ບັນຊີໂຄງການຮຽກການລົງທຶນ 5 ປີຂອງ ນວ ມີກວ່າ 50 ໂຄງການ

576 20 ມ.ສ. 2017 ຂ່າວໜ້າ​ໜຶ່ງ
ບັນຊີໂຄງການຮຽກການລົງທຶນ 5 ປີຂອງ ນວ ມີກວ່າ 50 ໂຄງການ

ພາຍຫຼັງ​ທີ່​ລາວ​ເຮົາ​ມີ​ກົດໝາຍວ່າ​ດ້ວຍ​ການ​ສົ່ງເສີມ​ການ​ລົງທຶນ ປີ 2009 ແລະ ດຳລັດ​ວ່າ​ດ້ວຍການຈັດຕັ້ງ​ປະຕິບັດ​ກົດໝາຍວ່າ​ດ້ວຍ​ການ​ສົ່ງເສີມ​ການ​ລົງທຶນ ປີ 2011 ເຊິ່ງ​ໂຄງການ ຫຼື ກິດຈະ​ການ​ຮຽກ​ການ​ລົງທຶນແມ່ນກິດຈະການ​ທົ່ວ​ໄປ ແລະ ການ​ສຳປະທານ​ທີ່​ບັນດາ​ຂະແໜງການ-ທ້ອງຖິ່ນ ເປັນ​ຜູ້​ດຳເນີນ​ການ​ຄົ້ນຄວ້າ-ສ້າງ​ຂຶ້ນ​ບົນ​ພື້ນຖານ​ກິດ​ຈະການ​ທີ່​ມີ​ຄວາມ​ສຳຄັນ​ຕໍ່​ເສດ​ຖະກິດ​ແຫ່ງ​ຊາດ ແລະ ມີ​ທ່າແຮງບົ່ມ​ຊ້ອນ​ທາງ​ດ້ານ​ຊັບ​ພະຍາກອນ​ທຳ​ມະ​ຊາດ ທີ່​ລັດຖະບານ ພ້ອມ​ທັງ​ອົງການ​ປົກຄອງ​ຂັ້ນແຂວງໄດ້​ຮັບຮອງ​ແລ້ວ ແຕ່​ມີຄວາມ​ຈຳເປັນ​ຕ້ອງ​ຊອກ​ຫາ​ທຶນ ເພື່ອ​ນຳ​ມາ​ພັດທະນາ​ເສດຖະກິດ-ສັງຄົມ ໃຫ້​ມີ​ການ​ພັດທະນາຢ່າງ​ຕໍ່​ເນື່ອງ ໂດຍ​ໃນ​ມາດຕາ 19 ດຳລັດ​ວ່າ​ດ້ວຍ​ການຈັດຕັ້ງ​ປະຕິບັດກົດໝາຍ​ວ່າ​ດ້ວຍ​ການ​ສົ່ງເສີມ​ການ​ລົງທຶນ ປີ 2011 ໄດ້​ລະບຸ​ວ່າ: ການ​ສ້າງ​ບັນຊີ​ຮຽກ​ການລົງທຶນ ຕ້ອງ​ຕິດ​ພັນ​ກັບ​ແຜນ​ພັດທະ​ນາ​ເສດຖະກິດ-ສັງຄົມຂອງປະເທດ.

ສຳລັບ​ນະຄອນຫຼວງ​ວຽງ​ຈັນ ພະ​ແນກ​ແຜນການ ແລະ ການລົງທຶນ ໄດ້​ເອົາໃຈໃສ່​ຢ່າງ​ຕັ້ງໜ້າ ເຂົ້າ​ໃນ​ການຈັດຕັ້ງ​ປະຕິບັດ​ວຽກງານ​ບັນຊີ ​ໂຄງການ​ຮຽນ​ການ​ລົງທຶນ​ທີ່​ລັດ​ວາງ​ອອກ ​ດ້ວຍ​ຄວາມຮັບຜິດຊອບ​ສູງ ພ້ອມ​ກັບ​ແຈ້ງ​ໃຫ້ບັນດາ​ເມືອງ ແລະ ຂະແໜງການ​ກ່ຽວຂ້ອງ​ກະກຽມ ແລະ ກຳນົດ​ບັນດາ​ໂຄງການ​ທີ່​ມີ​ຄວາມຕ້ອງການ ໃຫ້​ພາກສ່ວນ​ເອກະຊົນ​ພາຍ​ໃນ-ຕ່າງປະເທດ ເຂົ້າມາ​ລົງທຶນ​ໃນ​ພື້ນ​ທີ່​ຕົນ​ຮັບ​ຜິດຊອບ ຜ່ານ​ການ​ຄົ້ນຄວ້າ​ຮ່ວມກັນ​ຕົວ​ຈິງ ສາມາດ​ສັງ​ລວມໂຄງການ​ບັນຊີ​ຮຽກ​ການ​ລົງທຶນ (2016-2020) ໄດ້​ທັງ​ໝົດ 54 ໂຄງການ ຄາດ​ຄະເນ​ມູນ​ຄ່າການ​ລົງທຶນ​ທັງ​ໝົດ 46.042.957.000.000 ກີບ ເຊິ່ງ​ໃນ 5 ປີຜ່ານ​ມາ (2011-2015) ນະຄອນຫຼວງ​ວຽງ​ຈັນ ໄດ້ກຳນົດ​ບັນດາ​ແຜນ​ງານ​ໂຄງການ​ຈຸດ​ສຸມ ແລະ ແຜນ​ວຽກ​ບຸລິ​ມະ​ສິດ ທັງ​ໝົດ 160 ໂຄງການ ໂດຍ​ບັນດາ​ແຜນ​ງານ ໂຄງການດັ່ງກ່າວ ໄດ້​ກຳນົດ​ແບບ​ລວມໆ ບໍ່​ໄດ້​ແຍກ​ລະອຽດ​ໃຫ້​ເປັນ​ໂຄງການ​ບັນຊີ​ຮຽກ​ການ​ລົງທຶນຈາກພາກ​ເອກະ​ຊົນ ແຕ່​ເຖິງ​ຢ່າງໃດກໍ່​ຕາມ ຕະຫຼອດ 5 ປີຜ່ານມາ ໄດ້ມີ​ນັກ​ລົງທຶນ​ຈາກ​ຕ່າງປະເທດກວ່າ 47 ປະເທດ ມາ​ລົງທຶນ​ຢູ່​ນະຄອນ​ຫຼວງ​ວຽງ​ຈັນ ອັນ​ເຮັດ​ໃຫ້ສາມາດ​ດຶງ​ດູດ​ການ​ລົງທຶນ​ຂອງພາກ​ເອກະ​ຊົນ​ພາຍ​ໃນ-ຕ່າງ​ປະເທດ ໄດ້ຈຳນວນ 6.670 ໂຄງການ ມູນ​ຄ່າ 77.310,5 ຕື້​ກີບ ຫຼື ເທົ່າ​ກັບ 9,66 ຕື້​ໂດ​ລາ​ສະຫະລັດ ທຽບໃສ່​ສົກ​ປີ 2006-2010 ເພີ່ມ​ຂຶ້ນ 69,70% ອັນ​ພົ້ນ​ເດັ່ນແມ່ນ​ໂຄງການ​ພັດທະນາ​ສູນ​ເສດຖະ​ກິດ ແລະ ການ​ຄ້າ​ຄົບ​ວົງຈອນ​ໜອງ​ຈັນ​ຕອນ​ເໜືອ (ວຽງຈັນ​ເຊັນ​ເຕີ) ໂຄງການ​ພັດທະນາເຂດ​ດອນ​ຈັນ ສຳ​ປະທານ​ເນື້ອທີ່ 5 ເຮັກຕາ ໂຄງການ​ພັດທະນາບໍລິເວນ​ດິນ​ດອນ​ຈັນ​ຕອນ​ໃຕ້ ເນື້ອທີ່ 25 ເຮັກຕາ ແລະ ໂຄງການ​ພັດທະນາ​ໄຊ​ເຊດ​ຖາ​ກວມລວມ​ເປັນຕົ້ນ.

ຂ່າວທີ່ກ່ຽວຂ້ອງ