ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສສ ຫວຽດ­ນາມ ​ກຳ­ປູ­ເຈຍ

474 19 ມ.ກ. 2017 ຫົວຂໍ້ຂ່າວອື່ນໆ

ມື້­ນີ້​ພວກ​ເຮົາ​ພາ­ກັນ​ໄປ​ເບິ່ງ​ຂໍ້​ສະ­ເໜີ​ຕ່າງໆເພື່ອ​ອະ­ນຸ​ຮັກ​ຊ້າງ ຢູ່ ສສ ຫວຽດ­ນາມ ແລະ ປິດທ້າຍ​ກັບ​ຂໍ້​ແນະ­ນຳ​ຕ່າງໆຂອງ​ທ່ານ​ນາ­ຍົກ​ລັດ​ຖະມົນ­ຕີ ຮຸນ​ເຊັນ ຂອງ​ກຳ­ປູ­ເຈຍ ຕໍ່​ບັນ­ດາ​ນັກ​ຂ່າວ ແລະ ໂຄ­ສົກ.

ທີ່ ສສ ຫວຽດ­ນາມ: ຫວ່າງ​ບໍ່​ດົນ​ມາ​ນີ້ ທີ່​ດັກລັກ ຫວຽດ­ນາມ ໄດ້​ຈັດ​ໃຫ້​ມີ​ກອງ​ປະ­ຊຸມ​ກ່ຽວ​ກັບການ​ອະ­ນຸ​ຮັກ​ຊ້າງ​ຂຶ້ນ ທັງນີ້​ກໍ່​ເພາະ­ວ່າ ຊ້າງ​ໃນຫວຽດ­ນາມ​ມີ​ຄວາມ​ສ່ຽງ​ສູງ​ທີ່​ຈະ​ສູນ­ພັນສະ­ຖິ­ຕິ ທາງ​ການ​ຊີ້​ອອກ​ວ່າ ໃນ​ປັດ­ຈຸ­ບັນ ຫວຽດ­ນາມ ຍັງເຫຼືອ​ຊ້າງ​ປ່າ​ພຽງ​ປະ­ມານ 100 ໂຕ ແລະ ຊ້າງລ້ຽງ​ອີກ​ພຽງ 60 ໂຕເທົ່າ​ນັ້ນ.

ບັນ­ຫາ​ທີ່​ພາ­ໃຫ້​ເກີດ​ຄວາມ​ສ່ຽງ​ສູງ​ນັ້ນ​ແມ່ນ​ມາຈາກ​ການ​ລັກ­ລອບ​ລ່າ​ຊ້າງ​ປ່າເພື່ອ​ເອົາ​ງາ ການທຳ­ລາຍ​ປ່າ ກໍ່​ຄືການ​ບຸກ­ເບີກ​ເນື້ອ­ທີ່ເພື່ອ​ການພັດ­ທະ­ນາ ຊຶ່ງ​ເຮັດ​ໃຫ້​ທີ່­ຢູ່​ອາ­ໄສ​ຂອງ​ຊ້າງ​ສູນຫາຍ​ໄປ ສ່ວນ​ບັນ­ດາ​ຊ້າງ​ລ້ຽງ​ນັ້ນ ​ກໍ່​ນັບ​ມື້​ນັບ​ເຖົ້າແກ່ ແລະ ບໍ່​ແຜ່­ພັນ​ອີກ.

ນອກ­ຈາກ​ນັ້ນ ການ​ປະ​ທະ​ກັນ​ລະ­ຫວ່າງ​ຊ້າງປ່າ​ກັບ​ມະ­ນຸດ​ກໍ່​ນັບ​ມື້​ທະ­ວີ​ຖີ່​ຂຶ້ນ ເພື່ອ​ຍາດ​ຊີງ​ອາຫານ ແລະ ທີ່­ຢູ່​ອາ­ໄສ ທ່ານ ເອ​ຣິນ ​ໄອ​ວໍ​ຣີ ຊ່ຽວຊານ​ກ່ຽວ​ກັບ​ການ​ຮັກ­ສາ​ປິ່ນ­ປົວ​ສັດທີ່​ເຂົ້າ​ຮ່ວມກອງ​ປະ­ຊຸມ ໄດ້​ຮຽກ­ຮ້ອງ​ໃຫ້​ໃຊ້​ມາດ​ຕະ­ການ​ສະກັດ​ກັ້ນ​ການ​ລ່າ​ຊ້າງ ແລະ ຈັດ​ສັນ​ເຂດ​ຢູ່​ອາ­ໄສຂອງ​ຊ້າງ ເອົາ­ໃຈ­ໃສ່​ເບິ່ງ­ແຍງ​ດູ​ແລ​ສຸ­ຂະ­ພາບຂອງ​ຊ້າງ ແລະ ຈຳ­ກັດການ​ນຳ​ຊ້າງ​ເຂົ້າ​ໃນ​ກິດຈະ​ການ­ທ່ອງ­ທ່ຽວ ນອກ­ຈາກ​ນັ້ນ ຄວນ​ຊອກ​ວິ­ທີສົ່ງ­ເສີມ​ໃຫ້​ຊ້າງ​ແຜ່­ພັນ​ໃຫ້​ຫຼາຍ.

ສ່ວນ​ຊ່ຽວ­ຊານ​ຄົນ​ອື່ນໆ​ໃນ​ກອງ​ປະ­ຊຸມ​ນັ້ນ ​ໃຫ້ຄວາມ​ສົນ­ໃຈ​ບັນ­ຫາ​ການ​ໃຊ້​ຊ້າງ​ເພື່ອ​ທຸ­ລະ​ກິດການ­ທ່ອງ­ທ່ຽວ ຊຶ່ງ​ໄດ້ສ້າງ​ບັນ­ຫາ​ຄວາມ​ກົດ​ດັນແກ່​ຊ້າງ ຊຶ່ງ​ສົ່ງ​ຜົນ​ກະ­ທົບ​ຕໍ່​ລະ­ດັບ​ຄວາມ​ສາມາດ​ໃນ​ການ​ສືບ​ພັນ ໂຄງ­ການ​ອະ­ນຸ​ຮັກ​ຊ້າງ​ຂອງຫວຽດ­ນາມນັ້ນ ຕິດ​ພັນ​ກັບ​ການ​ສົ່ງ­ເສີມ​ການ​ປົກປັກ​ຮັກ­ສາ​ສິ່ງ­ແວ­ດລ້ອມ ກໍ່​ຄືການ​ແກ້​ໄຂ​ບັນ­ຫາຂັດ​ແຍ່ງ​ລະ­ຫວ່າງ​ຄົນກັບ​ຊ້າງ.

ທີ່​ ກຳ­ປູ­ເຈຍ: ຂ່າວ​ຕ່າງ­ປະ­ເທດ​ຈາກ​ກຳ­ປູ­ເຈຍ ໃນ​ວັນ​ທີ 16 ເດືອນ​ທັນ­ວາ​ປີ​ກາຍ​ນີ້​ ໃຫ້​ຮູ້​ວ່າ: ທ່ານ ຮຸນ​ເຊັນ ນາ­ຍົກ­ລັດ­ຖະ­ມົນ­ຕີ​ກຳ­ປູ­ເຈຍ ໄດ້​ຈັດ​ງານລ້ຽງ​ໃຫຍ່​ສຳ­ລັບ​ບັນ­ດາ​ນັກ​ໜັງ­ສື­ພິມ ໂຄ­ສົກ ແລະ ຜູ້​ຈັດ​ລາຍ­ການ​ພາຍ​ໃນ ຈຳ­ນວນ​ກວ່າ 1.000 ຄົນ ນີ້​ເປັນ​ການ​ພົບ​ປະ​ຄັ້ງ​ປະ­ຫວັດ­ສາດ ລະ­ຫວ່າງ​ທ່ານ​ນາ­ຍົກ ​ກັບ​ມວນ​ຊົນ​ຄົນ​ສື່​ຂອງ​ປະເທດ ໃນ​ງານ​ລ້ຽງ ທ່ານ​ນາ­ຍົກ​ໄດ້​ຮຽກ­ຮ້ອງ​ໃຫ້ບັນ­ດາ​ຕົວ​ແທນ​ສື່​ລາຍ​ງານ​ຂ່າວ​ຢ່າງ​ຖືກ­ຕ້ອງ ແມ໋ນ​ຢຳ ແລະ ທັນ​ການ ນອກ​ນັ້ນ ທ່ານ​ຍັງ​ໄດ້ຮຽກ­ຮ້ອງ​ໃຫ້​ບັນ­ດາ​ໂຄ­ສົກ​ປະ­ຈຳ​ກະ­ຊວງ ສຳ­ນັກງານ ອົງ­ການ​ຕ່າງໆ ຮ່ວມ​ມື​ເປັນ​ຢ່າງ​ດີ​ກັບ​ບັນດາ​ນັກ​ໜັງ­ສື­ພິມ.

ທ່ານ​ໄດ້​ຮຽກ­ຮ້ອງ​ໃຫ້​ນັກ​ໜັງ­ສື­ພິມ​ປະ­ຕິ­ບັດຕາມ​ລະ­ບຽບ​ຫຼັກ­ການ ແລະ ມີ​ຈັນ​ຍາ​ບັນ ຄື: ບໍ່ຮັບ​ເງິນ​ສິນ​ບົນ​ຈາກ​ຜູ້​ມີ​ອຳ­ນາດ​ເງິນ ແລະ ຖາ­ນະຕຳ­ແໜ່ງ​ທີ່​ຕ້ອງ­ການ ເຊື່ອງ­ອຳ​ຄວາມ​ຜິດ­ພາດ​ຕົນ ທ່ານ​ນາ­ຍົກ​ບອກ​ກັບ​ນັກ​ໜັງ­ສື­ພິມ​ວ່າ: ສິ່ງ​ທີ່ທ່ານຕ້ອງ­ການ​ຈາກ​ນັກ​ໜັງ­ສື­ພິມ ກໍ່​ຄືການ​ລາຍ​ງານຂ່າວ​ທີ່​ຖືກ­ຕ້ອງ ແລະ ຕ້ອງ­ການ​ເຫັນ​ບົດ­ບາດ​ອັນພົ້ນ​ດັ່ນ​ຂອງ​ວົງການ​ສື່.

ທ່ານ​ກ່າວ​ຕື່ມ​ວ່າ: ນັກ​ໜັງ­ສື­ພິມ​ຕ້ອງ​ມີ​ຄວາມກ້າ­ຫານ​ແກ້­ຄວາມ​ຜິດ­ພາດ​ຂອງ​ຕົນ ເມື່ອ​ໄດ້​ລາຍງານ​ຂ່າວ​ທີ່​ຜິດ­ພາດ ​ບໍ່​ມີຄວາມ​ຈິງ​ແລ້ວ ກຳ­ປູ­ເຈຍ ມີ​ສະ­ຖາ­ນີ​ໂທລະ­ພາບ 22 ແຫ່ງ ມີ​ໜັງ­ສື­ພິມ ວາລະ​ສານ ແລະ ໃບ​ຂ່າວ 812 ສະ­ບັບ ມີ​ເວັບ​ໄຊຂ່າວ 72 ຫົວ­ໜ່ວຍ ແລະ ມີ​ສະ­ຖາ­ນີ​ວິ­ທະ­ຍຸ​ນ້ອຍ-ໃຫຍ່ ທັງ​ໝົດ 334 ແຫ່ງ.

ຂ່າວທີ່ກ່ຽວຂ້ອງ