ກະສິກຳສະອາດ ເນັ້ນສະໜອງອາຫານສະອາດແກ່ສັງຄົມ

646 21 ມ.ສ. 2017 ຂ່າວໜ້າ​ໜຶ່ງ
ກະສິກຳສະອາດ ເນັ້ນສະໜອງອາຫານສະອາດແກ່ສັງຄົມ

ກະສິກຳ​ສະອາດ ຖື​ເປັນ​ແນວທາງ​ນະໂຍບາຍ​ໄລຍະ​ໃໝ່​ຂອງ ​ສປປ ລາວ ພາກ​ພື້ນ ແລະ ສາກົນ ເຊິ່ງ​ເປັນ​ລະບົບ​ການ​ຜະລິດ ທີ່​ຄຳນຶງ​ເຖິງ​ການ​ນຳ​ໃຊ້​ຊັບ​ພະຍາ​ກອນ​ທຳ​ມະ​ຊາດ​ແບບ​ຍືນ​ຍົງ ເປັນ​ການ​ຜະລິດ​ສະໜອງ​ອາຫານ​ສະອາດ​ແກ່​ສັງຄົມ ການ​ພັດທະ​ນາ​ກະສິກຳ​ສະອາດ ມີ 4 ລະບົບຄື: ການ​ຜະລິດ​ກະສິກຳ​ອິນ​ຊີ ການ​ຜະລິດ​ກະສິກຳ​ທີ່​ດີ ການ​ຜະລິດ​ກະສິກຳ​ປອດ​ຢາ​ປາບ​ສັດຕູພືດ​ເຄ​ມີ ແລະ ການ​ຜະລິດ​ແບບທຳ​ມະ​ຊາດ ກະຊວງ​ກະສິກຳ-ປ່າໄມ້​ ໄດ້​ຈັດ​ກອງ​ປະຊຸມ​ການພັດທະນາ​ກະສິກຳ​ສະອາດ ຕິດພັນ​ກັບ​ວຽກ​ງານ​ປູກຝັງ ໃນ​ວັນ​ທີ 20 ເມສາ 2017 ທີ່​ກະຊວງ​ດັ່ງກ່າວ ເປັນ​ປະທານ​ຂອງ​ທ່ານ ລຽນ ທິ​ແກ້ວ ລັດຖະມົນຕີ​ກະຊວງ​ກະສິກຳ ແລະ ປ່າໄມ້ ມີພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ກະຊວງ​ກະສິກຳ ແລະ ປ່າໄມ້​ ໄດ້​ເອົາໃຈໃສ່​ຊີ້​ນຳ​ບັນດາ​ກົມທີ່​ກ່ຽວຂ້ອງ​ ໃນ​ການຈັດຕັ້ງ​ປະຕິບັດ​ນະໂຍບາຍ​ກະສິກຳ​ສະອາດ ໃນ​ນັ້ນ​ກົມ​ປູກ​ຝັງ​ກໍ່​ເປັນ​ກົມ​ໜຶ່ງ ​ທີ່ມີ​ບົດບາດ​ຄວາມ​ສຳຄັນ​ໃນ​ການລິ​ເລີ່ມ​ຈັດ​ຕັ້ງ​ປະຕິບັດ ແລະ ຜັນຂະຫຍາຍ​ນະໂຍບາຍ​ດັ່ງກ່າວ ເຂົ້າ​ສູ່​ການຈັດຕັ້ງ​ປະຕິບັດ​ວຽກງານ​ຕົວ​ຈິງ ໂດຍ​ສະເພາະ ສຸມໃສ່​ການ​ພັດທະນາ​ກະສິກຳ​ສະອາດ​ ໃນ 2 ລະບົບຄື: ການ​ຜະລິດ​ກະສິກຳ​ອິນ​ຊີ ແລະ ການ​ຜະລິດ​ກະສິກຳ​ທີ່​ດີ ສອງ​ລະບົບ​ດັ່ງກ່າວ ​ເປັນ​ທາງ​ເລືອກ​ໜຶ່ງ​ທີ່​ມີເງື່ອນໄຂ​ທ່າແຮງ​ໄດ້​ປຽບ​ຂອງລາວ ເນື່ອງ​ຈາ​ກວ່າ​ຊາວ​ກະ​ສິກອນ​ສາມາດ​ເພິ່ງ​ຕົນ​ເອງ ແລະ ເພິ່ງ​ພາກັນ​ໄດ້​ມີ​ຄຸນະພາບ​ຊີວິດ​ດີຂຶ້ນ​ ມີ​ຄວາມ​ໝັ້ນຄົງ ແລະ ຄວາມປອດ​ໄພ​ທາງ​ດ້ານ​ສະບຽງ​ອາຫານ ແລະ ໂພຊະ​ນາ​ການ​ມີ​ຜົນກະທົບ​ໜ້ອຍ​ຕໍ່​ຜູ້​ຜະລິດ ​ຜູ້​ບໍລິໂພກ ແລະ ຊັບພະຍາກອນ​ທຳ​ມະ​ຊາດ ພ້ອມ​ດຽວ​ກັນ​ນັ້ນ ທັງ​ເປັນ​ການສອດຄ່ອງ​ກັບ​ການ​ຂະຫຍາຍຕົວຂອງ​ກະແສ​ຄວາມ​ຕ້ອງການ ການ​ຜະລິດ​ຕະ​ພັນ​ກະສິກຳ​ອິນ​ຊີ ແລະ ກະສິກຳ​ທີ່​ດີ​ພາຍ​ໃນ​ປະເທດ ພາກ​ພື້ນ ແລະ ສາກົນ ຈຶ່ງເຮັດ​ໃຫ້ການ​ພັດທະນາ​ການ​ຜະລິດ​ສິນຄ້າ​ກະສິກຳ​ອິນ​ຊີ ແລະ ກະສິກຳ​ທີ່​ດີ​ເປັນ​ທີ່​ຍອມຮັບ​ທັງພາຍ​ໃນ ແລະ ຕ່າງປະເທດ.

ສຳລັບ​ການ​ຜະລິດ​ກະສິກຳ​ອິນຊີ ​ໄດ້​ຂະຫຍາຍ​ອອກ​ໃນ 8 ແຂວງປະກອບ​ມີ: ນະຄອນຫຼວງ​ວຽງຈັນ ແຂວງ​ວຽງ​ຈັນ ຫຼວງ​ພະ​ບາງ ຊຽງ​ຂວາງ ອຸດົມ​ໄຊ ສະຫວັນ​ນະເຂດ ຈຳປາ​ສັກ ແລະ ແຂວງ​ໄຊຍະ​ບູ​ລີ ມີ​ກຸ່ມ​ຜູ້​ຜະລິດ ແລະ ຜູ້​ປະກອບ​ການ​ໄດ້​ຮັບ​ໃບຢັ້ງຢືນ 39 ຫົວໜ່ວຍ ມີ​ຊາວ​ກະສິກອນ​ທັງໝົດ 2.785 ຄອບຄົວ ກວມ​ເອົາເນື້ອທີ່ 7.984 ເຮັກຕາ ຜົນ​ຜະລິດ​ໄດ້ 3.375 ໂຕນ​ຕໍ່​ປີ ສ່ວນ​ກະສິ​ກຳ​ທີ່​ດີ​ມີ​ກຸ່ມ ແລະ ຟາມ​ທີ່​ໄດ້ຮັບ​ການຢັ້ງຢືນ 15 ຫົວໜ່ວຍ ໃນນັ້ນມີ 12 ກຸ່ມ​ມີ​ຊາວ​ກະສິກອນ 300 ຄອບຄົວ​ມີ​ເນື້ອທີ່ 1.200 ເຮັກຕາ ກວມ​ເອົາ 4 ແຂວງຄື: ແຂວງ​ວຽງ​ຈັນ ນະຄອນຫຼວງ ຄຳມ່ວນ ແລະ ແຂວງ​ຈຳປາ​ສັກ ແລະ ໃນ​ປີ 2016 ໄດ້​ສ້າງ​ຄອບຄົວ​ຊາວ​ກະສິກອນ ​ຜະລິດ​ເຂົ້າຕາມ​ມາດຖານ​ກະສິກຳ​ທີ່​ດີ​ຢູ່​ຈຸດສຸມ 2 ແຂວງຄື: ສະຫວັນ​ນະເຂດ ແລະ ແຂວງ​ຄຳ​ມ່ວນ ມີທັງ​ໝົດ 211 ຄອບຄົວ ກວມ​ເນື້ອທີ່ 210 ເຮັກຕາ.

ຂ່າວທີ່ກ່ຽວຂ້ອງ