​ນະ­ຄອນ­ຫຼວງ​ໃຫ້​ດີ​ຂຶ້ນ ປະ­ມານ 80% ຂອງກອງ​ທຶນ​ດັ່ງ­ກ່າວ ​ຈະ​ນຳ​ໃຊ້​ເພື່ອ​ຫຼຸດ­ຜ່ອນ​ກິດ­ຈະ­ກຳ​ທີ່​ບໍ່​ມີຄວາມ​ຈຳ­ເປັນ ບູ­ລະ­ນະ​ເຂດ​ຊຸມ​ຊົນ​ທີ່​ເກົ່າ​ແກ່ ແລະ ຍາກ­ຈົນ ກໍ່​ຄືການ​ປັບ­ປຸງ​ສະ­ພາບ​ແວດ​ລ້ອມ​ລວມ​ຂອງ​ຊຸມ​ຊົນ.

ທີ່ ເນ​ປານ: ໃນ​ກາງ​ເດືອນ​ພຶດ­ສະ­ພາ​ນີ້​ ຂ່າວ​ຈາກນະ­ຄອນ­ຫຼວງ​ກັດ​ມັງ​ທຸ ເນ​ປານ ໄດ້​ໃຫ້​ຊາບ​ກ່ຽວ​ກັບບັ້ນ​ຊ່ວຍ­ເຫຼືອ​ເອົາແມ່­ຍິງ​ຊາວ​ເນ​ປານ ຈຳ­ນວນ 24 ຄົນ​ ທີ່​ຖືກ​ຫຼອກ​ອອກ​ໄປ​ເຮັດ​ວຽກ​ຢູ່​ຕ່າງ​ປະເທດ ແຕ່​ສຸດ​ທ້າຍ​ຜູ້​ເຄາະ​ຮ້າຍ​ເຫຼົ່າ​ນີ້​ຖືກ​ກັກຂັງໄວ້​ເຮືອນ​ສ່ວນ​ຕົວ​ຫຼັງ​ໜຶ່ງ​ ທີ່​ນະ­ຄອນ​ນິວ​ເດລີ ປະ­ເທດ​ອິນ​ເດຍ ແຕ່​ໃນ​ທີ່​ສຸດ ​ເຈົ້າ​ໜ້າ​ທີ່​ີ​ຕຳ­ຫຼວດ​ອິນ​ເດຍ ໄດ້​ສົມທົບກັບ​ໜ່ວຍ​ງານ​ທີ່​ກ່ຽວ­ຂ້ອງປະ­ຈຳ​ສະ­ຖານ­ທູດເນ​ປານ ​ທີ່​ອິນ​ເດຍ ​ບຸກ​ຢຶດ​ບ່ອນ​ກັກ​ຂັງ ແລະ ປົດປ່ອຍ​ຍິງ​ທັງ 24 ຄົນ​ອອກມາ​ໄດ້ ທ່ານ ອົມໂຈ​ຊີ (Omjoshi) ທີ່​ປຶກ­ສາ​ສະ­ຖານ­ທູດ​ເນ​ປານ ປະ­ຈຳ​ນິວ​ເດລີ ໄດ້​ໃຫ້​ຂໍ້​ມູນ​ເພີ່ມ​ຕື່ມ​ກ່ຽວ​ກັບ​ບັນ­ຫານີ້ວ່າ ແມ່­ຍິງ​ທັງ 24 ຄົນ ຖືກ​ນາຍ​ໜ້າ​ລັກ­ລອບເອົາ​ເຂົ້າ​ໄປ​ນິວ​ເດລີ ເພື່ອ​ສົ່ງ­ຕໍ່​ໄປ​ບັນ­ດາ​ປະ­ເທດໃນ​ເຂດ​ຕາ­ເວັນ​ອອກ​ກາງ ໂດຍ​ເລ່­ກົນ​ຫຼອກ​ລວງ​ວ່າ ຈະ​ໄດ້​ເຮັດ​ວຽກ​ດີ​ມີ​ລາຍ​ໄດ້​ງາມ ແມ່­ຍິງ​ທີ່​ຕົກ​ເປັນເຫຍື່ອ​ການ​ຄ້າ​ມະ­ນຸດ​ຄັ້ງ​ນີ້​ ມີ​ອາ­ຍຸ​ແຕ່ 15-40 ປີ ທ່ານ ອົມ​ໂຈ​ຊີ ໄດ້​ໃຫ້​ລາຍ​ລະ­ອຽດ​ຕື່ມ​ວ່າ ທາງ​ສະຖານ​ທູດ​ເນ​ປານ​ທີ່​ນິວ​ເດລີ ໄດ້​ເຄັ່ງ​ລະ­ບຽບ​ໃ ການ​ອອກ​ວີ​ຊາໃຫ້​ພົນ­ລະ­ເມືອງ​ເນ​ປານ ເພື່ອ​ເດີນທາງ​ໄປ​ປະ­ເທດ​ທີ 3 ທັງ​ນີ້​ກໍ່​ເພາະ­ວ່າ​ ໃນ​ໄລ­ຍະ​ຫຼັງໆມາ​ນີ້​ ແມ່­ຍິງ​ເນ​ປານ ​ຖືກ​ບັນ­ດານາຍ​ໜ້າ​ຫຼອກ​ລວງ​ຫຼາຍ​ຂຶ້ນ ດ້ວຍ​ຂໍ້​ອ້າງ​ວ່າ​ຈະ​ໄດ້​ຮັບ​ທຶນ​ການ​ສຶກ​ສາ ກໍ່​ຄືວຽກ​ເຮັດ​ໃນ​ປະ­ເທດ​ທີ 3.

ທີ່ ອິນ​ເດຍ: ມີ​ຂ່າວ​ຮ້າຍ​ຈາກ​ອິນ​ເດຍ ​ກ່ຽວ​ກັບເຈົ້າ​ຄອງ​ລັດ​ແຫ່ງ​ໜຶ່ງ​ຂອງ​ອິນ​ເດຍ ຕ້ອງ​ໄດ້​ລາອອກ​ຈາກ​ໜ້າ­ທີ່​ ຍ້ອນ​ຄະ­ດີ​ຫຼິ້ນ​ແສ້​ພານ​ສາວ​ບໍ່​ມີເມືອງ​ພໍ ເຈົ້າ​ຄອງ​ລັດ​ທີ່​ຕົກ​ເປັນ​ຂ່າວ​ນັ້ນ​ຊື່­ວ່າ ທ່ານ ຊານ​ມູ​ກາ​ນາ​ທານ ອາ­ຍຸ 67 ປີ ທີ່​ລັດ​ເມ­ຄາລາ​ຢາ ເຈົ້າ​ຄອງ​ລັດ​ຄົນ​ນີ້ ຖືກ​ສືບ​ພົບ​ວ່າ ໄດ້​ຈັດ​ຕັ້ງ​ສະ​ໂມສອນສາວໆ​ຂຶ້ນ​ໃນ​ເຮືອນ​ຜູ້­ກ່ຽວ​ເອງ ທີ່​ນີ້​ສາວໆ​ທີ່ເປັນ​ເປົ້າ​ໝາຍ​ ສາ­ມາດ​ເຂົ້າ​ອອກ​ໄດ້​ຕາມ­ໃຈ​ມັກ ວ່າ​ແຕ່​ທ່ານ​ເຈົ້າ​ຄອງ​ສັ່ງ​ການ ແລະ ວ່າສາວໆ​ຫຼາຍ​ຄົນ (ແນ່­ນອນ​ກໍ່​ແມ່ນ​ຜູ້​ງາມໆກວ່າ​ໝູ່) ໄດ້​ຮັບ​ສິດ​ພິ­ເສດ​ເຂົ້າ​ໄປ​ຮອດ​ບ່ອນ​ນອນ​ຂອງ​ທ່ານເຈົ້າ​ຄອງ​ລັດ ເມື່ອ​ເລື່ອງ​ນີ້​ແດງ​ຂຶ້ນ​ຜ່ານ​ສື່​ສັງ­ຄົມອອນ​ລາຍ ທ່ານ​ເຈົ້າ​ຄອງ​ກໍ່​ຈົນ­ຕາ­ແຈ ຕ້ອງ​ໄດ້​ລາອອກ​ຕໍ່­ໜ້າ​ທ່ານ​ນາ­ຍົກ ບໍ່​ລາ​ຊິ​ທົນ​ຢູ່​ໄດ້​ແນວ­ໃດ ເພາະ​ມີ​ຫຼັກ​ຖານ ແລະ ມີ​ລາຍເຊັນ​ພະ­ນັກ­ງານ​ຈຳນວນ 80 ຄົນ ທີ່​ເຮັດ​ໜ້າ­ທີ່​ຮັບ​ໃຊ້​ຢູ່​ທີ່​ພັກ​ຂອງ​ທ່ານເຈົ້າ​ຄອງ​ເອງ.

ຂ່າວທີ່ກ່ຽວຂ້ອງ