ຮູ້ພາສາລາວ ມື້ລະຄຳ : ຄຳ​ສຳ­ນວນ - ເສຍ​ຫົວ / ຫົວ​ເສຍ

602 19 ມ.ກ. 2017 ຫົວຂໍ້ຂ່າວອື່ນໆ

ເສຍ​ຫົວ / ຫົວ​ເສຍ ຄຳ​ກິ­ລິ­ຍາ ຄຳ​ປະ­ສົມ ແປ​ວ່າ ເສຍ­ທ່າ, ເສຍ​ກົນ, ພາດ​ພັ້ງໄປ, ຮູ້​ບໍ່​ທັນ​ຫຼ່ຽມ​ເຂົາ, ຖືກ​ຫັກລຳ... ຈຶ່ງ​ພົບເຫັນ​ໃຊ້​ກ່ຽວ​ກັບ​ສະ­ຕິ​ປັນ­ຍາ, ຄວາມ​ສະ­ຫຼາດ​ຫຼັກ­ແຫຼມ​ທີ່​ບໍ່ທັນ​ຜູ້​ອື່ນ​ທີ່​ມາ​ຫຼອກ​ລວງ​ຕົນ…

ຕົວ­ຢ່າງ:

- ໝໍ​ນີ້​ຫຼິ້ນ​ການ​ພະ­ນັນ​ຫຼາຍ ຈົນ​ເປັນ​ຄົນ​ເສຍ​ຫົວ !

- ເຂົາ​ມາ​ຫຼອກ​ຂາຍ­ຂອງ​ໃຫ້ ຟ້າວ​ຢາກ​ໄດ້​ຫຼາຍຈຶ່ງ​ຖືກ​ຂອງ​ປອມ ​ເລີຍ​ຫົວ​ເສຍ​ຊ້ຳ!

- ຍ້ອນ​ປະ­ໝາດ​ ເລີຍ​ເສຍ​ຫົວ​ໃຫ້​ເດັກ­ນ້ອຍ

- ຄຶກ​ຢາກ​ເປັນ​ໃຫຍ່​ຫຼາຍ​ເລີຍ​ເສຍ​ຫົວ, ຫົວ​ເສຍ​ຊ້ຳ

ໃນ​ທາງ​ພາ­ສາ​ສາດ ເສຍ​ຫົວ / ຫົວ​ເສຍ ເປັນ​ຄຳ​ສຳ­ນວນ​ທີ່ເກີດ​ຈາກ​ການ​ສັງ­ເກດ​ຂອງ​ຄົນ​ບູ­ຮານ ເພາະ­ວ່າ ຄົນ​ເສຍ​ຫົວ ຫຼື ຄົນຫົວ​ເສຍ​ ແມ່ນ​ມີ​ລັກ­ສະ­ນະ​ເຫງົາ​ຫງອຍ, ເສຍ​ໃຈ ບາງ­ເທື່ອຖ້າ​ຄວບ​ຄຸມ​ອາ­ລົມ​ບໍ່​ໄດ້​ອາດ​ຈະ​ຮ້າຍ, ດ່າ ແລະ ເວົ້າ​ທົ່ວ­ທີບ​ທົ່ວແດນ ຍ້ອນ​ບໍ່​ໄດ້​ຕາມ​ທີ່​ຕັ້ງ­ໃຈ​ຢ່າງ​ສູງ​ໄດ້. ຄຳ​ສຳ­ນວນ​ແມ່ນ​ຄຳທີ່​ບໍ່​ມີ​ຄວາມ​ໝາຍ​ຕາມ​ຕົວ​ອັກ­ສອນ ຈຶ່ງ​ມີຄວາມ​ໝາຍ​ເລິກ­ເຊິ່ງ.

ຂ່າວທີ່ກ່ຽວຂ້ອງ