ອົງ­ການ​ກວດ­ກາ ພົບ​ບັນ­ຫາ​ຫຍໍ້­ທໍ້ - ໂດຍ : ດັ້ນ​ກີບ​ເມກ

2.472 03 ມ.ສ. 2017 ນານາສາລະ

ເຖິງ​ແມ່ນ​ວ່າຫຼາຍ​ຄົນ​ຈະ​ຮູ້​ຢູ່ເຕັມ​ເອິກ​ວ່າ ບັນຫາ​ມີ​ໄວ້​ເພື່ອ​ແກ້ ແຕ່​ບາງ​ບັນ­ຫາ​ອາດ​ແກ່­ຍາວ ແລະ ເປັນ​ໄພ​ຮ້າຍແຮງອັນ­ຕະ­ລາຍ​ຕໍ່​ການ​ພັດ­ທະ­ນາ​ຂອງ​ຊາດ ໂດຍສະ­ເພາະປາ­ກົດ­ການ​ສໍ້​ລາດ​ບັງ​ຫຼວງ ຫຼື ການ​ລະເມີດ​ກົດ­ໝາຍ​ຂອງ​ເຈົ້າ​ໜ້າ­ທີ່ພັກ-ລັດ ໃນ​ໜ່ວຍງານ​ທີ່​ຕົນ​ຮັບ­ຜິດ­ຊອບ ດັ່ງ­ນັ້ນ ການ​ແກ້​ໄຂ​ບັນ­ຫາສໍ້​ລາດ​ບັງ​ຫຼວງ​ຈຶ່ງ​ຫຍຸ້ງ­ຍາກ ແລະ ສັບ­ສົນ ເພາະຄົນ​ເຮົາ​ເຫັນ­ແກ່​ປະ­ໂຫຍດ​ຂອງ​ຕົນ​ເກີນ​ໄປ.

ຜູ້​ຂຽນ​ຂໍ​ຍົກ​ບັນ­ຫາ​ກ່ຽວ​ກັບ​ບັນ­ຫາ​ການ​ສໍ້​ລາດບັງ​ຫຼວງ​ທີ່​ອົງ­ການ​ກວດ­ກາ​ໄດ້​ກວດ​ພົບ ໃນ​ບົດໂອ້​ລົມ​ຂອງ​ທ່ານ ປອ. ບຸນ​ທອງ ຈິດ​ມະ­ນີ ກຳ​ມະການ​ກົມ​ການ­ເມືອງ​ສູນ​ກາງ​ພັກ ຫົວ­ໜ້າ​ອົງ­ການຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ຕໍ່​ກອງ​ປະຊຸມ​ວຽກ​ງານ​ກວດ­ກາ​ທົ່ວ​ປະ­ເທດ ວັນ​ທີ 18 ມັງກອນ 2017 ຜ່ານ​ມາ ດັ່ງ­ນີ້: ກ່ຽວ​ກັບ​ວຽກ​ງານກວດ­ກາ​ໜຶ່ງ​ປີ­ຜ່ານ­ມາ​ໄດ້​ກວດ­ກາ​ທັງ​ໝົດ 786 ເປົ້າ​ໝາຍ ພົບ​ເຫັນ​ການ​ຕົກ­ເຮ່ຍ​ເສຍ​ຫາຍ​ຊັບ​ສິນເງິນ​ຄຳຂອງ​ລັດ​ເປັນ​ຈຳ­ນວນ​ບໍ່​ໜ້ອຍ ແລະ ໄດ້ພະ­ຍາ­ຍາມ​ເກັບ​ກູ້​ຄືນ​ໃຫ້​ລັດ​ໄດ້​ຈຳ­ນວນ​ໜຶ່ງ ອີກບັນ­ຫາ​ໜຶ່ງ​ແມ່ນ​ໄດ້​ເອົາ­ໃຈ­ໃສ່​ກວດ­ກາ​ແກ້​ໄຂ​ບັນຫາ​ການ​ສໍ້​ລາດ​ບັງຫຼວງ​ໃນ​ຖັນ​ແຖວ​ພະ­ນັກ­ງານສະ­ມາ­ຊິກ​ພັກ ໄດ້​ດຳ­ເນີນ​ການ​ສືບ­ສວນ-ສອບສວນ​ພະ­ນັກ­ງານ​ທີ່​ມີ​ພຶດ­ຕິ​ກຳ​ສໍ້​ລາດ​ບັງຫຼວງ​ຢູ່​ກະຊວງ-ອົງ­ການ ແລະ ທ້ອງ­ຖິ່ນ​ຈຳ­ນວນ​ໜຶ່ງ ມີ​ຜູ້ຕ້ອງ​ຫາ​ທັງ​ໝົດ 71 ຄົນ ປະ­ກອບ​ສຳ­ນວນ​ສົ່ງ​ໄອຍະ​ການ​ປະ­ຊາ­ຊົນ​ສັ່ງ​ຟ້ອງ​ຂຶ້ນ​ສານ​ແລ້ວ​ຈຳ­ນວນ 25 ຄົນ ໃນ​ນີ້ຕັດ­ສິນ​ແລ້ວ 1 ຄົນ.

ໃນ​ບົດ​ໂອ້​ລົມ​ຍັງ​ໄດ້​ເວົ້າ​ຕື່ມ​ເຖິງ​ບັນ­ຫາ​ການສວຍ​ໃຊ້​ໜ້າ­ທີ່ ສົມ­ຮູ້​ຮ່ວມ​ຄິດ​ກັບ​ພວກ​ຄົນ​ບໍ່​ດີ​ສໍ້ລາດ​ບັງ​ຫຼວງ​ຂອງ​ພະ­ນັກ­ງານ-ສະ­ມາ­ຊິກ​ພັກ ທີ່​ຫາ​ຜົນ​ປະ­ໂຫຍດ​ສ່ວນ​ຕົວ ພັກ​ພວກ ພີ່­ນ້ອງ ແລະ ພຶດ­ຕິ​ກຳ​ອື່ນໆ ເຊິ່ງ​ມີ​ບັນ­ຫາ​ທີ່​ສັງ­ຄົມ​ເປັນຫ່ວງຫຼາຍ​ທີ່​ສຸດ​ກໍ່​ແມ່ນປາ­ກົດ­ການ​ພະ­ຍາດ​ອາດຍາ​ສິດ ຫ່າງ​ເຫີນ​ຕົວ​ຈິງ-ຮາກ​ຖານ ແລະ ລະເມີດ​ສິດ​ເປັນ​ເຈົ້າ​ຂອງ​ປະ­ຊາ­ຊົນ ສວຍ​ໃຊ້​ໜ້າ­ທີ່ຕຳ­ແໜ່ງລະ­ເມີດ​ກົດ­ໝາຍ ແລະ ການ​ສໍ້​ລາດ​ບັງຫຼວງ​ທີ່​ເກີດ​ຂຶ້ນ​ຢ່າງ​ແຜ່​ຫຼາຍ​ໃນ​ຖັນ​ແຖວ​ພະ­ນັກງານຢູ່​ທຸກ​ລະ­ດັບ ມີ​ທ່າ​ອຽງ​ສັບ­ສົນ ແກ້​ໄຂ​ໄດ້ຍາກ ບາງ​ກໍ­ລະ­ນີ​ມີ​ເຈົ້າ​ໜ້າ­ທີ່​ຂອງ​ພັກ-ລັດ​ກ່ຽວຂ້ອງ​ໂດຍ​ກົງ​ກັບ​ການ​ຄ້າ­ຂາຍເຖື່ອນ ບັນ­ຫາ​ໄມ້ ຢາ​ເສບ​ຕິດ ການ​ແກ້​ໄຂ​ຜົນ​ຂອງ​ການ​ກວດ­ກາ​ຍັງຊັກ​ຊ້າ ແລະ ບໍ່​ທັນ​ໄດ້​ຮັບກໍ່​ໄດ້​ເປັນ​ເອ­ກະ​ພາບກັນແລ້ວ​ວ່າ ບັນ­ຫາ​ເຫຼົ່າ­ນັ້ນ​ພວມ​ເປັນ​ບັນ­ຫາໃຫຍ່​ທີ່​ທ້າ​ທາຍ​ຕໍ່​ບົດ­ບາດ​ອິດ​ທິ​ພົນ ກໍ່​ຄືຄວາມສາ­ມາດ​ນຳ­ພາ ແລະ ຄວາມສາ­ມາດ​ເປັນ​ແບບຢ່າງ​ນຳ​ໜ້າ​ຂອງ​ພັກ​ເຮົາ.

ຂ້າງ​ເທິງ​ນັ້ນ​ຄື​ຜົນ​ການ​ກວດ­ກາ​ທີ່​ກວດ​ພົບ​ບັນຫາ​ຫຍໍ້­ທໍ້​ທີ່​ເກີດ​ຂຶ້ນ​ໃນ​ໜ່ວຍ​ງານ​ຂອງ​ລັດ ທັງສູນ​ກາງ ແລະ ທ້ອງ­ຖິ່ນ ເຊິ່ງບາງ​ຄະ­ດີ​ກໍ່​ໄດ້​ຕັດສິນ​ເດັດ­ຂາດ​ໄປ​ແລ້ວ ເຮັດ​ໃຫ້​ເປັນ​ແບບ­ຢ່າງ​ທີ່​ດີແກ່​ປະ­ຊາ­ຊົນ ເຊິ່ງ​ມັນ​ສົ່ງ​ຜົນ​ເຖິງ​ຄວາມ​ໜ້າ​ເຊື່ອ ແລະ ຄວາມ​ສັກ­ສິດ​ຂອງ​ກົດ­ໝາຍ​ບ້ານ​ເມືອງ ທີ່​ຈິງ​ພະ­ຍາດ​ອາດ­ຍາ​ສິດ​ຄວນ​ຈະ​ໝົດ​ໄປ​ຕັ້ງແຕ່​ປີ 1975 ພຸ້ນ ແຕ່​ປາ­ກົດວ່າ ມັນ​ຍັງ​ຕິດ​ແສດນຳ​ບຸກ­ຄົນ​ຜູ້​ເຫັນ­ແກ່​ຄວາມ​ໂລບ ແລະ ຄວາມ​ລ້ຳລວຍ​ຂອງ​ຕົນ​ເອງ​ເປັນ​ທີ່​ຕັ້ງ ມັນ​ເປັນ​ພະ­ຍາດ​ຊຳເຮື້ອ​ທີ່​ຕ້ອງ​ໄດ້​ແກ້​ໄຂ​ຢ່າງ​ເປັນ​ປົກ­ກະ­ຕິ ແລະ ທັນການ ໃນ​ໂອ­ກາດ​ທີ່​ພັກ​ເຮົາ​ຈັດ​ຕັ້ງ​ບັ້ນ​ດຳ­ເນີນ​ຊີວິດ​ການ­ເມືອງ​ເພື່ອປັບ­ປຸງ​ປົວ­ແປງ​ທົ່ວ​ພັກ ​ຄິດ​ວ່າປາ­ກົດ­ການ​ຫຍໍ້­ທໍ້​ເຫຼົ່າ­ນັ້ນ​ຈະ​ຖືກ​ຕີ​ຖອຍ​ໄປ.

ຂ່າວທີ່ກ່ຽວຂ້ອງ