ຂ່າວຫຼ້າສຸດ

ສັງຄົມ-ກົດໝາຍ - ນຳ​ສະ­ເໜີ​ໂດຍ : ມະ­ຕິ​ຊົນ : ໂທດ​ຂອງ​ການ​ປ້ອຍ​ດ່າ​ປະ­ຈານ​ກັນ​ໃນ​ເຟ​ສ​ບຸກ...

664 25 ມ.ກ. 2017 ຫົວຂໍ້ຂ່າວອື່ນໆ

ໃນ​ບັນ­ດາ​ປາ­ກົດ­ການ​ຫຍໍ້­ທໍ້​ໜຶ່ງ​ໃນ​ໂລກ​ອອນ​ລາຍ (ເຟ​ສ​ບຸກ) ທີ່​ເຄີຍ​ພົບ​ເຫັນ​ຢູ່​ເລື້ອຍໆ ກໍ່​ຄືການ​ໂພ​ສ​ຂໍ້­ຄວາມ ຮູບ​ພາບ ຄລິບ​ວິ​ດີ​ໂອ (ພາບ​ເຄື່ອນ​ໄຫວ) ລົງ ​ແລ້ວ​ມີ​ການ​ແຊຣແຜ່​ກະ­ຈາຍສົ່ງ­ຕໍ່​ກັນ ການ​ຄອມ​ເມັນ​ສະ­ແດງຄຳ​ຄິດ​ເຫັນ​ທີ່​ບໍ່​ເໝາະ​ສົມ ໃຊ້​ຄຳເວົ້າ​ຫຍາບ​ຄາຍ ລາ­ມົກ​ອາ­ນາຈານ ປ້ອຍ​ດ່າປະ­ຈານ​ກັນ.

ກົດ­ໝາຍ​ວ່າ​ດ້ວຍ​ອາ­ຍາ ແຫ່ງ ສປປ ລາວ ມາດ­ຕາ 95 ແລະ 96 ໄດ້​ລະ­ບຸ​ເຖິງ​ການ​ປ້ອຍ​ດ່າບຸກຄົນ​ໃດ​ຫາກ​ໄດ້​ໃຊ້​ວາ­ຈາ ຂຽນ ຫຼື ກະ­ທຳ​ແນວ​ຫຍາບ­ຊ້າ​ໃສ່​ຜູ້​ອື່ນ ເພື່ອ​ໃຫ້​ເສື່ອມ​ເສຍ​ກຽດ​ສັກ​ສີຢ່າງ​ຮ້າຍ​ແຮງ ແລະ ການໝິ່ນ­ປະ­ໝາດ​ຊາກ​ສົບ ຫຼື ຊື່​ສຽງຂອງ​ຜູ້​ຕາຍ ຖ້າ​ບຸກ­ຄົນ​ໃດ​ຫາກໄດ້​ກະ­ທຳ ຫຼື ໃຊ້​ວາ­ຈາ​ຢ່າງຫຍາບ­ຊ້າ​ຕໍ່​ຊາກ​ສົບ ຊື່​ສຽງ ບ່ອນຝັງ​ສົບ ຫຼື ທາດ​ຂອງຜູ້​ຕາຍ ເຊິ່ງເປັນ​ການ​ແຕະ­ຕ້ອງ​ເຖິງ​ຈິດ­ໃຈມະ­ຫາ­ຊົນ ລ້ວນ​ແຕ່​ຈະ​ຖືກ​ລົງໂທດ​ຕັດ​ອິດ­ສະ­ຫຼະ­ພາບ​ແຕ່ 3 ເດືອນ ຫາ 1 ປີ ຫຼື ດັດ​ສ້າງ​ໂດຍບໍ່​ຕັດ​ອິດ­ສະ­ຫຼະ­ພາບ ແລະ ຈະຖືກ​ປັບ​ໃໝ ແຕ່ 50.000 ກີບ ຫາ 300.000 ກີບ ນັ້ນ​ແມ່ນໂທດ​ຂອງ​ການປ້ອຍ​ດ່າ​ກັນ​ແບບທົ່ວ​ໄປ ແຕ່​ຖ້າ​ປ້ອຍ​ດ່າ​ປະ­ຈານກັນ​ລົງ​ເຟ​ສ​ບຸກ​ເດ ຈະ​ມີ​ຄວາມຜິດ​ແນວ­ໃດ? ໃນ​ກົດ­ໝາຍ​ວ່າດ້ວຍການ​ຕ້ານ ແລະ ສະ­ກັດ​ກັ້ນອາ​ຊະ​ຍາ​ກຳ​ທາງ​ລະ­ບົບ​ຄອມພິວ​ເຕີ້ ແຫ່ງ ສປປ ລາວ ໄດ້​ເວົ້າເຖິງ​ການ​ປ້ອຍ​ດ່າ​ປະ­ຈານ​ກັນໃນເຟ​ສ​ບຸກ ເປັນ​ການ​ສ້າງ​ຄວາມ​ເສຍ​ຫາຍ​ຜ່ານ​ສື່​ສັງ­ຄົມ​ອອນລາຍ ເຊິ່ງ​ໃນ​ມາດ­ຕາ 62 ຂໍ້​ທີ 5 ໄດ້​ລະ­ບຸ​ໂທດ​ຕັດ​ອິດ­ສະ­ຫຼະ­ພາບ 3 ເດືອນ​ເຖິງ 3 ປີ ແລະ ຈະຖືກ​ປັບ​ໃໝ​ແຕ່ 4.000.000 ກີບ ຫາ 20.000.000 ກີບ.

ຮູ້​ແນວ​ນີ້​ແລ້ວ ຕໍ່​ໄປ​ຖ້າ​ຊຸມ​ເຮົາເຈົ້າ​ຂ້ອຍ ຕະ­ຫຼອດ​ຮອດ​ກຸ່ມ​ຄົນຈຳ­ພວກ “ຫຼັງ​ສູ້​ຟ້າ ໜ້າ​ສູ້​ຈໍ (ສັງຄົມ​ກົ້ນ​ໜ້າ)” ທັງ­ຫຼາຍ ທີ່ເຂົ້າທ່ອງ​ສັງ­ຄົມ​ໂລກ​ອອນ​ລາຍ (ເຟ​ສບຸກ…) ຕ້ອງ​ມີ​ສະ­ຕິ​ລະ­ມັດ­ລະ­ວັງ ຢ່າ​ອ້າງ​ແຕ່​ວ່າ​ຍ້ອນ​ຄວາມ​ຮູ້​ເທົ່າບໍ່​ເຖິງ​ການ ອັນ​ໃດ​ຄວນ ອັນ​ໃດບໍ່​ຄວນ​ເຮັດ (ກົດ​ໄລ ກົດ​ແຊຣ ຄອມ​ເມັນ) ຢ່າ​ໄດ້​ຄິດ​ວ່າ​ ເຟ​ສ​ບຸກ ເປັນ​ພື້ນ​ທີ່​ສ່ວນ​ຕົວ​ຂອງ​ໃຜ­ລາວ ຢາກ​ລະ­ບາຍ​ອາ­ລົມ ຄວາມ​ໃນໃຈ ຢາກ​ປ້ອຍ ຢາກ​ດ່າ ຢາກ​ປະຈານ​ໃຜ​ແນວ­ໃດ​ກໍ່​ໄດ້ຕາມ­ໃຈ​ ບໍ່ຜິດ​ກົດ­ໝາຍ​ເນີ້!.

ຂ່າວທີ່ກ່ຽວຂ້ອງ