ສົ່ງເສີມຄວາມສະເໝີພາບເຂົ້າໃນການສຶກສາ

256 16 ມີ.ນ. 2017 ຂ່າວໜ້າ​ໜຶ່ງ
ສົ່ງເສີມຄວາມສະເໝີພາບເຂົ້າໃນການສຶກສາ

ອົງການ​ແພລນ​ສາກົນ ແລະ ກະຊວງ​ການ​ຕ່າງປະເທດ​ຍີ່ປຸ່ນ ສະໜັບສະໜູນ​ທຶນ​ໃຫ້​ແກ່ “ໂຄງການ​ສົ່ງເສີມ​ຄວາມ​ສະເໝີພາບບົດບາດຍິງ-ຊາຍ ເຂົ້າ​ໃນ​ການສຶກ​ສາ​ຊັ້ນ​ມັດທະຍົມ​ສຶກ​ສາ” ເພື່ອ​ເພີ່ມ​ຄວາມ​ອາດ​ສາມາດ ໃນ​ການ​ເຂົ້າ​ເຖິງ​ການ​ສຶກ​ສາ​ຂັ້ນມັດທະຍົມ​ແກ່​ເດັກ​ຍິງ​ທີ່​ດ້ອຍ​ໂອກາດ​ໃນ​ແຂວງ​ບໍ່​ແກ້ວ ໂຄງການດັ່ງກ່າວ​ ໄດ້​ລວມ​ເອົາ​ການ​ກໍ່ສ້າງຫໍ​ພັກ​ທີ່​ໄດ້​ມາດຕະຖານ ເຮືອນຄົວ ແລະ ຫ້ອງ​ນ້ຳ ການ​ເຝິກ​ອົບຮົມ​ຄູ ໂຮງຮຽນ​ມັດທະຍົມ​ສົມບູນ 10 ແຫ່ງ (ລວມ​ນັກຮຽນ​ມັດທະ​ຍົມ​ສຶກ​ສາ 4.306 ຄົນ ແລະ ຄູ 246 ທ່ານ) ໃນ​ເມືອງ​ຜາ​ອຸດົມ.

ໃນ​ວັນ​ທີ 13 ມີນາ 2017 ທີ່​ນະຄອນຫຼວງ​ວຽງ​ຈັນ ອົງການແພລນ​ສາກົນ ປະຈຳ ​ສປປ ລາວ ຮ່ວມ​ກັບ​ກະຊວງ​ສຶກ​ສາ​ທິ​ການ ແລະ ກີລາ ໄດ້​ເຊັນ​ບົດ​ບັນທຶກຄວາມ​ເຂົ້າໃຈ ໃນ​ໂຄງການ​ດັ່ງກ່າວ​ຂຶ້ນ ລະຫວ່າງທ່ານ​ນາງ ໂມ​ນາ ເກີ​ກິສ ຜູ້ອຳນວຍການອົງການ​ແພລນ​ສາກົນ ​ປະຈຳ ​ສປປ ລາວ ແລະ ທ່ານ ວັນ​ດີ ທຳມະ​ວົງ ຮອງ​ຫົວໜ້າ​ພະ​ແນກສຶກສາ ແລະ ກີລາ​ ແຂວງ​ບໍ່​ແກ້ວ ມີທ່ານ ຄຳ​ຜາຍ ສີ​ສະຫວັນ ຮອງລັດຖະມົນຕີ​ກະຊວງ​ສຶກ​ສາ​ທິການ ແລະ ກີລາ ພ້ອມ​ດ້ວຍພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ໃນ​ການ​ສະໜັບສະໜູນ​ຈາກກະຊວງ​ການ​ຕ່າງປະເທດ​ຍີ່ປຸ່ນ ອົງການ​ແພລນ​ສາກົນ​ ປະຈຳ​ຍີ່ປຸ່ນ ແລະ ອົງການ​ແພລນ​ສາກົນ ປະຈຳ ​ສປປ ລາວ ໄດ້​ຮ່ວມ​ກັນຈັດ​ຕັ້ງ​ປະຕິບັດ​ໂຄງການ​ດັ່ງກ່າວ ໃນ​ໄລຍະ 3 ປີ ລວມ​ມູນ​ຄ່າ​ການຊ່ວຍເຫຼືອ​ທັງ​ໝົດ 826.147 ໂດລາ​ສະຫະລັດ ຫຼື ປະມານ 6,7 ຕື້​ກວ່າ​ກີບ.

ອົງການ​ແພລນ​ສາກົນ ​ສ້າງຕັ້ງໃນ​ປີ 1937 ແມ່ນ​ໜຶ່ງ​ໃນ​ອົງການຈັດຕັ້ງ​ເພື່ອ​ການ​ພັດທະນາສາກົນ​ທີ່​ເກົ່າ​ແກ່ ແລະ ໃຫຍ່​ທີ່ສຸດ​ໃນ​ໂລກ ໂດຍ​ເຮັດ​ວຽກ​ຮ່ວມກັນ​ກັບ​ຜູ້​ຄົນ​ຫຼາຍ​ລ້ານ​ຄົນ​ທົ່ວໂລກ ​ເພື່ອ​ຢຸດຕິ​ໄພ​ທຸກ​ຍາກ​ຢູ່​ທົ່ວໂລກ ພັດທະນາ​ຄວາມ​ກ້າວໜ້າຂອງ​ສິດທິ​ເດັກນ້ອຍ ແລະ ຄວາມ​ສະເໝີພາບ​ເພື່ອ​ເດັກ​ຍິງ ປີ 2007 ໂດຍ​ດຳເນີນ​ໂຄງການ​ໃນແຂວງ​ບໍ່​ແກ້ວ ອຸດົມ​ໄຊ ແລະ ສາລະ​ວັນ ທີ່​ສຸມ​ໃສ່​ການ​ປັບປຸງການ​ເຂົ້າ​ເຖິງ​ການ​ສຶກ​ສາ​ທີ່​ມີຄຸນະພາບ​ສູງ​ໃຫ້​ເດັກ.

ຂ່າວທີ່ກ່ຽວຂ້ອງ