ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ປາ​ກິດ​ສະ­ຖານ ອິນ​ໂດ​ເນ​ເຊຍ

1.380 02 ມີ.ນ. 2017 ຫົວຂໍ້ຂ່າວອື່ນໆ

ສິ່ງ​ທີ່​ຄວນ​ເບິ່ງ​ໄວ້​ເປັນ​ບົດ­ຮຽນ​ປະ­ຈຳ​ວັນ​ນີ້ ມີ​ກົດ­ໝາຍ​ຫ້າມ​ການ​ແຕ່ງ­ດອງ​ລະ­ຫວ່າງ​ບຸກ­ຄົນທີ່​ບໍ່​ທັນ​ບັນ­ລຸ​ນິ­ຕິ­ພາ­ວະ​ຢູ່​ ​ປາ​ກິດ​ສະ­ຖານ ການ​ປະ­ຕິບັດ​ກົດ­ໝາຍ​ຊາ​ຣີ​ຢາ ຢູ່​ ອິນ​ໂດ​ເນ​ເຊຍ.

ທີ່ ປາ​ກິດ​ສະ­ຖານ: ໜັງ­ສື­ພິມ​ຜູ້​ແທນ​ປະ­ຊາ­ຊົນສຽງ​ຂອງ​ສະ­ພາ​ແຫ່ງ​ຊາດ ສະ­ບັບ​ປະ­ຈຳ​ວັນ​ທີ 16-19 ເດືອນ​ກຸມ­ພາ​ນີ້ ໄດ້ໃຫ້​ຮູ້​ວ່າ ສະ­ພາ​ແຫ່ງ​ຊາດ​ປະເທດ​ປາ​ກິດ​ສະ­ຖານ ໄດ້​ຮັບ­ຮອງ​ເອົາ​ກົດ­ໝາຍ​ຫ້າມການ​ແຕ່ງ­ດອງ​ລະ­ຫວ່າງ​ເດັກ ​ໃນ​ວັນ​ທີ 6 ເດືອນກຸມ­ພາ ປີ​ນີ້ ຕາມ​ຕົວ​ເລກ​ສະ­ຖິ­ຕິ​ການ​ແຕ່ງ­ດອງ​ລະຫວ່າງ​ບຸກ­ຄົນ​ທີ່​ບໍ່​ທັນ​ບັນ­ລຸ​ນິ­ຕິ­ພາ­ວະ​ຢູ່​ປະ­ເທດ​ນີ້ ຍັງ​ຢູ່​ໃນລະ­ດັບ​ສູງ​ຄື ເດັກ​ຍິງ 1 ໃນ 5 ຄົນ​ໃດ ​ຖືກບັງ­ຄັບ​ໃຫ້​ແຕ່ງ­ດອງ ສຳ­ລັບ​ກົດ­ໝາຍ​ທີ່​ຫາ­ກໍ່​ຮັບຮອງ​ເອົາ​ໃໝ່ໆ​ສະ­ບັບ​ນີ້ນັ້ນ ​ໄດ້ກຳ­ນົດ​ໂທດ​ໜັກກວ່າ​ເກົ່າ​ສຳ­ລັບ​ຜູ້​ຝ່າ­ຝືນ​ ຄື​ ຈະ​ຖືກ​ລົງ­ໂທດ​ຕັດ​ອິດສະ­ຫຼະ​ພາບ ຢ່າງ​ໜ້ອຍ 5 ປີ ແລະ ສູງ​ສຸດ​ບໍ່​ເກີນ 10 ປີ ສ່ວນ​ມູນ​ຄ່າ​ການ​ປັບ​ໃໝ​ນັ້ນ​ສູງ​ເຖິງ 1 ລ້ານຣູ​ປີ (ສະ­ກຸນ​ເງິນ​ປາ​ກິດ​ສະ­ຖານ ເທົ່າ​ກັບ 9.547 ໂດ​ລາ​ສະ­ຫະ­ລັດ) ຕາມກົດ­ໝາຍ​ສະ­ບັບ​ເກົ່າ​ນັ້ນ ໂທດ​ຕັດ​ອິດ­ສະ­ຫຼະ­ພາບ​ຕ່ຳ​ສຸດ 3 ປີ ແລະ ປັບ​ໃໝແມ່ນ 500.000 ຣູ​ປີ ການ​ລົງ­ໂທດ​ທີ່​ໜັກ­ໜ່ວງ​ຂຶ້ນກວ່າ​ເກົ່າ​ນີ້ ແມ່ນ​ເພື່ອ​ຄວບ​ຄຸມ​ບັນ­ຫາ​ການ​ແຕ່ງດອງ​ກ່ອນ​ໄວ​ອັນ​ຄວນ​ນັບ​ມື້​ແຜ່​ກວ້າງ ຍ້ອນ​ບົດ​ລົງໂທດ​ໃນ​ກົດ­ໝາຍ​ສະ­ບັບ​ເກົ່າ​ເບົາ­ບາງ​ເກີນ​ໄປ ຕາມສະ­ຖິ­ຕິ​ຂອງ​ອົງ­ການ​ອຸຍ​ນິ​ເຊັບ (UNICEF) ປະມານ 21% ຂອງ​ແມ່­ຍິງ​ປາ​ກິດສະ­ຖານ​ ແຕ່ງ­ດອງກ່ອນ​ອາ­ຍຸ 18 ປີ ສ່ວນ​ແມ່­ຍິງ​ທີ່​ບໍ່​ແມ່ນ​ຊາວ​ມຸດ​ສະລິມ​ນັ້ນ ກວມ​ອັດ­ຕາ 4% (ໃນ​ການ​ແຕ່ງ­ດອງ​ໃນໄວ​ເດັກ) 58% ຂອງ​ເດັກ​ຍິງ​ທີ່​ແຕ່ງ­ດອງ​ໃນ​ເກນອາ­ຍຸ​ຫຼຸດ 18 ປີ ອາ­ໄສ​ຢູ່​ເຂດ​ຊົນ­ນະ­ບົດ ກົດ­ໝາຍຫ້າມ​ແຕ່ງ­ດອງ​ໃນ​ໄວເດັກ​ສະ­ບັບ​ປັບ­ປຸງ​ໃໝ່​ນີ້ ຍັງໄດ້​ກຳ­ນົດ​ຫ້າມ​ການ​ແຕ່ງ­ດອງ​ໃນ​ໄວ​ເດັກ​ຂອງ​ແມ່ຍິງ​ຊົນ­ເຜົ່າ​ນ້ອຍ​ອີກ​ດ້ວຍ.

ທີ່ ອິນ​ໂດ​ເນ​ເຊຍ: ການ​ລົງ­ໂທດ​ດ້ວຍ​ການ​ໃຊ້​ໄມ້ຂ້ຽນ​ຫຼັງ​ ສຳ­ລັບ​ຜູ້​ກະ­ທຳ​ຜິດ​ຢູ່​ແຂວງ​ອາ​ເຈະ ອິນ​ໂດເນ​ເຊຍ ​ນັ້ນແມ່ນປະ­ຕິ­ບັດ​ຕາມ​ກົດ­ໝາຍ​ຊາ​ຣິ​ຍາ  ຫຼື ກົດ­ໝາຍ​ສາ­ສະ­ໜາ​ອິດ​ສະ​ລາມ ແຂວງ​ອາ​ເຈະ ໄດ້​ຮັບ​ອະ­ນຸ­ຍາດ​ໃຫ້​ປົກ­ຄອງ​ຕົນ​ເອງມາ​ແຕ່​ປີ 2001 ແລະ ຢູ່​ທີ່​ນີ້​ມີ​ການ​ບັງ­ຄັບ​ໃຊ້​ກົດ­ໝາຍ​ຢາ​ຣີ​ຢາ (Sharia) ຂ່າວ​ຕ່າງ­ປະ­ເທດ​ໃນ​ວັນ​ທີ 2 ເດືອນ​ກຸມພາ ​ປີນີ້ ໄດ້​ສະ­ເໜີ​ເລື່ອງ​ລາວ ແລະ ຮູບ​ພາບ​ການລົງ­ໂທດ​ດ້ວຍ​ການ​ຂ້ຽນ​ຕໍ່​ຍິງ​ຄົນ​ໜຶ່ງ ຍ້ອນ​ໂທດ​ມີເພດ​ສຳ­ພັນ​ກ່ອນ​ແຕ່ງ­ດອງ ສ່ວນ​ຝ່າຍ​ຊາຍ​ກໍ່​ຖືກລົງ­ໂທດ​ດ້ວຍ​ການ​ຂ້ຽນ​ຕໍ່­ໜ້າ​ສາຍ­ຕາ​ສາ​ທາ​ລະນະ​ຊົນ​ເຊັ່ນ​ກັນ ຈຳ­ນວນ​ຂ້ຽນ​ນັ້ນມີ 26 ບາດ ໂດຍເລີ່ມ​ຈາກ​ການ​ຂ້ຽນ​ຝ່າຍ​ຍິງ​ກ່ອນ ຂໍ້​ຫ້າມ​ທີ່​ຖ້າ​ໃຜລະ­ເມີດ​ຈະ​ຖືກ​ລົງ­ໂທດ​ດ້ວຍ​ການ​ຂ້ຽນ​ນັ້ນ ໄດ້­ແກ່ການ​ມີ​ເພດ​ສຳ­ພັນກ່ອນ​ແຕ່ງ­ດອງ​ຂອງ​ຊາຍ-​ຍິງ ການ​ມີ​ເພດ​ສຳ­ພັນ​ກັບ​ຄົນ​ເພດ​ດຽວ​ກັນ ການ​ຫຼິ້ນການ​ພະ­ນັນ ການ​ດື່ມ​ເຄື່ອງ​ມຶນ­ເມົາ ເພື່ອປ້ອງກັນ​ໄວ້​ລ່ວງ​ໜ້າ ກົດ­ໝາຍ​ຍັງ​ໄດ້​ຫ້າມ​ຍິງ​-ຊາຍ​ທີ່​ບໍ່ແມ່ນຄູ່​ຜົວ​ເມຍ ​ເຂົ້າ​ໃກ້​ກັນ​ຫຼາຍ​ເກີນ​ໄປ ນອກຈາກ​ນັ້ນ ​ຍັງ​ກຳ­ນົດ​ຫ້າມ​ແມ່­ຍິງ​ເຂົ້າ​ໄປ​ໃນ​ສະ­ຖານທີ່​ບັນ­ເທີງ​ຫຼັງ 23 ໂມງ ຍົກ­ເວັ້ນ​ຖ້າ​ໄປ​ກັບ​ຜົວ ຫຼື ສະ­ມາ­ຊິກ​ຄອບ­ຄົວ​ທີ່​ເປັນ​ຜູ້​ຊາຍ ຍິງ-ຊາຍທີ່​ບໍ່ແມ່ນ​ຄູ່​ຜົວ​ເມຍ ​ບໍ່​ມີ​ສິດ​ຂີ່​ລົດ­ຈັກ​ຊ້ອນ​ກັນ​ເດັດ­ຂາດ.

ຂ່າວທີ່ກ່ຽວຂ້ອງ