ຂ່າວຫຼ້າສຸດ

ຮູ້ພາສາລາວ ມື້ລະຄຳ : ຊິ​ຕີ​ໝາ ໃຫ້​ຫຼິງ​ດູ​ເຈົ້າ

449 12 ມ.ກ. 2017 ຫົວຂໍ້ຂ່າວອື່ນໆ

ຊິ​ຕີ​ໝາ ໃຫ້​ຫຼິງ​ດູ​ເຈົ້າ ເປັນ​ຄຳ​ສຸ­ພາ­ສິດ​ເກົ່າ​ຂອງ​ລາວ​ທີ່​ຖອດ​ອອກ​ມາ​ຈາກ​ນິ­ທານ​ສຽວ­ສະ­ຫວາດ ຈຶ່ງ​ມີ​ຄວາມ​ໝາຍ​ເລິກ​ເຊິງ ແລະ ໃຫ້​ຂໍ້​ຄິດ​ໄວ້​ຫຼາຍ. ຄວາມ​ໝາຍ​ລວມ​ຂອງ​ສຸ­ພາ­ສິດບົດ​ນີ້​ ແມ່ນ​ການ​ເຕືອນ​ສະ­ຕິ​ໃຫ້ຄົນ​ຄິດ​ຮອບ​ຄອບ​ເສຍກ່ອນ​ຈະ​ກະ­ທຳ​ສິ່ງ​ໃດ​ລົງ​ໄປ, ແມ່ນ​ແຕ່​ໝາ ກໍ​ບໍ່​ຄວນ​ຖື​ວ່າ​ເປັນ​ສັດ​ຕ່ຳ​ຕ້ອຍ ​ຊິ​ໄລ່ ຊິ​ຕີ ຊິ​ຂ້າ​ມັນ​ ກໍ​ຕ້ອງ​ເບິ່ງ​ໃຫ້​ດີ ເພາະ­ວ່າບາງ­ເທື່ອ​ໝາ​ນັ້ນ​ຍັງ​ມີ​ເຈົ້າ​ຂອງ​ເຂົາ​ເຝົ້າ​ດູ​ແລ​ເບິ່ງ​ຢູ່​ກໍ່​ມີ. ດ້ານ​ຄວາມ​ໝາຍ​ແມ່ນ​ໃຫ້​ຄຽງ​ກັບ​ສຸ­ພາ­ສິດ​ທີ່​ວ່າ ຕີ​ຫົວ​ປາ​ສະເນື່ອນ​ຫົວ​ນາກ ຄື​ເປັນ​ການ​ສັ່ງ­ສອນ​ໃຫ້​ຮູ້­ຈັກ​ເຄົາ­ລົບ​ນັບ­ຖື​ສິດ​ຄົນ​ອື່ນ.

ຕົວ­ຢ່າງ :

- ຄັນ­ວ່າ​ບໍ່​ຄິດ​ຖີ່​ຖ້ວນ        ຊວນ​ໝູ່​ຕີ​ໝາ

ມ້ອຍ​ມັບ​ມໍ­ລະ­ນາ​ຊັກ       ສະ­ເດີດ​ຕາຍ​ຫງາຍ​ແງ້ນ

ຫາກ​ເຈົ້າ​ຂອງ​ເຂົາ​ແຄ້ນ    ເຄື່ອງ​ແຄນ​ຄຽດ​ດ່າ

ຫາ​ປືນ​ມາ​ປ່ອນ​ໂປ້ງ         ກະ­ໂບງ­ຫົວ​ແຕກ​ເຕັ້ນ

ຊິ​ເປັນ​ເປົ້າ​ປ່ອງ​ກະ​ສູນ ແທ້­ແລ້ວ (ທອງ­ຄຳ ອ່ອນ​ມະ­ນີ​ສອນ)

ຄຳ​ສຸ­ພາ­ສິດ​ນີ້ ສາ­ມາດ​ໃຊ້​ໃນ​ຊີ­ວິດ​ປະ­ຈຳ​ວັນ​ໄດ້ ເພື່ອ​ເປັນ​ການເຕືອນ​ສະ­ຕິ​ທາງ​ຈິດ­ໃຈ ແລະ ການ​ປະ­ພຶດ. ຖ້າ​ຜູ້​ໃດ​ຮູ້ ແລະ ປະ­ຕິ­ບັດຫຼັກ​ປັດ​ຊະ​ຍາ​ບູ­ຮານ​ນີ້​ໄດ້​ ຈະ​ກາຍ­ເປັນ​ຜູ້​ຈະ­ເລີນ.

ຂ່າວທີ່ກ່ຽວຂ້ອງ