2016 ເປັນ​ປີ​ທີ່​ຂີ້­ຮ້າຍ​ທີ່​ສຸດ​ສຳ­ລັບ​ເດັກ­ນ້ອຍ​ຊີ​ຣີ

74 15 ມີ.ນ. 2017 ຂ່າວຕ່າງປະເທດ
2016 ເປັນ​ປີ​ທີ່​ຂີ້­ຮ້າຍ​ທີ່​ສຸດ​ສຳ­ລັບ​ເດັກ­ນ້ອຍ​ຊີ​ຣີ

ບົດ​ລາຍ​ງານ​ຂອງ​ອົງ­ການ​ກອງ​ທຶນ​ສຳ­ລັບ​ເດັກ­ນ້ອຍຂອງ​ອົງ­ການ​ສະ­ຫະ​ປະ­ຊາ​ຊາດ (UNICEF) ທີ່​ນຳ​ອອກ​ມາ​ເປີດ­ເຜີຍ​ເມື່ອ​ວັນ​ທີ 13 ມີ­ນາ​ນີ້ ລະ­ບຸ​ວ່າ ໃນ​ປີ 2016 ມີ​ເດັກ­ນ້ອຍ​ເສຍ​ຊີ­ວິດ 650 ກວ່າ​ຄົນ ຢູ່​ໃນ​ປະ­ເທດ​ຊີ​ຣີ ນັບ​ວ່າ​ເປັນ​ປີ​ທີ່​ນອງ​ເລືອດ​ທີ່​ສຸດ​ສຳ­ລັບ​ເດັກ­ນ້ອຍ​ຢູ່​ໃນ​ປະ­ເທດ​ນີ້. 

UNICEF ໃຫ້​ຮູ້​ວ່າ ຈຳ­ນວນ​ເດັກ­ນ້ອຍ​ທີ່​ຖືກ​ເຂັ່ນ­ຂ້າ ໄດ້​ຮັບບາດ­ແຜ​ຕິດ​ຕົວ ຫຼື ຖືກ​ຮັບ​ສະ­ໝັກເຂົ້າ​ໄປ​ໃນ​ບັນ­ດາ​ກຸ່ມ​ປະ­ກອບ​ອາວຸດ​ໃນ​ຊີ​ຣີ ໄດ້​ເພີ່ມ​ຂຶ້ນ​ສູງ​ເປັນ​ປະຫວັດ​ການ ພາຍ​ໃນ​ປີ 2016 ມີເດັກ­ນ້ອຍ​ເສຍ​ຊີ­ວິດ​ຢ່າງ​ໜ້ອຍ 652 ຄົນ ໃນປີ 2016 ເພີ່ມ​ຂຶ້ນ 20% ເມື່ອ​ທຽບ­ໃສ່​ປີ 2015 ໃນ​ຈຳ­ນວນ​ນັ້ນ​ມີ​ເດັກ­ນ້ອຍ 255 ຄົນ ຖືກ​ທຳ­ຮ້າຍ​ຈົນ​ເຖິງ​ແກ່ຄວາມ​ຕາຍ​ຢູ່​ພາຍ​ໃນ ຫຼື ໃກ້​ກັບໂຮງ­ຮຽນ ໃນ​ຂະ­ນະ​ດຽວ​ກັນ ມີເດັກ­ນ້ອຍ 850 ຄົນ​ເປັນ​ຢ່າງໜ້ອຍ ​ຖືກ​ຮັບ​ສະ­ໝັກ​ເຂົ້າ​ໄປ​ໃນບັນ­ດາກຸ່ມ​ປະ­ກອບ​ອາ­ວຸດ ຊຶ່ງເປັນ​ຕົວ​ເລກ​ທີ່​ສູງ​ທົບ​ສອງ​ເທົ່າຕົວຂອງ​ປີ 2015.

ບົດ​ລາຍ​ງານ​ຂອງ UNICEF ກໍ​ລະ­ບຸ​ວ່າ ມີ​ເດັກ­ນ້ອຍ​ປະ­ມານ 1,7 ຄົນ​ຕ້ອງ​ໄດ້​ເຊົາ​ການ​ຮຽນ ໄລ່​ສະ­ເລ່ຍ​ແລ້ວ​ໂຮງ­ຮຽນໃນ​ຊີ​ຣີ ສາມ​ແຫ່ງ​ໃດ​ ແມ່ນ​ມີ​ໜຶ່ງ​ແຫ່ງທີ່​ບໍ່​ສາ­ມາດ​ນຳ​ໃຊ້​ໄດ້ ຍ້ອນ​ວ່າພື້ນ­ຖານ​ການ​ສຶກ​ສາ​ເຫຼົ່າ­ນັ້ນ​ຖືກຢຶດ​ຄອງ​ໂດຍ​ບັນ­ດາ​ກຸ່ມ​ປະ­ກອບອາ­ວຸດ.

ປັດ­ຈຸ­ບັນ​ນີ້ ມີ​ເດັກ­ນ້ອຍ​ຊີ​ຣີ ປະ­ມານ 2,3 ຄົນ ພວມ​ລີ້​ໄພ​ຢູ່ໃນ​ປະ­ເທດ​ລີ​ບັງ ຕວກ​ກີ ຊອກ​ດານີ ເອ​ຢິບ ແລະ ອີ​ຣັກ ໃນຂະ­ນະ​ທີ່ມີ​ເດັກ­ນ້ອຍ 280.000 ຄົນ ຍັງຕິດ​ຄ້າງ​ຢູ່​ໃນ​ຊີ​ຣີ ທ່າມ­ກາງ​ສະພາບ​ຂາດ­ແຄນ​ສະ­ບຽງ​ອາ­ຫານ ແລະ ຢາ​ປົວ​ພະ­ຍາດ.

ການ​ພິ­ພາດ​ແກ່­ຍາວ​ເປັນ​ເວລາ​ເກືອບ 6 ປີ ຢູ່​ໃນ​ຊີ​ຣີ ໄດ້​ເຮັດໃຫ້​ມີ​ຜູ້​ເສຍ​ຊີ­ວິດ​ກວ່າ 310.000 ຄົນ ແລະ ອີກ​ຫຼາຍ​ລ້ານຄົນ​ຕ້ອງໜີ​ອອກ​ໄປ​ຈາກ​ເຮືອນ​ຊານ​ເພື່ອໜີ​ໄພ ໃນ​ຂະ­ນະ​ດຽວ​ກັນ ອົງການ​ຕິດ­ຕາມ​ສິດ­ທິ​ມະ­ນຸດ​ຊີ​ຣີ (SOHR) ແຈ້ງ​ໃຫ້ຮູ້­ເມື່ອ​ວັນ​ທີ 13 ມີ­ນາ​ນີ້​ວ່າ ສົງ­ຄາມ​ໃນ​ຊີ​ຣີ​ທີ່ແກ່­ຍາວ​ມາ​ເປັນ​ເວ­ລາ 6 ປີ ໄດ້ເຮັດ​ໃຫ້​ມີ​ຜູ້​ເສຍ​ຊີ­ວິດ 320.000 ກວ່າ​ຄົນ.

ຂ່າວທີ່ກ່ຽວຂ້ອງ