ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ອິນ​ເດຍ ອັງ­ກິດ

451 25 ມ.ກ. 2017 ຫົວຂໍ້ຂ່າວອື່ນໆ

ມື້­ນີ້​ມີ​ເລື່ອງ​ກ່ຽວ​ກັບ​ທາງ​ການ ​ອິນ​ເດຍ ສັ່ງຫ້າມ​ບັນ­ດາ​ອົງ­ການ​ສົງ­ເຄາະຮັບ​ເງິນ​ສະ­ໜັບ​ສະໜູນ​ຈາກ​ຕ່າງ­ປະ­ເທດ ແລະ ຂ່າວ​ກ່ຽວ​ກັບ​ຂໍ້​ສະເໜີ​ໃຫ້​ສ້າງ­ຕັ້ງ​ລະ­ບົບ​ເກັບ​ຄ່າ​ການ​ໃຊ້​ເສັ້ນ­ທາງ​ໃນບໍ­ລິ­ເວນ​ໃຈ­ກາງ​ນະ­ຄອນ­ຫຼວງ​ລອນ​ດອນ ປະ­ເທດ ອັງ­ກິດ.

ທີ່ ອິນ​ເດຍ: ໃນ​ທ້າຍ​ເດືອນ​ທັນ­ວາ​ ປີ 2016 ມີຂ່າວ​ກ່ຽວ​ກັບ​ທາງ​ການ​ອິນ​ເດຍໄດ້​ສັ່ງ​ອົງ­ການ​ຈັດຕັ້ງ​ທາງ​ສັງ­ຄົມ​ທີ່​ເຮັດ​ວຽກ​ສົງ­ເຄາະ ຈຳ­ນວນ 20.000 ຫົວ­ໜ່ວຍ ບໍ່​ໃຫ້​ຮັບ​ເງິນ​ທຶນ​ສະ­ໜັບ​ສະໜູນ​ຈາກ​ຕ່າງ­ປະ­ເທດ ຍ້ອນ​ວ່າອົງ­ການ​ເຫຼົ່າ​ນີ້​ບໍ່ປະ­ຕິ­ບັດ​ຕາມ​ລະ­ບຽບ​ຫຼັກ­ການ​ທີ່​ກະ­ຊວງ​ພາຍ​ໃນ​ອິນ​ເດຍ​ໄດ້​ວາງ​ອອກ.

ທ່ານ ທາ​ວາ​ເລຍ (KS Dhatwalia) ໂຄ­ສົກ​ກະຊວງ​ດັ່ງ­ກ່າວ​ໄດ້​ບອກ​ກັບ​ນັກ​ຂ່າວ AFP ວ່າ ທາງການ​ໄດ້​ຍົກ­ເລີກ​ໃບອະ­ນຸ­ຍາດ​ເຄື່ອນ​ໄຫວ​ຂອງອົງ­ການ​ເຫຼົ່າ​ນີ້ ເປັນ​ເວ­ລາ 1 ປີ​ເຄິ່ງ ຍ້ອນ​ມີ​ການເຄື່ອນ​ໄຫວ​ທີ່​ຂັດ​ຕໍ່​ລະ­ບຽບ​ ວ່າ​ດ້ວຍ​ການ​ຮັບການ​ບໍ­ລິ­ຈາກ​ຂອງ​ຕ່າງ­ປະ­ເທດ.

ເມື່ອ​ຖືກ​ຍົກ­ເລີກ​ໃບ​ອະ­ນຸ­ຍາດ​ເຄື່ອນ​ໄຫວ ອົງການ­ຈັດ­ຕັ້ງ​ສົງ­ເຄາະ​ກໍ່​ບໍ່​ສາ­ມາດ​ຮັບ​ການ​ບໍ­ລິ­ຈາກດ້ານ​ທຶນ­ຮອນ​ຈາກ​ຕ່າງ­ປະ­ເທດ​ໃດໆທັງ​ຊິ້ນ ຊຶ່ງ​ຈະເຮັດ​ການ­ເຄື່ອນ­ໄຫວ​ປະ­ຈຳ​ວັນ​ຂອງ​ພວກ​ເຂົາ­ເຈົ້າເປັນ​ອຳ­ມະ­ພາດ​ໄປ ທ່ານ​ໂຄ­ສົກ​ໄດ້​ຢ້ຳຕື່ມ​ວ່າ ອົງການ​ເຫຼົ່າ​ນີ້​ຈະ​ໄດ້​ຮັບ​ໃບ​ອະ­ນຸ­ຍາດ​ເຄື່ອນ​ໄຫວ​ພາຍຫຼັງ​ໄລ­ຍະ​ກຳ­ນົດ​ຫ້າມ​ຊິ້ນ​ສຸດ.

ໃນ​ຂະ­ນະ​ດຽວອີກ 13.000 ອົງ​ການ­ຈັດ­ຕັ້ງ​ທີ່​ບໍ່ຂຶ້ນ​ກັບ​ລັດ­ຖະ­ບານ ຊຶ່ງ​ໄດ້​ຮັບ​ທຶນ​ສະ­ໜັບ­ສະ­ໜູນທຶນ​ຈາກ​ຕ່າງ­ປະ­ເທດ ແລະ ຍັງ​ມີ​ໃບ​ອະ­ນຸ­ຍາດເຄື່ອນ​ໄຫວ ກໍ່​ໄດ້​ຖືກ​ຕິດ­ຕາມ​ຄວບ​ຄຸມ​ຢ່າງ​ເຄັ່ງ​ຄັດ ເພື່ອ​ໃຫ້​ປະ­ຕິ­ບັດ​ຕາມ​ລະ­ບຽບ​ການ​ທີ່​ທາງການ​ໄດ້ວາງ​ອອກ.

ທີ່​ປະ­ເທດອັງ­ກິດ: ໜັງ­ສື­ພິມ​ວຽງ​ຈັນ​ທາມ ສະ­ບັບ ວັນ​ທີ 21 ເດືອນ​ມັງ­ກອນ​ປີ​ນີ້ ໄດ້​ສະ­ເໜີ​ຂ່າວ​ກ່ຽວກັບ​ແຜນ­ການ​ຈັດລະ­ບົບ​ເກັບ​ເງິນ​ຄ່າ​ໃຊ້​ທາງ​ຢູ່​ບໍ​ລິເວນ​ໃຈ­ກາງ​ນະ­ຄອນ­ຫຼວງ​ລອນ​ດອນ ປະ­ເທດ​ອັງກິດ ໂດຍ​ແມ່ນ​ສຳ­ນັກ­ງານ​ປົກ­ຄອງນະ­ຄອນ­ຫຼວງ ເປັນ​ເຈົ້າ​ການ​ລິ​ເລີ່ມ.

ເຫດ​ທີ່​ຕ້ອງ​ຈິງ​ຈັງ​ກ່ຽວ​ກັບ​ບັນ­ຫາ​ນີ້​ກໍ່​ເພາະ­ວ່າ ມີ​ຕົວ​ເລກ​ລາຍ​ງານ​ໃນ​ວັນ​ທີ 19 ເດືອນ​ມັງ­ກອນ​ນີ້​ວ່າ ບັນ­ຫາ​ຊັກ​ຊ້າ​ຍ້ອນການ​ຈະ­ລາ­ຈອນ​ຕິດ​ຂັດ​ຢູ່​ນະ­ຄອນ­ຫຼວງ ​ໄດ້​ສ້າງ​ຄວາມ​ເສຍ​ຫາຍຄິດ​ເປັນເງິນ​ເຖິງ 6,8 ຕື້​ໂດ​ລາ​ສະ­ຫະ­ລັດ ນອກ­ຈາກນັ້ນ ທາງ​ຄະ­ນະ​ກຳ­ມະ­ການ​ກິດ­ຈະ­ການ​ຂົນ­ສົ່ງ​ຂອງລອນ​ດອນ ​ຍັງ​ໃຫ້​ຊາບ​ຕື່ມ​ວ່າ ໃນ​ພຽງ 2 ປີ​ເທົ່ານັ້ນ ມູນ​ຄ່າ​ຄວາມເສຍ​ຫາຍ​ຈາກ​ສະ­ພາບ​ຊັກ​ຊ້າ​ຍ້ອນ​ຈະ­ລາ­ຈອນ​ຕິດ​ຂັດ​ຢູ່​ລອນ​ດອນ ​ໄດ້​ເພີ່ມ​ຂຶ້ນ​ເຖິງ 30%.

ນະ­ຄອນ­ຫຼວງ​ລອນ​ດອນ ​ໄດ້​ປະ​ເຊີນ​ກັບ​ບັນ­ຫາ​ມົນ​ລະ​ພິດ​ທາງ​ອາ­ກາດ​ເຖິງ​ຂັ້ນ​ໄດ້​ມີ​ການ​ເຕືອນ​ໄພເປັນ​ເວ­ລາ​ຢ່າງ​ໜ້ອຍ 3 ວັນ ຫວ່າງ​ບໍ່​ດົນ​ມາ​ນີ້ ຫ້ອງ­ການ​ອົງ­ການ​ປົກ­ຄອງ​ນະ­ຄອນ­ຫຼວງ ​ໄດ້​ເຕືອນກ່ຽວ​ກັບ​ມົນ​ລະ​ພິດ​ທາງ​ອາ­ກາດ​ທີ່​ເພີ່ມຄວາມຮ້າຍ​ແຮງ​ຂຶ້ນ​ໃນ 17 ເຂດ​ອ້ອມ­ແອ້ມ ກໍ່​ຄືໃນ​ໃຈກາງ​ລອນ​ດອນ​ເອງ.

ດ້ວຍ​ເຫດ­ຜົນ​ນີ້​ເອງ ທາງ​ຄະ­ນະ​ກຳ­ມະ­ການ​ກິດຈະ​ການ​ຂົນ­ສົ່ງ​ນະ­ຄອນ­ຫຼວງ ຈິ່ງ​ໄດ້​ຮຽກ­ຮ້ອງ​ໃຫ້ທ່ານ ຄານ (Khan) ເຈົ້າ​ຂອງ​ນະ­ຄອນ­ຫຼວງ ​ຮີບປ່ຽນ​ຈາກ​ລະ­ບົບ​ເກັບ​ຄ່າ​ຈະ­ລາ­ຈອນ​ຕິດ​ຂັດ (Traffic Congestion Charge) ມາ​ເປັນ​ລະ­ບົບເກັບ​ຄ່າ​ທາງ (Road Pricing) ຄື​ວາງ​ເປົ້າ​ໝາຍເກັບ​ໃນ​ເຂດ​ສະ­ເພາະ​ບ່ອນ​ມີ​ສະ­ພາບ​ການ​ຈະ­ລາຈອນ​ອັ່ງ​ອໍ​ໃນ​ຊົ່ວ­ໂມງ​ລົດ​ຕິດ.

ໃນ​ລະ­ບົບ​ທີ່​ໃຊ້​ໃນ​ປັດ­ຈຸ­ບັນ ລົດ​ທີ່​ແລ່ນ​ເຂົ້າ​ບໍ​ລິເວນ​ໃຈ­ກາງ​ລອນ​ດອນ ໃນ​ມື້​ເຮັດ​ວຽກ​ນັ້ນ ໄດ້​ເສຍຄ່າ​ທາງ​ປະ­ມານ 11,50 ປອນ (ເທົ່າ​ກັບ 12,30 ໂດ​ລາ​ສະ­ຫະ­ລັດ) ແຕ່​ບໍ່​ໄດ້​ເສຍ​ຄ່າ​ຖ້າ​ໃຊ້​ທາງ​ໃນໂມງ​ເລີກ​ການ (ຕອນ​ຄ່ຳ) ແລະ ໃນ​ວັນພັກ​ທ້າຍອາ­ທິດ ລະ­ບົບ​ເກັບ​ຄ່າ​ທາງ​ໃໝ່​ທີ່​ຈະ​ນຳ​ໃຊ້​ໃນ​ຕໍ່ໜ້າ​ນີ້ ຈະ​ເນັ້ນ​ເກັບ​ໃນ​ລາ­ຄາ​ສູງໆ ສຳ­ລັບ​ລົດ​ທີ່ແລ່ນ​ຕາມ​ເສັ້ນ­ທາງ​ໃຈ­ກາງ​ນະ­ຄອນ­ຫຼວງ​ເວ­ລາ​ມີ​ສະ­ພາບ​ລົດ​ອັ່ງ​ອໍ ແລະ ລົດ​ທີ່​ແກ່­ຍາວ​ເວ­ລາ​ໃນເຂດ​ດັ່ງ­ກ່າວ ລະ­ບົບ​ເກັບ​ຄ່າ​ລົດ​ຕິດ​ຢູ່ລອນ​ດອນ ​ໄດ້ນຳ​ໃຊ້​ມາ​ແຕ່​ປີ 2003 ແລະ ມີ​ມູນ​ຄ່າ​ສູງ​ທີ່​ສຸດ​ໃນໂລກ.

ຂ່າວທີ່ກ່ຽວຂ້ອງ