ນະຄອນເສິງຕູ ສົນໃຈແຮກສ່ຽວກັບນະຄອນຫຼວງວຽງຈັນ

285 17 ມີ.ນ. 2017 ຂ່າວໜ້າ​ໜຶ່ງ

ວັນ​ທີ 13 ມີນາ 2017 ທີ່ຫ້ອງ​ວ່າການ ນວ ທ່ານ​ນາງ ຄຳ​ຟອງ ພູມ​ວົງ​ໄຊ ຮອງ​ປະທານສະພາ​ປະຊາຊົນນະຄອນຫຼວງວຽງ​ຈັນ (ນວ) ໄດ້​ຕ້ອນຮັບ​ການເຂົ້າ​ຢ້ຽມ​ຄຳນັບ​ຂອງ​ທ່ານ ອ້າວ ຊີ​ກຸຍ ຮອງ​ປະທານ​ສະພາ​ປະຊາຊົນ ນະຄອນ​ເສິງ​ຕູ ແຂວງ​ເຊສວນ ​ສປ ຈີນ ພ້ອມ​ດ້ວຍ​ຄະນະ ໃນ​ໂອກາດ​ເດີນທາງ​ມາ​ຢ້ຽມຢາມ ນວ ແລະ ເມືອງ​ຫຼວງ​ພະບາງ.

ໂອກາດ​ດັ່ງກ່າວ ທ່ານ​ນາງ ຄຳ​ຟອງ ພູມ​ວົງ​ໄຊ ໄດ້​ສະແດງຄວາມ​ຕ້ອນຮັບ​ຕໍ່​ການ​ມາ​ຢ້ຽມຢາມ ​ສປປ ລາວ ຄັ້ງ​ນີ້​ຂອງ​ຄະນະ​ຜູ້​ແທນ​ດັ່ງກ່າວ ເຊິ່ງ​ການ​ພົບປະ​ສອງ​ຝ່າຍ ​ໄດ້​ຕີ​ລາຄາ​ສູງ​ຕໍ່​ຜົນສຳເລັດ​ຂອງ​ການ​ຮ່ວມ​ມື​ສອງພັກ-ສອງ​ລັດ ກໍ່​ຄືປະຊາຊົນ​ສອງຊາດ​ລາວ-ຈີນ​ໃນ​ໄລຍະ​ຜ່ານ​ມາ ທີ່​ສອງ​ປະເທດ​ມີ​ມູນເຊື້ອ​ສາຍ​ພົວພັນ​ສະໜິດ​ແໜ້ນ​ມາ​ຍາວ​ນານ ນະຄອນ​ເສິງ​ຕູ ເປັນ​ເມືອງ​ເອກຂອງ​ແຂວງ​ເຊ​ສວນ ມີ​ພົນ​ລະເມືອງ 16 ລ້ານ​ກວ່າ​ຄົນ ມີ​ເນື້ອທີ່ທັງ​ໝົດ 14 ພັນ​ກວ່າ​ກິ​ໂລ​ຕາແມັດ ພາຍຫຼັງ ​ສປ ຈີນ ເປີດ​ປະຕູສູ່​ພາຍ​ນອກ ເສິງ​ຕູ​ໄດ້​ມີ​ການ​ພັດທະ​ນາ​ຢ່າງ​ຕໍ່​ເນື່ອງ ແລະ ໃນ​ໄລຍະ​ຜ່ານ​ມາ ​ໄດ້​ມີ​ບໍລິສັດ​ຈາກ​ເສິງຕູ​ກໍ່​ຄື​ແຂວງ​ເຊ​ສວນ​ ມາ​ລົງທຶນ​ຢູ່ລາວ​ຫຼາຍ​ໂຄງການ​ສົມຄວນ ສຳລັບ​ການ​ມາ​ຢ້ຽມຢາມ ນວ ຄັ້ງ​ນີ້ ເພື່ອ​ສືບຕໍ່​ເສີມ​ຂະຫຍາຍ​ສາຍ​ພົວພັນ​ຮ່ວມ​ມື​ລະຫວ່າງ ນວ ກັບ​ເສິງຕູ ທາງ​ດ້ານ​ວັດທະນະທຳ ການຄ້າ ແລະ ອື່ນໆ ໂດຍ​ສະເພາະກໍ່​ແມ່ນ​ມີ​ຄວາມ​ສົນໃຈ​ການ​ຮ່ວມມື​ເປັນ​ນະຄອນ​ແຮກສ່ຽວ​ໃນ​ອະນາ​ຄົດ​ຂ້າງ​ໜ້າ.

ຂ່າວທີ່ກ່ຽວຂ້ອງ