ເຕືອນ­ໃຈ: 14 ກຸມ­ພາ - ໂດຍ : ດັ້ນ​ກີບ​ເມກ

1,399 14 ກ.ພ. 2017 ນານາສາລະ

14 ກຸມ­ພາ ວັນ​ແຫ່ງ​ຄວາມ​ຮັກ ບໍ່​ມີ​ໃຜ​ຈະສາ­ມາດ​ຫ້າມ​ໃຜ​ບໍ່​ໃຫ້​ສະ­ແດງ​ອອກ​ເຊິ່ງຄວາມ​ຮັກ ແຕ່​ປະ­ເດັນ​ຂອງ​ວັນ​ນີ້ ຄື​ການ​ຫຼິ້ນ-ກິນ​ໃຫ້​ມີ​ສະ­ຕິ ແລະ ຮູ້­ຈັກ​ຂີດ​ຈຳ­ກັດ​ຂອງ​ຕົນເອງ ​ເພື່ອ​ບໍ່​ໃຫ້​ກາຍ­ເປັນ​ບັນ­ຫາ​ຂອງ​ສັງ­ຄົມ ຄື​ດັ່ງ​ປີ​ຜ່ານໆ​ມາ ເພາະ­ວ່າການ​ຫຼິ້ນ​-ກິນຂາດ​ສະ­ຕິ ໂດຍ​ສະ­ເພາະມຶນ­ເມົາ​ແລ້ວ​ຂັບ​ຂີ່ລົດ ພາ­ໃຫ້​ເກີດ​ອຸ­ບັດ​ຕິ​ເຫດ​ ນຳ­ໄປ​ສູ່​ການ​ສູນເສຍແບບ​ບໍ່​ຄາດ​ຄິດ​ນີ້ ​ກໍ່​ເນື່ອງ​ຈາ​ກວ່າ​ເຮົາຂາດ​ຄວາມ​ລະ­ມັດ­ລະ­ວັງ​ໃນ​ການ​ໃຊ້​ຈ່າຍຊັບ ຫຼື ການ​ສັນ­ຈອນ​ຕາມ​ຖະ­ໜົນ.

ຂໍ້​ຄິດ​ສຳ­ລັບ 14 ກຸມ­ພາ​ນີ້ ຈິ່ງ​ບໍ່​ຄວນ​ສະຫຼຸບ​ເອົາ​ມື້­ນີ້​ເປັນ​ຄຳ​ຕອບສຸດ​ທ້າຍ​ໃນ​ການຕັດ­ສິນ​ໃຈ​ກັບ​ຄົນ​ຮັກ ຫຼື ຄວາມ​ຮັກ ເພາະຄວາມ​ຮັກ​ທີ່​ຖືກ­ຕ້ອງ​ຄວນ​ຄວບ​ຄູ່​ໄປ​ກັບ​ສະ­ຕິປັນ­ຍາ ແລະ ຮູ້­ຈັກ​ຍອມ­ຮັບ​ສະ­ພາບ​ຄວາມເປັນ​ຈິງ ເຊິ່ງ​ມີ​ທິດ​ສະ​ດີ ນິ​ຍາມ​ຄວາມ​ຮັກ​ໄວ້ໃຫ້​ຄິດ​ຫຼາຍ​ແບບ ເຊັ່ນ: ຮັກ​ແທ້​ຍ່ອມ​ເກີດຈາກ​ຄວາມ​ເສຍ­ສະ­ຫຼະ ຫຼື ຮັກ​ທີ່​ບໍ­ລິ­ສຸດຍ່ອມ​ບໍ່​ຕ້ອງ​ບັງ­ຄັບ​ຈິດ­ໃຈ... ຫຼາຍໆ​ແນວຄິດ​ກ່ຽວ​ກັບ​ຄວາມ​ຮັກ​ທີ່​ຄູ່​ບ່າວ-ສາວ​ຖື​ເປັນຄະ­ຕິ ຖ້າ­ວ່າຢຶດ​ຄະ­ຕິ​ຖືກ­ຕ້ອງ​ກໍ່​ອາດ​ເຮັດ​ໃຫ້ການກະ­ທຳ​ຖືກ­ຕ້ອງ ແຕ່​ສຳ­ລັບ​ຜູ້​ຄິດ​ເອົາ 14 ກຸມ­ພາ​ເປັນ​ບັ້ນ​ສຸດ​ທ້າຍ​ຕັດ­ສິນ​ໃຈ­ຄວາມ​ຮັກ ອາດ​ບໍ່​ສົມ​ຫວັງ​ຫຼາຍ​ຄົນ ເພາະຄວາມ​ຜິດຫວັງ ແລະ ສົມ​ຫວັງ​ມັນ​ມີ​ເປັນ​ຂອງ​ຄູ່​ໂລກ ແລະ ຢ່າ​ລືມ​ວ່າ ຖ້າ​ຄິດ​ຈະ​ຮັກ​ກໍ່​ຕ້ອງ​ທຳ​ໃຈໄວ້​ໂລດ​ວ່າ ທີ່​ໃດ​ມີ​ຮັກທີ່​ນັ້ນ​ມີ​ທຸກ ບໍ່​ວ່າ​ຈະສົມ​ຫວັງ ຫຼື ຜິດ​ຫວັງ​ກໍ່​ຕາມ ຕ່າງ​ແຕ່​ວ່າທຸກ​ໜ້ອຍ ຫຼື ທຸກ​ຫຼາຍ​ເທົ່າ​ນັ້ນ.

ຂ້າງ​ເທິງ​ນັ້ນ​ເວົາ​ເຕືອນ​ໃຫ້​ມີ​ສະ­ຕິ​ນຳ​ກັນ ໂດຍ​ເນັ້ນ​ໄປ​ຫາ​ໄວ​ລຸ້ນ​ທີ່​ອາດ​ຈະ​ຍັງ​ບໍ່​ມີຄວາມ​ທຸ່ນ​ທ່ຽງ​ໃນ​ແງ່​ຂອງ​ການ​ໃຊ້ຄວາມຄິດ ແລະ ການ​ຕັດ­ສິນ​ໃຈ ເມື່ອ​ບໍ່​ໄດ້​ໃນ​ສິ່ງ​ທີ່ຕົນ​ຄາດ​ຫວັງ ຫຼື ສົມ​ຫວັງ​ໃນ​ຄວາມ​ຮັກ​ທີ່ວາງ​ແຜນ​ໄວ້ ກໍ່​ອາດ​ເສຍໃຈ ​ດື່ມ​ເຫຼົ້າ​ຈົນ​ມຶນເມົາ​ ແລ້ວ​ຂັບ​ຂີ່​ລົດ​ແບບ​ຂາດ​ສະ­ຕິ ເລື່ອງການ​ກິນ​ດື່ມ​ກໍ່​ເປັນ​ອີກ​ບັນ­ຫາ​ທີ່​ບໍ່​ຄວນ​ຖື​ເບົາ ສຳ­ລັບ​ວັນ​ທີ 14 ກຸມ­ພາ ເພາະ​ທຸກໆ​ປີ​ຫຼັງຈາກ​ມື້­ນີ້​ຜ່ານ​ໄປ ​ກໍ່​ຈະ​ມີ​ອາ­ການ​ເມົາ​ຄ້າງ ຂາດ​ວຽກ ເຂົ້າ​ໂຮງ­ໝໍ ລົດ​ເພ... ລວມ​ເຖິງລັກ­ສະ­ນະ​ຫຼິ້ນ​ກິນ​ຟຸມ​ເຟືອຍ ຈ່າຍ​ບໍ່​ອັ້ນ ເພື່ອໃຫ້​ໄດ້​ໃຈ​ຄົນ​ຮັກ ທັງໆ​ທີ່​ມື້​ຕໍ່​ໄປ​ກະ​ເປົ໋າ​ແຫ້ງ ເດືອດ­ຮ້ອນ​ພໍ່​ແມ່​ຜູ້​ປົກ­ຄອງ​ໃນການ​ລ້ຽງ​ດູ ຄວາມ​ຈິງ​ແລ້ວ​ຖ້າ​ເວົ້າ​ໃນ​ແງ່​ປ້ອງ​ກັນ​ອຸ­ບັດຕິ​ເຫດ ຖ້າ​ຫາກ​ມີ​ເຈົ້າ​ໜ້າ­ທີ່​ກວດ­ກາ​ພຶດ­ຕິກຳ​ການ​ຂັບ​ຂີ່​ມຶນ­ເມົາ ມີ​ການ​ຈັບ​ປັບ​ໃໝ ຄົງຈະ​ຊ່ວຍ​ຫຼຸດ­ຜ່ອນ​ອຸ­ບັດ​ຕິ​ເຫດ​ລົງ​ໄດ້ ເພາະເປັນ​ການ​ເຮັດ​ໃຫ້​ແຕ່­ລະ­ຄົນ​ມີ​ສະ­ຕິ.

ລວມ​ຄວາມ​ວ່າ ຄົນ​ເຮົາ​ມີ​ຄວາມ​ຮັກ​ກໍ່​ບໍ່ຄວນ​ຄິດ​ເອົາ​ມື້ 14 ກຸມ­ພາມື້​ດຽວ­ນີ້ ​ມາ​ຕັດສິນ​ຊີ້​ຂາດ​ທາງ​ເດີນ​ຊີ­ວິດ​ຂອງ​ຕົນ ທັງໆ​ທີ່​ອະນາ​ຄົດ​ຍັງ​ຍາວ​ໄກ ການ​ສຶກ​ສາ​ໜ້າ­ທີ່​ວຽກງານ​ຍັງ​ລໍ­ຖ້າ ໂດຍ​ສະ­ເພາະໄວ​ໜຸ່ມ​ຄວນທຸ້ມ­ເທ​ພະ­ລັງ­ງານ​ໃສ່​ການສຶກ​ສາ​ຄົ້ນ­ຄວ້າເພື່ອ​ອະ­ນາ­ຄົດ​ຂອງ​ຕົນ​ເອງ ທັງ​ເຮັດ​ໃຫ້​ພໍ່ແມ່​ພູມ­ໃຈ​ຖ້າ​ຕົນ​ຮຽນ​ເກ່ງ​ເສັງ​ໄດ້ ແຕ່​ສິ່ງສຳ­ຄັນ​ຄວນ​ໄປ​ສຶກສາ​ຕົ້ນ​ປາຍ​ສາ­ເຫດຂອງ​ວັນ​ນີ້​ເສຍ​ກ່ອນ ເພາະ​ມັນ​ບໍ່​ແມ່ນ​ປະ​ເພນີ​ບ້ານ​ເຮົາເມືອງ​ເຮົາ ເປັນ​ວັນ​ຂອງ​ຊາວ​ຕາເວັນ​ຕົກ​ຕັ້ງວັນ​ແຫ່ງ​ຄວາມ​ຮັກ​ຂຶ້ນ​ກໍ່​ຍ້ອນ​ສັງຄົມ​ເນົ່າ​ເປື່ອຍ ຄົນ​ຂາດ​ອິດ­ສະ­ຫຼະ ສິດ​ສະເໝີ​ພາບ... ເປັນ­ຕົ້ນ ສຳ­ລັບ​ສັງ­ຄົມ​ລາວ​ຍາມໃດ​ກໍ່​ມີ​ຄວາມ​ຮັກ​ຝັງ​ໄວ້​ໃນ​ໃຈ​ສະ­ເໝີ ບໍ່​ມີວັນ​ເສື່ອມ​ຫາຍຕາມ​ຮີດ­ຄອງ​ປະ­ເພ­ນີ​ອັນ​ດີງາມ​ທີ່​ບັນ​ພະ​ບູ​ລຸດ​ໄດ້​ນຳ­ພາ​ພັດ­ທະ­ນາ​ມາເຖິງ​ທຸກ​ວັນ​ນີ້​ນັ້ນ ກໍ່​ຄືສັງ­ຄົມ​ທີ່​ມີ​ຄວາມ​ເມດຕາ ເອື້ອ­ເຟື້ອ​ເພື່ອ​ແຜ່ ຊ່ວຍ­ເຫຼືອ​ຮັກ­ແພງ​ກັນ ດ້ວຍ​ຄວາມ​ບໍ­ລິ­ສຸດຜຸດ​ຜ່ອງ ມີ​ຄວາມ​ສະ­ເໝີພາບ​ຕໍ່​ກັນ.

ຂ່າວທີ່ກ່ຽວຂ້ອງ