ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສິງ­ກະ­ໂປ ສປ ຈີນ

454 24 ມ.ກ. 2017 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້ ຂໍ​ເລີ່ມ​ຕົ້ນ​ກັບ​ເລື່ອງ​ການ​ຕີລາ­ຄາ​ໜັງ­ສື­ຜ່ານ­ແດນ​ຂອງ​ບັນ­ດາ​ປະ­ເທດ ​ທີ່​ສາມາດ​ໃຊ້​ໄດ້​ຢ່າງ​ສະ­ດວກສະ­ບາຍ ຊຶ່ງ​ ສິງ­ກະ­ໂປ ​ໄດ້ຄອງ​ລະ­ດັບ​ທີ​ສອງ ແລະ ຕໍ່​ໃສ່​ເລື່ອງ​ນະ­ຄອນ­ຫຼວງປັກ​ກິ່ງ ສປ ຈີນ ທຸ່ມ​ເທ​ງົບ­ປະ­ມານ​ຕ້ານ​ມົນ​ລະ​ພິດ​ທາງ​ອາ­ກາດ.

ທີ່ ສິງ­ກະ­ໂປ: ອີງ​ຕາມ​ຂ່າວ​ຕ່າງ­ປະ­ເທດ ໃນ​ວັນ​ທີ 17 ເດືອນ​ມັງ­ກອນ​ນີ້ ພວກ​ເຮົາ​ຮູ້​ວ່າໜັງ­ສື​ຜ່ານແດນ​ຂອງ​ປະ­ເທດ​ສິງ­ກະ­ໂປ ແລະ ຂອງ​ປະ­ເທດ​ຊູແອດ (ສະ​ວີ​ເດັນ) ໄດ້​ຮ່ວມ​ກັນ​ຄອງ​ລະ­ດັບ​ທີ​ສອງ ໃນ​ແງ່​ຄວາມ​ສະ­ດວກ​ສະ­ບາຍ​ໃນ​ການ​ນຳ​ໃຊ້ ເພື່ອເດີນ­ທາງ​ເຂົ້າ-ອອກ​ຕ່າງ­ປະ­ເທດ ໂດຍ​ໄດ້​ຮັບ​ຄະແນນ 156 ແຕ້ມ ສຳ­ລັບ​ເງື່ອນ­ໄຂ​ໄດ້​ຮັບ​ການ​ຍົກເວັ້ນ​ວີຊາ.

ສ່ວນ​ປະ­ເທດ​ທີ່​ມີ​ປັດ​ສະ​ປໍ​ໃຊ້​ໄດ້​ສະ­ດວກ​ສະ­ບາຍຫຼາຍ​ເປັນ​ລະ­ດັບ​ທີ 1 ນັ້ນ ແມ່ນ​ປະ­ເທດ​ເຢຍ​ລະ​ມັນ ທີ່​ໄດ້​ຄະ­ແນນ 157 ແຕ້ມ ມາ​ໃນ​ອັນ​ດັບ​ທີ 3 ທີ່​ມີຄະ­ແນນ 155 ແຕ້ມ ໄດ້­ແກ່​ປະ­ເທດ​ ດານ​ມາກ ຟິນແລນ ຝຣັ່ງ ແອັດ​ສະ​ປາຍ ສະ​ວິດ ນອກ​ແວ ອັງ­ກິດ ແລະ ສະ­ຫະ­ລັດ​ອາ​ເມ​ຣິ​ກາ ເມື່ອ​ເບິ່ງ​ຕາມ​ຄະ­ແນນແລ້ວ ສິງ­ກະ­ໂປ ມີ​ປັດ​ສະ​ປໍ​ທີ່​ໃຊ້​ໄດ້​ສະ­ດວກ​ສະບາຍ ແລະ ກວ້າງ­ຂວາງ​ເປັນ​ອັນ​ດັບ​ທີ 1 ໃນ​ທະ­ວີບອາ­ຊີ ແທນ​ບ່ອນ ສ ເກົາ­ຫຼີ ທີ່​ຄອງ​ອັນ​ດັບ 1 ຕາມສະ­ຖິ­ຕິ​ປີ​ກາຍ.

ປັດ​ສະ​ປໍຂອງ​ບັນ­ດາ​ປະ­ເທດ​ທີ່​ໃຊ້​ໄດ້​ໃນ​ຈຳ­ນວນຈຳ­ກັດ​ທີ່​ສຸດ ໄດ້­ແກ່​ປັດ​ສະ​ປໍ​ປະ­ເທດ​ອີ​ຣັກ (ຄະແນນ 92) ປາ​ກິ​ສະ­ຖານ (ຄະ­ແນນ 93) ອັບ​ການິ​ສະ­ຖານ (ຄະ­ແນນ 94).

ການ​ຕີ​ລາ­ຄາ​ຄວາມ​ສະ­ດວກ​ສະ­ບາຍ​ຂອງ​ການນຳ​ໃຊ້​ປັດ​ສະ​ປໍ​ປະ­ເທດ​ຕ່າງໆ​ນັ້ນ ດຳ­ເນີນ​ໂດຍຫຼາຍ​ປະ­ເທດ ແລະ ຫຼາຍອົງ​ການ­ຈັດ­ຕັ້ງ ໂດຍ​ອີງໃສ່​ຕາມ​ເງື່ອນ­ໄຂ​ດັ່ງ​ຕໍ່​ໄປ​ນີ້​ຄື: ເປັນ​ໜັງ­ສື­ຜ່ານ­ແດນທີ່​ໄດ້​ຮັບ​ການ​ຍົກ­ເວັ້ນ​ວີ​ຊາ​ຫຼາຍ​ທີ່​ສຸດ ເວ­ລາ​ເດີນທາງ​ໄປ​ຕ່າງ­ປະ­ເທດ ຫຼື ເປັນ​ໜັງ­ສື­ຜ່ານ­ແດນ​ທີ່​ສາມາດ​ໃຊ້​ເພື່ອ​ເອົາ​ວີ​ຊາ​ກັບ​ດ່ານ​ໄດ້ ບາງ​ອົງ­ການຈັດ​ຕັ້ງ​ທີ່​ເຮັດ​ໜ້າ­ທີ່​ຕີ​ລາ­ຄາ​ນັ້ນ​ໄດ້​ຖື​ເອົາ​ເງື່ອນ­ໄຂຂອງ​ປະ­ເທດ​ທີ່​ຍົກ­ເວັ້ນ​ວີ​ຊາ ​ໃຫ້​ໜັງ­ສື­ຜ່ານ­ແດນຂອງ​ປະ­ເທດ​ອື່ນ​ເປັນ​ຫຼັກ ເມື່ອ​ປີ­ຜ່ານ­ມາ ບາງ​ອົງການ­ຈັດ­ຕັ້ງ​ທີ່​ເຮັດ​ການ​ຕີ​ລາ­ຄາ​ໄດ້​ຈັດ​ສິງ­ກະ­ໂປ ຢູ່​ໃນ​ອັນ​ດັບ​ທີ 5 ຂອງ​ໂລກ.

ການ​ທີ່​ປະ­ເທດ​ໜຶ່ງໆ​ມີ​ໜັງ­ສື­ຜ່ານ­ແດນ​ທີ່​ເປັນ​ທີ່​ຍອມ­ຮັບ​ຢ່າງ​ກວ້າງ­ຂວາງ​ຂອງ​ຕ່າງ­ປະ­ເທດ​ນັ້ນ ມັນ​ສະ­ແດງ​ວ່າ ປະ­ເທດນັ້ນ​ໄດ້​ຮັບ​ຄວາມ​ໄວ້​ວາງໃຈ​ສູງ​ໃນ​ເວ­ທີ​ສາ­ກົນ.

ທີ່ ສປ ຈີນ: ຂ່າວ​ຕ່າງ­ປະ­ເທດ ໃນ​ວັນ​ທີ 16 ເດືອນ​ມັງ­ກອນ​ປີ​ນີ້​ໃຫ້​ຮູ້​ວ່າ: ທາງ​ການ​ນະ­ຄອນຫຼວງ​ປັກ​ກິ່ງ ຈະ​ນຳ​ໃຊ້​ງົບ­ປະ­ມານ​ສູງ​ເຖິງ 18,22 ຕື້​ຢວນ (ເທົ່າ​ກັບ 2,6 ຕື້​ໂດ​ລາ​ສະ­ຫະ­ລັດ) ເພື່ອ​ແກ້ໄຂ​ມົນ​ລະ​ພິດ​ທາງ​ອາ­ກາດ​ຢູ່​ນະ­ຄອນ​ປັກ​ກິ່ງ ໃນປີ 2017 ໂດຍ​ຕັ້ງ​ເປົ້າ​ໝາຍ​ຫຼຸດ­ຜ່ອນ​ຄວາມ​ໜາແໜ້ນ​ຂອງ​ສານ PM 2,5 ໃຫ້​ຢູ່​ໃນ​ລະ­ດັບ​ປະ­ມານ 60 ໄມ​ໂຄຣກ​ຣາມ.

PM 2,5 ແມ່ນ​ມາດ­ຖານ​ວັດ­ແທກ​ຝຸ່ນ​ໝອກ​ທີ່​ມີຂະ­ໜາດ​ເສັ້ນ​ຜ່າ​ສູນ​ກາງ 2,5 ໄມ​ໂຄຣ​ມີ​ເຕີ ໃນ​ປີ 2016 ຄວາມ​ໜາ​ແໜ້ນ​ຂອງ PM 2,5 ຢູ່​ນະ­ຄອນຫຼວງ​ປັກ​ກິ່ງ ແມ່ນ 73 ໄມ​ໂຄຣກ​ຣາມ ຕໍ່​ພື້ນ​ທີ່ 1 ແມັດ​ກ້ອນ ຫຼຸດ​ລົງ​ຈາກ​ປີ 2015 9,9% ເມື່ອ​ບັນລຸ​ເປົ້າ​ໝາຍ​ແກ້​ໄຂ​ມົນ​ລະ​ພິດ​ທາງ​ອາ­ກາດ ນະຄອນ​ຫຼວງ​ປັກ​ກິ່ງ ​ຈະ​ໄດ້​ກຳ­ນົດ​ໃຫ້ 700 ບ້ານ ປ່ຽນ​ໄປ​ໃຊ້​ພະ­ລັງ­ງານ​ສະ­ອາດ​ແທນ​ການ​ໃຊ້​ຖ່ານ​ຫີນ ຈຳ­ນວນ​ການ​ໃຊ້​ຖ່ານ​ຫີນ​ຈະ​ຖືກ​ຕັດ​ລົງ 30% ເທົ່າ​ກັບ 7 ລ້ານ​ໂຕນ ນອກ­ຈາກ​ນັ້ນກໍ່​ຍັງ​ມີ​ແຜນກຳ­ຈັດ​ພາ­ຫະ­ນະ​ເກົ່າ​ທີ່​ລ້າ​ສະ­ໄໝ ຈຳ­ນວນ 300.000 ຄັນ ເປັນ​ຂັ້ນ​ຕອນ​ຕໍ່​ໄປ.

ຂ່າວທີ່ກ່ຽວຂ້ອງ