ຂ່າວຫຼ້າສຸດ

ຮູ້ພາສາລາວ ມື້ລະຄຳ : ຕົກ

447 27 ມ.ກ. 2017 ຫົວຂໍ້ຂ່າວອື່ນໆ

ຄຳ​ກິ­ລິ­ຍາ ຄຳ​ລາວ ແປ​ວ່າ ຫຼຸດ​ລົງ, ລົ່ນ​ລົງ​ຈາກ​ບ່ອນ​ສູງ  (ວັດ­ຈະ­ນະ​ນຸ​ກົມ​ພາ­ສາ​ລາວ ທອງ­ຄຳ ອ່ອນ​ມະ­ນີ​ສອນ, 2012: 389), ເປັນ​ຄຳ​ລາວ​ຄຳ​ໜຶ່ງ​ທີ່​ສາ­ມາດ​ໃຊ້​ໄດ້​ໃນ​ຫຼາຍ​ກໍ­ລະ­ນີ ໂດຍ​ສະ­ເພາະມັກ​ພົບ​ເຫັນ​ໃຊ້​ສ້າງ​ຄຳ​ໃໝ່​ໄດ້​ຫຼວງ­ຫຼາຍ ພ້ອມ​ທັງ​ສາ­ມາດ​ສ້າງ​ມະ­ໂນ­ພາບ​ໄດ້​ນຳອີກ ຈຶ່ງ​ພົບ​ເຫັນ​ໃຊ້​ທົ່ວ​ໄປ​ໃນ​ຊີ­ວິດ​ປະ­ຈຳ​ວັນ.

ຕົວ­ຢ່າງ:

- ຫຼານ​ຊາຍ​ໄປ​ຈວາດ​ພໍ່­ເຖົ້າ, ລາວ​ຕົກ­ໃຈ ຈົນ​ຫົວ­ໃຈ​ເກືອບ​ວາຍ​ຕາຍ

- ຕົກ­ກະ­ເທີນ​ໄດ້​ປ້ຳ ຊິ​ນຳ​ຮອນ​ໝົດ​ທຸກ​ງ່າ ງ່າ​ໃດ​ອອກ​ນອກ​ຮົ້ວ ຊິ​ນຳ​ມ້ວນ​ເຂົ້າ​ໃສ່​ສວນ (ຜະ­ຫຍາ)

- ລາວ​ຕົກ​ຄະ​ມ່າ​ໃຈ ເມື່ອ​ເຫັນ​ຫຼານ​ນ້ອຍ​ກັບ​ມາ​ແຕ່​ໂຮງ­ຮຽນ​ຜູ້​ດຽວ

- ຕົກ­ຄະ­ມະ​ພໍ້​ກັນ​ແລ້ວ ກະ​ໄປ​ຫຼິ້ນ​ນຳ​ກັນ​ເລີຍ​ນໍ!

- ລາວ​ຕົກ​ຍົນ ຍ້ອນ​ໄປ​ຊ້າ​ໂພດ ຍົນ​ຈຶ່ງ​ຂຶ້ນ​ກ່ອນ

- ເຈົ້າ​ບໍ່​ຮູ້​ເລື່ອງ​ລາວ​ຫຍັງ ຈັ່ງ​ແມ່ນ​ຕົກ​ຍຸກ​ນໍ!

- ຕົກ­ຕາ​ໄດ້​ລົງ​ລາຍ​ມ້ວນ ບໍ່​ເປັນ​ສວນ​ໃຫ້​ເປັນ​ໄຮ່ ຄັນ​ບໍ່​ເປັນ​ໄຮ່​ແທ້ໆ ໃຫ້​ພໍ­ໄດ້​ປູກ​ແຕງ (ຜະ­ຫຍາ)

- ຕົກ​ສະ​ເຫງີ້​ເບິ່ງ​ສາວ​ງາມ

- ຕົກ​ຕະ­ລຶງ​ເຫັນ​ຫຼານ​ສາວ​ແຕ່ງ­ເພດ​ງາມ​ອີ່­ຫຼີ!

ຫາກ​ສຶກ​ສາ​ພິ­ຈາ­ລະ­ນາ​ໃຫ້​ຄັກ­ແນ່ ຄຳ​ສັບ​ລາວ​ສາ­ມາດ​ນຳໃຊ້​ໄດ້​ຫຼາຍ​ບໍ​ລິ​ບົດ ຫຼື ລັກ­ສະ­ນະ​ສະ­ເພາະ​ຂອງ​ສຳ­ນວນ, ປະ ໂຫຍກ​ແລ້ວ ກໍ່​ຈະ​ເຂົ້າ­ໃຈ​ຢ່າງ​ເລິກ­ເຊິ່ງ ຈຶ່ງ​ເຫັນ​ວ່າ​ຄຳ​ສັບ​ແມ່ນ​ມີ​ຄວາມ​ໝາຍ​ແມ່ນ​ກວ້າງ­ຂວາງ ແລະ ເລິກ­ເຊິ່ງ​ຫຼາຍ.

ຂ່າວທີ່ກ່ຽວຂ້ອງ