ອາ­ຫານ​ໃນ​ງານ​ດອງ - ໂດຍ : ທິດ​ດີ

444 27 ມ.ກ. 2017 ນານາສາລະ

ມີ​ເພື່ອນ​ຜູ້​ອ່ານ​ສ່ອງ​ແສງ​ມາ​ວ່າ: ເມື່ອ​ຕົ້ນ​ເດືອນ​ມັງ­ກອນ 2017 ນີ້​ລະ! ເພິ່ນ​ໄປ​ງານ​ດອງ​ຢູ່​ສະ­ຖານ­ທີ່​ແຫ່ງ​ໜຶ່ງ​ຢູ່​ນະ­ຄອນ­ຫຼວງ​ເຮົາ​ນີ້... ເວ­ລາຕັກ​ຍຳ​ສະ­ຫຼັດ​ມາ​ຮັບ​ປະ­ທານ​ກໍ່​ເຫັນ​ໂຕ​ບົ້ງ​ໄຕ່​ຢູ່​ໃນຈານ​ໃຫຍ່... ໝົດ​ຄວາມ​ຮູ້­ສຶກ​ທັນ­ທີ! ຈຳ­ເປັນ​ຕ້ອງເອີນ​ໃສ່​ເຈົ້າ­ພາບ​ເພື່ອ​ລາຍ​ງານ.

ເພິ່ນ​ວ່າ​ກໍ­ລະ­ນີ​ແບບ​ນີ້​ຢາກ​ໃຫ້​ແຂກ​ທີ່​ໄປ​ຮ່ວມງານ​ເຂົ້າ­ໃຈ ແລະ ສ່ອງ​ແສງ​ຢ່າງ​ຈິງ​ຈັງ​ຕໍ່​ຜູ້​ບໍ­ລິ­ການ​ອາ­ຫານ​ການ​ກິນ ບໍ່ຢາກ​ໃຫ້​ເວົ້າ​ວ່າ: “ບໍ່ຕ້ອງ​ເຄັ່ງ​ຄຽດ ຕັກ​ບົ້ງ​ອອກ​ກິນ​ຕໍ່​ກໍ່​ໄດ້ ມີ​ບົ້ງ​ແມ່ນຜັກ​ປອດ​ສານ­ພິດ...” ເພິ່ນ​ວ່າ​ເວົ້າ​ງ່າຍ​ໂພດ ບໍ່​ໃຫ້ກຽດ​ໂຕ​ເອງ ແນວ​ເປື້ອນ​ກໍ່​ຍັງ​ຊິ​ກິນ​ຢູ່? ຄັນ​ບໍ່ທ້ວງ ບໍ່​ແຈ້ງ​ເຈົ້າ­ພາບ ເທື່ອ​ໜ້າ​ຮ້ານ​ນັ້ນ ຫຼື ຜູ້​ບໍ​ລິການ​ອາ­ຫານ​ກໍ່​ບໍ່​ຍອມ​ປັບ­ປຸງ​ປ່ຽນ­ແປງ ອັນ​ນີ້​ອັນຕະ​ລາຍ​ແທ້​ໃດ໋?.

ຜູ້​ຂຽນ​ຟັງ​ເພິ່ນ​ເລົ່າ​ກໍ່​ຮູ້­ສຶກ​ສະ­ເທືອນ​ໃຈ...! ເພື່ອນ​ຜູ້​ອ່ານ​ເດ? ຄັນ​ຖືກ​ແນວ​ນັ້ນ​ຄື​ຊິ​ວາງ​ໂຕຍາກ​ພໍ​ສົມ­ຄວນ? ຄັນ​ແມ່ນ​ຖືກ​ໂຕະ​ເຈົ້າ­ພາບຝ່າຍ​ຍິງ-ຝ່າຍ​ຊາຍ ກໍ່​ບໍ່​ຮູ້​ຄື​ກັນ​ວ່າ​ເພິ່ນ​ຊິ​ໃຈ​ຂຶ້ນ ຫຼື ບໍ່? ເວົ້າ​ເລື່ອງ​ອາ­ຫານ​ໃນ​ງານ​ດອງ​ນີ້​ມັກ​ມີ​ບັນຫາເຊັ່ນວ່າ: ຕົ້ມ​ຊຸບ​ກະ­ເພາະ​ປາ​ມັກ​ຂິວ ເພາະເວ­ລາ​ຕົ້ມ​ໃຊ້​ນ້ຳ​ປະ­ປາ ລາບ​ມັກ​ບູດ ເພາະ​ເຮັດດົນ​ປະ​ໄວ້ ຂອງ­ຫວານ ເປັນ­ຕົ້ນ ໝາກ­ກ້ຽງ​ບາງໜ່ວຍ​ຊ້ຳ-ເນົ່າ ແລະ ອື່ນໆ.

ສະ­ນັ້ນ ເຈົ້າ­ພາບ​ຕ້ອງ​ເອົາ­ໃຈ­ໃສ່​ກວດ­ກາ​ແຕ່​ລະ​ໂຕະ ​ຄັນ​ເປັນ​ໄປ​ໄດ້ເວ­ລາ​ແຂກ​ໄປ​ນັ່ງ​ຄົບ​ຄວນໄປ​ເປີດ​ອາ­ຫານ​ໃຫ້ແຂກ​ຈະ​ດີ​ທີ່​ສຸດ... ຫາກ​ແມ່ນກິນ​ແບບ​ບຸບ​ເຟ​ກໍ່​ເປັນ​ອີກ​ເລື່ອງ​ໜຶ່ງ ນອກ­ຈາກ​ອາຫານ​ແລ້ວ​ກໍ່​ຄວນ​ເບິ່ງ​ເລື່ອງ​ເຄື່ອງ​ດື່ມ ບໍ່ຢາກ​ໃຫ້ມີ​ການ​ຈຳ­ແນກ​ໂຕະ (VIP) ຫຼື ໂຕະ​ພິ­ເສດ ແລະ ໂຕະ​ທຳ​ມະ​ດາ ເພາະ​ບາງ­ເທື່ອ​ເງິນ​ໃສ່​ຊອງ​ໂຕະທຳ​ມະ​ດາ​ກໍ່​ບໍ່ຕ່ຳ​ແຕ້ມ​ໂຕະ VIP ນໍ? ຄັນ​ມີ​ເຫຼົ້າກໍ່​ຕ້ອງ​ເຫຼົ້າ​ສະ­ເໝີ​ກັນ ຄັນ​ເບຍ​ກໍ່​ເບຍ​ຄື​ກັນ ເພາະເວ­ລາ​ເຈົ້າ­ພາບ​ເລາະ​ຕຳ​ຈອກ​ຂອບ­ໃຈ​ແຂກ​ທີ່​ມາຮ່ວມ​ງານ​ນັ້ນ ຈອກ​ເຈົ້າ­ພາບ​ແມ່ນ​ເຫຼົ້າ​ລາ­ຄາແພງ ສ່ວນ​ຜູ້​ມາ​ຮ່ວມ​ງານ​ແມ່ນ​ຈອກ​ເບຍ ມັນໂລດ​ບໍ່​ເຂົ້າ­ທ່າ ບໍ່​ຮູ້​ວ່າ​ເຈົ້າ­ພາບ​ຊິ​ຄິດ​ອອກ ຫຼື ບໍ່?.

ລະ­ດູ​ການ​ນີ້​ແມ່ນ​ລະ­ດູ​ການ​ແຕ່ງ­ດອງ​ຫຼາຍແທ້ໆ ຄັນ​ແມ່ນ​ເຈົ້າ­ພາບ​ບໍ່​ເປັນ​ເຈົ້າ​ການ​ກວດ­ກາອາ­ຫານ​ການ​ກິນແລ້ວ​ ຈະ​ເສຍ​ພາບ ຈະ​ເສຍ­ໜ້າເສຍ​ຕາ​ແທ້ໆ ເພາະ​ປາກ​ຄົນ​ຕໍ່­ປາກ​ຄົນ​ນີ້​ອັນ​ຕະລາຍ​ແທ້​ໄດ໋... ສິບ​ປີ...ຊາວ​ປີ ກໍ່​ຍັງ​ເວົ້າ​ວ່າ​ໄປງານ​ດອງ​ນັ້ນ​ກິນ​ບົ້ງ​ໃນ​ຍຳ​ສະ­ຫຼັດ.

ຂໍ​ສະ­ເໜີ​ເປັນ​ຂໍ້​ຄິດ​ເນີ?.

ຂ່າວທີ່ກ່ຽວຂ້ອງ