ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ອິນ​ໂດ​ເນ​ເຊຍ ແບນ​ຊິກ

460 26 ມ.ກ. 2017 ຫົວຂໍ້ຂ່າວອື່ນໆ

ພົບ​ກັນ​ວັນ​ນີ້​ຂໍ​ເລີ່ມ​ຕົ້ນ​ກັບ​ເລື່ອງ ​ອິນ​ໂດ​ເນ​ເຊຍ ມີ​ແຜນ​ເກືອດ​ຫ້າມ​ການ​ກະ­ທຳ​ທີ່​ຕ້ານ​ກັບ​ອຸ­ດົມການ​ປັນ​ຈາ​ສີ​ລາ ແລະ ຕໍ່​ໃສ່​ເລື່ອງ​ສອງ­ຜົວ­ເມຍຖືກ​ຈັບ​ກຸມ​ຍ້ອນ​ເຫດ​ທໍ­ລະ­ມານ​ລູກ​ຕົນ​ເອງ​ຢູ່​ປະເທດ​ ແບນ​ຊິກ.

ທີ່ ອິນ​ໂດ​ເນ​ເຊຍ: ໜັງ­ສື­ພິມ​ວຽງ​ຈັນ​ທາມ ສະບັບ​ວັນ​ທີ 21 ເດືອນ​ມັງ­ກອນ​ປີ​ນີ້ ລົງ​ຂ່າວ​ຕ່າງ​ປະເທດ​ກ່ຽວ​ກັບ​ແຜນ​ເກືອດຫ້າມ​ທຸກ​ການ​ກະ­ທຳຂອງ​ບັນ­ດາ​ກຸ່ມ​ຕ່າງໆ​ທີ່​ຂັດ​ກັບ​ຫຼັກ​ອຸ­ດົມ​ການປັນຈາ​ສີ​ລາ ໃນ​ອິນ​ໂດ​ເນ​ເຊຍ ໂດຍ​ທາງ​ການ​ຈະ​ໄດ້ກຳ­ນົດ​ແຈ້ງ​ໃຫ້​ທົ່ວ​ສັງ­ຄົມ​ຮູ້​ວ່າ ມີ​ການ​ກະ­ທຳແນວ­ໃດ​ແດ່​ທີ່​ຖື​ວ່າ​ເປັນ​ການ​ຂັດ​ຕໍ່​ອຸ­ດົມ​ການ​ປັນຈາ​ສີ​ລາ ຫຼື ຫຼັກ 5 ປະ­ການເພື່ອ​ຢູ່​ຮ່ວມ​ກັນ​ຢ່າງສັນ­ຕິ​ ທີ່​ເປັນ​ແນວ­ທາງ​ຕ່າງ­ປະ­ເທດ​ຂອງ​ອິນ​ໂດ​ເນເຊຍ ທັງ​ເປັນ​ອຸ­ດົມ​ການ​ຂອງ​ອາ​ຊຽນ.

ໃນ​ໄລ­ຍະ​ຜ່ານ​ມາ ​ເຄີຍ​ມີ​ກໍ­ລະ­ນີ​ກຸ່ມ​ຄົນ ການຈັດ​ຕັ້ງ ກໍ່​ຄືວົງ​ການ​ສື່​ຕ່າງ­ປະ­ເທດ​ຈຳ­ນວນ​ໜຶ່ງ ຕີຄວາມ​ໝາຍ​ເນື້ອ​ໃນ​ຂອງຫຼັກ​ປັນ​ຈາ​ສີ​ລາແບບຜິດ­ພາດ ຊຶ່ງ​ຖື​ວ່າ​ເປັນ​ການ​ໝິ່ນ­ປະ­ໝາດ​ຫຼັກ​ອຸ­ດົມການ​ອັນ​ສູງ​ສົ່ງ​ດັ່ງ­ກ່າວ.

ແຜນ​ເກືອດ​ຫ້າມ​ນີ້​ມີ​ເປົ້າ​ໝາຍ​ປະ­ຕິ­ບັດ​ວິ­ໄນ​ກັບທຸກ​ພາກ­ສ່ວນ​ທີ່​ຕີ​ຄວາມ​ໝາຍ​ຫຼັກ​ປັນ​ຈາ​ສີ​ລາແບບ​ຜິດ­ພາດ ແລະ ບໍ່ຈະ­ແຈ້ງ ທີ່​ຈະ​ກໍ່​ຊະ​ນວນຄວາມ​ບໍ່​ສະ­ຫງົບ​ໃນ​ສັງ­ຄົມ ທ່ານ ຢາ​ໂຊນ​ນາ ຮາ​ໂມນັນ​ກັນ ລາວ​ລີ ລັດ­ຖະ­ມົນ­ຕີ​ກະ­ຊວງ​ກົດໝາຍ ແລະ ສິດ­ທິ​ມະ­ນຸດ ອິນ​ໂດ​ເນ​ເຊຍ (Yasonna Hamonangan Laoly) ມີ​ຄຳເຫັນ​ກ່ຽວ​ກັບ​ເລື່ອງ​ນີ້​ ໃນ​ວັນ​ທີ 19 ເດືອນ​ມັງ­ກອນ ໂດຍ​ໄດ້​ບອກ​ວ່າ ລັດ­ຖະ­ບານ​ອິນ​ໂດ​ເນ​ເຊຍ ມີ​ແຜນ​ກຳ­ຈັດ​ບັນ­ດາ​ອົງ​ການ­ຈັດ­ຕັ້ງ​ທາງ​ສັງ­ຄົມທີ່​ນິ­ຍົມ​ໃຊ້ຄວາມ​ຮຸນ​ແຮງ ແລະ ມີ​ການ​ເຄື່ອນໄຫວ​ຂັດ​ກັບ​ຫຼັກ 5 ປະ­ການເພື່ອ​ຢູ່​່​ຮ່ວມ​ກັນ​ຢ່າງສັນ­ຕິ.

ທີ່​ປະ­ເທດ ແບນ​ຊິກ (ແບນ​ຢຽມ): ຂ່າວ AFP ໃນ​ມື້​ຂ້ອນ​ທາຍ​ຂອງ​ເດືອນ​ທັນ­ວາ ປີ­ຜ່ານ­ມາ ໃຫ້​ຮູ້ວ່າ ຜົວ​ເມຍ​ຄູ່​ໜຶ່ງ​ໄດ້ຖືກ​ທາງ​ການ​ແບນ​ຊິກ​ຈັບກຸມຍ້ອນ​ເຫດ​ທໍ­ລະ­ມານ​ຜູ້​ເປັນ​ລູກ​ອາ­ຍຸ​ພຽງ​ຫົກ​ປີ ດ້ວຍ​ການ​ປ່ອຍ​ໃຫ້​ໜາວ​ຕາຍ​ຢູ່​ລະ­ບຽງເຮືອນ ໃນຍາມ​ລະ­ດູ​ໜາວ ໂຊກ​ດີ​ທ້າວ​ນ້ອຍ​ໄດ້​ຮັບ​ຄວາມຊ່ວຍ­ເຫຼືອ​ເອົາ​ໄປ​ໂຮງ­ໝໍ​ທັນ ແຕ່​ອາ­ການ​ໜັກໜ່ວງ​ເຕັມ­ທີ ຊິຕາຍ ຫຼື ຊິ​ຍັງ ​ສ່ຳ​ກັນ (ຕອນ​ເປັນຂ່າວ) ເຫດ​ຮ້າຍ​ນີ້​ເກີດ​ຂຶ້ນ​ເມື່ອ​ທ້າວ​ນ້ອຍ​ຫິວ​ເຂົ້າ ແລ້ວ­ໄປ​ຢິບ​ເອົາ​ອາ­ຫານ​ຢູ່​ເຮືອນ­ຄົວມາ​ກິນ​ເອງ ຊຶ່ງ​ເຮັດ​ໃຫ້​ຜູ້​ເປັນ​ພໍ່​ແມ່​ໂມ­ໂຫ ແລ້ວ​ຈັບ​ທ້າວ​ນ້ອຍ ອອກ​ໄປ​ຕາກ​ໜາວ​ຢູ່​ລະ­ບຽງ​ເຮືອນ ເປັນ​ເວ­ລາ 15 ຊົ່ວ­ໂມງ ເພື່ອ​ເປັນ​ການ​ລົງ­ໂທດ ແຕ່​ໃນ​ທີ່​ສຸດໜ່ວຍ​ກູ້​ໄພ​ໄດ້​ພົບ​ເຫັນ​ທ້າວ​ນ້ອຍ​ໃນ​ສະ­ພາບ​ໝົດສະ­ຕິ ແລະ ອ່ອນ­ເພຍ ຍ້ອນຂາດ​ອາ­ຫານ.

ນອກ­ຈາກ​ນັ້ນ ລູກ​ສາວ​ຂອງ​ສອງ­ຜົວ­ເມຍ​ທີ່ເປັນ​ຄູ່​ແຝດ​ກັບ​ທ້າວ​ນ້ອຍ​ຜູ້​ເຄາະ​ຮ້າຍ ກໍ່​ຖືກ​ສົ່ງ​ໄປໂຮງ­ໝໍ ຍ້ອນ​ອາ­ການຂາດ​ອາ­ຫານ ແລະ ຖືກ​ທໍລະ​ມານ​ເຊັ່ນ​ກັນ ຂ່າວ​ໃຫ້​ຮູ້​ຕື່ມ​ວ່າ ຜູ້​ເປັນ​ແມ່​ຂອງເດັກ​ເປັນ​ຄົນ​ຝຣັ່ງ ອາ­ຍຸ 31 ປີ ສ່ວນ​ຝ່າຍຊາຍ​ທີ່ເປັນ​ພໍ່​ນ້າ​ນັ້ນ ແມ່ນ​ຄົນ​ແບນ​ຊິກ ອາ­ຍຸ 21 ປີ ທັງສອງ​ຖືກ​ຈັບ​ກຸມ​ຂຶ້ນ​ສານ​ໃນ​ຄະ­ດີ​ທໍ­ລະ­ມານ​ເດັກ.

ຄະ­ດີ​ນີ້​ໄດ້​ສ້າງ​ບັນ­ຫາ​ຫຍຸ້ງ­ຍາກ​ພໍ​ສົມ­ຄວນ​ສຳລັບ​ອຳ­ນາດ​ການ​ປົກ­ຄອງ ເພາະ​ເດັກ​ທັງ​ສອງ​ບໍ່​ໄດ້ຈົດ​ທະ­ບຽນ​ການ​ເກີດ​ຢູ່ປະ­ເທດ​ແບນ​ຊິກ ຢູ່​ຕ່າງ​ປະເທດໂທດ​ຂອງ​ຜູ້​ເປັນ​ພໍ່​ແມ່ ຫຼື ຜູ້​ປົກ­ຄອງ​ຈາກການ​ໃຊ້​ຄວາມ​ຮຸນ​ແຮງ​ຕໍ່​ລູກໆ​ນັ້ນ​ໜັກ­ໜ່ວງ ຫຼາຍ ຢູ່​ລາວ​ເຮົາ​ມີ​ປະ­ໂຫຍກ​ຄຳ​ສອນ​ສຳ­ລັບ​ຜູ້ເປັນ​ພໍ່​ແມ່​ວ່າ “ຮັກ​ງົວ​ໃຫ້​ຜູກ-ຮັກ​ລູກ​ໃຫ້​ຕີ!” ແຕ່ຕ້ອງ “ຕີ” ດ້ວຍ​ການ​ສັ່ງ­ສອນ ດ້ວຍ​ລະ­ບຽບ​ວິ­ໄນ ບໍ່​ແມ່ນ​ດ້ວຍ​ການ​ໃຊ້​ຄວາມ​ຮຸນ​ແຮງ​ເນີ!.

ຂ່າວທີ່ກ່ຽວຂ້ອງ