ນາຍົກເນັ້ນ ນວ ຕ້ອງປັບປຸງວຽກງານຮາກຖານຕາມທິດ 3 ສ້າງ

134 20 ມີ.ນ. 2017 ຂ່າວໜ້າ​ໜຶ່ງ
ນາຍົກເນັ້ນ ນວ ຕ້ອງປັບປຸງວຽກງານຮາກຖານຕາມທິດ 3 ສ້າງ

ວັນ​ທີ 17 ມີນາ 2017 ຢູ່ຫ້ອງ​ວ່າການ​ປົກຄອງ​ນະຄອນຫຼວງ​ວຽງ​ຈັນ (ນວ) ທ່ານ ທອງລຸນ ສີ​ສຸ​ລິດ ນາຍົກລັດຖະມົນຕີ ໄດ້​ພົບ​ປະ​ໂອ້​ລົມ​ຕໍ່​ກອງ​ປະຊຸມ​ຄົບຄະນະ​ບໍລິຫານ​ງານ​ພັກ ນວ ຄັ້ງທີ 8 ສະໄໝ​ທີ VI ເພື່ອ​ຊຸກຍູ້​ໃຫ້ອົງຄະ​ນະ​ພັກ ນວ ສືບຕໍ່​ຈັດ​ຕັ້ງປະຕິບັດ​ວຽກ​ງານ​ຊີ້​ນຳ-ນຳພາ ການ​ພັດທະນາ​ເສດຖະກິດ-ສັງຄົມຢູ່ ນວ ໃຫ້​ມີ​ຄວາມ​ເຂັ້ມແຂງຮອບດ້ານ.

ພາຍຫຼັງ​ຮັບ​ຟັງ​ລາຍ​ງານ​ຫຍໍ້ຈາກ​ທ່ານ ສິນ​ລະ​ວົງ ຄຸດ​ໄພທູນ ເລຂາ​ຄະນະ​ພັກ ເຈົ້າ​ຄອງ ນວ ກ່ຽວ​ກັບ​ສະພາບ​ລວມ​ການ​ພັດທະ​ນາ​ເສດຖະກິດ-ສັງຄົມ ໃນ​ຊຸມປີຜ່ານມາ ແລະ ບັນດາ​ຂໍ້​ສະເໜີຂອງ​ອົງການ​ປົກຄອງ ນວ ເປັນຕົ້ນ ບັນຫາ​ການ​ພັດທະນາ ແລະ ນຳ​ໃຊ້​ທີ່​ດິນທີ່​ບໍ່​ເໝາະ​ສົມ ບໍ່​ມີການ​ກຳນົດ​ທີ່​ຈະແຈ້ງ​ພາໃຫ້​ເກີດບັນຫາ​ໃນຕໍ່ໜ້າ ບັນຫາ​ຢາ​ເສບຕິດ ບັນຫາ​ຫຍໍ້ທໍ້​ໃນ​ສັງຄົມ ບັນຫາ​ງົບປະມານ​ໂຄງການ​ລົງທຶນຂອງ​ລັດ ລວມ​ທັງ​ໂຄງການໃຫຍ່ໆ​ຢູ່ ນວ ທີ່​ໄດ້​ສະເໜີ​ໄປ​ຍັງລັດຖະບານ ແຕ່​ຍັງ​ບໍ່​ທັນ​ໄດ້​ຮັບຄຳ​ຕອບ​ແກ້​ໄຂ ໂດຍ​ສະເພາະແມ່ນ​ໂຄງການ​ພັດທະນາ​ແຄມຂອງ​ໄລຍະ 2 ແລະ ໂຄງການກໍ່ສ້າງ​ເສັ້ນທາງສີ​ໄຄ-ສີ​ເກີດ ເປັນຕົ້ນ.

ໂອກາດ​ດັ່ງກ່າວ ທ່ານ​ນາຍົກລັດຖະມົນຕີ ໄດ້​ສະແດງ​ຄວາມ​ເຫັນຄຽງ​ຄູ່​ກັບ​ຈຸດ​ດີ​ດັ່ງກ່າວ ນວ ກໍ່​ຍັງ​ມີ​ຈຸດ​ອ່ອນ ແລະ ຂໍ້​ຄົງຄ້າງ​ທີ່​ຕ້ອງ​ໄດ້​ພ້ອມ​ກັນ​ປັບປຸງແກ້​ໄຂ ໂດຍ​ສະເພາະແມ່ນ​ບັນຫາການ​ເກັບ​ລາຍ​ຮັບ​ເຂົ້າ​ງົບ​ປະມານ ​ທີ່​ບໍ່​ໄດ້​ຕາມ​ແຜນການ ເຊິ່ງບັນຫາ​ດັ່ງກ່າວ​ ທ່ານ​ນາຍົກ​ໄດ້ເນັ້ນ​ໃຫ້  ນວ ຕ້ອງ​ສ້າງ​ຖານ​ເກັບລາຍ​ຮັບ​ທີ່​ແນ່ນອນ ແລະ ສອດຄ່ອງ​ກັບ​ສະພາບ​ຕົວ​ຈິງ ບັນຫາການ​ແກ້​ໄຂ​ຮ້ານ​ບັນເທີງ ຮ້ານກິນ​ດື່ມໃກ້​ກັບ​ສະຖານທີ່​ການ​ສຶກສາ ອົງການປົກຄອງ ນວ ຍັງ​ຕ້ອງ​ໄດ້​ເພີ່ມ​ທະວີ​ປັບປຸງ​ວຽກ​ງານ​ຮາກ​ຖານ ໃຫ້ມີ​ຄວາມ​ເຂັ້ມແຂງ​ຕາມ​ທິດ 3 ສ້າງ ປັບປຸງ​ກົງຈັກ​ການຈັດຕັ້ງທຸກ​ຂັ້ນ​ໃຫ້​ສອດຄ່ອງການ​ແກ້​ໄຂ​ບັນຫາການ​ຈໍ​ລະ​ຈອນ​ແອ​ອັດ ລວມ​ທັງການ​ເອົາໃຈໃສ່​ຢ່າງ​ຕັ້ງໜ້າ​ສົ່ງເສີມ​ຫົວໜ່ວຍ​ທຸລະ​ກິດ SME ແລະ MSME ທີ່ຢູ່ ນວ ຫຼາຍ​ກວ່າ 35.000 ຫົວໜ່ວຍ ໃຫ້​ມີ​ຄວາມເຂັ້ມແຂງ​ຮອບດ້ານ ເພື່ອ​ຊຸກຍູ້ໃຫ້ ນວ ທີ່​ເປັນ​ຖານ​ລາຍ​ຮັບ​ໃຫຍ່ທີ່​ສຸດ​ຂອງ​ປະເທດ (ກວ່າ 40%).

ຂ່າວທີ່ກ່ຽວຂ້ອງ