ຫຼາຍສະຖາບັນການສຶກສາ ປະກອບສ່ວນບໍລິຈາກເລືອດ

439 18 ມ.ສ. 2017 ຂ່າວໜ້າ​ໜຶ່ງ

ໂດຍ​ປະຕິບັດ​ຕາມ​ແຜນການເຄື່ອນ​ໄຫວ ​ວຽກ​ງານ​ປະກອບສ່ວນ​ຊ່ວຍເຫຼືອ​ສັງຄົມ ແລະ ການ​ຕົກລົງ​ເຫັນ​ດີ​ເປັນ​ເອກະພາບ​ຂອງ​ກອງ​ປະຊຸມ​ປຸກລະດົມ ຜູ້​ບໍລິຈາກ​ເລືອດ​ແບບ​ສະໝັກ​ໃຈ ບໍ່​ຮຽກ​ຄ່າ​ຕອບ​ແທນ ປະຈຳ​ປີ 2017 ວັນ​ທີ 7 ເມສາ 2017 ທີ່ໂຮງຮຽນ​ມັດທະຍົມ​ສຶກ​ສາ​ຕອນປາຍ ໂນນ​ສະຫວ່າງ ເມືອງ​ໄຊເຊດ​ຖາ ນະຄອນຫຼວງ​ວຽງ​ຈັນ ຮ່ວມ​ກັບ​ສູນ​ເລືອດ​ແຫ່ງ​ຊາດ ອົງການ​ກາແດງ​ລາວ ຈັດ​ກິດຈະກຳຮັບ​ບໍລິຈາກ​ເລືອດ ເຊິ່ງ​ມີ​ພະນັກງານ​ຄູ-ອາຈານ ໃຫ້ການ​ປະກອບສ່ວນ​ບໍລິຈາກ​ເລືອດ​ຄັ້ງ​ນີ້ 53 ເທື່ອ​ຄົນ ໃນ​ນັ້ນ ທ່ານ ດາວ​ເດັ່ນ ໄພ​ມຸງຄຸນ ຜູ້ນຳ​ພາ​ວຽກ​ງານ​ປຸກລະດົມ​ການ​ບໍລິຈາກ​ເລືອດ​ຂອງໂຮງຮຽນ​ແຫ່ງ​ດັ່ງກ່າວ ​ໃຫ້ການປະກອບສ່ວນ​ບໍລິຈາກ​ເລືອດ​ເຖິງ 15 ຄັ້ງ.

ນອກຈາກ​ນີ້ ຍັງ​ມີ​ພະນັກງານ ຄູ-ອາຈານ ແລະ ຊາວ​ໜຸ່ມ​ນັກຮຽນ​ຈຳນວນ​ຫຼາຍ​ຄົນ ທີ່​ໄດ້​ໃຫ້ການ​ປະກອບສ່ວນ​ບໍລິຈາກ​ເລືອດ​ຫຼາຍ​ຄັ້ງ​ເຊັ່ນ​ກັນ ພ້ອມ​ທັງ​ສືບຕໍ່ໃຫ້ການ​ປະກອບສ່ວນ​ບໍລິຈາກເລືອດ​ໃນ​ວັນ​ສຳຄັນ​ຕ່າງໆ​ເປັນຈຳນວນ​ຫຼາຍ.

ຂ່າວ​ແຈ້ງ​ຕື່ມ ວັນ​ທີ 5 ເມສາ 2017 ພະນັກງານ ຄູ-ອາຈານ ແລະ ນັກ​ສຶກ​ສາ​ວິທະຍາໄລ ລາວ-ທ໋ອບ ກໍ່​ໄດ້​ພ້ອມ​ໃຈ​ກັນ​ບໍ​ລິຈາກ​ເລືອດ​ເພື່ອ​ຊ່ວຍເຫຼືອ​ສັງຄົມ ຈຳນວນ 21 ເທື່ອ​ຄົນ ໂອກາດ​ນີ້ ທາງ​ສູນ​ເລືອດ​ແຫ່ງ​ຊາດ ອົງການ​ກາແດງ​ລາວ ຂໍ​ສະແດງຄວາມ​ຍ້ອງຍໍ​ຊົມເຊີຍ​ມາ​ຍັງທຸກໆ​ທ່ານ ​ທີ່​ໃຫ້ການ​ປະກອບສ່ວນ​ບໍລິຈາກ​ເລືອດ ເນື່ອງ​ໃນໂອກາດ​ປີ​ໃໝ່ ​ຂໍ​ໃຫ້​ມີ​ຄວາມສຸກ ຄວາມ​ຈະເລີນ​ໃນ​ໜ້າທີ່​ການ​ງານ​ໝົດ​ທຸກ​ທ່ານ ແລະ ພ້ອມ​ກັນ​ສືບຕໍ່​ປະກອບສ່ວນ​ບໍລິຈາກ​ເລືອດ ເພື່ອ​ກອບ​ກູ້​ເອົາ​ຊີວິດ​ເພື່ອນ​ມະນຸດ​ດ້ວຍ​ກັນ.

ຂ່າວທີ່ກ່ຽວຂ້ອງ