ຂ່າວຫຼ້າສຸດ

ຮູ້ພາສາລາວ ມື້ລະຄຳ : ລໍ້

484 24 ມ.ກ. 2017 ຫົວຂໍ້ຂ່າວອື່ນໆ

ຄຳ​ກິ­ລິ­ຍາ ໃນ​ຄວາມໝາຍ​ໜຶ່ງແປ​ວ່າ ຊວນ​ໃຫ້​ຫຼົງໄຫຼ, ຫຼອກ​ລວງ, ອອຍ​ເອົາ, ຍົວະ​ເອົາ (ວັດ­ຈະ­ນາ­ນຸ­ກົມພາ­ສາ​ລາວ ທອງ­ຄຳ ອ່ອນ​ມະນີ​ສອນ 2008:683), ຈຶ່ງ​ພົບ​ເຫັນ​ໃຊ້​ປົກ​ກະຕິ​ໃນ​ຊີ­ວິດ​ປະ­ຈຳ​ວັນ ໂດຍ​ສະ­ເພາະເວ­ລາ​ຖືກ​ລົບ​ກວນຈິດ­ໃຈ ຫຼື ມີ​ສິ່ງ​ດຶງ​ດູດ​ໃຈ.

ຕົວ­ຢ່າງ:

- ສິນ­ຄ້າ​ຫຼາຍ​ຢ່າງ​ລໍ້​ໃຈ​ລູກ​ຄ້າ​ໃຫ້​ຈົກ​ກະ­ເປົາ​ເງິນ

- ຢ່າ​ເວົ້າ​ລໍ້​ຫຼິ້ນ ຫາ​ລະ​ໄປ​ເຮັດ​ວຽກ​ໃຫ້​ແລ້ວ​ໄວໆ

- ເວົ້າ​ລໍ້​ແລ້​ກັນ​ຢູ່​ຫັ້ນ​ລະ ວຽກ​ບໍ່​ແລ້ວ​ເດີ!

- “ນົກ​ເຕັນ​ຊີວ​ທຳ​ກົນ​ລໍ້​ຫຼອກ ຫົວ­ຄິດ​ອອກ​ຂີ້​ອ່ອຍ​ລົງ​ມາ” (ກາບ)

- “ຢ່າ​ມາ​ລໍ້​ແລ້    ຮັງ​ແຕນ​ມັນ​ຊິ​ໄລ່

ຢ່າ​ເອົາ​ໄມ້­ແສ້     ມາ​ລໍ້​ແຍ່​ແຕນ” (ຜະ­ຫຍາ)

- “ບູ­ຮານ​ເພິ່ນ​ເວົ້າ           ວ່າ​ປາກ​ຜູ້​ຊາຍ​ຫວານ

ຄື​ນ້ຳ­ຕານ​ຊາຍ​ຂາວ         ລໍ້​ມົດ​ແດງ​ໃຫ້​ຕາຍ​ຄ້າງ ຍ້ອນ​ປາກ­ຫວານ (ຜະ­ຫຍາ)

ໃນ​ທາງ​ທາງ​ພາ­ສາ​ສາດ ແລະ​ໃນ​ພາ­ສາ​ລາວ, ລໍ້ ຖື​ເປັນໜ່ວຍ​ຄຳ​ໜຶ່ງ​ທີ່​ເປັນ​ທັງ​ຄຳ ແລະ ໜ່ວຍ​ຄຳ​ທີ່​ສາ­ມາດ​ສ້າງ​ຄຳ​ໄດ້ ເຊັ່ນ: ລໍ້​ແລ້, ລໍ້​ຫຼິ້ນ, ຫຼອກ​ລໍ້...

ຂ່າວທີ່ກ່ຽວຂ້ອງ