ຂ່າວຫຼ້າສຸດ

ສັງຄົມ-ກົດໝາຍ - ນຳ​ສະ­ເໜີ​ໂດຍ : ມະ­ຕິ​ຊົນ : ໂທດ​ຂອງ​ການ​ໂພ​ສ​ຮູບ​ພາບ ຄລິບ​ລາ­ມົກ ລົງ​ເຟ​ສ​ບຸກ...

794 27 ມ.ກ. 2017 ຫົວຂໍ້ຂ່າວອື່ນໆ

ພົບ​ກັນ​ໃນ​ມື້­ນີ້ ຜູ້​ຂຽນ​ຈະ​ຂໍຕອບ​ຄຳ​ຖາມ​ມິດ​ຮັກ​ເພື່ອນ​ຜູ້ອ່ານ​ເຈົ້າ​ປະ­ຈຳ​ຂອງ​ຄໍ​ລຳ​ສັງຄົມ​ກົດ­ໝາຍຂອງ ນສພ ວຽງຈັນ​ໃໝ່​ພວກ​ເຮົາ ​ຫຼາຍ​ທ່ານ​ສົ່ງຄຳ​ຖາມ​ເຖິງ​ຜູ້​ຂຽນ​ວ່າ: ຖ້າ​ມີ​ຄົນໂພ​ສ​ຮູບ​ພາບ ຫຼື ຄລິບ​ວິ​ດີ​ໂອໂປ້​ເປືອຍ ລາ­ມົກ​ອາ­ນາ​ຈານ (ພາບ​ເຄື່ອນ​ໄຫວ) ເຜີຍ­ແຜ່​ລົງໃນ​ສື່​ອອນ​ລາຍ (ເຟ​ສ​ບຸກ) ຈະ​ມີຄວາມ​ຜິດ​ແນວ­ໃດ​ແດ່?.

ກົດ­ໝາຍ​ວ່າ​ດ້ວຍ​ອາ­ຍາ ແຫ່ງ ສປປ ລາວ ມາດ­ຕາ 138 ລະ­ບຸວ່າ: ບຸກ­ຄົນ​ຜູ້​ໃດ​ຫາກ​ໄດ້​ຜະ­ລິດ ຫຼື ໄດ້​ນຳ​ເອົາ​ໜັງ­ສື ຮູບ ຟິມ ​ວີ​ດີໂອ ແລະ ສິ່ງ​ອື່ນໆທີ່​ລາ­ມົກ ຫຼື ສິ່ງ​ອື່ນໆ​ທີ່​ຂັດ​ກັບ​ວັດ­ທະ­ນະ­ທຳອັນ​ດີ­ງາມ​ຂອງ​ຊາດ ອອກ​ຈຳໜ່າຍ ຫຼື ເຜີຍ­ແຜ່ທາງ​ກວ້າງ ຫຼື ທາງ​ເລິກ ຈະ​ຖືກ​ລົງ­ໂທດ​ຕັດ​ອິດສະ­ຫຼະ​ພາບ​ແຕ່ 3 ເດືອນ ຫາ 1 ປີ ແລະ ຈະ​ຖືກ​ປັບ​ໃໝ​ແຕ່ 200.000 ກີບ ຫາ 5.000.000 ກີບ ໃນ​ຂະ­ນະ​ທີ່­ຢູ່​ມາດ­ຕາ 14 ຂອງ​ກົດ­ໝາຍ​ວ່າ​ດ້ວຍ​ການ​ຕ້ານ ແລະ ສະ­ກັດ​ກັ້ນ​ອາ​ຊະ​ຍາ​ກຳທາງ​ລະ­ບົບ​ຄອມ​ພິວ​ເຕີ ແຫ່ງ ສປປ ລາວ ໄດ້​ລະ­ບຸ​ເຖິງ​ການເຜີຍ­ແຜ່​ສິ່ງ​ລາ­ມົກ​ຜ່ານ​ລະ­ບົບ​ຄອມ​ພິວ​ເຕີ ສິ່ງ​ລາ­ມົກແມ່ນຂໍ້ມູນ​ທີ່​ມີ​ເນື້ອ​ໃນ​ສະ­ແດງ​ອອກ​ຢ່າງຈະ­ແຈ້ງ ເປັນ­ຕົ້ນ ຮູບພາບ​ເຄື່ອນໄຫວ ສຽງ ແລະ ວິ​ດີ​ໂອ​ກ່ຽວ​ກັບອະ​ໄວ​ຍະ​ວະ​ເພດ ແລະ ພຶດ­ຕິ​ກຳທາງ​ເພດ​ຂອງ​ຄົນ ການ​ເຜີຍ­ແຜ່ສິ່ງ​ລາ­ມົກ​ຜ່ານ​ລະ­ບົບ​ຄອມ​ພິວເຕີ ແມ່ນ​ການ​ຊື້-ຂາຍ ການ​ແຈກຢາຍ ການ​ສົ່ງ­ຕໍ່ການ​ແນະ­ນຳ ແລະ ການ​ເຜີຍ­ແຜ່​ຂໍ້​ມູນຕາມທີ່​ໄດ້​ກຳ­ນົດ​ໄວ້​ໃນ​ວັກ​ທີ 1 ເທິງ​ນີ້ແລ້ວ​ ໂທດ​ຂອງ​ການ​ເຜີຍ­ແຜ່​ສິ່ງລາ­ມົກນີ້​ເດ​ມີ​ແນວ­ໃດ​ແດ່? ຢູ່​ຂໍ້ທີ 6 ໃນ​ມາດ­ຕາ 62 ຂອງ​ກົດ­ໝາຍວ່າ​ດ້ວຍ​ການ​ຕ້ານ ແລະ ສະ­ກັດກັ້ນ​ອາ​ຊະ​ຍາ​ກຳ​ທາງ​ລະ­ບົບຄອມ​ພິວ​ເຕີ ແຫ່ງ ສປປ ລາວ ກໍ່ໄດ້​ລະ­ບຸ​ເຖິງ​ການ​ເຜີຍ­ແຜ່​ສິ່ງ​ລາມົກ​ຜ່ານ​ລະ­ບົບ​ຄອມ​ພິວ​ເຕີ ຈະຖືກ​ລົງ­ໂທດ​ຕັດ​ອິດ­ສະ­ຫຼະ­ພາບແຕ່ 1 ປີ ຫາ 5 ປີ ແລະ ຈະຖືກ​ປັບ​ໃໝ​ແຕ່ 5.000.000 ກີບ ຫາ 30.000.000 ກີບ.

ກໍ່​ຖື​ວ່າ​ກະ­ຈ່າງ​ແຈ້ງ​ລະ​ນໍຕໍ່​ໄປນີ້ ສາຍ​ຫື່ນ​ທັງ­ຫຼາຍກໍ່​ໃຫ້​ລະ​ມັດລະ­ວັງ​ແດ່ ເພີ່ມ​ຄວາມ​ມີ​ສະ­ຕິສູງ​ຂຶ້ນ​ຕື່ມ ບໍ່​ຄວນ​ໂພ​ສ ແຊຣ ຫຼື ຈະ​ດ້ວຍ​ຮູບ​ການ ແລະ ວິ­ທີ​ການ​ໃດໆ​ກໍ່​ຕາມ​ທີ່​ກ່ຽວ­ຂ້ອງ​ກັບ​ການ​ເຜີຍ­ແຜ່​ສິ່ງ​ລາ­ມົກ​ອະ­ນາ­ຈານ​ລົງ​ໃນ​ເຟ​ສ​ບຸກ​ອີກ​ເນີ້ ເພາະ​ນັ້ນ​ເປັນການ​ກະ­ທຳ​ຜິດ​ຕໍ່​ກົດ­ໝາຍ​ບ້ານເມືອງ.

ຂ່າວທີ່ກ່ຽວຂ້ອງ