ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ກຳ­ປູ­ເຈຍ ກາ​ນາ​ດາ

410 21 ກ.ພ. 2017 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້ ຂໍ​ສະ­ເໜີ​ຕື່ມ​ກ່ຽວ​ກັບ​ຄຳ​ແນະນຳ​ຂອງ​ນາ­ຍົກ​ກຳ­ປູ­ເຈຍ ຕໍ່​ວຽກ​ສື່​ມວນ​ຊົນ ເລື່ອງຫາງ​ສຽງ​ຕິ­ຕຽນ​ນາ­ຍົກກາ​ນາ​ດາ ວ່າລະ­ເມີດ​ຈັນຍາ​ບັນ​ພະ­ນັກ­ງານ.

ທີ່ ກຳ­ປູ­ເຈຍ: ຂ່າວ​ໂດ່ງ​ດັງ ແລະ ເປັນ​ທີ່​ສົນ­ໃຈຂອງ​ວົງ​ການ​ສື່​ທີ່​ອອກ​ມາ​ຈາກ​ກຳ­ປູ­ເຈຍ ໃນ​ໄລ­ຍະກາງ​ເດືອນ​ມັງ­ກອນ​ປີນີ້ ກໍ່​ຄືການ​ພົບ​ປະ​ຂອງ​ທ່ານ ຮຸນ​ເຊັນ ນາ­ຍົກ­ລັດ­ຖະ­ມົນ­ຕີ​ກຳ­ປູ­ເຈຍ ກັບ​ສື່​ມວນຊົນ​ກວ່າ 1.000 ຄົນ ທີ່​ເປັນ​ຕົວ​ແທນ​ບັນ­ດາ​ອົງ­ການສື່​ສິ່ງ​ພິມ ສື່​ເອ​ເລກ​ໂຕຣ​ນິກ ກໍ່​ຄືພະ­ນັກ­ງານ​ຮັບ​ຜິດຊອບ​ວຽກ​ສື່​ປະ­ຈຳ​ຢູ່​ກະ­ຊວງ ສຳ­ນັກ­ງານ ອົງ­ການ ຈາກທົ່ວ​ປະ­ເທດ ດ້ວຍ​ຈຳ­ນວນ​ຜູ້​ເຂົ້າ​ຮ່ວມ​ຢ່າງ​ມະຫາ​ສານ​ນີ້ ທ່ານ​ນາ­ຍົກ ຮຸນ​ເຊັນ ຈຶ່ງ​ກ້າ​ບອກ​ວ່າ ທ່ານ​ເປັນ​ຜູ້­ນຳ​ລະ­ດັບ​ປະ­ເທດ​ທີ່​ໄດ້​ພົບ​ປະ​ກັບ​ມວນຊົນ​ຄົນ​ສື່​ຫຼາຍ​ທີ່​ສຸດ ແລະ ທ່ານ​ບອກ​ວ່າ ການ​ພົບປະ​ລັກ­ສະ­ນະ​ນີ້​ຈະ​ເຮັດ​ເປັນ​ປະ­ຈຳ ສຳ­ລັບ​ປີ 2018 ທ່ານ​ໃຫ້​ສັນ­ຍາ​ວ່າ​ຈະ​ພົບ​ກັບ​ເຫຼົ່າ​ນັກ​ໜັງ­ສື­ພິມຫຼາຍ​ກວ່າ​ເກົ່າ ຄື 3.000 ຄົນ ຫຼື 4.000 ຄົນ ທ່ານບອກ​ວ່າ ສິ່ງ​ທີ່ທ່ານ​ຕັ້ງ​ຄວາມ​ຫວັງ​ກັບ​ບັນ­ດາ​ນັກໜັງ­ສື­ພິມ​ນັ້ນ ມີ​ພຽງ​ຢາກ​ຫວັງ​ໃຫ້​ມີ​ການ​ລາຍ​ງານຂ່າວ​ຢ່າງ​ຖືກ­ຕ້ອງ​ຕາມ​ຄວາມ​ຈິງ ແລະ ວ່ອງ­ໄວ​ທັນການ ທ່ານ​ບອກ​ວ່າ​ໃນ​ໄລ­ຍະ​ຜ່ານ​ມາ ນັກ​ໜັງ­ສືພິມ​ຈຳ­ນວນ​ໜຶ່ງ ໄດ້​ລ້ຳ​ຊາຍ​ແດນ​ຂອບ​ເຂດ​ສິດ ແລະ ຈັນ​ຍາ​ບັນ​ຂອງ​ຕົນ​ໃນ​ການ​ລາຍ​ງານ​ຂ່າວ ທ່ານ​ນາ­ຍົກ​ເວົ້າ​ວ່າ “ນັກ​ໜັງ­ສື­ພິມ​ທີ່​ສະ­ຫຼາດ ທີ່ເກັ່ງ​ນັ້ນ ຕ້ອງ​ຂຽນ ແລະ ເວົ້າແຕ່​ຄວາມ​ຈິງ ລາຍງານ​ຂ່າວ​ໃຫ້​ໄວ ແລະ ບໍ່​ຕ້ອງ​ຢ້ານ​ ເມື່ອ​ຕົນ​ເອງລາຍ​ງານ​ຂ່າວ​ຜິດ­ພາດ​ກໍ່​ຕ້ອງ​ກ້າ​ແກ້​ໄຂ​ຢ່າງ​ບໍ່​ລໍຊ້າ ແລະ ຢ່າ​ແລກ​ຂ່າວ​ກັບ​ຜົນ​ກຳ­ໄລ ທ່ານ​ນາ­ຍົກ ໄດ້​ແນະ­ນຳ​ໃຫ້​ກະ­ຊວງ​ຖະ­ແຫຼງ​ຂ່າວ ເຮັດ​ວຽກ​ຢ່າງຂະ­ຫຍັນ​ຂັນ​ແຂງ​ກວ່າເກົ່າ​ກັບ​ບັນ­ດາ​ເຈົ້າ­ແຂວງ ເພື່ອ​ແຕ່ງ­ຕັ້ງ​ໂຄ­ສົກ​ປະ­ຈຳ​ຮັບ­ຜິດ­ຊອບ​ເຮັດ​ວຽກ​ກັບບັນ­ດາ​ນັກ​ໜັງ­ສື­ພິມ.

ທີ່ ກາ​ນາ​ດາ: ຂ່າວ​ຈາກ​ໜັງ­ສື­ພິມ The Nation ສະ­ບັບ​ວັນ​ທີ 18 ເດືອນ​ມັງ­ກອນ​ຜ່ານ​ມາ​ໃຫ້​ຮູ້​ວ່າ ຄະ­ນະ​ກຳ­ມະ­ການ​ຈັນຍາ​ບັນ​ແຫ່ງ​ຊາດ​ກາ​ນາ​ດາ ໄດ້​ສັ່ງ​ໃຫ້​ສອບ​ສວນ​ກ່ຽວ​ກັບ​ຂ່າວ​ທີ່​ວ່າ ທ່ານ​ນາຍົກ ​ທຼູ​ໂດ ໄປ​ພັກ­ຜ່ອນ​ຫຼັງ​ວັນ​ຄຣິສມາດ (Christmas) ຢູ່​ເກາະ​ລີ​ີ​ສອດ ​ບາ​ຮາ​ມັສ (Bahamas) ໂດຍ​ການ​ອຸ­ປະ­ຖຳ​ຂອງ​ມະ­ຫາ​ເສດ­ຖີ​ທີ່​ທັງ​ເປັນ​ຜູ້­ນຳ​ທາງ​ຈິດ​ວິນຍານ​ຄົນ​ໜຶ່ງ ຊື່​ທ່ານ ອາ​ກາ ຄານ (Aga khan) ທີ່​ຈຳ­ເປັນ​ຕ້ອງ​ໄດ້​ສອບ​ສວນເລື່ອງ​ນີ້​ກໍ່​ເພາະ­ວ່າ ທ່ານ​ນາ­ຍົກ ທຼູ​ໂດ ໄປພັກ­ຜ່ອນໂດຍ​ແມ່ນ​ມະ­ຫາ​ເສດ­ຖີ​ ອາ​ກາ ​ຄານ ​ເປັນ​ຜູ້​ຮັບ​ຜິດຊອບ​ໃຊ້​ຈ່າຍ​ໃຫ້​ທັງ​ໝົດ ລວມ​ທັງ​ໃຫ້​ບໍ­ລິ­ການໂດຍ­ສານດ້ວຍ​ເຄື່ອງ​ບິນ ເຮລີ​ຄອບ​ເຕີ ນອກ­ຈາກນັ້ນ ທ່ານ​ນາ­ຍົກ​ ພ້ອມ​ດ້ວຍ​ຄອບ­ຄົວ​ທີ່​ໄປ​ພັກ­ຜ່ອນແລ້ວ ກໍ່​ຍັງ​ມີ​ສະ­ມາ­ຊິກ​ລັດຖະ​ສະ­ພາ 1 ທ່ານ ທີ່​ເປັນປະ­ທານ​ພັກ​ຝ່າຍ​ຂວາ​ຮ່ວມ​ນຳ ກາ​ນາ​ດາ ​ມີ​ກົດໝາຍ​ຫ້າມ​ພະ­ນັກ­ງານ​ລັດ​ຮັບ​ຂອງ­ຂວັນ ​ສຳ­ລັບພະນັກ​ງານ​ຂັ້ນ​ລັດ­ຖະ­ມົນ­ຕີ​ນັ້ນ ເດັດ­ຂາດ​ຫ້າມ​ຮັບ ການ​ອຸ­ປະ­ຖຳ​ຄ່າ​ເດີນ­ທາງ​ຟຣີ​ ທີ່​ສັງ­ຄົມ​ມີ​ຄວາມ​ສົງໃສ​ແຮງ​ກ່ຽວກັບ​ການ​ໄປ​ພັກ­ຜ່ອນ​ຂອງ​ທ່ານ​ນາຍົກ ທຼູ​ໂດ ຄັ້ງ​ນີ້ກໍ່​ເພາະ­ວ່າ ທ່ານ​ມະ­ຫາ​ເສດ­ຖີ​ ອາກາ​ ຄານ​ ມີ​ມູນ​ນິ­ທິ​ທີ່​ໄດ້​ຮັບ​ທຶນ​ຈາກລັດ­ຖະ­ບານກາ​ນາ​ດາ​ ຫຼາຍ​ຮ້ອຍ​ລ້ານ​ໂດ​ລາ ​ເພື່ອ​ພັດ­ທະ­ນາ​ໂຄງການ​ໃນ​ຫຼາຍໆ​ປະ­ເທດ ​ກ່ຽວ​ກັບ​ບັນ­ຫາ​ນີ້ ທ່ານນາ­ຍົກ ທຼູ​ໂດ ໄດ້​ອອກ​ມາ​ແກ້​ຂ່າວ​ວ່າ ທ່ານ​ໄປ​ພັກຜ່ອນ​ແບບ​ສ່ວນ​ຕົວ​ກັບ​ຄອບ­ຄົວ ແລະ ວ່າ ທ່ານ ອາ​ກາ ​ຄານ ເປັນ​ເພື່ອນ​ເກົ່າຂອງ​ທ່ານ​ມາ​ແຕ່​ເຫິງນານ​ແລ້ວ.

ຂ່າວທີ່ກ່ຽວຂ້ອງ