ຄັດເລືອກນັກຮຽນເກ່ງ 11 ຄົນ ເຂົ້າສອບເສັງລະດັບຊາດ

326 16 ມີ.ນ. 2017 ຂ່າວໜ້າ​ໜຶ່ງ
ຄັດເລືອກນັກຮຽນເກ່ງ 11 ຄົນ ເຂົ້າສອບເສັງລະດັບຊາດ

ເພື່ອ​ເປັນ​ການ​ກະຕຸກ​ຊຸກຍູ້ຂະ​ບວນ​ການ​ຮຽນ-ການ​ສອນຂອງຄູ-ອາຈານ ແລະ ນັກຮຽນໃຫ້​ມີ​ຄວາມ​ຫ້າວຫັນ ເອົາໃຈໃສ່ການ​ສິດສອນ-ຮ່ຳຮຽນ ຮັບ​ປະກັນ​ໄດ້​ໃນ​ການຈັດຕັ້ງ​ປະຕິບັດ ໂຄງການ​ຫຼັກສູດເປັນ​ການ​ປະຕິບັດ 3 ຂໍ້ແຂ່ງຂັນ​ທີ່​ກະຊວງ​ສຶກສາ​ທິ​ການ ແລະ ກີລາ​ວາງ​ອອກ ທັງ​ເປັນ​ການ​ກວດກາ​ປະ​ເມີນ​ຜົນການ​ພັດທະນາ​ການ​ສຶກ​ສາ ເພື່ອຄັດ​ເລືອກ​ຕົວ​ແທນ​ນັກຮຽນ​ເກ່ງ ຄູ​ສອນ​ດີເດັ່ນ ແລະ ສົ່ງ​ຕົວ​ແທນນັກຮຽນ​ເກ່ງ​ເຂົ້າ​ຮ່ວມ​ການ​ສອບເສັງ​ນັກຮຽນ​ເກ່ງ​ລະດັບ​ຊາດ.

ຜ່ານ​ການຈັດຕັ້ງ​ປະຕິບັດ​ໂຄງການ​ຄັດ​ເລືອກ​ຕົວ​ແທນ​ນັກຮຽນເກ່ງ​ມາ​ແຕ່​ຕົ້ນ ສົກຮຽນ 2016-2017 ການ​ສອບເສັງ​ຄັດ​ເລືອກແຕ່​ລະ​ຂັ້ນ ມາ​ຮອດ​ປັດຈຸບັນ ມີນັກຮຽນ​ຜ່ານ​ເຂົ້າ​ຮອບ​ຄັດ​ເລືອກທັງ​ໝົດ 563 ຄົນ ຍິງ 390 ຄົນ ໃນ​ນັ້ນ ຂັ້ນ ປ5 ມີ 146 ຄົນ ຍິງ 112 ຄົນ ສອບເສັງ​ວິຊາ​ພາສາລາວ ຄະນິດສາດ ແລະ ວິຊາໂລກ​ອ້ອມ​ຕົວ ຂັ້ນ ມ4 ມີ 222 ຄົນ ຍິງ 163 ຄົນ ສອບເສັງ​ວິຊາພາສາ​ລາວ-ວັນນະຄະດີ ຄະນິດສາດ ເຄ​ມີ​ສາດ ແລະ ວິຊາ​ຟີຊິກ​ສາດ ແລະ ຂັ້ນ ມ7 ມີ 195 ຄົນ ຍິງ 115 ຄົນ ວິຊາ​ສອບເສັງຄື​ກັນ​ກັບ​ຂັ້ນ ມ4.

ສຳລັບ​ສົກຮຽນ​ນີ້​ ຈະ​ຄັດ​ເຂົ້າພຽງ​ວິຊາ​ລະ​ຄົນ​ຂອງ​ແຕ່​ລະ​ຂັ້ນ ລວມ 11 ຄົນ​ເທົ່າ​ນັ້ນ ເພື່ອ​ເຂົ້າຮ່ວມ​ການ​ສອບເສັງ​ລະດັບ​ຊາດ ​ທີ່​ຈະ​ມີ​ຂຶ້ນ​ໃນ​ທ້າຍ​ເດືອນ​ເມສາ 2017 ຢູ່​ມະຫາວິທະຍາໄລ​ແຫ່ງຊາດ ພິທີ​ເປີດ​ການ​ສອບເສັງຄັດເລືອກ​ຕົວ​ແທນ​ນັກຮຽນ​ເກ່ງ​ຂັ້ນນະຄອນຫຼວງ​ວຽງ​ຈັນ ​ປະຈຳ​ສົກຮຽນ 2016-2017 ໄດ້​ຈັດ​ຂຶ້ນ​ວັນທີ 14 ມີນາ 2017 ທີ່​ໂຮງຮຽນ ​ມສ ວຽງ​ຈັນ ໂດຍ​ເປັນ​ປະທານຂອງ​ທ່ານ ຊົມ​ພູ ແກ້ວ​ປັນຍາ ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ ນະຄອນຫຼວງ​ວຽງ​ຈັນ ມີ​ຜູ້ຕາງໜ້າ​ຈາກ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ