ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສສ ຫວຽດ­ນາມ ອິນ​ໂດ​ເນ​ເຊຍ

440 12 ມ.ກ. 2017 ຫົວຂໍ້ຂ່າວອື່ນໆ

ພົບ​ກັນ​ໃນ​ຄໍ​ລຳ​ປະ­ຈຳ​ວັນ​ນີ້ ມີ​ຂ່າວ​ທາງ​ການ ສສ ຫວຽດ­ນາມ ປັບ​ໃໝ​ໜັງ­ສື­ພິມ​ອອນ​ລາຍ​ສາມ​ສະບັບ ຍ້ອນ​ສະ­ເໜີ​ເນື້ອໃນ​ທີ່​ບໍ່​ສ້າງ­ສັນ ຕໍ່​ໃສ່​ເລື່ອງ ອິນ​ໂດ​ເນ​ເຊຍ ປະ­ກາດ​ໂຈະ​ການ​ຮ່ວມ​ມື​ທາງ​ທະຫານ​ກັບ​ອົດ​ສະ​ຕຣາ​ລີ.

ທີ່ ສສ ຫວຽດ­ນາມ: ຂ່າວ​ຕ່າງ­ປະ­ເທດ​ຈາກ​ໜັງສື​ພິມ​ວຽງ​ຈັນ​ທາມ ສະ­ບັບ​ວັນ​ທີ 6 ເດືອນ​ມັງ­ກອນ ປີ​ນີ້ ​ໃຫ້​ຊາບ​ວ່າ ຄະ­ນະຄຸ້ມ​ຄອງ​ການ​ກະ­ຈາຍ​ຂ່າວຜ່ານ​ສື່​ເອ​ເລັກ​ໂຕຣ​ນິກ ໄດ້​ດຳ­ເນີນ​ມາດ​ຕະ­ການ​ປັບໃໝ​ໜັງ­ສື­ພິມ​ອອນ​ລາຍ​ສາມ​ສະ­ບັບ ຍ້ອນ​ກະ­ຈາຍຂ່າວ​ທີ່​ບໍ່​ສ້າງ­ສັນ ໃນ​ຮູບ​ການ​ໂຄ­ສະ­ນາ​ຊວນ​ເຊື່ອ ກ່ຽວ​ກັບ​ບັນ­ຫາ​ທີ່​ໜ້າ​ອັບ­ອາຍ​ຂອງ​ນັກ­ສະ­ແດງ​ຕະຫຼົກ​ຊື່ ຮົງ​ກວງ​ມິງ.

ທ່ານ ຫງຽວ​ນ ແທງ ເລິມ (Nguyen Thanh Lam) ອຳ­ນວຍ​ການ​ຄະ­ນະ​ຄຸ້ມ​ຄອງ​ການ​ກະ­ຈາຍຂ່າວ​ຜ່ານ​ສື່​ເອ​ເລັກ​ໂຕຣ​ນິກ ໄດ້​ລົງ​ລາຍ​ເຊັນ​ໃສ່​ຄຳສັ່ງ​ປັບ​ໃໝ​ໜັງ­ສື­ພິມ​ອອນ​ລາຍ Kenh 14 Vn and Soha.Vn ຫົວ­ໜ່ວຍ​ລະ 30 ລ້ານ​ດົງ (ເທົ່າ​ກັບ 1.320 ໂດ​ລາ​ສະ­ຫະ­ລັດ) ຍ້ອນ​ຄວາມ​ຜິດຖານ​ໄດ້ລະ­ເມີດ​ລະ­ບຽບ​ການ​ກະ­ຈາຍ​ສື່​ອອນ​ລາຍ ແລະ ໄດ້​ສະ­ເໜີຂ່າວ​ທີ່​ບໍ່​ສອດ­ຄ່ອງ​ກັບ​ຄ່າ​ນິ­ຍົມ ແລະ ປະ­ເພ­ນີ​ຂອງ​ຫວຽດ­ນາມ ສື່​ອອນ​ລາຍ​ເຈົ້າ​ບັນ­ຫາທີ່​ຖືກ​ປັບ​ໃໝ​ຄັ້ງ​ນີ້​ ມີ​ສັນ­ຍາ​ເຊົ່າຈາກ Vccorp JSC.

ອີກ​ຂ່າວ​ໜຶ່ງ​ກ່ຽວ​ກັບ​ຫວຽດ­ນາມ ສະ­ເໜີ​ໂດຍ ວຽງ​ຈັນ​ທາມ ສະ­ບັບ​ວັນ​ທີ 7 ເດືອນ​ມັງ­ກອນ​ປີ​ນີ້ ກໍ່​ຄືການ​ປະ­ກາດ​ໃຫ້​ປີ 2017 ເປັນ​ປີ​ການ​ຈະ­ລາຈອນ​ປອດ​ໄພ ເປົ້າ​ໝາຍ​ຂອງ​ປີ​ເລັ່ງ​ໃສ່​ຫຼຸດ­ຜ່ອນ​ສະພາບ​ແອ​ອັດ​ຂອງ​ການ​ຈະ­ລາ­ຈອນ​ຕາມຖະ­ໜົນ ແລະ ອຸ­ບັດ​ຕິ​ເຫດ​ທີ່​ເກີດ​ຈາກ​ນິ­ໄສ​ຂັບ​ຂີ່​ທີ່​ມີ​ຄວາມສ່ຽງ​ສູງ ໃນ​ພິ­ທີ​ປະ­ກາດ​ໃຫ້​ເປັນ​ປີ​ການ​ຈະ­ລາ­ຈອນປອດ​ໄພນັ້ນ ທ່ານ ເຈືອງ ຮົວ​ບິງ ຮອງ​ນາ­ຍົກ​ລັດຖະ​ມົນ­ຕີ ທັງ​ເປັນ​ປະ­ທານ​ຄະ­ນະ​ກຳ­ມະ­ການ​ເພື່ອຄວາມ​ປອດ​ໄພ​ຂອງ​ການ​ຈະ­ລາ­ຈອນ ຊີ້​ໃຫ້​ເຫັນ​ວ່າ ພາຍ​ໃຕ້​ການ​ຊີ້​ນຳ​ຂອງ​ພັກ ແລະ ຄວາມ​ພະ­ຍາຍາມ​ຮ່ວມ​ກັນ​ຂອງ​ຫຼາຍ​ພາກ­ສ່ວນ ໃນ​ໄລ­ຍະ​ແຕ່​ປີ 2011 ຫາ​ປີ 2016 ຈຳ­ນວນ​ອຸ­ບັດ​ຕິ​ເຫດ ຈຳ­ນວນ​ຜູ້ເສຍ​ຊີ­ວິດ ແລະ ບາດ­ເຈັບ​ຈາກ​ອຸ­ບັດ​ຕິ​ເຫດ​ທາງ​ຖະໜົນ​ ໄດ້​ຫຼຸດລົງ​ເປັນ​ຈຳ­ນວນ​ຫຼວງ­ຫຼາຍ ບັນ­ຫາ​ການຈະ­ລາ­ຈອນ​ແອ​ອັດ​ຢູ່​ນະ­ຄອນ­ຫຼວງ​ຮ່າ​ໂນ້ຍ ແລະ ນະ­ຄອນ​ໂຮ່​ຈີ​ມິງ ໄດ້​ຄ່ອຍໆ​ດີຂຶ້ນ​ໃນ​ລະ­ດັບ​ໜ້າ​ຊື່ນຊົມ.

ທີ່ ອິນ​ໂດ​ເນ​ເຊຍ: ໃນ​ຕົ້ນ​ເດືອນ​ທັນ­ວາ​ນີ້ ຂ່າວຕ່າງ­ປະ­ເທດຈາກ​ອິນ​ໂດ​ເນ​ເຊຍ ໃຫ້​ຊາບ​ວ່າ ທາງ​ການ​ປະ­ເທດ​ນີ້​ໄດ້​ປະ­ກາດ​ໂຈະ​ບໍ່​ມີ​ກຳ­ນົດ  ການ​ຮ່ວມ​ມື​ທາງ​ການ​ທະ­ຫານ​ກັບ​ປະ­ເທດ​ອົດ​ສະຕຣາ​ລີ ຍ້ອນ​ການ​ກະ­ທຳ​ທີ່​ເປັນ​ການ​ໝິ່ນ­ປະ­ໝາດຂອງ​ອົດ​ສະ​ຕຣາ​ລີ ຕໍ່​ຫຼັກ​ແຫຼ່ງ​ອຸ­ດົມ​ການ​ຂອງ​ອິນໂດ​ເນ​ເຊຍ.

ທ່ານ ພັນ​ຕີ ວູ​ຣຽນ​ໂຕ (Wuryanto) ໂຄ­ສົກກອງ­ທັບ​ອິນ​ໂດ​ເນ​ເຊຍ ບໍ່​ໄດ້​ໃຫ້​ລາຍ​ລະ­ອຽດ​ຈະແຈ້ງ​ກ່ຽວ​ກັບ​ການ​ຕັດ­ສິນໃຈ​ຂອງ​ຝ່າຍ​ອິນ​ໂດ​ເນເຊຍ ພຽງ​ແຕ່​ບອກ​ລວມ​ວ່າ ມີ​ຫຼາຍ​ປັດ​ໄຈ ແລະ ໜຶ່ງ​ໃນ​ນັ້ນ​ກໍ່​ຄື ຂໍ້­ຄວາມ​ໝິ່ນ­ປະ­ໝາດ​ທີ່​ເຜີຍ­ແຜ່ໃນກອງ​ກຳ­ລັງ​ພິ­ເສດ​ຂອງ​ອົດ​ສະ​ຕຣາ​ລີ.

ທ່ານ ມາ​ຣິ ເພນ (Marise Payne) ລັດ​ຖະ​ມົນຕີ​ປ້ອງ​ກັນ​ປະ­ເທດ​ອົດ​ສະ​ຕຣາ​ລີ ມີ​ຄຳ​ເຫັນ​ກ່ຽວ​ກັບບັນ­ຫາ​ນີ້​ວ່າ ການຮ່ວມ​ມື​ກັນ​ບາງ​ຢ່າງ​ລະ­ຫວ່າງສອງ​ປະ­ເທດ​ມີ​ກຳ­ນົດ​ເລື່ອນ​ອອກ​ໄປ​ຈົນ​ກວ່າ​ບັນຫາ​ຈະ​ຖືກ​ແກ້​ໄຂ ແຕ່​ການ​ຮ່ວມ​ມື​ໃນຂະ­ແໜງ­ການອື່ນໆ​ນັ້ນ​ຍັງ​ສືບ­ຕໍ່.

ສ່ວນ​ສື່​ມວນ​ຊົນ​ຂອງ​ອິນ​ໂດ​ເນ​ເຊຍນັ້ນ ໄດ້​ໃຫ້ລາຍ​ລະ­ອຽດ​ກ່ຽວ​ກັບ​ຂໍ້­ຄວາມ​ໝິ່ນ­ປະ­ໝາດ​ຂອງອົດ​ສະ​ຕຣາ​ລີ​ວ່າ ໜັງ­ສື­ພິມ​ກອງ​ກຳ­ລັງ​ພິ­ເສດ​ຂອງອົດ​ສະ​ຕຣາ​ລີ ໄດ້​ຕີ​ຄວາມ​ໝາຍ​ຄຳ​ວ່າ “ປັນ­ຈະ​ສີລາ” ທີ່​ເປັນ​ຫຼັກ​ອຸ­ດົມ​ການ​ຂອງ​ລັດ​ອິນ​ໂດ​ເນເຊຍ ບໍ່​ຕົງ​ກັບ​ຄວາມ​ເປັນ​ຈິງ ໂດຍ​ແປ​ຜິດ​ຜ້ຽນ​ວ່າ ເປັນຫຼັກ­ການ​ທີ່​ເລືອນ​ລາງ​ໃນ​ຄວາມ​ເຊື່ອ​ຕໍ່​ພະ​ເຈົ້າ​ອົງດຽວ ແລະ ຄວາມ​ເປັນ​ເອ­ກະ​ພາບ​ຂອງ​ຊາວ​ອິນ​ໂດເນ​ເຊຍ ຈຳ­ນວນ 250 ລ້ານ​ຄົນ.

ສຳ­ລັບ​ຄົນ​ລາວ​ເຮົາ​ແລ້ວ​ໃຜໆ​ກໍ່​ເຂົ້າ­ໃຈ​ດີ​ວ່າ “ປັນ­ຈະ​ສີ​ລາ” ແມ່ນ​ຫຼັກ 5 ປະ­ການ ເພື່ອ​ຢູ່​ຮ່ວມກັນ​ຢ່າງ​ສັນ­ຕິ  ຊຶ່ງ​ໄດ້​ກາຍ­ເປັນ​ເຂັມ­ທິດ​ຂອງ​ອາ​ຊຽນພວກ​ເຮົາ.

ຂ່າວທີ່ກ່ຽວຂ້ອງ