ຂ່າວຫຼ້າສຸດ

ຮູ້ພາສາລາວ ມື້ລະຄຳ : ປາກ​ພົ້ນ​ໂຕ ຫົວ​ພົ້ນ​ເພິ່ນ

521 13 ມ.ກ. 2017 ຫົວຂໍ້ຂ່າວອື່ນໆ

ປາກ​ພົ້ນ​ໂຕ ຫົວ​ພົ້ນ​ເພິ່ນ ເປັນ​ສຳ­ນວນ​ສຸ­ພາ­ສິດ​ເກົ່າ​ຂອງ​ລາວ ທີ່​ຖອດ​ອອກ​ມາ​ຈາກ​ນິ­ທານ​ສຽວ­ສະ­ຫວາດ ຈຶ່ງ​ມີ​ຄວາມ​ໝາຍ​ເລິກ­ເຊິ່ງ ແລະ ໃຫ້​ຂໍ້​ຄິດ​ໄວ້​ຫຼາຍ. ຄວາມ​ໝາຍ​ລວມ​ຂອງ​ສຸ­ພາສິດ​ບົດ​ນີ້​ແມ່ນ ​ການເຕືອນ​ສະ­ຕິ​ໃຫ້​ຄົນ​ຄິດ​ຮອບ​ຄອບ​ເສຍ​ກ່ອນຈະ​ກະ­ທຳ​ສິ່ງ​ໃດ​ລົງ​ໄປ ໂດຍ​ສະ­ເພາະກ່ຽວ​ກັບ​ການ​ປາກ​ເວົ້າ ແລະ ການ​ຫົວ­ຂວັນ ເພາະ­ວ່າ​ຄົນ​ເຮົາ​ຈະ​ດີໄດ້​ກໍ່​ຍ້ອນ​ປາກ, ຈະຊົ່ວ​ກໍ່​ຍ້ອນ​ປາກ​ ທີ່​ພາ­ໃຫ້​ເວົ້າ​ຖືກ​ໃຈ ຫຼື ຜິດ​ໃຈ​ທັງ​ໂຕ ແລະ ຜູ້​ອື່ນໄດ້. ເວ­ລາ​ຫົວ​ກໍ່​ຫົວ­ຂວັນ​ດັງຈົນ​ສຽງ​ດັງ​ກາຍ​ຜູ້​ອື່ນ​ໃນ​ຝູງ​ດຽວ​ກັນ ຈຶ່ງ​ຖື​ເປັນ​ການ​ເສຍ​ມາ​ລະຍາດ ​ແລ້ວ​ກໍ່​ບໍ່​ມີ​ໃຜ​ນັບ­ຖື​ໂຕ​ເອງ.             

ຕົວ­ຢ່າງ:

ຄົນ​ໃດ​ປາກ​ເວົ້າ              ໂຫວ່ໆໂວ​ເວ

ໂວ­ຍວາຍ​ວາງ​ໂວ­ຫານ      ກ່າງ​ສູງ​ເກີນ​ອ້າງ

ວາງ­ທ່າ​ທາງ​ລະ­ດັບ​ຊັ້ນ     ເຊີງ​ສະ­ຫາວ​ຫັນ​ເກງ

ເປັນ​ນັກ­ເລງ​ປາກ​ໂຜ້        ຈາ​ລື່ນ​ໂຕ​ຫົວ​ລື່ນ​ບ້ານ

                                    ຫຼານ​ຫຼ້າ​ດ່າ​ປະ­ຈານ ແທ້​ໃດ (ທອງ­ຄຳ ອ່ອນ​ມະ­ນີ​ສອນ)

ຄຳ​ສຸ­ພາ­ສິດ​ນີ້​ສາ­ມາດ​ໃຊ້​ໃນ​ຊີ­ວິດ​ປະ­ຈຳ​ວັນ​ໄດ້ ເພື່ອ​ເປັນ​ການເຕືອນ​ສະ­ຕິ​ທາງ​ຈິດ­ໃຈ ແລະ ການ​ປະ­ພຶດ. ຖ້າ​ຜູ້​ໃດ​ຮູ້ ແລະ ປະ­ຕິບັດ​ຫຼັກ​ປັດ​ຊະ​ຍາ​ບູ­ຮານ​ນີ້​ໄດ້ ຈະ​ກາຍ­ເປັນ​ຜູ້​ຈະ­ເລີນ.

ຂ່າວທີ່ກ່ຽວຂ້ອງ