ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ມາ​ເລ​ເຊຍ ສ ເກົາ­ຫຼີ ມຽນ​ມາ

1.354 01 ມີ.ນ. 2017 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້​ມີ​ເລື່ອງ​ກ່ຽວ​ກັບ​ມາດ​ຕະ­ການເຂັ້ມ​ງວດ​ຂອງ​ ມາ​ເລ​ເຊຍ ຕໍ່​ຜູ້​ສູບ­ຢາ​ຕາມ​ສະ­ຖານທີ່​ສາ­ທາ­ລະ­ນະ ຕໍ່​ໃສ່ການ​ປັບ​ຫຼຸດ​ເກນ​ອາ­ຍຸ​ລົງ​ຄະ­ແນນ​ສຽງ​ຢູ່ ສ ເກົາ­ຫຼີ ສຸດ​ທ້າຍ​ໄປ​ເບິ່ງ​ເປົ້າ​ໝາຍການ​ສົ່ງ­ເສີມ​ການ­ທ່ອງ­ທ່ຽວ​ຢູ່​ ມຽນ​ມາ.

ທີ່ ມາ​ເລ​ເຊຍ: ນັບ​ແຕ່​ວັນ​ທີ 1 ກຸມ­ພາ​ປີ​ນີ້​ ເປັນ­ຕົ້ນ ມາ​ບັນ­ດາ​ສິງ​ອົມ​ຄວັນ​ຢູ່​ມາ​ເລ​ເຊຍ ຕ້ອງ​ໄດ້​ປະ​ນິ­ໄສປ່ອຍ​ຄວັນ​ຢາຕາມ​ສະ­ຖານ­ທີ່​ສາ­ທາ­ລະ­ນະ ໃຜ​ລະເມີດ​ຈະ​ຖືກ​ປັບ​ໃໝ​ເປັນ​ເງິນ​ສູງ​ສຸດ 10.000 ຣິງ​ກິດ (ປະ­ມານ 3 ຣິງ​ກິດ​ປາຍ ຕໍ່ 1 ໂດ​ຣາ​ສະ­ຫະ​ລັດ) ຫຼືບໍ່​ກໍ່​ຖືກ​ຕັດ​ອິດ­ສະ­ຫຼະ­ພາບ​ສູງ​ສຸດ 2 ປີ ຂ່າວ​ບອກ​ວ່າ ມາດ​ຕະ­ການ​ນີ້​ບໍ່​ແມ່ນ​ປະ­ກາດ​ຂູ່​ຂວັນ ຫຼື ເວົ້າແຕ່ປາກ​ລ້າໆ ທາງ​ການ​ມາ​ເລ​ເຊຍ ຈະ​ສ້າງ­ຕັ້ງ​ໜ່ວຍການ​ກວດ­ກາ​ເຝົ້າ​ລະ­ວັງ​ຢ່າງ​ໃກ້­ຊິດ ເພື່ອ​ຈັດ­ການກັບ​ກໍ­ລະ­ນີ​ລະ­ເມີດ ເຈົ້າ​ໜ້າ­ທີ່​ກະ­ຊວງ​ສາ­ທາ­ລະ­ນະສຸກ​ໄດ້​ແຈ້ງ​ໃຫ້​ຊາບ​ຕື່ມ​ກ່ຽວ​ກັບ​ສະ­ຖານ­ທີ່​ສາ​ທາລະ­ນະ ​ທີ່​ຫ້າມ​ບໍ່​ໃຫ້​ຜູ້​ໃດ​ສ້າງ​ມົນລະ​ພິດ​ຄວັນ​ຢາ ເຊິ່ງ​ໄດ້­ແກ່​ ສວນ​ອຸດ​ທິ​ຍານ​ແຫ່ງ​ຊາດ ສວນ​ສາ​ທາລະ­ນະ​ລະ­ດັບ​ລັດ ໃນ​ຕົວ​ເມືອງ ກໍ່​ຄືໃນ​ຄຸ້ມໆ​ຕ່າງໆທຸກ​ແຫ່ງ ນອກ​ນັ້ນ ກໍ່​ຍັງ​ມີ​ສະ­ຖາ­ນີ​ຈອດ​ລົດ​ໜ້າ­ດິນ ໃຕ້​ດິນ ສູນ​ການ​ຄ້າ ສະ­ໜາມ​ຫຼວງ ແລະ ເຂດ​ທ່ຽວຫຼິ້ນ​ສຳ­ລັບ​ເດັກ ຕາມ​ຕົວ​ເລກ​ສະ­ຖິ­ຕິ​ຢູ່​ມາ​ເລ​ເຊຍ ຈຳ­ນວນ​ຄົນ​ສູບ­ຢາ​ກວມ​ເອົາ​ອັດ­ຕາ​ສ່ວນ 22,8% ຂອງ​ພົນ­ລະ­ເມືອງ​ໃນ​ທົ່ວ​ປະ­ເທດ ຫຼື ເທົ່າໆ​ກັບ 5 ລ້ານ​ຄົນ ອັນ​ໄດ້​ເພີ່ມ​ຄວາມ​ສ່ຽງ​ຕໍ່​ພະ­ຍາດ​ທີ່​ພົວພັນ​ກັບ​ຢາ­ສູບ.

ທີ່ ສ ເກົາ­ຫຼີ: ໃນ​ປັດ­ຈຸ­ບັນ​ພົນ­ລະ­ເມືອງ​ຂອງ ສ ເກົາ­ຫຼີ ທີ່​ມີ​ສິດ​ລົງ​ຄະ­ແນນ​ສຽງ​ເລືອກ​ຕັ້ງ​ນັ້ນ ຕ້ອງມີ​ອາ­ຍຸ​ແຕ່ 19 ປີ​ຂຶ້ນ​ໄປ ສ່ວນ​ຢູ່​ລາວ​ເຮົາ ແລະ ຢູ່ຫຼາຍໆ​ປະ­ເທດ​ແມ່ນ 18 ປີ ເຊິ່ງ​ຖື​ວ່າ​ເປັນ​ເກນ​ອາ­ຍຸບັນ­ລຸ​ນິ­ຕິ­ພາ­ວະ ຂ່າວ​ຕ່າງ­ປະ­ເທດ​ຫວ່າງ​ບໍ່​ດົນ​ມານີ້​ໃຫ້​ຊາບ​ວ່າ ທາງ​ສະ­ພາ​ແຫ່ງ​ຊາດ ສ ເກົາ­ຫຼີ ພວມຂຸ້ນ­ຂ້ຽວ​ຊຸກ­ຍູ້​ໃຫ້​ມີ​ການ​ປັບ​ຫຼຸດ​ອາ­ຍຸ​ລົງ​ຄະ­ແນນ​ສຽງ​ເລືອກ​ຕັ້ງຈາກ 19 ປີ ລົງ​ມາ​ເປັນ 18 ປີ ມາດຕະ­ການ​ປັບ​ຫຼຸດ​ດັ່ງ­ກ່າວ​ມີ​ເປົ້າ​ໝາຍ​ໃນ​ເບື້ອງ​ຕົ້ນ​ວ່າ​ ຈະ​ໃຫ້​ທັນ​ກັບ​ການ​ເລືອກ​ຕັ້ງປະ­ທາ­ນາ­ທິ­ບໍ­ດີໃນ​ເດືອນ​ທັນ­ວາ​ປີ​ນີ້ຕາມ​ກຳ­ນົດ ​ແຕ່​ຖ້າ​ມີ​ການ​ຖອດຖອນ​ປະ­ທາ­ນາ­ທິ­ບໍ­ດີ (ຕາມ​ຂ່າວ) ໄວ​ຂຶ້ນ​ ກໍ່​ອາດ​ຈະມີ​ການ​ເລືອກ​ຕັ້ງ​ກ່ອນກຳ­ນົດ ​ການ​ປັບ​ຫຼຸດ​ອາ­ຍຸ​ລົງ ຄະ­ແນນ​ສຽງ​ເລືອກ​ຕັ້ງ​ຈະ​ເຮັດ​ໃຫ້​ຈຳ­ນວນ​ຜູ້​ມີ​ສິດເລືອກ​ຕັ້ງ​ເພີ່ມຂຶ້ນຕື່ມ 610.000 ຄົນ ເຊິ່ງ​ລ້ວນ​ແຕ່ເປັນ​ຄົນໜຸ່ມ​ຫົວ​ໃໝ່​ໄຟ​ແຮງ ວ່າ​ກັນ​ວ່າ ຄະ­ແນນສຽງ​ຈາກ​ທັບ​ຊາວ​ໜຸ່ມ​ກຸ່ມ​ນີ້​ ຈະ​ສາ­ມາດ​ພິກ​ຜັນ​ຜົນ​ການ​ເລືອກ​ຕັ້ງ​ໄດ້.

ທີ່ ມຽນ​ມາ: ໃນ​ຕົ້ນ​ເດືອນ​ມັງ­ກອນ​ປີ​ນີ້ ທາງ​ການຂອງ​ມຽນ​ມາ ​ເຜີຍ​ໃຫ້​ຮູ້​ແຜນ­ການ​ປັບ­ປຸງ​ການ­ທ່ອງ­ທ່ຽວ​ເພື່ອ​ດຶງ​ແຂກບ້ານ​ແຂກ­ເມືອງ​ເຂົ້າ​ປະ­ເທດໃຫ້​ໄດ້​ຫຼາຍ​ກວ່າ​ເກົ່າ ດ້ວຍ​ຫຼາຍ​ວິ­ທີເຊັ່ນ: ແຜນ​ປັບ­ປຸງ​ແຫຼ່ງ​ທ່ອງ​ທ່ຽວ​ທີ່​ມີ​ແລ້ວ​ໃຫ້​ມີ​ພະ­ລັງດຶງ​ດູດ​ ໄປ​ພ້ອມໆ​ກັບ​ສ້າງ​ສະ­ຖານ­ທີ່​ທ່ອງ​ທ່ຽວ​ໃໝ່ ປັບ­ປຸງ​ຄຳ​ຂວັນ​ໃຫ້​ແທດ­ເໝາະ ແລະ ຈື່​ງ່າຍ ເຮັດ​ປຶ້ມ​ໂຄສະ​ນາ ແລະ ແນະ­ນຳ​ແຫຼ່ງ​ທ່ອງ​ທ່ຽວ​ ປະ­ດິດ​ຄິດ​ສ້າງສັນ­ຍະ​ລັກ​ການ­ທ່ອງ­ທ່ຽວ​ໃຫ້​ດີ​ຂຶ້ນ ນອກ­ຈາກ​ນັ້ນ ຍັງ​ຈະ​ຕ້ອງ​ສົ່ງ­ເສີມ​ຄວາມ​ສົມດຸນ​ລະ­ຫວ່າງ ​ການທ່ອງ​ທ່ຽວ​ຂາ​ເຂົ້າ ໝາຍ​ເຖິງ​ການ​ດຶງ​ດູດ​ນັກ​ທ່ອງທ່ຽວ​ຕ່າງ­ປະ­ເທດ ກໍ່​ຄືການ​ເອື້ອ​ອຳ­ນວຍ​ຄວາມ​ສະດວກ​ໃຫ້​ແກ່​ການ­ທ່ອງ­ທ່ຽວ​ຂາ​ອອກ​ ສຳ­ລັບ​ຊາວ​ມຽນ​ມາທີ່​ຕ້ອງ­ການ​ໄປ​ທ່ອງ​ທ່ຽວ​ຢູ່​ຕ່າງ­ປະ­ເທດ ຕົວ​ເລກ​ສະ­ຖິ­ຕິ​ຊີ້ໃຫ້​ເຫັນ​ວ່າ ໃນ​ປັດ­ຈຸ­ບັນ ຊາວ​ມຽນມາທີ່​ເດີນ­ທາງ​ໄປ​ທ່ອງ​ທ່ຽວ​ຢູ່​ບັນ­ດາ​ປະ­ເທດ​ໃກ້ຄຽງ ໂດຍ​ສະ­ເພາະຢູ່​ໄທ ແລະ ສິງ­ກະ­ໂປນັ້ນ​ ໄດ້ເພີ່ມ​ຂຶ້ນ ການ­ທ່ອງ­ທ່ຽວ​ຂາ​ອອກ​ສ່ວນ​ຫຼາຍ​ແມ່ນມີ​ຈຸດ­ປະ­ສົງ​ເພື່ອ​ພັກ­ຜ່ອນ ແລະ ກວດ​ສຸ­ຂະ­ພາບ ທາງ​ການ​ມຽນ​ມາ ​ຈະ​ເພີ່ມ​ທະ­ວີ​ໂຄ­ສະ­ນາ​ການ­ທ່ອງ­ທ່ຽວ​ຜ່ານ​ເຄືອ​ຂ່າຍ​ສື່­ສານ ​ດີ​ຈິ​ຕອລ ໂດຍ​ຈະນຳ​ໃຊ້​ນັກ​ໂຄ­ສະ­ນາ​ຂັ້ນ​ຫົວກະ­ທິ​ທີ່​ມີ​ຊື່​ສຽງ ສ່ວນ​ການ​ໂຄ­ສະ­ນາ​ໂດຍ​ຜ່ານ​ການ​ເຂົ້າ​ຮ່ວມ​ກອງ​ປະ­ຊຸມ ຫຼື ກາ­ນວາງ­ສະ­ແດງ​ລະ­ດັບ​ພາກ​ພື້ນ ແລະ ສາ­ກົນ​ນັ້ນ ຖື​ວ່າ​ເປັນ​ນະ­ໂຍ­ບາຍ​ສຳ­ຮອງ ເພາະຕ້ອງ​ໄດ້​ໃຊ້​ຈ່າຍ​ສິ້ນ​ເປືອງ​ຫຼາຍ.

ຂ່າວທີ່ກ່ຽວຂ້ອງ