ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ອິນ​ໂດ​ເນ​ເຊຍ ຝຣັ່ງ

414 18 ມ.ກ. 2017 ຫົວຂໍ້ຂ່າວອື່ນໆ

ມື້­ນີ້​ຂໍ​ເລີ່ມ​ຕົ້ນ​ດ້ວຍ​ເລື່ອງ​ການ​ແຫ່​ປະ­ຈານ​ຄົນຂີ້­ລັກ​ຢູ່​ເກາະ​ແຫ່ງ​ໜຶ່ງ​ ໃນ​ປະ­ເທດ​ອິນ​ໂດ​ເນ​ເຊຍ ແລະ ເລື່ອງ ​ຝຣັ່ງ ​ຢຸດ​ຊື້ນັກ­ກີ­ລາ​ຕ່າງ­ປະ­ເທດ​ເຂົ້າທີມ​ຣັກ​ບີ​ແຫ່ງ​ຊາດ.

ທີ່ ອິນ​ໂດ​ເນ​ເຊຍ: ໜັງ­ສື­ພິມ​ເດິ​ເນ​ເຊິນ (The nation) ສະ­ບັບ​ທ້າຍ​ເດືອນ​ທັນ­ວາ​ປີ­ຜ່ານ­ມາ​ໃຫ້​ຮູ້ວ່າ ການ​ແຫ່​ປະ­ຈານເພື່ອ​ໃຫ້​ຜູ້​ມີ​ໂທດ​ລັກ​ຂອງ​ຄົນອື່ນ​ລະ­ອາຍ​ຂາຍ­ໜ້າ​ຍັງ​ປະ­ຕິ­ບັດ​ຢູ່​ເກາະ​ກີ​ລີ (Gili isles) ທາງ​ທິດ­ຕາ­ເວັນ­ອອກ​ຂອງ​ເກາະບາ​ຫຼີ ແຫຼ່ງທ່ອງ​ທ່ຽວ​ບັນ­ລື​ໂລກ​ແຫ່ງ​ໜຶ່ງ​ຂອງ​ອິນ​ໂດ​ເນ​ເຊຍ ເລື່ອງ​ມີ​ຢູ່​ວ່າ ນັກ​ທ່ອງ​ທ່ຽວ​ອົດ​ສະ​ຕຣາ​ລີ ສອງ​ຄົນ ໄດ້​ເກີດພະ­ຍາດ​ມື​ໄວ​ໃຈ​ກ້າ ​ລັກ​ລົດ­ຖີບ​ຢູ່​ໂຮງ­ແຮມບ່ອນ​ພວກ​ຕົນ​ພັກ ຂ່າວ​ບໍ່​ໄດ້​ບອກ​ວ່າ​ລັກ​ເພື່ອ​ຂີ່ເລາະ​ທ່ຽວ ຫຼື ເອົາ​ໄປ​ຂາຍ​ຕໍ່ ແຕ່​ໂຊກ​ບໍ່​ເຂົ້າ​ຂ້າງ “ຕາ​ສະ­ຫວັນ” (ກ້ອງ​ວົງ​ຈອນ​ປິດ) ຈັບ​ໄດ້ ກໍ່​ເລີຍເປັນ​ເລື່ອງ​ໃຫຍ່ ທັງ​ສອງ​ຖືກ​ເຈົ້າ​ໜ້າ­ທີ່​ສອບ​ສວນຫາ​ຄວາມ​ຈິງ ແລະ ພົບ​ວ່າ ​ທັງ​ສອງ​ໄດ້​ມີ​ເຈ­ຕະ­ນາລັກ​ລົດ­ຖີບ​ຄັນ​ດັ່ງ­ກ່າວ​ແທ້ ຈາກ​ນັ້ນ ກໍ່​ໄດ້​ຈັດ​ໃຫ້ມີ​ລາຍ­ການ​ແຫ່​ປະ­ຈານ​ຄົນ​ຂີ້­ລັກ​ທັງ​ສອງ​ຕາມເສັ້ນ­ທາງ​ອ້ອມ​ດອນ ຜ່ານ​ໜ້າ​ຊຸມ​ຊົນ ເພື່ອ​ໃຫ້​ທັງສອງ​ຫຼາບ​ຈື່​ ບໍ່​ດື້​ລັກ​ອີກ​ຄື­ເກົ່າ ຫ້ອຍ​ຢູ່​ຄໍ​ໂຈນ​ລົດຖີບ​ມີ​ປ້າຍ​ໂຕ​ໜັງ­ສື​ເປີ້​ເຈີ້​ອ່ານ​ວ່າ “ເຮົາ​ແມ່ນໂຈນ... ຂໍ​ຢ່າ​ເອົາ​ແບບ­ຢ່າງ​ຂອງ​ເຮົາ​ເນີ້” ພາຍ­ຫຼັງສຳ­ເລັດ​ການ​ແຫ່ປະ­ຈານ​ໃຫ້​ລະ­ອາຍ (Walk of shame) ແລ້ວທັງ​ສອງ​ກໍ່​ຖືກ​ເນ­ລະ­ເທດ​ອອກຈາກ​ເກາະ​ລີ​ສອດ​ແຫ່ງ​ນັ້ນ ທ້າວ ໂມ​ຮາ​ມັດ ຕາວ ຟິກ (Mohamad Taufik) ນາຍ­ບ້ານ​ບ່ອນ​ຄະ­ດີ​ນີ້ເກີດ​ຂຶ້ນ​ກ່າວ​ວ່າ ການ​ແຫ່​ປະ­ຈານ​ຄົນ​ຂີ້­ລັກ​ນີ້​ເປັນປະ­ເພ­ນີຂອງ​ບ້ານ​ມາ​ແຕ່­ໃດໆ​ມາ ສ່ວນ​ການ​ລົງໂທດ​ແບບ​ອື່ນ​ເປັນ​ເລື່ອງ​ຂອງ​ເຈົ້າ​ໜ້າ­ທີ່​ຕຳ­ຫຼວດ ນັກ​ທ່ອງ​ທ່ຽວ​ອົດ​ສະ​ຕຣາ​ລີ​ທັງ​ສອງ ເປັນ​ຊາວ​ຕ່າງປະ­ເທດ​ຜູ້​ທຳ​ອິດ​ທີ່​ຖືກ​ແຫ່​ປະ­ຈານ ຜ່ານ​ມາ​ເຄີຍ​ມີແຕ່​ຄົນ​ອິນ​ໂດ​ເນ​ເຊຍ​ເອງ ເຫດ­ການ​ນີ້​ຄວນ​ຖື​ເປັນບົດ­ຮຽນ​ສຳ­ລັບ​ຄົນ​ລາວ​ທີ່​ໄປ​ທ່ຽວ​ຕ່າງ­ປະ­ເທດ ເພາະ​ໃນ​ແຕ່​ລະ​ບ່ອນ​ນັ້ນ​ອາດ​ມີ​ວິ­ທີ​ການ​ລົງ­ໂທດແຕກ​ຕ່າງ​ກັນ ກ່ອນ​ໄປໄສ​ມາ​ໄສ​ຄວນ​ສຶກ​ສາ​ເລື່ອງລະ­ບຽບ​ກົດ­ໝາຍ​ເພື່ອ​ໃຫ້​ຮູ້​ວ່າ ​ອັນ​ໃດ​ເຮັດ ​ໄດ້ອັນ​ໃດ​ຕ້ອງ​ຫ້າມ.

ທີ່ ຝຣັ່ງ: ອີງ​ຕາມ​ຂ່າວ​ຕ່າງ­ປະ­ເທດ​ໃນວັນ​ທີ 22 ເດືອນ​ທັນ­ວາ ປີ 2016 ພວກ​ເຮົາ​ຮູ້​ວ່າ ນັບ​ແຕ່​ນີ້​ຕໍ່​ໄປ​ທີມ​ກີ­ລາ​ຣັກ​ບີ​ແຫ່ງຊາດ​ຝຣັ່ງ ຈະ​ຢຸດຊື້​ນັກ­ກີ­ລາ​ຈາກ​ຕ່າງ­ປະ­ເທດ​ເຂົ້າ​ທີມ​ເດັດ­ຂາດ ຄຳ​ປະ­ກາດ​ນີ້​ອອກ​ມາ​ຈາກ​ປາກ​ທ່ານ ແບກ​ນາ ລາປອກ (Bernard Laporte) ເວ­ລາ​ພົບ​ປະ​ເຈລະ​ຈາ​ກັບ​ທ່ານ ບິນ​ ໂບ​ມົງ (Bill Beaumont) ປະທານ​ກີ­ລາ​ຣັກ​ບີໂລກ ການ​ຢຸດ​ຊື້​ນັກ­ກີ­ລາ​ຣັກ​ບີ​ທີ່ເປັນ​ຄົນ​ຊາດ​ອື່ນ​ນັ້ນ ແມ່ນ​ປະ­ຕິ­ບັດ​ຕາມ​ຫາງ​ສຽງເຫັນ​ດີ​ຂອງ​ສັງ­ຄົມ ແລະ ຊາວ​ໜຸ່ມ​ຝຣັ່ງ ​ທີ່ຕ້ອງການ​ໃຫ້​ຄົນ​ຊາດ​ຝຣັ່ງ​ເອງ​ເປັນ​ເຈົ້າ​ສະ­ໜາມ​ຣັກ​ບີ ຂ່າວ​ໃຫ້​ຮູ້​ຕື່ມ​ວ່າ ຜ່ານ​ມາ​ຝຣັ່ງ​ເຄີຍ​ຊື່​ໂຕ​ນັກ­ກີ­ລາຣັກ​ບີ​ເດັ່ນໆຈາກ​ບັນ­ດາ​ປະ­ເທດ​ໝູ່​ເກາະ​ອາ­ຊີ​ປາຊີ​ຟິກ ເຊັ່ນ: ຈາກ​ຟິ​ຈິ ຊາ​ມົວ ແລະ ຕົງ​ກາ ທີ່​ສະແຫວງ​ຫາ​ລາຍ​ໄດ້​ຈາກ​ການ​ເຂົ້າຮ່ວມ​ທີມ​ບັນ­ດາປະ­ເທດ​ຮັ່ງ­ມີ ແນວ­ໃດ​ກໍ່​ດີ ສ່ວນ​ນັກ­ກີ­ລາ​ຣັກ​ບີ​ສັນຊາດ​ອື່ນ​ທີ່​ຮ່ວມ​ທີມ​ຢູ່​ແລ້ວ (ຈາກ​ນິວ​ຊີ​ແລນ 1 ຄົນ ອາ​ຟຣິ​ກາ​ໃຕ້ 1 ຄົນ ແລະ ສອງ​ຄົນ​ຈາກ​ຟິ​ຈິ) ຈະສາ­ມາດ​ສືບ­ຕໍ່​ຮ່ວມ​ທີມ​ຊາດ​ຝຣັ່ງ​ຕໍ່​ໄປ​ໄດ້.

ຂ່າວທີ່ກ່ຽວຂ້ອງ