ອະ­ດີດ​ປະ­ທາ­ນາ­ທິ­ບໍ­ດີ​ເອ​ຢິບ ໄດ້​ຮັບ​ການ​ປ່ອຍ​ຕົວ

336 15 ມີ.ນ. 2017 ຂ່າວຕ່າງປະເທດ
ອະ­ດີດ​ປະ­ທາ­ນາ­ທິ­ບໍ­ດີ​ເອ​ຢິບ ໄດ້​ຮັບ​ການ​ປ່ອຍ​ຕົວ

ວັນ​ທີ 13 ມີ­ນາ​ນີ້ ຜູ້​ພິ­ພາກ­ສາຄົນ​ໜຶ່ງ​ຂອງ​ເອ​ຢິບ ໄດ້​ອະ­ນຸ­ຍາດໃຫ້​ອະ­ດີດ​ປະ­ທາ­ນາ­ທິ­ບໍ­ດີ​ເອ​ຢິບ ຮົສ​ນີ ມູ​ບາ​ຣັກ ມີ​ອິດສະ­ລະ​ພາບ ຫຼັງ​ຈາກ​ທີ່​ສານ​ອຸ­ທອນ​ສູງ​ສຸດຂອງ​ປະ­ເທດ​ນີ້ ປະ­ກາດ​ໃຫ້​ເຂົາປອດ​ຄະ­ດີ ສຳ­ລັບ​ການ​ກ່າວ​ຫາວ່າ​ເຂັ່ນ­ຂ້າ​ຜູ້ປະ​ທ້ວງ ເມື່ອ​ປີ 2011.

ທະ­ນາຍ­ຄວາມ ຟາ​ຣິດ ອາ​ລ-ດິບ ເວົ້າ​ວ່າ ອະ­ດີດ​ປະ​ທາ​ນາ​ທິບໍ­ດີ ຮົສ​ນີ ມູ​ບາ​ຣັກ ສາ­ມາດ​ກັບເມືອ​ເຮືອນ​ໄດ້​ທັນ­ທີ​ທີແພດ​ໝໍອະ­ນຸ­ຍາດ ແຕ່​ເຖິງ​ຢ່າງ­ໃດ​ກໍ່​ຕາມ ທ່ານ ມູ​ບາ​ຣັກ ຈະ​ບໍ່​ໄດ້​ອອກ​ໄປນອກ​ປະ­ເທດ ຈົນ​ກວ່າ​ວ່າ​ຈະ​ສິ້ນສຸດ​ການສືບ­ສວນ​ກ່ຽວ​ກັບ​ການ​ສໍ້ລາດ​ບັງ​ຫຼວງ.

ໃນ​ໄລ­ຍະ​ເວ­ລາ​ທີ່​ຖືກ​ກັກ​ຂັງ ນັບ​ແຕ່​ປີ 2011 ເປັນ­ຕົ້ນ​ມາ​ນັ້ນ ອະ­ດີດ​ປະ­ທາ­ນາ­ທິ­ບໍ­ດີ ຮົສ​ນີ ມູບາ​ຣັກ ໄວ 88 ປີ ຕ້ອງ​ໄດ້ຢູ່​ໃນສະ​ຖາ​ບັນ​ການ​ແພດ​ຂອງ​ທະຫານ​ມາ​ໂດຍ​ຕະ­ຫຼອດ.

ກ່ອນ​ໜ້າ​ນັ້ນ ເມື່ອ​ວັນ​ທີ 2 ມີ­ນາ​ທີ່​ຜ່ານ​ມາ ສານ​ດັ່ງ­ກ່າວ​ໄດ້ປະ­ກາດ​ການ​ປອດ​ຄະ­ດີ ສຳ­ລັບ ທ່ານ ມູ​ບາ​ຣັກ ຊຶ່ງ​ນີ້​ເປັນການ​ພິຈາ­ລະ​ນາ­ຄະ​ດີ​ວາ­ລະ​ສຸດ​ທ້າຍ ກັບ​ທ່ານ ມູ​ບາ​ຣັກ ການ​ຕັດ­ສິນຂອງ​ສານ​ທີ່​ມີ​ອອກ​ມາ​ນັ້ນ ​ກໍ່​ເປັນການ​ຕັດ­ສິນ​ສຸດທ້າຍ ແລະ ບໍ່​ມີການ​ສູ້​ຄະ­ດີ​ອີກ.

ທ່ານ ມູ​ບາ​ຣັກ ຖືກ​ກ່າວ​ຫາວ່າ ​ກໍ່­ໃຫ້­ເກີດ​ການ​ຕາຍ​ຂອງ​ບັນດາ​ຜູ້​ປະ​ທ້ວງ ຢູ່​ໃນ​ກະ­ແສ​ຜູ້​ປະທ້ວງ​ທີ່​ກໍ່­ໃຫ້­ເກີດ​ຄວາມ​ວຸ້ນ­ວາຍ ແກ່­ຍາວ​ເປັນ​ເວ­ລາ 18 ວັນ ເມື່ອປີ 2011 ຕາມ​ສະ­ຖິ­ຕິ​ແລ້ວ ມີ​ຜູ້ເສຍ​ຊີ­ວິດ​ປະ­ມານ 850 ຄົນ ໃນລະ­ຫວ່າງ​ເກີດການ​ປະ​ທະ​ກັນ ລະຫວ່າງ​ຕຳ­ຫຼວດ​ກັບ​ຜູ້​ປະ​ທ້ວງ​ໃນເວ­ລາ​ນັ້ນ.

ທ່ານ ມູ​ບາ​ຣັກ ຖືກ​ຕັດ­ສິນໃຫ້​ຈຳ​ຄຸກ​ຕະ­ຫຼອດ​ຊີ­ວິດ​ໃນ​ປີ 2012 ແຕ່​ຫຼັງ​ຈາກ​ນັ້ນ 2 ປີ ສານອຸ­ທອນ​ແຫ່ງ​ໜຶ່ງ​ໄດ້​ປະ­ຕິ­ເສດຄຳກ່າວ​ຫາ ແລະ ສະ­ເໜີ​ໃຫ້​ດຳ­ເນີນການ​ພິ­ຈາ­ລະ­ນາ​ຄືນ­ໃໝ່​ກ່ຽວ​ກັບຄະ­ດີ​ນີ້.

ຂ່າວທີ່ກ່ຽວຂ້ອງ