ບຸນ­ປີ­ໃໝ່ ຄົນ​ລາວ​ ຄວນ​ເຮັດ​ຫຍັງ​ແດ່? - ໂດຍ : ດັ້ນ​ກີບ​ເມກ

ເມື່ອ​ຫວນ​ຄືນ​ການ​ປະ­ຕິ­ບັດ​ຮີດ­ຄອງ​ເກົ່າ​ບູ­ຮານ​ລາວ​ທີ່​ເຄີຍ​ນຳ­ພາ​ປະ­ຕິ­ບັດ​ໃນ​ປາງ​ບຸນ­ປີ­ໃໝ່​ນັ້ນ ຍ່ອມ​ມີ​ຫຼາຍ​ປະ­ການ​ທີ່ພວກເຮົາ​ຄວນ​ປະ­ຕິ­ບັດ​ສືບ​ທອດ ເພື່ອ​ບໍ່​ເປັນ​ການ​ລະຮີດ​ລະ​ຄອງ ໂດຍ​ສະ­ເພາະເຖົ້າ​ແກ່​ລຸງ​ຕາ ແລະ ພະ­ສົງ​ສາ­ມະ­ເນນທີ່​ນຳ­ພາ​ຊາວ­ບ້ານ​ປະ­ຕິ­ບັດ ເພາະ​ບຸນ​ປາງ​ນີ້​ຖື​ໃນ​ຮີດ 12 ຄອງ 14 ທີ່​ຄົນ​ລາວປະ­ຕິ­ບັດ​ສືບ​ທອດ​ກັນ​ມາ​ທຸກ​ປີ​ບໍ່​ໄດ້​ຂາດ.

ຖ້າ​ເບິ່ງ​ຕາມ​ປະ­ຕິ­ທິນ​ລາວ​ບູ­ຮານ​ສະ­ບັບ​ວັດໂພນ​ເພົາ ແຂວງ​ຫຼວງ​ພະ​ບາງ ປີ 2017 ເອີ້ນ​ວ່າ ປີ​ລະ­ກາ (ພາ­ສາ​ລາວ​ບູ­ຮານ​ເອີ້ນ​ກັນ​ວ່າ ​ປີ​ເມິງເຮົ້າ) ວັນ​ສັງ­ຂານ​ລ່ວງ​ກົງ​ກັບ​ວັນ​ສຸກ (ມື້​ຮວງມົດ) ແຮມ 3 ຄ່ຳ ກົງ​ກັບ​ວັນ​ທີ 14 ເມ­ສາ ເວ­ລາ 3:12 ນາ­ທີ  ວັນ​ເນົາ ​ກົງ​ກັບ​ວັນ​ເສົາ ແຮມ 4 ຄ່ຳເດືອນ 5 ຖືກ​ວັນ​ທີ 15 ເມ­ສາ ວັນ​ສັງ­ຂານ​ຂຶ້ນ ຖືກ​ມື້​ວັນ​ອາ­ທິດ ກົງ​ກັບວັນ​ທີ 16 ເມ­ສາ ເວ­ລາ 6:45 ນາ­ທີ ການ​ຄິດ­ໄລ່​ຕາມ​ຫຼັກ­ການ​ບູ­ຮານລາວ​ປີ​ນີ້​ບອກ​ວ່າ: ນາກ​ຫຼິ້ນ​ນ້ຳ 7 ໂຕ ບັນ­ດານໃຫ້ຝົນ­ຕົກ 300 ຫ່າ ຕົກ­ລົງ​ມາ​ພາຍ​ໃນ​ຈັກ­ກະວານ 120 ຫ່າ ຕົກ­ລົງ​ປ່າ​ຫິ­ມະ­ພານ 90 ຫ່າ ຕົກ​ໃນ​ມະ­ຫາ​ສະ­ໝຸດ 60 ຫ່າ ຕົກ­ລົງ​ໃນ​ໂລກ​ມະນຸດ 30 ຫ່າ ຕາມ​ການ​ຄາດ​ເດົາ​ໃນ​ປະ­ຕິ­ທິນ​ບູຮານ​ບອກ​ວ່າ ຝົນ​ຕົ້ນ​ປີ​ຈະ​ໜ້ອຍ ປາຍ​ປີ​ຈະ​ຫຼາຍ ເຮັດໃຫ້​ນາ​ດອນ ແລະ ນາ​ລຸ່ມ​ມີ​ເຂົ້າ​ຂຽວ­ງາມ​ດີ ສຳ­ລັບ​ປີ​ນີ້ ໄມ້​ທີ່​ເປັນ​ພະ­ຍາ​ໄດ້­ແກ່​ໄມ້​ຈວງ​ຈັນ.

ປະ­ເພ­ນີ​ທີ່​ຄວນ​ສືບ​ທອດ​ໃນ​ປາງ​ບຸນ­ປີ­ໃໝ່​ນີ້​ຄື​ການ​ຫົດ­ສົງ​ພະ​ພຸດ​ທະ​ຮູບ ເຊິ່ງ​ປະ­ຊາ­ຊົນ​ພ້ອມດ້ວຍ​ພະ­ສົງ​ໄດ້​ຕັ້ງ­ໃຈ​ເອົາຂັນ​ດອກ​ໄມ້​ທູບ​ທຽນ ນ້ຳ​ຫອມ​ຕັ້ງ​ໄວ້ ແລ້ວ​ກ່າວ​ຄຳ​ບູ­ຊາດອກ​ໄມ້​ທູບທຽນ ປ່າວ​ສັກ​ເຄ​ເທວະ​ດາ ອະ­ທິ­ຖານ​ຂໍ​ຫົດ­ສົງ​ໃຫ້ຟ້າ​ຝົນ­ຕົກ​ເປັນ​ປົກ­ກະ­ຕິ ຝ່າຍ​ຊາວ­ບ້ານ​ອາດ​ອາໃສ​ບຸນ­ປີ­ໃໝ່​ນີ້ ເຮັດ­ບຸນ​ອຸ­ທິດ​ຫາ​ຍາດ​ພີ່­ນ້ອງ​ຜູ້ລ່ວງ​ລັບ ແລະ ພາ­ກັນທາ­ສີ​ອະ­ນາ­ໄມ​ທາດ​ດູກ​ບັນພະ​ບູ​ລຸດ ເປັນ​ການ­ສະ­ແດງ​ອອກ​ເຊິ່ງ​ຄວາມ​ກະຕັນ​ຍູ ພໍ່​ແມ່​ຜູ້​ປົກ­ຄອງ​ພາ​ລູກ​ຫຼານ​ນຳ​ເອົານ້ຳຫອມ​ໄປ​ຫົດ­ສົງ​ຂໍ​ພອນ​ຜູ້​ໃຫຍ່ (ເຖົ້າ​ແກ່) ເປັນ​ທີ່ເຄົາ­ລົບ​ຂອງ​ສັງ­ຄົມ ໃນ​ປາງ​ບຸນ­ປີ­ໃໝ່​ນີ້​ຄົນ​ລາວເຮົາ​ຍັງ​ນິ­ຍົມ​ເຮັດພະ­ທາດ​ຊາຍ​ເພື່ອ​ຖະ­ຫວາຍ​ບູຊາ​ພຸດ­ທະ­ຄຸນ ແລະ ສັງ­ຄະ​ຄຸນ ເມື່ອ​ກ່ອນ​ຖ້າເຖິງ​ບຸນ­ປີ­ໃໝ່ ຄົນ​ລາວ​ມັກ​ນິ­ຍົມ​ປ່ອຍ​ສັດ ເປັນການ­ສະ­ແດງ​ອອກ​ເຖິງ​ແນວ​ຄິດ​ຈິດ­ໃຈ​ໃນ​ການສ້າງ​ກຸ­ສົນ.

ບຸນ­ປີ­ໃໝ່​ລາວ​ຍັງ​ພົວ­ພັນ​ເຖິງ​ນິ­ທານທ້າວ​ທຳມະ​ບານກຸມ­ມານ ທີ່​ກ່ຽວ­ຂ້ອງ​ກັບ 3 ລາ­ສີ ອັນເປັນ​ວິ­ຖີ​ຊີ­ວິດ​ຂອງ​ມະ­ນຸດ ຄື: ຕອນ​ເຊົ້າ​ມະ­ນຸດ​ເຮົາມີ​ລາ­ສີ​ຢູ່​ໜ້າ ​ຕື່ນ​ເຊົ້າ​ຈຶ່ງ​ອາບ­ນ້ຳ​ລ້າງ​ໜ້າ ຕົກ​ມາຕອນ​ທ່ຽງ​ລາ­ສີ​ຢູ່​ເອິກ (ຫົວ­ໃຈ) ອາ­ກາດ​ຮ້ອນ ເຮັດໃຫ້​ອາ­ລົມ​ຄົນ​ບໍ່​ດີ ຕ້ອງ​ໄດ້​ເອົາ​ນ້ຳ​ເຢັນ​ລູບ​ໄວ້ ນີ້​ເປັນ​ປິດ­ສະ­ໜາ​ທຳ​ທີ່​ສອນ​ຄົນ​ໃຫ້​ຮູ້­ຈັກ​ທຳ​ໃຈ​ໃຫ້​ສະ­ຫງົບ​ເຢືອກ​ເຢັນ ຕອນ​ແລງລາ­ສີ​ຢູ່​ຕີນ ກ່ອນນອນ​ເພິ່ນ​ສອນ​ໃຫ້​ລ້າງ​ຕີນ​ເພື່ອ​ຄວາມ​ສະ­ອາດ ບຸນ­ປີ­ໃໝ່​ລາວ​ເຮົາ​ນີ້​ຖ້າ​ເບິ່ງ​ໃຫ້​ເລິກ ແລະ ໄຂ​ປິດສະ­ໜາ​ໃຫ້​ໄດ້​ກໍ່​ຈະ​ເກີດ​ປັນ­ຍາ ນັ້ນ​ແມ່ນ​ເວົ້າເລື່ອງ​ຮີດ­ຄອງ ສ່ວນ​ການ​ປະ­ຕິ­ບັດ​ຕົວ​ຈິງ​ໃນ​ສັງ ຄົມ​ນັ້ນ​ ກໍ່​ຕ້ອງ​ພ້ອມກັນ​ປະ­ຕິ­ບັດ​ຕາມ​ແຈ້ງ​ການຂອງ​ອຳ­ນາດ​ການ​ປົກ­ຄອງ​ເຊິ່ງ​ໃນ​ແຕ່​ລະ​ປີ​ມີ​ອອກມາ​ປະ­ຈຳ ​ຕັ້ງ­ແຕ່​ຂັ້ນ​ລັດ­ຖະ­ບານ ແຂວງ ນະ­ຄອນ ເມືອງ ແລະ ບ້ານ ເປັນ­ຕົ້ນ.