ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ຈີນ ​ມຽນ​ມາ

445 22 ກ.ພ. 2017 ຫົວຂໍ້ຂ່າວອື່ນໆ

ພົບ​ກັນ​ປະ­ຈຳ​ວັນ​ນີ້ ຂໍ​ເລີ່ມ​ຕົ້ນ​ກັບ​ຂ່າວ​ເດັ່ນ​ດັງກ່ຽວ​ກັບ​ການ​ຈັບ​ກຸມ​ຍິງ​ຄົນ​ໜຶ່ງ​ຢູ່​ແຂວງ​ຮູ​ເປ ສປ ຈີນ ຍ້ອນ​ຜູ້­ກ່ຽວ​ເຮັດແນວ​ຈັງ­ໄຮ­ໄຟ­ໄໝ້ ປ່າວ​ຂ່າວລື​ຂ່າວ​ຂີ້​ຕົວະ​ຜ່ານ​ສັງ­ຄົມ​ອອນ​ລາຍ ກ່ຽວ​ກັບ​ການລະ­ບາດ​ຂອງ​ພະ­ຍາດ​ໄຂ້​ຫວັດ​ສັດ​ປີກ ຈາກ​ນັ້ນກໍ່​ມີເລື່ອງ​ຄູ­ບາ​ໃນ​ຜ້າ​ເຫຼືອງ​ແທ້ໆ ແຕ່​ລັກ­ລອບ​ຄ້າ­ຂາຍຢາ​ເສບ​ຕິດ ແຕ່​ບຸນ​ບໍ່​ພ້ອມ ທາງ​ການ ​ມຽນ​ມາ ເລີຍຈັບໄດ້​ໄລ່​ທັນ.

ທີ່ ສປ ຈີນ: ຂ່າວ​ຕ່າງ­ປະ­ເທດ​ໃນ​ວັນ​ທີ 20 ເດືອນ​ກຸມ­ພາ​ນີ້ (ຜ່ານ​ໜັງ­ສື­ພິມ​ວຽງ​ຈັນ​ທາມ) ໄດ້ລາຍ​ງານ​ວ່າ ຍິງ​ຄົນ​ໜຶ່ງ​ຊື່ ເຈິນ (Chen) ຢູ່​ແຂວງຮູ​ເປ (Hubei) ໄດ້​ປ່ອຍ​ຂ່າວ​ຜ່ານ​ເຄືອ​ຂ່າຍ​ອອນລາຍ WeChat ດ້ວຍ​ຂໍ້­ຄວາມ​ຂີ້​ຕົວະ​ວ່າ: “ພະ­ຍາດໄຂ້​ຫວັດ​ສັດ​ປີກ H7N9 ໄດ້​ລະ­ບາດ​ຢ່າງ​ໜັກຕິດ­ຕໍ່ໃສ່​ແພດ​ຈຳ­ນວນ 8 ຄົນ ສະ­ມາ­ຊິກ​ຄອບ­ຄົວ​ຂອງພວກ​ເຂົາ­ເຈົ້າ​ອີກ​ຈຳ­ນວນ​ໜຶ່ງ ແລະ ວ່າ​ຕົ້ນ​ເຫດຂອງ​ການ​ລະ­ບາດ​ນີ້​ມາ​ຈາກ​ຊາວ­ບ້ານ​ຄົນ​ໜຶ່ງຈາກ​ເຂດ​ນອກ​ເມືອງ​ຊຽນ​ຕາວ (Xiantao) ທີ່​ນຳມາ​ຕິດ­ແປດ” ຂ່າວ​ນີ້​ເຮັດ​ໃຫ້​ຄົນ​ໃນ​ສັງ­ຄົມ​ແຕກ​ຕື່ນ ອົກ​ສັ່ນ​ຂວັນ​ຫາຍ ສຸດ​ທ້າຍ​ເຈົ້າ​ໜ້າ­ທີ່​ຕຳ­ຫຼວດ​ກໍ່ໄດ້ເລັ່ງ​ມື​ສືບ​ສາວ​ທາວ​ຫາ​ທີ່​ມາ​ຂອງ​ຂ່າວ​ດັ່ງ­ກ່າວ ແລະ ພົບ​ວ່າມັນ​ເປັນ​ເລື່ອງ​ຂີ້​ຕົວະ​ທີ່​ເສກ​ສັນ​ປັ້ນແຕ່ງ​ຂຶ້ນ​ມາ​ຈາກຄົນໆ​ໜຶ່ງ ກໍ່​ຄື​ສາວ ​ເຈິນ ຫັ້ນ​ຫຼະ ເມື່ອ​ຮູ້​ວ່າ​ຈະ​ໄປ​ບໍ່​ລອດ ຍິງ​ຈັງ­ໄຮ​ໃຈ​ຖ່ອຍ​ຄົນ​ນີ້​ກໍ່​ໄດ້ເຂົ້າ​ມອບ​ໂຕ ແລະ ຍອມ­ຮັບວ່າ​ຂ່າວ​ທັງ​ໝົດ​ແມ່ນ​ນາງ​ປັ້ນ​ຂຶ້ນ​ມາ​ເອງ ເລື່ອງ​ນີ້​ຄວນ​ຖື​ເປັນ​ອຸ­ທາ­ຫອນສອນ​ໃຈ​ວ່າ ຂ່າວ​ຂີ້​ຕົວະ ຂ່າວ​ຫຼອກ​ລວງ ບໍ່​ວ່າຈະສົ່ງ​ຜ່ານ​ເຄືອ​ຂ່າຍ​ໃດ​ກໍ່​ຕາມ ຍ່ອມ​ຈະ​ໄປ​ບໍ່​ລອດ​ມືກົດ­ໝາຍ​ເດັດ­ຂາດ ພ້ອມ​ດຽວ​ກັນ​ນັ້ນ​ຜູ້​ບໍ­ລິ­ໂພກຂ່າວ​ອອນ​ລາຍຕ້ອງ​ມີ​ສະ­ຕິ​ ຢ່າ​ເຮັດ​ຫູ​ເບົາ​ເອົາ​ງ່າຍ ບໍ່​ຊັ້ນ​ຈະ​ຕາຍ​ທັງ​ຢືນ ເພາະ​ຂ່າວ​ແບບ​ນີ້​ມີ​ຫຼາຍ.

ທີ່ ມຽນ​ມາ: ຂ່າວ​ທີ່​ເຫຼືອ​ເຊື່ອ (ສຳ­ລັບ​ຊາວ​ພຸດ) ແຕ່​ກໍ່​ຕ້ອງ​ໄດ້​ເຊື່ອ ​ເລື່ອງ​ນີ້ແມ່ນ​ກ່ຽວ​ກັບ​ພະ­ສົງມຽນ​ມາ​ຄົນ​ໜຶ່ງ​ ຖືກ​ເຈົ້າ​ໜ້າ­ທີ່​ຈັບ​ໄດ້​ພ້ອມ​ດ້ວຍ​ຂອງກາງ ​ເປັນ​ຢາ​ບ້າ 4 ລ້ານ​ເມັດ ແຫຼ່ງ​ຂ່າວ​ທີ່​ມາ​ຈາກສຳ­ນັກ​ຂ່າວ​ເອ​ພີ (AP) ໃຫ້​ລາຍ​ລະ­ອຽດຕື່ມ​ວ່າ ພະ­ສົງ​ທີ່​ກໍ່​ເຫດ​ນີ້​ຖືກ​ເຈົ້າ​ໜ້າ­ທີ່​ຈັບ​ກຸມໃນ​ຂະ­ນະ​ຜູ້­ກ່ຽວ​ຂັບ​ລົດ​ຜ່ານ​ໄປ​ທາງ​ພາກ​ເໜືອ​ຂອງ​ລັດ​ຍະ​ໄຂ່ ທີ່ມີ​ຊາຍແດນ​ຕິດ​ກັບ​ປະ­ເທດ​ບັງ​ກະ­ລາ​ເທດ ໃນ​ຕົ້ນເດືອນ​ກຸມ­ພາ​ນີ້​ເອງ ແລະ ພົບ​ວ່າ​ໃນ​ລົດ​ຂອງ​ພະອົງ​ນີ້​ມີ​ຢາ​ບ້າ​ຈຳ­ນວນ 4 ແສນ​ເມັດ ຈາກ​ນັ້ນເຈົ້າ​ໜ້າ­ທີ່​ໄດ້​ຂະ­ຫຍາຍ​ຜົນ​ດ້ວຍ​ການ​ຄົ້ນ​ບ່ອນ​ພັກ​ຢູ່​ວັດ​ຂອງ​ພະ​ເຈົ້າ​ບັນ­ຫາ ແລະ ພົບ​ຢາ​ບ້າ​ຕື່ມ​ອີກ 4 ລ້ານ 2 ແສນ​ເມັດ ພ້ອມ​ດ້ວຍ​ລູກ​ລະ­ເບີດ​ໜຶ່ງ​ໜ່ວຍ ແລະ ອາ­ວຸດ​ຈຳ­ນວນ​ໜຶ່ງ ນອກ​ນັ້ນ ຍັງ​ມີ​ເງິນ­ສົດ​ອີກຈຳ­ນວນ 769 ໂດ​ລາ​ສະ­ຫະ­ລັດ ທ່ານ ໂຊ​ ມິນ ຕູນ (Soe Min Tun) ຫົວ­ໜ້າ​ກົມ​ປະ­ຈຳ​ກະ­ຊວງ​ກິດ​ຈະການ​ສາ­ສະ­ໜາ​ມຽນ​ມາ ບອກກ່ຽວ​ກັບ​ຄະ­ດີ​ນີ້​ວ່າ ເປັນ​ເລື່ອງ​ສຸດ​ແສນ​ປະ­ຫຼາດ ເປັນ​ກໍ­ລະ­ນີ​ທີ່​ບໍ່​ປົກ​ກະຕິ ແຕ່​ກໍ່​ບໍ່​ເຖິງ​ຂັ້ນ​ເປັນ​ໄປ​ບໍ່​ໄດ້ ໃນ​ກໍ­ລະ­ນີ​ນີ້​ພະ­ສົງ​ທີ່ຕິດ​ແຮ້ວ​ຄະ­ດີ​ຈະ​ຖືກ​ບັງ­ຄັບ​ໃຫ້​ສິກ​ໂດຍ​ທັນ­ທີ​ທັນ­ໃດ ແລະ ຖືກ​ດຳ­ເນີນ​ຄະ­ດີ​ຄື​ດຽວ​ກັບ​ຄົນ​ທົ່ວໆ​ໄປ ໃນ 2016 ເຈົ້າໜ້າ­ທີ່​ຕຳ­ຫຼວດ​ມຽນ​ມາ ສາ­ມາດ​ຢຶດ​ຢາບ້າ​ໄດ້​ທັງ​ໝົດ​ຈຳ­ນວນ 21 ລ້ານ​ເມັດ ຄິດ​ເປັນ​ມູນ​ຄ່າຕາມ​ຖະ­ໜົນ​ສູງ​ເຖິງ 35,5 ລ້ານ​ໂດ​ລາ​ສະ­ຫະ­ລັດ ເລື່ອງ​ນີ້​ເຕືອນ​ໃຫ້​ພວກ​ເຮົາ​ຮູ້​ວ່າ ເລື່ອງ​ຢາ​ເສບ​ຕິດນີ້​ຂໍ​ຢ່າ​ໄວ້­ໃຈ​ທາງ ຢ່າ​ວາງ​ໃນ​ຄົນ​ເດັດ­ຂາດ.

ຂ່າວທີ່ກ່ຽວຂ້ອງ