ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສສ ຫວຽດ­ນາມ ມຽນ​ມາ

390 09 ມ.ກ. 2017 ຫົວຂໍ້ຂ່າວອື່ນໆ

ຂໍ​ເລີ່ມ​ບົດ​ດ້ວຍ​ການ​ທັກ​ທາຍ​ສະ­ບາຍ­ດີ​ທ່ານຜູ້​ອ່ານ​ທີ່​ເປັນ​ເພື່ອນ​ແຟນໆຄໍ​ລຳ “ເບິ່ງ​ບ້ານ​ເຂົາ ເອົາ​ບົດ­ຮຽນ” ຄໍ​ລຳ​ນີ້ ເບິ່ງທັງ​ບົດ­ຮຽນ​ທີ່​ດີ ທີ່​ອາດໝູນ​ໃຊ້​ໄດ້ ແລະ ທັງ​ບົດ­ຮຽນແນວ​ບໍ່​ດີ​ເພື່ອ​ຫຼີກເວັ້ນ​ບໍ່​ຊ້ຳ​ຮອຍ​ບ້ານ​ເຂົາ ສຳ­ລັບ​ວັນ​ນີ້ ມີ​ເລື່ອງ​ທາງການ​ນະ­ຄອນ​ໂຮ່​ຈີ​ມິງ ສສ ຫວຽດ­ນາມ ຈັດ​ສັນ ແລະ ຍ້າຍ​ບັນ­ດາໂຮງ​ຈັກໂຮງ­ງານຈາກ​ບ່ອນ​ທີ່​ບໍ່​ກຳ­ນົດ​ໃຫ້​ຕັ້ງ​ໂຮງງານ ແລະ ເລື່ອງ​ມຽນ​ມາ ວາງ​ແຜນ​ໂຄງ­ການຕ້ານ​ການ​ຄ້າ​ມະ­ນຸດ.

ທີ່ ສສ ຫວຽດ­ນາມ: ຂ່າວ​ຕ່າງ­ປະ­ເທດຈາກ​ໜ້າໜັງ­ສື­ພິມ​ວຽງ​ຈັນ​ທາມ (Vientiane Times) ສະບັບ​ແຮກ​ໝານ​ປີ 2017 ໃຫ້​ຮູ້​ວ່າ ທາງ​ນະ­ຄອນ​ໂຮ່ຈີ​ມິງ ສສ ຫວຽດ­ນາມ ມີ​ແຜນ​ຍົກ­ຍ້າຍ​ໂຮງ­ງານຜະ­ລິດ​ກວ່າ 10.000 ຫົວ­ໜ່ວຍ ອອກ​ຈາກ​ໂຕນະຄອນ ໄປ​ເຂດ​ອຸດ­ສາ­ຫະ­ກຳ ການ​ຍົກ­ຍ້າຍ​ບັນ­ດາໂຮງ­ງານ​ອອກ​ເຂດ​ນອກ​ນະ­ຄອນ​ຄັ້ງ​ນີ້ ແມ່ນ​ປະ­ຕິບັດ​ຕາມ​ແຜນ​ຈັດສັນ​ເຂດ​ຕົວ​ເມືອງ​ໃໝ່ ແຕ່​ປີ 2016 ເຖິງ 2020 ໂຮງ­ງານ​ທີ່​ເປັນ​ເປົ້າ​ໝາຍ​ຍົກຍ້າຍ​ນີ້​ເກືອບ​ທັງ​ໝົດ​ເປັນ​ໂຮງ­ງານ​ຂະ­ໜາດ​ກາງ ແລະ ຂະ­ໜາດ​ນ້ອຍ ທີ່​ຕັ້ງ​ຢູ່​ເຂດ​ແອ​ອັດ ມີ​ຕົ້ນ​ທຶນຈຳ­ກັດ​ສຳ­ລັບ​ດຳ­ເນີນ​ທຸ­ລະ​ກິດ ແລະ ບໍ່​ສາ­ມາດປົກ​ປັກ​ຮັກ­ສາສິ່ງ­ແວ­ດລ້ອມ​ໄດ້​ຕາມ​ມາດ­ຕະ­ຖານ ໂຮງ­ງານ​ເຫຼົ່າ​ນີ້​ຕັ້ງ​ຢູ່​ເຂດ​ທີ່­ຢູ່​ອາ­ໄສ​ຂອງ​ຊຸມ​ຊົນ ​ນຳໃຊ້​ເຕັກ​ໂນ​ໂລ​ຊີ ແລະ ເຄື່ອງ­ມືຫຼ້າ​ສະ­ໄໝ ຂາດ​ງົບປະ­ມານ​ເພື່ອ​ກຳ­ຈັດ​ຂີ້​ເຫຍື້ອ​ຈາກ​ໂຮງ­ງານ ແລະ ອີກ​ໂຮງ­ງານ​ຈຳ­ນວນ​ໜຶ່ງ​ຍັງ​ມີ​ບັນ­ຫາ​ສ່ຽງ​ທີ່​ຈະ​ກໍ່ໃຫ້​ເກີດ​ອັກ­ຄີ​ໄພ ນອກ­ຈາກ​ນັ້ນ ໂຮງ­ງານ​ເຫຼົ່າ​ນີ້​ຍັງສົ່ງ​ຜົນ​ກະ­ທົບ​ທາງ​ລົບ​ຕໍ່​ຊີ­ວິດ​ຂອງ​ຜູ້​ອາ­ໄສ​ຢູ່​ຕາມ​ບໍລິ​ເວນ​ໃກ້​ຄຽງ ແລະ ຍາກ​ທີ່​ທາງ​ການ​ຈະ​ສາ­ມາດຄຸ້ມ​ຄອງ​ໄດ້.

ສຳ­ລັບໂຮງ­ງານ​ໃນ​ຂະ­ແໜງ​ຜະ­ລິດ​ເຄື່ອງ​ກໍ່­ສ້າງ​ຕັດ­ຫຍິບຍ້ອມ​ສີ ແລະ ຜະ­ລິດ​ຕະ​ພັນ​ເຄ​ມີ​ນັ້ນ ຈະຖືກ​ຍ້າຍ​ໄປ​ຕັ້ງ​ຢູ່​ເຂດອຸດ­ສາ­ຫະ­ກຳ​ນອກ​ຕົວ​ນະຄອນ ສ່ວນ​ໂຮງ​ຂ້າ​ສັດ​ຂະ­ໜາດ​ນ້ອຍ ຈະ​ຖືກ​ຍົກຍ້າຍ​ໄປ​ໂຮມ​ກຸ່ມ​ກັນ​ຢູ່​ບ່ອນ​ດຽວ.

ທີ່ ມຽນ​ມາ: ຂ່າວ​ຕ່າງ­ປະ­ເທດຈາກ​ມຽນ​ມາ ​ໃນຕົ້ນ​ເດືອນ​ນີ້​ໃຫ້​ຊາບ​ວ່າ ທາງ​ການ​ມຽນ​ມາ ຈະສ້າງ­ຕັ້ງ​ໂຄງ­ການ​ພິ­ເສດ​ໂຄງ­ການ​ໜຶ່ງ ເພື່ອ​ແກ້​ໄຂບັນ­ຫາ​ການ​ຄ້າ​ມະ­ນຸດ ໂດຍ​ແມ່ນ​ກະ­ຊວງ​ພາຍ​ໃນຂອງ​ປະ­ເທດ​ນີ້​ເປັນ​ເຈົ້າ​ການຕິດ­ຕາມ​ຄຸ້ມ​ຄອງ ອີງ​ຕາມ​ຄຳ​ເວົ້າ​ຂອງ​ທ່ານ ພົນ​ໂທ ຈໍ​ສະ​ເວ (Kyawswe) ລັດ­ຖະ­ມົນ­ຕີ​ກະ­ຊວງ​ພາຍ​ໃນ​ມຽນມາ ການ​ສ້າງ­ຕັ້ງ​ໂຄງ­ການ​ນີ້​ມີ​ຂຶ້ນ​ຍ້ອນ​ວ່າ ມີ​ການປ່ຽນ­ແປງ​ຂໍ້​ຈຳ­ກັດ​ໃນ​ການ​ຈັບ​ປາ​ຕາມ​ນ່ານ​ນ້ຳມຽນ​ມາ ຊຶ່ງ​ໄດ້​ອະ­ນຸ­ຍາດ​ໃຫ້​ເຮືອ​ຫາ​ປາ​ຕ່າງ​ປະເທດ​ເຂົ້າ​ໄປ​ເຄື່ອນ​ໄຫວ​ຈັບ​ປາ​ໄດ້ ທາງ​ການ​ມຽນມາ​ເຫັນ​ວ່າ​ມີ​ຄວາມ​ຈຳ­ເປັນ​ຕ້ອງ​ມີ​ໂຄງ­ການ​ພິເສດ ເພື່ອ​ປ້ອງ​ກັນ​ບໍ່ໃຫ້​ມີ​ບັນ­ຫາ​ຄ້າ​ມະ­ນຸດ ທີ່​ຕິດພັນ​ກັບ​ການ​ປະ​ມົງ.

ໃນ​ເດືອນ​ຕຸ­ລາ ປີ 2016 ມຽນ​ມາ ໄດ້​ຈັດ​ກອງປະ­ຊຸມ​ຮ່ວມ​ກັບ​ຄະ­ນະ​ຜູ້​ແທນ​ອິນ​ໂດ​ເນ​ເຊຍ ໄທ ແລະ ກຳ­ປູ­ເຈຍ ເພື່ອປຶກ­ສາ​ຫາ­ລື​ກ່ຽວ​ກັບ​ການຮ່ວມ​ມື​ໃນ​ຂົງ­ເຂດ​ອຸດ­ສາ­ຫະ­ກຳ​ການ​ປະ​ມົງ ແລະ ມາດ​ຕະ­ການ​ດ້ານ​ກົດ­ໝາຍ ຕ້ານ​ການ​ຄ້າ​ມະ­ນຸດ ແລະ ການ​ຂູດ​ຮີດ​ແຮງ​ງານ​ໃນ​ອຸດ­ສາ­ຫະ­ກຳ​ການປະ­ມົງ ແລະ ອຸດ­ສາ­ຫະ­ກຳ​ອື່ນໆ.

ກອງ​ປະ­ຊຸມ​ໄດ້​ຕົກ­ລົງ​ໃຫ້​ມີ​ການ​ຊົດ​ເຊີຍ​ແກ່ຊາວ​ປະ​ໂມງ​ມຽນ​ມາ ຈຳ­ນວນ 8 ຄົນ ທີ່​ຕົກ​ເປັນເຫຍື່ອ​ການ​ຄ້າ​ມະ­ນຸດ​ໃນ​ນ່ານ​ນ້ຳ­ຂອງ​ອິນ​ໂດ​ເນເຊຍ.

ໃນ​ໄລ­ຍະ​ຫຼັງ​ມາ​ນີ້ ບັນ­ຫາ​ການ​ຄ້າ​ມະ­ນຸດ​ໄດ້ເຮັດ​ໃຫ້​ອຸດ­ສາ­ຫະ­ກຳ​ການ​ປະ​ມົງ​ຂອງ​ບາງ​ປະເທດ​ໃນ​ອາ​ຊຽນ ໂດຍ​ສະ­ເພາະແມ່ນ​ຂອງ​ໄທ ເສຍຊື່​ສຽງ ແລະ ຕົກ​ເຂົ້າ​ບັນ­ຊີ​ດຳ​ສຳ­ລັບ​ປະ­ເທດ​ທີ່ເປັນ​ລູກ​ຄ້າ​ເຄື່ອງ​ທະ­ເລ ດັ່ງ­ນັ້ນ ການ​ກຳ­ຈັດ​ບັນ­ຫາການ​ຄ້າ​ມະ­ນຸດ ແລະ ການ​ຂູດ​ຮີດ​ແຮງ​ງານ​ໃນ​ອຸດສາ​ຫະ​ກຳ​ນີ້ ​ຈຶ່ງ​ມີ​ຄວາມ​ຈຳ­ເປັນ​ຕ້ອງ​ໄດ້​ຮ່ວມ​ມື​ກັບຫຼາຍ​ຝ່າຍ.

ຂ່າວທີ່ກ່ຽວຂ້ອງ