ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ຟິ​ລິບ​ປິນ ສປ ຈີນ ກຳ­ປູ­ເຈຍ

883 23 ກ.ພ. 2017 ຫົວຂໍ້ຂ່າວອື່ນໆ

ຄໍ​ລຳ​ເກົ່າ​ເຈົ້າ​ເດີມ​ປະ­ຈຳ​ວັນ​ນີ້ ມີ​ເລື່ອງ​ມາດ​ຕະ­ການ​ຕ້ານ​ການ​ພະ­ນັນ​ເຖື່ອນ​ຢູ່ ຟິ​ລິບ​ປິນ ຕໍ່​ໃສ່​ເລື່ອງ​ທາງ​ການ ສປ ຈີນ ຢຶດ​ໜັງ​ແຂ້​ທີ່​ນຳ​ເຂົ້າ​ປະ­ເທດ​ຢ່າງ​ຜິດ​ກົດ­ໝາຍ ສຸດ​ທ້າຍ​ໄປ​ຮູ້­ຈັກ​ກັບ​ກົດ­ໝາຍ​ເລືອກ​ຕັ້ງ​ສະ­ບັບ​ໃໝ່​ຂອງ ກຳ­ປູ­ເຈຍ.

ທີ່ ຟິ​ລິບ​ປິນ: ຂ່າວ​ໃຫຍ່​ດັງ​ໄກ​ທີ່​ທະ­ຍອຍ​ກັນ​ອອກ​ມາ​ຈາກ ຟິ​ລິບ​ປິນ ໃນ​ມໍ່ໆ​ນີ້ ສ່ວນ​ຫຼາຍ​ແມ່ນ​ກ່ຽວ​ກັບ​ມາດ​ຕະ­ການ​ເດັດ­ຂາດ​ຂອງ​ທ່ານ​ປະ­ທາ­ນາ­ທິ­ບໍ­ດີ ດູ​ເຕັກ​ເຕ ຕ້ານ​ຢາ​ເສບ​ຕິດ ຖັດ​ມາ​ກໍ່​ແມ່ນ​ມາດ​ຕະ­ການ​ຕ້ານ​ການ​ພະ­ນັນ​ເຖື່ອນ ດັ່ງ​ຂ່າວ​ຕ່າງ­ປະ­ເທດ​ໃນ​ຕົ້ນ​ເດືອນ​ກຸມ­ພາ​ປີ​ນີ້​ໄດ້​ບອກ​ວ່າ ເມື່ອ​ສົມ​ທຽບ​ກັບ​ສະ­ໜາມ­ຮົບ​ຕ້ານ​ຢາ​ເສບ​ຕິດ​ແລ້ວ ສົງ­ຄາມ​ຕ້ານ​ການ​ພະ­ນັນ​ເຖື່ອນ​ນັ້ນ​ຈະ​ມີ​ຄວາມ​ຮຸນ​ແຮງ​ນ້ອຍ​ກວ່າ ເວົ້າ​ອີກ​ຢ່າງ​ໜຶ່ງ​ກໍ່​ຄື ຈະ​ມີ​ບັນ­ຫາ “ເລືອດ​ຕົກ​ຢາງ​ອອກ” ນ້ອຍ​ກວ່າ​ນີ້ ເປັນ​ຄຳ​ຖະ­ແຫຼງ​ຂອງ ໂຣ​ນານ ບາ​ໂຕ ເດ ລາ ໂຣ​ຊາ (Ronald “Bato” de la rosa) ຜູ້​ບັນ­ຊາ​ການ​ກຳ­ລັງ​ຕຳ­ຫຼວດ​ແຫ່ງ​ຊາດ​ຟິ​ລິບ​ປິນ ແຕ່​ພ້ອມ​ດຽວ​ກັນ​ນັ້ນ ທ່ານ​ຜູ້​ບັນ­ຊາ​ການ​ກໍ່​ໄດ້​ບອກ​ວ່າ ຈະ​ໃຊ້​ມາດ​ຕະ­ການ​ເດັດ­ຂາດ​ແບບ​ບໍ່​ປາ­ນີ​ປາ​ນອມ​ກັບ​ບັນ­ດາ​ເຈົ້າ­ແຂວງ ເຈົ້າ­ເມືອງ ກໍ່​ຄື​ຜູ້­ນຳ​ທ້ອງ­ຖິ່ນ​ທີ່​ຂັດ­ຂວາງ​ການ​ປະ­ຕິ­ບັດ​ງານ​ຂອງ​ເຈົ້າ​ໜ້າ­ທີ່​ຕຳ­ຫຼວດ​ໃນ​ການ​ກວາດ​ລ້າງ​ການ​ພະ­ນັນ​ເຖື່ອນ ການ​ພະ­ນັນ​ເຖື່ອນ​ນອກ­ຈາກ​ເປັນ​ບັນ­ຫາ​ຫຍໍ້­ທໍ້​ໃນ​ສັງ­ຄົມ​ແລ້ວ ຍັງ​ສ້າງ​ບັນ­ຫາ​ທ້າ​ທາຍ​ດ້ານ​ຄວາມ​ໝັ້ນ­ຄົງ​ຂອງ​ຊາດ​ອີກ​ດ້ວຍ ເພາະ​ມັນ​ເປັນ​ບ່ອນ​ມົ້ວ​ສຸມ ແລະ ບ່ອນ​ເພາະ​ພັນ​ອາ​ຊະ​ຍາ​ກຳ​ປະ­ເພດ​ຕ່າງໆ.

ທີ່ ສປ ຈີນ: ໃນ​ຊຸມ​ປີ​ຫຼັງໆ​ມາ​ນີ້ ສປ ຈີນ ໄດ້​ເອົາ​ຈິງ​ເອົາ​ຈັງ​ໃນ​ການ​ປາບ​ປາມ​ການ​ຄ້າ­ຂາຍ​ສັດ­ປ່າ ທີ່​ນອນ​ຢູ່​ໃນ​ບັນ­ຊີ​ສະ­ຫງວນ​ແຫ່ງ​ຊາດ ແລະ ສາ­ກົນ ເຊັ່ນ​ການ​ຫ້າມ​ຄ້າ­ຂາຍ​ງາ​ຊ້າງ ການ​ລົງ­ໂທດ​ຜູ້­ນຳ​ເຂົ້າ​ຜະ­ລິດ​ຕະ​ພັນ​ຈາກ​ຊິ້ນ​ສ່ວນ​ຂອງ​ສັດ​ໃກ້​ຈະ​ສູນ­ພັນ​ຫວ່າງ​ບໍ່​ດົນ​ມາ​ນີ້ ໜັງ­ສື­ພິມ​ຈາຍ​ນາ ເດລີ (China Daily) ກໍ່​ໄດ້​ລາຍ​ງານ​ກ່ຽວ​ກັບ​ການ​ຢຶດ​ໜັງ​ແຂ້ ຈຳ­ນວນ 1.600 ແຜ່ນ ແລະ ຊີ້ນ​ແຂ້ ນ້ຳ­ໜັກ 500 ກິ​ໂລ ຢູ່​ເຂດ​ປົກ­ຄອງ​ຕົນ​ເອງ​ກວງ​ຊີ​ຊວງ (Guangxi Zuang) ຂ່າວ​ບອກ​ວ່າ ເຈົ້າ​ໜ້າ­ທີ່​ຮັກ­ສາ​ຄວາມ​ປອດ​ໄພ​ຕາມ​ແຄມ​ຝັ່ງ ໄດ້​ຢຸດ​ເຮືອ​ບັນ­ທຸກ​ຫີບ​ຫໍ່​ທີ່​ເຕັມ​ອະ​ຍະ​ໄປ​ດ້ວຍ​ໜັງ​ແຂ້ ຈຳ­ນວນ 1.609 ແຜ່ນ ໜັງ​ແຕ່​ລະ​ແຜ່ນ​ມີ​ຄວາມ​ຍາວ 1,4 ແມັດ ນອກ​ນັ້ນ ກໍ່​ຍັງ​ພົບ​ຊີ້ນ​ແຂ້​ນ້ຳ­ໜັກ 506 ກິ​ໂລ.

ທີ່ ກຳ­ປູ­ເຈຍ: ໜັງ­ສື­ພິມ​ຜູ້​ແທນ​ປະ­ຊາ­ຊົນ​ສະ­ບັບ 395 ໃນ​ຕົ້ນ​ເດືອນ​ກຸມ­ພາ​ນີ້ ໃຫ້​ຮູ້​ວ່າ ກຳ­ປູ­ເຈຍ ພວມ​ຢູ່​ໃນ​ຂະ​ບວນ​ການ​ປັບ­ປຸງ​ກົດ­ໝາຍ ວ່າ​ດ້ວຍ​ການ​ເລືອກ​ຕັ້ງ​ທີ່​ກຳ­ນົດ​ຫ້າມ​ບຸກ­ຄົນ​ໃດ​ກໍ່​ຕາມ​ທີ່​ຖືກ​ສານ​ຕັດ­ສິນ​ໂທດ​ຈາກ​ການ​ກະ­ທຳ​ຄວາມ​ຜິດ ລົງ​ສະ­ໝັກ​ຮັບ​ເລືອກ​ຕັ້ງ​ເປັນ​ເວ­ລາ 5 ປີ ເລື່ອງ​ນີ້ ທ່ານ ຮຸນ​ເຊັນ ນາ­ຍົກ­ລັດ­ຖະ­ມົນ­ຕີ​ກຳ­ປູ­ເຈຍ​ເອງ ເປັນ​ຜູ້​ປະ­ກາດ​ກົດ­ໝາຍ​ວ່າ​ດ້ວຍ​ການ​ເລືອກ​ຕັ້ງ​ທີ່​ໃຊ້​ກັນ​ຢູ່​ໃນ​ປັດ­ຈຸ­ບັນ​ນີ້ ແມ່ນ​ສະ­ບັບ​ປີ 1998 ໃນ​ປີ 2018 ກຳ­ປູ­ເຈຍ ຈະ​ດຳ­ເນີນ​ການ​ເລືອກ​ຕັ້ງ​ຜູ້​ແທນ​ລັດ​ຖະ​ສະ­ພາ ຖ້າ​ກົດ­ໝາຍ​ເລືອກ​ຕັ້ງ​ສະ­ບັບ​ປັງ​ປຸງ​ຖືກ​ປະ­ກາດ​ໃຊ້ ທ່ານ ສຳ​ຣັງ​ສີ ຫົວ­ໜ້າ​ພັກ​ຝ່າຍ​ຄ້ານ​ທີ່​ຖືກ​ສານ​ຕັດ­ສິນ​ຈຳ​ຄຸກ​ຄົງ​ບໍ່​ມີ​ໂອ­ກາດ​ໄດ້​ລົງ​ສະ­ໝັກ​ຮັບ​ເລືອກ​ຕັ້ງ​ແນ່­ນອນ ນອກ­ຈາກ​ການ​ຕັດ​ສິດ​ລົງ​ສະ­ໝັກ​ຮັບ​ເລືອກ​ຕັ້ງ​ເປັນ​ເວ­ລາ 5 ປີ​ແລ້ວ ນັກ​ການ­ເມືອງ​ຜູ້​ມີ​ຄວາມ​ຜິດ​ຍັງ​ຕ້ອງ​ປະ­ກາດ​ຍຸບ​ພັກ​ຂອງ​ຕົນ ຖ້າ​ຜູ້­ກ່ຽວ​ເປັນ​ຫົວ­ໜ້າ​ພັກ ເພາະ “ນັກ­ໂທດ​ບໍ່​ຄວນ​ເປັນ​ຫົວ­ໜ້າ​ພັກ​ການ­ເມືອງ” ທ່ານ​ນາ­ຍົກ ຮຸນ​ເຊັນ ວ່າ.

ຂ່າວທີ່ກ່ຽວຂ້ອງ