ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ຈີນ ສສ ​ຫວຽດ­ນາມ

586 28 ກ.ພ. 2017 ຫົວຂໍ້ຂ່າວອື່ນໆ

ພົບ​ກັນ​ປະ­ຈຳ​ວັນ​ນີ້​ມີ​ສອງ​ເລື່ອງ​ຈາກ ສປ ຈີນ ມາ​ຂ່າວ​ໃຫ້​ຮູ້​ຄື: ເລື່ອງ​ແຜນ­ການ​ພິມ​ລາຍ​ມື​ນັກທ່ອງ​ທ່ຽວ​ຕ່າງ­ປະ­ເທດ​ທີ່​ເຂົ້າ​ໄປ​ປະ­ເທດ ແລະ ການເປີດ​ເສລີ​ໃຫ້​ນັກ​ລົງ­ທຶນ​ຕ່າງ­ປະ­ເທດ​ສາ­ມາດ​ສົ່ງຜົນ​ກຳ­ໄລ​ໃນ​ການ​ດຳ­ເນີນ​ທຸ­ລະ​ກິດ​ອອກນອກ​ປະເທດ ສຸດ​ທ້າຍ​ແມ່ນ​ເລື່ອງ ສສ ​ຫວຽດ­ນາມ ກັບ​ມາດຕະ­ການ​ອະ­ນຸ​ຮັກ​ຊ້າງ.

ທີ່ ສປ ຈີນ: ຂ່າວຫວ່າງ​ບໍ່​ດົນ​ມາ​ນີ້ໃຫ້​ຊາບ​ວ່າ ທາງ​ກະ­ຊວງ​ຕຳ­ຫຼວດ​ຈີນ ຈະ​ເພີ່ມ​ທະ­ວີການ​ຄວບ​ຄຸມ​ຄົນ​ເຂົ້າ​ເມືອງ​ ດ້ວຍມາດ​ຕະ­ການ​ພິມລາຍ​ມື​ນັກ​ທ່ອງ​ທ່ຽວ​ຕ່າງ­ປະ­ເທດ​ທຸກໆ​ຄົນ​ ເຊັ່ນດຽວ​ກັບ​ຢູ່ ສ ອາ​ເມ​ຣິ​ກາ ຍີ່­ປຸ່ນ ກຳ­ປູ­ເຈຍ ສິງ­ກະ­ໂປ ແລະ ປະ­ເທດ​ອື່ນໆ​ອີກ​ຈຳ­ນວນ​ໜຶ່ງ ຄົນ​ຕ່າງ​ປະເທດ​ທີ່​ຕ້ອງ​ໄດ້​ຜ່ານ​ການ​ພິມ​ລາຍ​ມື​ເວ­ລາ​ເຂົ້າ​­ປະ­ເທດນັ້ນ ແມ່ນ​ຜູ້​ທີ່​ມີອາ­ຍຸ​ແຕ່ 14 ຫາ 70 ປີ ສຳລັບ​ຢູ່​ສະ­ໜາມ​ບິນ​ເສີນ​ເຈິ້ນ ທາງ​ພາກ​ໃຕ້​ຂອງ​ຈີນ ການ​ພິມ​ລາຍ​ມື​ຄົນ​ຕ່າງ­ປະ­ເທດ​ໄດ້​ເລີ່ມແຕ່ວັນ​ທີ 10 ກຸມ­ພາ​ປີ​ນີ້​ເປັນ­ຕົ້ນ​ມາ ມາດ​ຕະ­ການ​ດັ່ງ­ກ່າວ​ຈະ​ຕິ​ບັດ​ເປັນ​ຂັ້ນ​ຕອນ​ໄປ ແລະ ຈະ​ຂະ­ຫຍາຍໄປ​ທົ່ວ​ດ່ານກວດ​ຄົນ​ເຂົ້າ​ເມືອງ​ອື່ນໆ​ໃນ​ທົ່ວ​ປະ­ເທດ ມາດ​ຕະ­ການ​ພິມ​ລາຍ​ມື​ຄົນ​ຕ່າງ­ປະ­ເທດ​ດັ່ງ­ກ່າວ ໄດ້​ມີ​ຂຶ້ນ​ໃນ​ໄລ­ຍະ​ເວ­ລາ​ທາງການ​ຈີນ​ໄດ້​ເພີ່ມ​ທະ­ວີ​ການ​ຮັກ­ສາ​ຄວາມ​ສະ­ຫງົບ​ຕາມ​ເຂດ​ຊາຍ​ແດນ ອີກ​ຂ່າວ​ໜຶ່ງ​ກ່ຽວ​ກັບ​ຈີນກໍ່​ຄື ທາງ​ການ​ຂອງ​ປະ­ເທດນີ້ ໄດ້​ອອກ​ມາ​ປະ­ກາດ​ຢ່າງ​ຊັດ​ເຈນ​ວ່າ ບໍ່​ມີ​ແຜນ​ຈະຈຳ­ກັດ​ການ​ສົ່ງ​ເງິນ​ຜົນ​ກຳ­ໄລ​ຂອງ​ບັນ­ດາ​ບໍ­ລິ­ສັດຕ່າງ­ປະ­ເທດ​ອອກ​ຕ່າງ­ປະ­ເທດ ຄຳ​ປະ­ກາດ​ດັ່ງ­ກ່າວມີ​ຂຶ້ນ​ໃນ​ໂອ­ກາດ​ທີ່​ທາງ​ການ​ຈີນ ໄດ້​ດຳ­ເນີນ​ການ​ປາບ​ປາມ​ການ​ລັກ­ລອບ​ສົ່ງ​ເງິນອອກ​ຕ່າງ­ປະ­ເທດຢ່າງ​ຜິດ​ກົດ­ໝາຍ ໃນ​ສອງ​ສາມ​ອາ­ທິດ​ຫຼັງໆ​ມາ​ນີ້ ເຊິ່ງ​ມີ​ຜົນ​ກະ­ທົບ​ຕໍ່​ຄ່າ​ຂອງ​ເງິນ​ຢວນ ການ​ເຄື່ອນໄຫວ​ດັ່ງ­ກ່າວ​ຂອງ​ທາງ​ການ​ຈີນ​ ໄດ້​ກໍ່­ໃຫ້­ເກີດ​ຄວາມສົງ­ໄສ​ວ່າ ​ຈະ​ມີ​ການ​ຈຳ­ກັດ​ການ​ສົ່ງ​ເງິນ​ຜົນ​ກຳ­ໄລ​ອອກ​ຕ່າງ­ປະ­ເທດຂອງ​ບັນ­ດາ​ບໍ­ລິ­ສັດ​ຕ່າງ­ປະ­ເທດ ທ່ານ ປັນ ​ກົງ​ເຊິນ (Pan Gongsheug) ຫົວ­ໜ້າຄະ­ນະ​ກຳ­ມະ­ການ​ຄຸ້ມ​ຄອງ​ການ​ແລກ­ປ່ຽນ​ເງິນ­ຕາ​ແຫ່ງ​ລັດ ໄດ້​ເວົ້າ​ກ່ຽວ​ກັບ​ບັນ­ຫາ​ນີ້​ວ່າ ຈະ​ບໍ່​ມີ​ການຫ້າມ​ບໍ­ລິ­ສັດ​ຕ່າງ­ປະ­ເທດ​ສົ່ງ​ເງິນ​ຜົນ​ກຳ­ໄລ​ອອກນອກ​ປະ­ເທດ ນອກ­ຈາກ​ນັ້ນ ທາງ​ການ​ຈີນ​ຍັງ​ຈະສົ່ງ­ເສີມ ແລະ ເອື້ອ​ອຳ­ນວຍ​ຄວາມ​ສະ­ດວກ​ໃຫ້​ແກ່ການ​ຄ້າ ແລະ ການ​ລົງ­ທຶນຕ່າງ­ປະ­ເທດ ຊຸກ­ຍູ້ ແລະ ສະ­ໜັບ­ສະ­ໜູນ​ການ​ລົງ­ທຶນ​ຂອງ​ບັນ­ດາ​ບໍ​ລິສັດ​ຂອງ​ຈີນ​ໃນ​ຕ່າງ­ປະ­ເທດ ພາຍ​ໃຕ້​ເງື່ອນ­ໄຂ​ທີ່​ບໍລິສັດ​ເຫຼົ່າ​ນີ້​ເຄື່ອນ​ໄຫວ​ຢ່າງ​ຖືກ­ຕ້ອງ​ຕາມ​ກົດ­ໝາຍ ແລະ ລະ­ບຽບ​ການ ທ່ານ ປັນ​ ກົງ​ເຊິງ ໄດ້​ເນັ້ນ​ຕື່ມ​ວ່າ ທາງ​ການ​ຈີນ ຈະ​ສ້າງ​ບັນ­ຍາ­ກາດ​ທີ່​ງ່າຍ­ດາຍ ເປັນ​ລະ­ບຽບໂປ່ງ​ໃສ​ສຳ­ລັບ​ການ​ລົງ­ທຶນ ໂດຍ​ມີ​ຕະຫຼາດ​ທີ່​ມີ​ການ​ຄຸ້ມ​ຄອງ​ຮອງ​ຮັບ.

ທີ່ ສສ ຫວຽດ­ນາມ: ຂ່າວ Vietnam News ໄດ້​ລາຍ​ງານ​ກ່ຽວ​ກັບ​ກອງ​ປະ­ຊຸມ​ຢູ່​ແຂວງ​ພູ​ພຽງ​ດາລັກ ວ່າ​ດ້ວຍ​ການ​ອະ­ນຸຮັກ​ຊ້າງ ໂດຍ​ມີ​ການ​ເຂົ້າ​ຮ່ວມ​ຂອງ​ເຫຼົ່າ​ຊ່ຽວ­ຊານ​ສາ­ກົນ​ທີ່​ກ່ຽວ­ຂ້ອງ ຂ່າວໃຫ້ຮູ້​ຕື່ມ​ວ່າ ຢູ່ຫວຽດ­ນາມ​ໃນ​ປັດ­ຈຸ­ບັນ ຊ້າງ​ປ່າທີ່​ຍັງເຫຼືອ​ນັ້ນ​ມີ​ປະ­ມານ 100 ໂຕ​ເທົ່າ​ນັ້ນ ສ່ວນ​ຊ້າງ​ບ້ານ-ຊ້າງ​ລ້ຽງ ມີ 60 ໂຕ ແຕ່​ກໍ່​ມີ​ອາ­ຍຸ​ສູງ ແລະ ຫວິດ​ໄວ​ຈະ­ເລີນພັນ​ແລ້ວ ອັນ​ໄດ້​ສ້າງ​ຄວາມ​ກັງ­ວົນ ຢ້ານ​ຊ້າງ​ຈະ​ສູນ­ພັນ​ໄປ​ໃນ​ທີ່​ສຸດ ກອງ​ປະ­ຊຸມ​ທີ່​ໃຊ້ເວ­ລາ 3 ວັນ ໄດ້​ສະ­ຫຼຸບ​ຂໍ້​ສະ­ເໜີຕ່າງໆ​ທີ່​ຈຳ­ເປັນ ສຳ­ລັບ​ການ​ອະ­ນຸ​ຮັກ​ຊ້າງ ຄື: ໜຶ່ງ: ຕ້ອງ​ສະ­ຫງວນ​ເຂດ​ທີ່­ຢູ່​ອາ­ໄສ​ທາງ​ທຳ​ມະ​ຊາດ​ຂອງ​ຊ້າງ ສອງ: ຕ້ອງກຳ​ຈັດ­ການ​ລັກ­ລອບ​ລ່າ​ຊ້າງ​ເພື່ອ​ເອົາ​ງາ ສາມ: ຕ້ອງ​ເອົາ­ໃຈ­ໃສ່​ເບິ່ງ­ແຍງ​ສຸ­ຂະ­ພາບ​ຊ້າງ ແລະ ສີ່: ຕ້ອງ​ຈຳ­ກັດ​ການ​ໃຊ້ຊ້າງ​ເພື່ອ​ຜົນ​ປະໂຫຍດ​ໃນ​ທຸ­ລະ​ກິດ​ທ່ອງ​ທ່ຽວ ສຳ­ລັບ​ນະ­ໂຍ­ບາຍອະ­ນຸ​ຮັກ​ໃນ​ໄລ­ຍະ​ຍາວ​ນັ້ນ ຈະ​ສຸມ​ໃສ່​ການ​ປະ­ຕິ­ບັດກົດ­ໝາຍ​ສິ່ງ­ແວ­ດລ້ອມ ແລະ ຫຼຸດ­ຜ່ອນ​ບັນ­ຫາ​ທີ່ເກີດ​ຂຶ້ນ​ລະ­ຫວ່າງ​ຄົນ​ກັບ​ຊ້າງ.

ຂ່າວທີ່ກ່ຽວຂ້ອງ